Miqueas 5:7 - Biblia Enxet

⁷ Keñe sa' nepyeseksa apxámokma énxet'ák, apkeleymomap nak ma'a Jacob énxet'ák apagkok, etnahagkok sa' ma'a ektémól'a yálye, apcháphassól'a Wesse' egegkok, tén han ektémól'a ekmámeye ekpálweyktál'a pa'at, melhaxanma nak chá'a apkeltémókxa etnehek ma'a énxet.

Miqueas 5:7 ပူးပေါင်းရင်းမြစ်များ

2 Samuel 17:12

Tén sa' agketamagkok ma'a apyáp nak xép, apheykenxa enxoho chá'a yókxexma. Máxa yálye sa' antéhek agáhapwók ektémól'a kápok xapop, megyeymakpek sa' xama enxoho m'a énxet'ák apagkok, yetsapok sa' han ma'a.

Salmos 110:3

Epasmekxak sa' énxet'ák apagkok peya enxoho yempakha'. Etépekxak sa' aqsa chá'a wokma'ák apagkok yókxoho ekhem ma'a egkexe élpagkanamaxche nak, ektémól'a yálye ektéyeykmohol'a amonye' ekteyapma ekhem.

Salmos 133:3

Kaxhok ma'a yálye ektéyeykmohol'a egkexe Hermón, tén han ektéyeykmohol'a néten nak egkexe Sión. Cha'a apcháphassamakxa Wesse' egegkok ekwenaqte negweynchámeykha m'a.

Salmos 72:6

¡Máxa ekmámeye sa' etnehek, tén han yálye, ekyássessamól'a xapop, tén han pa'at!

Proverbios 19:12

Máxa yámakméwa ekpáweykha awáxok la'a etnehek aplawa enxoho m'a wesse' apwányam, máxa eyke yálye élyássessól'a pa'at ma'a ektaqmeleyncha'a enxoho apwáxok henlano'.

Isaías 32:15

Hegáhapwaták sa' eyke makham negko'o apmopwána m'a Wesse' egegkok, apmopwána nak elának aqsok, keñe sa' katnekxak namyep ma'a yókxexma ekyamáyekxa nak exma, kayeykhágwomhok agko' sa' nahan ektaqmalma m'a namyep.

Isaías 44:3

hakte wának sa' ko'o kanyehek yegmen ma'a yókxexma meykexa nak énxet, keñe sa' yegmen ényé m'a ekyamáyekxa nak xapop. Agkések sa' ko'o axnagkok apkelyennaqte m'a aptawán'ák neptámen nak, wáphássesek sa' ektaqmalma apheykha.

Isaías 55:10

“Cham'a ektémakxal'a ekmámeye kaweywenták eñama m'a néten tén han yeyám appok megkaltaqhók makham ma'a éleñamakxa nak, kayássesek aqsa m'a xapop, kataqmelchesek nahan, kaltektekkesek nahan ma'a aqsok, katekkesek nahan aqsok aktek yaqwayam kólchenekxa', tén han ma'a nento yaqwayam antók,

Isaías 66:19

Agkések sa' ko'o xama aqsok magkenatchesso. Wohok sa' elxeganmok nápakha keñe sa' aláphaksek ma'a apheykegkaxa nak chá'a pók aptémakxa énxet'ák: cham'a Tarsis, Libia tén han ma'a Lidia, apkelókxa, apmopwancha'a nak elmaha m'a yágke, tén han ma'a Tubal, Grecia tén han ma'a apkelókxa makhawók agko' nak, neyáwa nak ma'a wátsam ekwányam, cham'a, mellegaya nak ko'o makham axénaxche', melweteya nak makham ma'a seyeymáxkoho; Sa' ellegaksek nepyeseksa pók aptémakxa énxet'ák seyeymáxkoho m'a.

