Miqueas 4:13 - Biblia Enxet

¹³ ¡Tegma apwányam Sión, yempekxa néten, ellegássesagkoho apkelenmexma! Hakte aptáhak Wesse' egegkok se'e: “Agkések sa' ko'o exchep apyennaqte ektémól'a m'a weyke kennawo' sawól'a kepet'ák, tén han sawo ekyexwasel'a aphék, yaqwayam sa' enaqtawasagkohok apxámokma apagko' énxet'ák. Elyementók sa' xép ma'a aqsok apagkok ekxámokma apkelmenyexcháseyak axta pók énxet'ák, keñe sa' hélmések ko'o, sektáha nak Wesse' ekyókxoho keso náxop.”

Miqueas 4:13 ပူးပေါင်းရင်းမြစ်များ

Salmos 24:1

Wesse' egegkok apagkok keso nélwanmeygkaxa, tén han ma'a ekyókxoho aqsok ekhéyak nak awáxok, tén han ma'a ekyókxoho élleykha nak.

Salmos 68:29

Keñe m'a tegma appagkanamap apagkok netno' nak, cham'a Jerusalén, apkelseykekxéssamakxa nak chá'a apkelmésso naqsa aqsok ma'a kelwesse'e apkelwányam,

Salmos 72:10

¡Elsókásegmak sa' apkelmésso naqsa aqsok, tén han apcháncheseykekxa m'a kelwesse'e nak Tarsis, tén han ma'a egkexe étkók nak, tén han ma'a kelwesse'e apkelwányam nak Sabá, tén han ma'a Sebá!

Isaías 18:7

Cháxa ekhem nak, kólsantagkasek sa' aqsok kélmésso naqsa m'a Wesse' ekha nak apyennaqte, apagkok ma'a énxet'ák apkelwenaqte nak, éláxñeyo nak apyempe'ék, énxet'ák apkeleymáp nak chá'a ekyókxoho yókxexma, énxet'ák apkelyennaqte nak tén han apkeleymákpoho, apheykha nak ma'a xapop ekyetnamakxa nak wátsam yegmen. Kólsantagkasek sa' ma'a egkexe Sión, kélwóneykegkaxa nak chá'a apwesey m'a Wesse' ekha nak apyennaqte.

Isaías 21:10

Énxet'ák ahagkok, kélteyammeykha nak ektémól'a m'a hótáhap apaktek kélteyammeykha, éltennássek ko'o m'a seklege nak eñama Wesse' ekha apyennaqte, cham'a Israel Dios apagkok nak.

Isaías 23:18

Keñe sa' ma'a ekwete nak ekyánmaga élyánmagkásamáxche kólpagkanchesek ma'a Wesse' egegkok; megkólaqxegkesek sa' kañe', megkóltaqmelchesek sa' nahan. Sa' kólmésagkok chá'a m'a apkeltemessáseykha nak chá'a Wesse' egegkok, yaqwayam sa' etegyagkok chá'a ekxámokma m'a aptéyak tén han ma'a apkelántaxno apkeltaqmalma nak.

Isaías 5:28

Ahamtakcha'ak agko' nahan ma'a yágke aktek apagkok, tásek nahan apkeleykesso apnaqtete táma ekyókxoho m'a yágke apagkok. Máxa nahan meteymog élyennaqte agko' la'a awáxok apmagkok ma'a yátnáxeg apkelchánte, máxa nahan samaxche élyennaqte élyéha amagkok ma'a yátnáxeg apkelyenyawasso apagkok nak;

Jeremías 51:20

“¡Babilonia, xép apteme sawo ekyentaxno ahagkok, sekmeykha nak chá'a sénchesso kempakhakma! Xép chá'a wásenneykxak alyaqtennagkok ma'a pók aptémakxa énxet'ák, tén han amasséssók ma'a ekyókxoho apkelókxa.

Jeremías 51:33

Hakte aptáhak Wesse' ekha apyennaqte Dios apagkok nak Israel se'e: “¡Aphawók Babilonia m'a kélchexakkassamakxa nak chá'a apyempe'ék hótáhap apaktek, kaxwók sa' kammok ekhem eknakxamáxchexa apaktek!”

