Miqueas 5:8 - Biblia Enxet

⁸ Keñe sa' nepyeseksa apxámokma énxet'ák, apkeleymomap nak ma'a Jacob énxet'ák apagkok, máxa yámakméwa sa' etnahagkok neyseksa m'a aqsok nawha'ák éllo nak, máxa méwa sa' etnahagkok ekleykhal'a nepyeseksa m'a nepkések kélnaqtósso, ektahanmal'a neyseksa ekyeykhe keñe katnéssesek nápakha'a apketkók, eksawhomól'a kalnápok apyókxoho.

Miqueas 5:8 ပူးပေါင်းရင်းမြစ်များ

Génesis 49:9

¡Xép, hatte Judá! aphawók xép ma'a méwa étkok eksawhomal'a katwok ekyógkexma, keñe keytek náxop, ektémól'a m'a méwa ekyawel'a megkólmowánal'a kólya'aksek exma.

Salmos 104:20

Eyáqtéssesek chá'a exchep, keñe chá'a katnehek axta'a, keytlawhok han chá'a élánteyapma m'a aqsok nawha'ák élleykha nak naxma.

Salmos 44:5

xép sempasmo axta keñamak negmenxanma m'a nélenmexma; ¡xép apwesey axta keñamak nentemessáseykekxo kóneg ma'a ektáha axta chá'a segketámeyam!

Salmos 50:22

“Kólya'asagkoho sa' se'e, kéxegke megkaxeyenma nak kélwáxok Dios, kélnápakha'a apketkók katnehek atnéssesek, méko kalwagkasek teyp:

Proverbios 30:30

cham'a neptána, aqsok nawhak eklo agko', megyenye nak amonye' xama aqsok, megyeye nak han ma'a énxet;

Isaías 5:29

máxa nahan méwa ekyexwéweykha m'a apkelwehéseykha nak, ektémól'a keyxwéwha kamok ekyógkexma, keñe kaswok, méko nahan keymentemekxa'.

Ezequiel 39:10

Melántépek sa' yókxexma etegyagkok yántapák, melmahagkek sa' nahan naxma elyaqtennagkok, hakte sa' katnehek yántapák apagkok xa ekyókxoho nak aqsok apkelmeykha. Keñe sa' elmenyexchásekxak kaxwók aqsok apagkok ma'a ektáha axta apkelmenyexchesso aqsok apagkok, esawhaksohok sa' nahan aqsok apagkok ma'a apsawhéssamo axta aqsok apagkok. Ko'o sekxeyenma sektáha nak Wesse'.

Oseas 5:14

Sa' atnehek ko'o aktamagkok Efraín, tén han Judá m'a ektémól'a méwa kaktamagkok aqsok, ko'o ahagko' sa' han atnéssesagkok nápakha'a apketkók, tén sa' axñekxak makham, alyenyawasagkokxak sa', méko sa' kalwagkasek teyp.

Miqueas 2:12

Wánchásekxak sa' ko'o apyókxoho Jacob énxet'ák apagkok; ayekhámekxak sa' apqántawók apkeleymomap nak ma'a énxet'ák Israel. Wánchásekxak sa' aptémól'a nepkések yaqnekxak ma'a apxagkok aptémól'a nepkések yaqnekxak ma'a yókxexma ektaqmelakxa nak pa'at, énnegkesek sa' exma eñama apxámokma.

Miqueas 4:13

¡Tegma apwányam Sión, yempekxa néten, ellegássesagkoho apkelenmexma! Hakte aptáhak Wesse' egegkok se'e: “Agkések sa' ko'o exchep apyennaqte ektémól'a m'a weyke kennawo' sawól'a kepet'ák, tén han sawo ekyexwasel'a aphék, yaqwayam sa' enaqtawasagkohok apxámokma apagko' énxet'ák. Elyementók sa' xép ma'a aqsok apagkok ekxámokma apkelmenyexcháseyak axta pók énxet'ák, keñe sa' hélmések ko'o, sektáha nak Wesse' ekyókxoho keso náxop.”