Jeremías 14:22

¿Yetnéya neyseksa xama aqsok kéleykmássesso m'a ekmowána nak kamámeyaksek? ¿Awancheya káphaksohok agkok ekmámeye m'a yaphope? ¡Ma', Dios Wesse' egegkok! Xép chá'a apcháphasso m'a, xép chá'a apkelane xa ekyókxoho aqsok nak; ¡cháxa keñamak nélhaxanma nak negko'o exchep!

Ezequiel 14:22

Apqántawók sa' aqsa eleymakpok meletsapma, yaqwayam sa' elántépok yetlo apketchek apkelennay'a m'a tén han ma'a kelwán'ák nak. Apkelya'awékteyk sa' agkok kéxegke m'a, kólwetak sa' apkeltémakxa tén han ma'a aqsok ekmaso apkelánéyak, keñe sa' kaltaqmelchessásekxak kélwáxok kéxegke m'a nenlegeykegkoho seyáphasso nak ko'o m'a Jerusalén.

Ezequiel 47:1

Éntamánteyk axta makham énxet ma'a nentaxnamakxa nak tegma appagkanamap. Ekwet'ak axta nahan ektepa yegmen ma'a kóneg átog nak, kenyeyk axta ekmahágko m'a ekpayho nak teyapmakxa ekhem, appayhémókxa axta m'a tegma appagkanamap. Péwók axta nahan ekweyweykenta' ényé yegmen ma'a ekpayho nak apkelya'assamakxa m'a tegma appagkanamap, ekpayho nak nepyeyam ekyetnamakxa m'a ekwatnamáxchexa aqsok.

Ezequiel 5:5

“Ektáhak ko'o sekpeywa s'e, sektáha nak Wesse': Cháxa Jerusalén xa. Ko'o axta sekpekkenma nepyeseksa m'a énxet'ák tén han ma'a pók aptémakxa nak chá'a énxet'ák.

Daniel 11:32

Emáwhok sa' eykhe elmok wesse' apwányam yetlo ekmátsa appeywa elának ma'a énxet'ák apkelyenseyam axta apkelpeykessamo Dios, elwasqápok sa' eyke m'a énxet'ák apkelásekhayo nak Dios, elenmexekxak sa' ma'a kélteméssesakxa'.

Oseas 14:5

Máxa yálye apagkok sa' ko'o atnehek ma'a Israel, keñe sa' máxa etnehek ma'a ektémól'a pánaqte exnók éltaqmalmal'a exnók. Kalyeyha'ak sa' katnehek kepmenák, ektéma nak ma'a egkexe Líbano;

Oseas 6:3

¡Ólwasqápekxohok hana agya'ásegwók Wesse' egegkok! Hegyo'ótak sa' negko'o Wesse' egegkok, ektémól'a katyapok ekhem, ektémól'a kamme' kayássesek xapop, ekmáxaqxamakxal'a exma, tén han élyapweykxal'a yenta'a.

Joel 2:32

Apyókxoho énxet ektáha nak sewóneykha, ko'o sektáha nak Wesse', ewagkasakpok sa' teyp ma'a nétsapmakxa nak, hakte keytek sa' nélwagkásamáxche teyp ma'a egkexe Sión, Jerusalén nak, apkeltennassamakxa axta katnehek ma'a Wesse' egegkok. Meletsepek sa' ma'a ektáha nak apkelyéseykha.

Amós 5:15

¡Kóltaqnow aqsok ekmaso! ¡Kólásekhoho m'a aqsok ektaqmela! Kólána kalanaxchek ekpéwomo kéllánekxésso amya'a énxet'ák ma'a sẽlyekpelchémókxa nak; lapmaxcheyk sa' kexa kalepyóshok elanok Wesse' egegkok, Dios ekha nak apyennaqte énxet'ák Israel apkeleymomap nak ektáha enxoho xa ektáha nak.

Miqueas 2:12

Wánchásekxak sa' ko'o apyókxoho Jacob énxet'ák apagkok; ayekhámekxak sa' apqántawók apkeleymomap nak ma'a énxet'ák Israel. Wánchásekxak sa' aptémól'a nepkések yaqnekxak ma'a apxagkok aptémól'a nepkések yaqnekxak ma'a yókxexma ektaqmelakxa nak pa'at, énnegkesek sa' exma eñama apxámokma.

