Nahúm 3:5 - Biblia Enxet

⁵ Aptáhak Wesse' egegkok ekha nak apyennaqte s'e: “Énmexchek ko'o exche': eyxnéssesek sa' néten ekyekma ekweykekxoho nát, yaqwayam sa' elwetak apyókxoho énxet'ák meyke apáwa, yaqwayam sa' elwetak ekyókxoho apheykegkaxa énxet'ák ma'a ekyókxa nak.

Nahúm 3:5 ပူးပေါင်းရင်းမြစ်များ

Jeremías 13:22

Kelmaxneyáha sa' agkok han, yaqsa ektáha, ektáha xa ektáha nak, kéméxcheyk kay'asagkohok eñama ekyawe megkay'assáxma; ¡cháxa keñamak kélhaxyawássesa nak élnaqta tén han kélyennaqtésa kélyempehek kélteméssessekmoho exma!

Jeremías 13:26

Alhaxyawássesagkok sa' ko'óxa kéxegke apyókxoho kélnaqta, yaqwayam sa' kólmegqé' kataxchek yáxña'akxoho kélyókxa'.

Jeremías 50:31

Aptáhak Wesse' ekha apyennaqte s'e: “Apchókxa eyeymáxkoho nak, énmexchek ko'o exche'; wokmek yaqwánxa añássesagkoho'.

Ezequiel 16:37

Wánchásekxak sa' ko'o apyókxoho m'a élpatheteykegko nak chá'a appeykessáseykekxo nak chá'a awáxok, apyókxoho m'a élásekhayókxa nak chá'a tén han ma'a éltaqnagkamakxa nak chá'a; keñe sa' nápaqta'awók axekmósek ma'a ekyókxa yaqwayam sa' elanok meyke apagko' apáwa.

Ezequiel 21:3

Sa' etnehek yának se'e: ‘Keso aptáhakxa exchek appeywa Wesse' egegkok se'e: Sénmexma ko'o ektáhak xép. Alkok sa' ko'o sókwenaqte ahagkok, alnápok sa' ma'a énxet'ák apkelpéwomo nak tén han ma'a melya'assáxma nak.

Ezequiel 23:25

Ayenyenták sa' ko'o seklo takháxet xeye', metaqmelchesek sa' xeye' m'a yetlo aptawáseykegkoho; elyaqténchesek sa' aheyk'ák tén han awéhek, keñe sa' ma'a apkeleymomap nak meletsapma elnápok, sókwenaqte sa' chá'a elyetxeygkok. Elyementók sa' ma'a étchek apkelennay'a tén han ma'a kelwán'ák nak, keñe sa' kawatnaxchek xeye' táxa.

Ezequiel 23:29

Etwasagkohok sa' chá'a yetlo aptaqnagko, apagkok sa' etnehek ma'a aqsok ekwete nak chá'a eñama ekyánmaga ektamheykha, meyke agko' élnaqta sa' eyenyekxa'; yáxña'akxoho sa' keytnekxak ma'a ekyókxa, cham'a ekteméssesseykmoho nak chá'a exma élánéssama m'a ektémakxa ekmaso megkamasexta. Ekmátsa katnegwomhoxma tén han megkamasexta

Ezequiel 26:3

“Cháxa keñamak sektáha nak ko'o sekpeywa s'e sektáha nak Wesse': Énxet'ák Tiro, ekxénchek ko'o sektáha sélenmexma kéxegke. Wának sa' ko'o ektámegmak kéxegke apxámokma apagko' ma'a pók aptémakxa nak chá'a énxet'ák, sa' etnahagkok ma'a ektémól'a kalxegmak élyaqyahayam élyawe m'a wátsam ekwányam.

Miqueas 1:11

¡Énxet'ák kélheykha nak Safir, kólmohok sa' ma'a megkatnahakxa nak kélókxa, meyke apáwa, yetlo ekyawe agko' kélmegqakto! ¡Melántépek sa' ma'a énxet'ák apheykha nak Zaanán! ¡Tekkek kéllekxagweykha m'a Bet-ésel, keñe sa' kéxegke katnehek meyke ekpasmo!

Nahúm 2:13

Aptáhak Wesse' egegkok ekha nak apyennaqte s'e: “Élenmexchek ko'o kéxegke: alwatnések sa' ma'a yátnáxeg apkelyenyawasso kélagkok kélanchesso nak kempakhakma, éten sa' atnessásekxa'; alnáhakkasek sa' méwa étkók kélagkok; alyementemekxak sa' aqsok kélmeñexéyak ekheykegko nak kañe' kélókxa', kamaskok sa' kañexchek apkelpeywa m'a apseykha nak chá'a amya'a kélagkok.”

Habacuc 2:16

Kólmegqáwhok kélagko' sa' yaqwayam eykhe kóltéhek ekha kéláyo, hakte Wesse' egegkok sa' yagkok xama egheykok ma'a senlegassáseykegkoho nak, yaqwayam sa' kataxchek kélyókxa meyke apáwa, aqsok segmegqasso sa' katnekxak ma'a kéleymáxkoho.