Miqueas 5:3

Apkexakhamchek eyke kaxwók Wesse' egegkok ma'a ektáha nak énxet'ák apagkok, ekweykmoho sa' ektáha naqláwa m'a kelán'a élhaxanma nak kategkesek étche apkenna'. Keñe sa' kólpáxaqteyásekxak makham ma'a apchókxa xamo' nak israelitas, kélnaqleykekxa axta megkatnahakxa apkelókxa.

Miqueas 7:18

Méko pók Dios aphawo nak xép, hakte meyaqmagkásekxeyk chá'a exchep nentémakxa ekmaso, kalwanaqmohok nahan chá'a exchep nénmexeykekxa negko'o néleymomáxche nak egqántawók énxet'ák apagkok. Atsek negko'o eltamhók xép henxekmósek segásekhayo, megkawegqók chá'a aplo.

Zacarías 10:5

Sa' etnahagkok ma'a aptamheykegkaxal'a sẽlpextétamo apkelxegál'a ámay neyseksa yelpa' yempakha'; elnapakpok sa', hakte apheyk nepyeseksa m'a Wesse' egegkok, elmegqaksek sa' ma'a apkelchánte nak yátnáxeg.

Zacarías 11:6

Megkalepyósek sa' ko'óxa kaxwók alanok énxet apheykha nak se'e apchókxa nak, agkések sa' aqsa chá'a yaqwayam emok xama m'a pók nak, tén han yaqwayam emok chá'a m'a wesse' apwányam apagkok. Sa' emasséssók apchókxa xa, malwagkasek sa' nahan ko'o teyp apkelma enxoho chá'a m'a. Ko'o sekxeyenma xa, sektáha nak Wesse'.”

Zacarías 12:3

“Atnessásekxak sa' ko'o meteymog ekyentaxno agko' Jerusalén xa ekhem nak, megyexyawaksek sa' chá'a m'a pók aptémakxa nak énxet'ák. Kapexyekhak sa' chá'a m'a apmáheyo nak chá'a éxnések néten. Épetchekxak sa' pók apyókxoho pók aptémakxa énxet'ák yenmexek ma'a Jerusalén,

Zacarías 14:18

Sa' agkok elmeyákxak chá'a m'a énxet'ák Egipto, ellegássesagkohok sa' ma'a Wesse' egegkok. Sa' katnehek nahan ma'a mók apheykegkaxa nak cha'a énxet melmeyeykekxa nak chá'a elánegwakxak apkelsawássessamo ekhem Kélpakxeneykegkaxa Yenta'a Aktegák ma'a.

Zacarías 9:15

Elmeyók sa' Wesse' ekha nak apyennaqte m'a ektáha nak chá'a apagkok. Sa' elteyagkásekxak han chá'a meteymog apagkok apkelmeykha nak chá'a mélwakto xa énxet'ák nak. Sa' emasséssók han ekmanyehe agko' ma'a apkelenmexma nak; máxa vino negyà sa' etnéssesek énagkok ma'a éma apagkok, máxa egheykok éllánéyak la'a aqsok égmenek sa' etnahagkok kallanagkok apwokma'ák. Máxa sa' etnahagkok ma'a ektémól'a kólexpaqheykha nekhaw'ék élmahamtakcha'a m'a ekwatnamáxchexa nak chá'a aqsok.

Malaquías 4:3

Cháxa ekhem sekpagkanma nak ko'o, máxa yagkamex sa' kólteméssesek kéxegke kólteyammaha m'a élmasagcha'a nak apkeltémakxa'.

Números 24:9

Aphágkek agkok ellókasek apkelyampe, máxa etnahagkok ma'a ektémól'a méwa: méko nahan kamáwhok kanaqxétekhasagkok. ¡Apkeleñémo sa' chá'a kóltéméssesek ma'a ektáha nak chá'a ektaqmalma apxeyenma, sagkek sa' chá'a katnehek apxénamap ma'a apkeltémo nak chá'a katnégwomhok exma ekmaso!”