Miqueas 4:13

¡Tegma apwányam Sión, yempekxa néten, ellegássesagkoho apkelenmexma! Hakte aptáhak Wesse' egegkok se'e: “Agkések sa' ko'o exchep apyennaqte ektémól'a m'a weyke kennawo' sawól'a kepet'ák, tén han sawo ekyexwasel'a aphék, yaqwayam sa' enaqtawasagkohok apxámokma apagko' énxet'ák. Elyementók sa' xép ma'a aqsok apagkok ekxámokma apkelmenyexcháseyak axta pók énxet'ák, keñe sa' hélmések ko'o, sektáha nak Wesse' ekyókxoho keso náxop.”

Miqueas 5:3

Apkexakhamchek eyke kaxwók Wesse' egegkok ma'a ektáha nak énxet'ák apagkok, ekweykmoho sa' ektáha naqláwa m'a kelán'a élhaxanma nak kategkesek étche apkenna'. Keñe sa' kólpáxaqteyásekxak makham ma'a apchókxa xamo' nak israelitas, kélnaqleykekxa axta megkatnahakxa apkelókxa.

Miqueas 5:8

Keñe sa' nepyeseksa apxámokma énxet'ák, apkeleymomap nak ma'a Jacob énxet'ák apagkok, máxa yámakméwa sa' etnahagkok neyseksa m'a aqsok nawha'ák éllo nak, máxa méwa sa' etnahagkok ekleykhal'a nepyeseksa m'a nepkések kélnaqtósso, ektahanmal'a neyseksa ekyeykhe keñe katnéssesek nápakha'a apketkók, eksawhomól'a kalnápok apyókxoho.

Miqueas 7:18

Méko pók Dios aphawo nak xép, hakte meyaqmagkásekxeyk chá'a exchep nentémakxa ekmaso, kalwanaqmohok nahan chá'a exchep nénmexeykekxa negko'o néleymomáxche nak egqántawók énxet'ák apagkok. Atsek negko'o eltamhók xép henxekmósek segásekhayo, megkawegqók chá'a aplo.

Sofonías 3:13

Melanagkek sa' aqsok megkapéwomo m'a énxet'ák Israel apkeleymomap nak meletsapma, metnahagkek sa' han chá'a apkelmopwancha'a amya'a, melyexanchesha sa' nahan chá'a pók. Apwanchek sa' etawagkok aptéyak tén han ellókasagkok apkelyampe meyke apkelaye xama aqsok enxoho.”

Zacarías 14:8

Keñe sa' katyapok yegmen megkeymaye m'a Jerusalén, yaqwayam sa' kanyehek ma'a ekhem apmopsamágexal'a tén han ma'a ekmexanmakxal'a exma, nekha sa' kamhagkok ma'a ekpayho nak Wátsam Ekwányam Étsapma tén sa' mók nekha kamhagkok ma'a ekpayho nak Wátsam Ekwányam Mediterráneo.

Zacarías 9:13

Eyeykessek ko'o axát'ák yágke ahagkok sénchesso nak kempakhakma. Judá xa. Ekpekkenchessek nahan xama aktek. Efraín xa. Keñe sa' xép tegma apwányam Sión atnéssesek xama sókwenaqte, wanmexchesek sa' ko'o exchep apketchek ma'a apketchek nak énxet'ák Grecia.”

Deuteronomio 32:2

“Máxa ekmámeye sa' katnehek kapallenták ma'a nélxekmowásamáxche ahagkok, máxa yálye sa' katnehek ma'a sekpeywa, ektémól'a chawówa kapálwaták ma'a pa'at, ektémól'a kapálwaták yegmen ma'a pa'at ekpayhe.

Jueces 6:36

Keñe axta Gedeón aptáha apcháneya m'a Dios: “Naqsók sa' agkok peya heyásenneykxak yaqwayam alwagkasek teyp ma'a énxet'ák Israel, cham'a aptáhakxa nak xép appeywa,