Nehemías 13:2 - Biblia Enxet

² (Hakte axta elanyexeykegkok elmok takha' israelitas elsókasek ma'a aptéyak, tén han apyenéyak, apyánmagkassegkek axta aqsa apkeltémo elteméssessamhok exma ekmaso m'a Balaam. Aqsok ektaqmela axta eyke aptemessáseykekxak Dios ma'a aqsok ekmaso apkeltémókxa axta etnéssesek.)

Nehemías 13:2 ပူးပေါင်းရင်းမြစ်များ

Salmos 109:28

Eltamhok sa' eykhe chá'a hetnégwomhok exma ekmaso, méko katnehek, hakte etaqmelchessegkek chá'a exchep. Elmegqágwakxak sa' ma'a apyókxoho nak, keñe sa' ko'o sektáha nak xép apkeláneykha kapayhekxak ewáxok.

Miqueas 6:5

Énxet'ák ahagkok, kaxénwakxoho kélwáxok ma'a aqsok ekxeyenma axta apwáxok elának Balac, wesse' apwányam axta m'a Moab, tén han apchátegmoweykegkokxa axta m'a Balaam, Beor axta apketche. Kaxénwakxoho kélwáxok ma'a kélyeykhaya axta Sitim, kélmaheykegko m'a Guilgal, kaxénwakxoho kélwáxok appasmoma axta apkelmallahanchessama m'a Wesse' egegkok.”

Números 23:18

Tén axta Balaam aplegasa s'e ektéma nak amya'a: “Balac, Sipor apketche, etaqmelchesho sa' apháxenmo sekpeywa.

Deuteronomio 23:3

“Mopwanchek apagko' sa' etnahagkok Wesse' egegkok énxet'ák apagkok ma'a amonitas tén han ma'a moabitas, kawakxohok sa' nahan ma'a apmáheyo nak elántépekxak makham ma'a egmonye';

Deuteronomio 23:4

hakte axta elmeyáseykegkok kéxegke yegmen tén han kéltéyak ma'a kélyeykhágweykmo axta m'a xapop apagkok nak, natámen axta kélánteyapma m'a Egipto; apyánmagkassegkek axta nahan yaqwayam elhak kéxegke aqsok ekmaso m'a Balaam, Beor apketche, apkeñama axta m'a yókxexma Petor Mesopotamia.

Deuteronomio 23:5

Axta eyke yaháxenmók Dios Wesse' kélagkok ma'a Balaam, aptemessáseykekxeyk axta aqsa aqsok éltaqmalma m'a aqsok ekmaso yaqwayam axta eykhe yehekxak kéxegke, hakte apkelásekhayo'.