Nahúm 1:12 - Biblia Enxet

¹² Cháxa keñamak aptáha nak Wesse' egegkok apkeláneya énxet'ák apagkok se'e: “Apmelyeyha'ak eykhe m'a asirios, apxámok eykhe han, kólmasséssók sa' eyke, kamaskok sa' apkelwetamap. Éllegassáseykegkok axta ko'o kéxegke, mallegássesagkók sa' eyke kaxwo'.

Nahúm 1:12 ပူးပေါင်းရင်းမြစ်များ

2 Reyes 19:35

Apxegkek axta Wesse' egegkok apchásenneykha xa axta'a nak, keñe apkelnáhapwokmo ciento ochenta y cinco mil énxet ma'a apkelpakxeneykegkaxa axta asirios, keñe axta mók ekhem, kelsakak axta, hágkek axta aphopák apyókxoho m'a.

2 Reyes 19:37

Keñe axta xama ekhem, neyseksa apkelpeykessamo aqsok apcháyókxa Nisroc ma'a apkelpeykessamókxa axta chá'a, apkelmeyákxeyk axta han apketchek ma'a, cham'a Adramélec tén han Sarézer, apchaqhegwákxeyk axta han ma'a, tén axta apkelmeyákxo apkelyexánegwákxo m'a yókxexma Ararat. Apyaqmagkassek axta han apteme wesse' apwányam ma'a apketche apwesey axta Esarhadón.

Éxodo 12:12

Cháxa axta'a nak, aweynchamha sa' ko'o m'a ekyókxoho nak kañe' Egipto, alnápok sa' chá'a xama tegma étchek átnaha apketkók ma'a egipcia, tén han ma'a émha amonye' ekwete nak étkók ma'a apnaqtósso. Alyekpexchetagkok sa' nahan ko'o m'a ekyókxoho aqsok kéláyókxa nak chá'a m'a kañe' Egipto. Ko'o sekxeyenma xa, sektáha nak Wesse'.

Isaías 10:16

Cháxa keñamak peya nak etnessásekxak meyke apkelwasqapma Wesse' ekha nak apyennaqte xa énxet'ák élyenneykha agko' nak apyempe'ék, elméxenchessesek sa' apyempe'ék máxa táxa élwatno sa' etnéssesek.

Isaías 17:14

Hegyegwakkasek ma'a taxnám, keñe amonye' élseye kamaskok agweta'. Cháxa yaqwánxa sa' katnehek ma'a énxet'ák apmáheyo nak chá'a hẽlyementók aqsok egagkok. Cháxa yaqwánxa sa' katnehek elmassegwók ma'a énxet'ák, apmáheyo nak chá'a hentawássesha negheykha.

Isaías 30:19

Énxet'ák Sión, kélheykha nak Jerusalén: megkóllekxagwaha sa' kaxwók kéxegke. Kélyósekak sa' elanok kéxegke Dios apleg'a enxoho kélpáxameykha ekyennaqte kólmaxnak yaqwayam epasmok, ketse' aplege sa' katnehek kélpeywa, yohók sa' chá'a yátegmowagkok.

Isaías 31:8

kalnápok sa' sókwenaqte m'a énxet'ák apheykha nak Asiria, háwe sa' eyke énxet yaqwayam elnápok. Kamenxenek sa' kempakhakma m'a énxet'ák apagkok, keñe sa' ma'a wokma'ák kempakhakma yapmeyk nak katnéssesek kélásenneykha naqsa;

Isaías 37:36

Apxegkek axta m'a Wesse' egegkok apchásenneykha, apkelnáhapwokmek axta nahan ciento ochenta y cinco mil énxet ma'a apkelpakxeneykegkaxa axta m'a asirios; keñe axta mók ekhem, kelsakak axta, hágkek axta aphopák apyókxoho m'a.

Isaías 51:22

Aptáhak Dios Wesse' kélagkok se'e ektáha axta apkelmasma m'a énxet'ák apagkok: “Eymentemekxak sa' ko'o kéxegke s'e egheykok élnápeykencha'a nak chá'a kélyeta m'a kañe'; megkólyenekxók sa' chá'a kaxwók ma'a egheykok kélyeta nak seklo.

Isaías 7:20

Yásenneykxak sa' Wesse' egegkok wesse' apwányam Asiria xa ekhem nak, máxa sa' etnéssesek ma'a ektémól'a sawo kélmeykha naqsal'a eñama m'a teyp wátsam Éufrates, elmópésseshok sa' apqatkok elyésésagkok ma'a israelitas, tén han ma'a áwa' apatña'ák nak ekweykekxoho m'a áwa' apexchakkok.

Isaías 8:8

kawakxohok sa' ma'a Judá, káhapwók sa' ma'a, kayeykhak sa' yegmen ekyawe m'a, apyespa'ák sa' kaxnagwak yegmen ma'a énxet'ák. Máxa náta élpeykessól'a axempenák sa' etnehek yápok Emanuel ma'a ekyókxoho xapop apagkok nak”.

Daniel 11:10

“Elánekxak sa' eyke aptamhágkaxa yaqwayam yempakhak ma'a wesse' apwányam apketchek apha nak nexcheyha, yánchásekxak sa' apxámokma sẽlpextétamo. Ektamagkok sa' yetlo sẽlpextétamo apagkok xama m'a, emok sa' ma'a ekpayho nak nepyeyam, emasséssók sa' ekyókxoho aqsok, ektémól'a m'a yegmen ekyawe ekteyapma wátsam; tén sa' ektamagkokxak makham ekweykmoho m'a tegma apyennaqte apagkok nak wesse' apwányam, apha nak nepyeyam.

Joel 2:19

aptáha s'e: “Wáphássesek sa' ko'o kéxegke hótáhap apaktek, tén han vino, tén han pexmok égmenek, ekwokmoho kélyaqkanakmo; magwohók sa' kaxwók elya'ássók kéxegke m'a énxet'ák mehey'áseyak nak ko'o.

Nahúm 1:15

¡Kóllano! ¡Apxegakmek apseykha nak amya'a meyke ektáhakxa egwáxok ma'a néten nak egkexe! Énxet'ák Judá, kóllána kélessawassamo; kóllána m'a kélxeyenma axta chá'a kóllána'. Wánxa sa' kaxwók apkelántaxno xapop kélagkok ma'a énxet'ák élmasagcha'a nak apkeltémakxa; hakte apmassegwokmek apyókxoho m'a.