Miqueas 7:8 - Biblia Enxet

⁸ Énxet'ák sélenmexma nak, nágkalpayhekxa kélwáxok kólwetak ekmaso sekha, ekyaqnenmeyk eykhe ko'o, wampekxak sa' eyke makham néten; ekhegkek eykhe ko'o ekyáqtésakxa exma, Wesse' egegkok akke sélsássesso chá'a exma.

Miqueas 7:8 ပူးပေါင်းရင်းမြစ်များ

Job 31:29

Megkapayheykekxak chá'a ko'o ewáxok katnégwomhok exma m'a sélenmexma nak, megkapayhekxeyk han chá'a ewáxok eyáhapwa'a enxoho ekmaso apha.

Salmos 112:4

Kalsássesek chá'a exma cháléwasso ekyáqtésakxa exma m'a énxet'ák meyke nak apkeltémakxa, tén han ma'a apmopyósa nak chá'a elanok pók, tén han ma'a ektaqmalma nak apkelwáxok, tén han ma'a ekpéwomo nak chá'a apkeltémakxa.

Salmos 143:3

Élyetleykha apmáheyo heyaqhek ma'a sélenmexma, épetchessegkek xapop; apkeltémok axnamok ma'a ekyáqtéssamakxa nak exma, ekhémók ko'o m'a apkeletsapma axta nano'.

Salmos 20:8

Kalyelqaxkohok eyke chá'a apyay'ák ma'a, keñe elyaqnenek chá'a, keñe negko'o, mólyaqnenek chá'a, ólchempekxak chá'a néten.

Salmos 27:1

Wesse' egegkok apteme ko'o sélsássessóxma, tén han sewagkasso teyp, ¿yaqsa aqsok ko'o wé'? Wesse' egegkok apteme semasma, ¿yaqsa awanchek ko'o hégwakkasek?

Salmos 35:19

Nágyoho kalpayhekxak apkelwáxok hélanok ma'a sélenmexma nak ko'o; nágyoho kalátsaha nápaqta'a hey'ássók ma'a setaqnagko nak chá'a meykexho sektáhakxa.

Salmos 37:21

Yának chá'a kólmássesha aqsok ma'a élmasagcha'a nak apkeltémakxa, keñe meyaqmagkásekxeyk chá'a, apyósek eyke elanok pók ma'a énxet ektaqmalma nak aptémakxa, memyewek nahan aqsok apagkok.

Salmos 37:24

apyaqnenchek agkok chá'a, yempekxak chá'a néten, hakte Wesse' egegkok apméyak ma'a apmek.

Salmos 38:16

Wánxa eyke aqsa sélmaxneya exchep, maltamho ko'o wasmésaxche', tén han kalpayhekxak apkelwáxok énxet'ák eñama sektéyam.

Salmos 84:11

Hakte Dios Wesse' egegkok sẽlsássesso chá'a exma, tén han sẽlmasma; elásekhohok chá'a Wesse' egegkok ma'a apkeláneykegkoho nak chá'a aqsok ektaqmela, kataqmalmakha chá'a apwáxok epasmok, elmések chá'a aqsok éltaqmela.

Salmos 97:11

Kalsássesek chá'a élseyéxma m'a énxet ektaqmalma nak aptémakxa; keñe chá'a ekpayheykekxa egwáxok ma'a énxet'ák meyke nak apkeltémakxa.

Isaías 2:5

¡Nók, Jacob énxet'ák apagkok, ólxog éltátchesakxa nak Wesse' egegkok élseyéxma apagkok!

Isaías 49:9

yaqwayam sa' etnehek elának apkelmomap nak se'e: ‘Kólántép’, yaqwayam sa' etnehek elának apheykha nak ekyáqtésakxaxma s'e: ‘Kólántép élsakókxaxma.’ Kólwetak sa' chá'a pa'at ekyókxoho m'a nekhaw'ék ámay, kaxek sa' chá'a ektéyak kélnaqtósso ekyókxoho m'a egkexe meykexa nak chá'a xama aqsok.

Isaías 50:10

Kéxegke kéláyo nak chá'a Wesse' egegkok tén han kélháxenmo nak chá'a appeywa m'a apkeláneykha: kélxegkek agkok ekyáqtésakxaxma, meyke éltátchessesso m'a élseyéxma, kólteme kéláyo m'a Wesse' egegkok kólyepetchegwakxa m'a Dios kélagkok.

Isaías 9:2

Apkelwet'ak ekyawe agko' élseyéxma m'a énxet'ák apkelweynchámeykencha'a nak ekyáqtésakxaxma; xama élseyéxma élsássessóxma m'a énxet'ák apheykencha'a nak ekyaqtéssamakxa agko' exma.