Daniel 2:44

Epekkenek sa' xama apchókxa megkólmowána nak kólmasséssók ma'a Dios apha nak néten, neyseksa aptamhéyak apkelwesse'e apkelwányam xa apkelwesse'e nak, memek sa' xama enxoho m'a pók wesse', kamasséssók sa' ekyókxoho mók apkelókxa nak, megkamassegwomek sa'.

Oseas 10:11

“Máxa axta weyke étkok kéltámessól'a m'a Efraín, ekmátsal'a kampaksek apyempe'ék ma'a hótáhap apaktek. Ekpekkenchessek kaxwók nagyétek ektaqmalma nak ma'a yámet, yaqwayam keynyawaksek ma'a ekyenyawasso nak, tén sa' Judá ényawaksek ma'a élchekha nak, keñe sa' Jacob ényawaksek ma'a ektepelcheykekxal'a xapop.

Miqueas 5:7

Keñe sa' nepyeseksa apxámokma énxet'ák, apkeleymomap nak ma'a Jacob énxet'ák apagkok, etnahagkok sa' ma'a ektémól'a yálye, apcháphassól'a Wesse' egegkok, tén han ektémól'a ekmámeye ekpálweyktál'a pa'at, melhaxanma nak chá'a apkeltémókxa etnehek ma'a énxet.

Habacuc 3:12

Yetlo aplo apweynchámeyha ekyókxoho keso náxop, yetlo aplómo apagko' apkelteyammeyha pók aptémakxa énxet'ák.

Zacarías 12:3

“Atnessásekxak sa' ko'o meteymog ekyentaxno agko' Jerusalén xa ekhem nak, megyexyawaksek sa' chá'a m'a pók aptémakxa nak énxet'ák. Kapexyekhak sa' chá'a m'a apmáheyo nak chá'a éxnések néten. Épetchekxak sa' pók apyókxoho pók aptémakxa énxet'ák yenmexek ma'a Jerusalén,

Zacarías 12:6

“Máxa átex éláléweykhal'a neyseksa yántapák sa' ko'o atnéssesek apkelámha apmonye' nak Judá xa ekhem nak, ektémól'a táxa eyáléweykhal'a nepyeseksa hótáhap apexchakkok kélyaqtónma kéltéteykekxal'a nepxet. Kalwatnek sa' ma'a ekyókxoho apheykegkaxa nak chá'a pók aptémakxa énxet'ák ma'a neyáwa, keñe sa' ma'a énxet'ák apheykha nak Jerusalén elhekxak sa' aqsa makham ma'a tegma apwányam apagkok nak.

Zacarías 4:14

Tén axta aptáha makham seyátegmowágkokxo s'e: “Cháxa apteme apqánet énxet apkelpagkanamap yaqwayam etnehek apkeltamheykha m'a aphakxa nak Wesse' egegkok apsawheykekxoho nak ekyókxoho keso náxop.”

Zacarías 6:5

Aptáhak axta seyátegmowágkokxo Dios apchásenneykha s'e: “Cháxa ekteme cuatro éleñamakxa nak éxchahayam xa, élánteyapma nak chá'a m'a aphakxa nak Wesse' egegkok apsawheykekxoho nak ekyókxoho keso náxop.

Deuteronomio 33:25

Sawo sa' katnehek kélápeykekxexa m'a atña'ák apagkok nak tén han ma'a sawo élyexwase, kawegqohok sa' nahan apyennaqte, kaxhok sa' ekwánxa apha keso náxop.

Josué 6:19

Wesse' egegkok sa' eyke kólpagkanchesek ma'a sawo élyátekto élmomnáwa, tén han sawo ekmope élmomnáwa, keñe han ma'a ekyókxoho aqsok, cham'a sawo élyexwase nak, keñe han ma'a sawo ekyentaxno, sa' kólnegkenwakxak ma'a ekheykegkaxa nak aqsok élmomnáwa apagkok.”