Miqueas 3:5 - Biblia Enxet

⁵ Megkataqmelweykmok apkelxega m'a énxet'ák ahagkok eñama apkelyexancháseykha chá'a m'a apkellegasso nak sekpeywa apkelmopwancha'a amya'a, apkeltennasso nak chá'a katnehek meyke ektáhakxa apheykha m'a apkelmésso nak chá'a aptéyak, keñe eltennaksek chá'a yempakhak ma'a meléyak nak chá'a aptéyak. Aptáhak apkelxéna Wesse' egegkok, cháxa apkellegasso nak appeywa apkelmopwancha'a amya'a:

Miqueas 3:5 ပူးပေါင်းရင်းမြစ်များ

Proverbios 28:21

Megkapayhawok antéhek apyeykhamap pók anlanok egnámakkok; megkeyxek henlanaksek magya'assáxma m'a selyaqye étchetse nak.

Isaías 3:12

Sakcha'a m'a apnaqtawáseykegkoho nak énxet'ák ahagkok; kelán'ák kaxwo' tamheykegkok ma'a wesse' apagkok. Énxet'ák ahagkok, apkelyexancháseykha kéxegke m'a apkelámha apmonye'e kélagkok, apkelxegánegkessegkek apkelya'áseykekxo m'a mók ámay.

Jeremías 23:27

Eltennasha chá'a pók ma'a aqsok ekwanmésso, apkeltémo elwátéssesagkok élxeyenma apkelwáxok ko'o m'a énxet'ák ahagkok, ektéma axta ekmassama ko'o élxeyenma apkelwáxok ma'a apyapmeyk nano', apkelyetleykekxo m'a Baal.

Jeremías 23:32

Ekxénchek ko'o alenmexek xa apkelxeyenma nak chá'a apkellegasso sekpeywa, apkelxeyenma nak chá'a apkelwanmagko ekmowána amya'a; apkeltémo nak chá'a elyetnakhássók énxet'ák ahagkok eñama apkelmopwancha'a amya'a, tén han apkelpaqméteykha naqsa. Malapháseykha ko'o, magkéssók han sekpeywa xama enxoho séltémókxa etnahagkok, mopwanchek epasmok énxet'ák ma'a. Ko'o sekxeyenma xa, sektáha nak Wesse'.

Jeremías 6:14

Etnéssesek aqsa chá'a apkelánésso apkelyense m'a énxet'ák ahagkok; exének chá'a ektaqmela, asagkek eykhe katnehek.

Jeremías 6:4

Aptáhak apkelpaqmeta apkelenmexma s'e: “¡Kóllánekxa sa' kéltáhakxa, yaqwayam ólnapaxchek ma'a! ¡Kólchexyem, agketamagkok sa' yetseksók ekhem agko'! ¡Hay!, taxnakmek eyke nahan peyk kayaqtések.

Lamentaciones 2:14

Wanchek amya'a m'a aptémakxa nak chá'a apkeltennasso aqsok apkelwete m'a apkelánémap axta chá'a etnahagkok apkellegasso Dios appeywa. Meltennassók ekmasagko ektémakxa yaqwayam enxoho eyaqmagkassesek ma'a ektémakxa nak; apkeltennáseykha chá'a m'a aqsok apkelwete ekmowána amya'a nak, naqsók han chá'a teméssessók.

Ezequiel 13:9

Allegássesagkohok sa' ko'o m'a apkellegasso nak chá'a amya'a ekmowána amya'a, cham'a apkelwete nak chá'a aqsok megkamámnaqsoho, ekmowána amya'a nak chá'a m'a apkelxeyenma yaqwánxa katnehek egmonye'. Mopwanchek sa' elántaxnegwók epasmok apchaqneykekxa m'a énxet'ák ahagkok Israel; megkanaqtáxésaxcheyk sa' apkelwesey nepyeseksa m'a israelitas, melántexek sa' ma'a kañe' xapop Israel. Keñe sa' kólya'ásegwók kéxegke, sektáha ko'o Wesse'.’

Oseas 4:5

Ekhakxoho ekhem sa' xép etlapmok, keñe sa' axta'a etlapmok nahan xamo' ma'a aplegasso nak ko'o sekpeywa, amasséssessók sa' ma'a egken.

Joel 3:9

Kóllegés sa' apyókxoho pók aptémakxa énxet'ák se'e: ¡Kóllánekxés aptamhágkaxa yaqwayam yempakha'! ¡Kóláneyha m'a apkelyennaqte nak! ¡Elxegmak sa' ma'a kempakhakma yapmeyk, tén sa' elxog!

Miqueas 2:11

Yetneyk agkok xama énxet aptamheykha apmopwána amya'a, etnehek chá'a s'e: “Añeksohok chá'a ko'o kéxegke m'a anmen yámet égmenek, tén han ma'a mók anmen nak”, cháxa yaqwayam etnehek Dios appeywa aplegasso apagkok ekleklamo apwáxok xa énxet'ák nak.

Miqueas 3:11

Elmok chá'a takha' elxawagkok selyaqye m'a énxet'ák segyekpelchémo nak tegma apwányam, selyaqye aqsa chá'a eltamhok elxawagkok ekyánmaga apkelxekmósso apnámakkok ma'a apkelmaxnéssesso nak Dios énxet'ák apagkok, keñe m'a apkellegasso nak chá'a Dios appeywa, elmok chá'a ekyánmaga apkeltenneykha elxénmakha appasmo m'a Wesse' egegkok, etnehek chá'a apkelpeywa s'e: “Apheyk negyeseksa negko'o Wesse' egegkok; méko xama aqsok ekmaso awanchek hegáhapwak negko'o.”

Malaquías 2:8

“Kélyetnakhágweykmek eyke kéxegke m'a ámay ektaqmela, kéxegke kélmaxnéssesso nak énxet'ák ahagkok; apxámok han énxet'ák ekpalchesso m'a ektémakxa nak chá'a kélxekmósso. Kéltawáseykha m'a ekhémo mók nélpaqhetchásamáxkoho ahagkok sekmésso axta ko'o m'a Leví.