Jeremías 48:27

Énxet'ák Moab, ¿Ya axta kéxegke kólesméssók chá'a m'a énxet'ák Israel? ¿Ya axta kólxéneykha chá'a yetlo kélwanyeykha? ¿Ya axta kólteméssessók ma'a aptémól'a apkelmenyexma?

Jeremías 50:11

“Kéxegke caldeos, kélyementaméyak axta aqsok apagkok énxet'ák ahagkok, ¡kalpayhekxa kélwáxok, kólnéwha! ¡Kólnextegmakha néten, ektémól'a weyke étkok ma'a neyseksa pa'at! ¡Kólwehesha aptémól'a elpáwha yátnáxeg!

Jeremías 8:4

“Jeremías, eltennés sa' énxet'ák se'e amya'a sektáhakxa nak ko'o sekpeywa: “Apyaqnenchek agkok chá'a xama énxet yempekxak chá'a néten; apxegánegwokmek agkok chá'a m'a ámay, etaqhegwók chá'a.

Ezequiel 25:6

“Ektáhak ko'o sekpeywa s'e, sektáha nak Wesse': Énxet'ák Amón, kéltekpageykha axta kéxegke kélmék yetlo kélnextegeykha néten kélátseykencha'a, kélasméssegkek axta nahan kélwanyeykencha'a m'a Israel.

Ezequiel 35:15

Payhekxeyk axta exche' awáxok kélmasséssekmo axta m'a apchókxa, apxaweykxa axta apagkok apagko' ma'a énxet'ák Israel, kaxhok sa' eyke nahan ektáhakxa exche' m'a: katnekxak sa' ekmaso m'a egkexe Seír, cham'a apchókxa Edom nak. Keñe sa' kólya'ásegwók ko'o sektáha Wesse'.”

Ezequiel 36:5

Keso aptáhakxa nak appeywa Wesse' egegkok se'e: Kalwok sa' ko'o sekpeywa alának ma'a pók énxet'ák nak, sa' ekyágwánxa agkok ma'a ekyókxoho nak kañe' Edom, hakte apmomchek axta xapop ahagkok yetlo ekyawe agko' élpayheykekxa apkelwáxok, yetlo apkelwañémo apagko' axta nahan apkelyementameykegkok ma'a yókxexma agkok nak.’

Amós 9:11

“Axátekhásekxak sa' ko'o makham David axta apxagkok aptéyam xa ekhem nak. Alápekxak sa' ma'a apkelyagqaxe nak, almekxak sa' makham ma'a nápakha'a apketkók nak, keñe sa' axátekhásekxak makham axnéshok ma'a aptémakxa axta m'a nano' axta,

Abdías 1:12

Axta eykhe kapayhawok xép kapayhekxak apwáxok apwet'a ektáhakxa ekmaso apha m'a apyáxeg, axta eykhe kapayhawok xép kapayhekxak apwáxok apwet'a ektáhakxa kélmasséssekmo m'a Judá, axta eykhe kapayhawok xép yesmaksek apwet'a apkellegágkoho ekyentaxno agko'.

Miqueas 4:10

Epexyawha, kapayheykha apátog tegma apwányam Sión, ektémól'a kelán'a káskok awáxok, kamáwhok katnehek naqláwa, hakte elántépok sa' xép énxet'ák apagkok aphakxa, elhók sa' ma'a yókxexma eyáxñe nak, elwakxohok sa' ma'a Babilonia. Elántekkesekxak sa' eyke Wesse' egegkok énxet'ák apagkok ma'a; elwagkasek sa' teyp nepyeseksa m'a apkelenmexma.

Miqueas 7:10

Elwetak sa' nahan ma'a sélenmexma nak, cháxa peya sa' kalmegqaksohok apagko' xa. Hakte axta etnehek chá'a heyának se'e: “¿Háxko aphakxa Dios Wesse' apagkok?”, alanha sa' ko'o kaxwo' kólteyammaha ektémól'a yelpa' m'a ámay nak.

Zacarías 12:8

Almeyók sa' ko'o m'a apheykha nak Jerusalén, ko'o sektáha nak Wesse'. Apkelyennaqte sa' nahan etnahagkokxak ma'a apkelyelqamákpoho nak, ektéma axta m'a wesse' apwányam David, keñe sa' ma'a David aptawán'ák neptámen nak etnahagkokxak ma'a aptémakxa nak Dios, aptémakxa nak ma'a Wesse' egegkok apchásenneykha, apxegamól'a chá'a apmonye'e.

Malaquías 4:2

Keñe sa' kéxegke kélteme nak séláyo ko'o, kalyenmok sa' kélnepyeseksa m'a ektémakxa nak ekpéwomo sektémakxa, ektémól'a ekhem éltátchesso, segméssamól'a ekyennaqte egyempehek hẽltátchesek. Kólnextegmakha sa' néten kéxegke kólátsaha, ektémól'a weyke étkók kelennay'a élánteyapmal'a m'a axanák.