Miqueas 1:6 - Biblia Enxet

⁶ Cháxa keñamak aptáha nak Wesse' egegkok se'e: “Nápakha'a apketkók sa' ko'o atnessásekxak ma'a tegma apwányam Samaria, yókxexma eyáxñe sa' katnekxa' kélcheneykekxexa nak anmen yámet. Waxpánchesha sa' meteymog nekha'a nak tegma apwányam ma'a ekyapwátegweykenxa nak xapop, yáxña'akxoho sa' apekkenchásekxak ma'a apowhók nak.

Miqueas 1:6 ပူးပေါင်းရင်းမြစ်များ

2 Samuel 17:13

Apyexánegwokmek sa' agkok han chá'a xama tegma apwányam, negyókxoho sa' ólsók táma' nentáha nak israelitas, ólyenyawaksek sa' meteymog apagkok xa tegma apwányam ekweykekxoho m'a alwáta nak, megkeymaxcheyk sa' xama enxoho meteymog ma'a.

2 Reyes 18:10

keñe axta ektéma apqántánxo apyeyam apmoma. Chaqhawók axta apmomakpo Samaria ekweykmo axta seis apyeyam apteme wesse' apwányam Ezequías, keñe nueve apyeyam apteme wesse' apwányam Oseas ma'a Israel.

2 Reyes 18:9

Apwakhegweykmek axta tegma apwányam Samaria m'a Salmanasar, wesse' apwányam axta Asiria yetlo sẽlpextétamo apagkok, apketámegkek axta, cham'a ekweykmo axta cuatro apyeyam apteme wesse' apwányam ma'a Ezequías, ektéma axta han siete apyeyam apteme wesse' apwányam Oseas, Elá axta apketche, wesse' apwányam axta Israel,

2 Reyes 19:25

¿Ya ey'ásegkok xép ektáha ko'o séltémo katnehek ekyókxoho xa aqsok nak, ko'o sektáha nak Wesse'? Nanók agko' axta ko'o ekxeyenma ewáxok alának xa, élanak kaxwo'; ékeso éñamakxa apmasséssekmo nak xép ma'a tegma apkelyennaqte nak tén han aptemessásekxo nak apxámokma m'a tegma aphopák.

Isaías 17:1

Tegma apwányam Damasco apxénamáp yaqwánxa kólteméssesek. Kamaskok sa' etnehek tegma apwányam ma'a Damasco; meteymog ektaháneykekxa mók sa' etnekxa'.

Isaías 25:12

Eyaqnegkessesek sa' Wesse' egegkok ma'a aphaxta netno' nak nepyáwa' tén han ekyennaqte; elyaqnegkessesek sa', enegkenek sa' náxop.

Isaías 25:2

Meteymog ektaháneykekxa mók aptemessáseykekxak ma'a tegma apkelyawe nak, apmopsagcha'a aptemessáseykekxak ma'a tegma apkelyawe apkelyennaqte nak; apmasséssesseykmek tegma apkelyawe apagkok ma'a apkelenmexma nak, megkólnaqxétekhasagkokxeyk sa' nahan chá'a kaxwók ma'a.

Jeremías 31:5

Eknekxak sa' makham anmen yámet ma'a néten egkexe nak Samaria, etawagkok sa' nahan ekyexna anmen yámet ma'a ektáha nak apkeneykekxa.

Jeremías 51:25

Énmexchek ko'o exche' meteymog ekwenaqte ekmassesseykmoho nak aqsok, ekmasseseykmo nak aqsok ekyókxoho keso náxop. Ko'o sekxeyenma xa, sektáha nak Wesse'. Añássesagkohok sa' ko'o exche', eyttelegwásenták sa' eñama m'a néten meteymog élwenaqte nak, egkexe ekmeyesma sa' atnéssásekxa'.

Jeremías 51:37

peya nak etnekxak ektaháneykekxa mók meteymog, élleykegkaxa semheg nawha'ák, meyke énxet apha, elyegwakkasek sa' chá'a apyókxoho énxet, yeyk sa' nahan chá'a.

Jeremías 9:11

“Meteymog ektaháneykekxa mók sa' ko'o atnessásekxak ma'a Jerusalén, semheg nawha'ák éllo élyexanmomakxa; yókxexma meykexa énxet sa' atnessásekxak ma'a tegma apkelyawe nak Judá, meyke énxet apheykha kañe' sa' atnéssesek.”

Lamentaciones 4:1

¡Peysamákxeyk ma'a sawo ekyátekto ekmomnáwa nak! ¡Massegwokmek élyenma m'a sawo ekyátekto ekmomnáwa agko' nak! ¡Kexpaqneykha ekyókxoho máséyak ámay ma'a meteymog apagkok nak ma'a tegma appagkanamap!

Ezequiel 13:14

Apalchásegmak sa' ko'o xa tegma nápakhaw'ék kélmópeséyak nak kéxegke; alyaqnegkessesagkok sa' náxop, apowhók sa' aqsa kataxchek kaleymaxche'. Naqso', epallegmak sa' ma'a nápakhaw'ék tegma nak, keñe sa' kéxegke kólmaskok neyseksa m'a nápakha'a apketkók nak appalleyam eñama apcháhapweykta'. Keñe sa' kólya'ásegwók ko'o sektáha Wesse'.

Oseas 13:16

Kóllegássesagkohok sa' nahan ma'a énxet'ák Samaria eñama apkenmexeykekxa Dios apagkok. Etekyók sa', sawo sa' chá'a kólyetxa', xapop sa' chá'a kólyenhaksek ma'a apketchek, tén sa' ma'a kelán'ák lós'awo nak, kólpáxqatchesagkok chá'a awokma'ák.

Amós 5:11

Megkólhakha sa' ma'a kélxanák apkeltaqmalma kélláneyak axta meteymog eñama kélnaqtawáseykegkoho m'a meyke nak aqsok apagkok tén han kéltémo elyánmagkasek chá'a hótáhap apaktek elmések kéxegke, megkólyenagkek sa' nahan vino éleñama m'a kélcheneykekxa nak.

Amós 6:8

Naqsók aptáha appeywa Wesse' egegkok, Dios ekha nak apyennaqte s'e: “Altaqnawhok ko'o m'a éleymáxkoho nak apkelwáxok Jacob énxet'ák apagkok; megkalchek agko' ewáxok ma'a kelwesse'e apxanák apkelyawe nak; agkések sa' ko'o tegma apwányam ma'a apkelenmexma nak, yetlo m'a ekyókxoho aqsok ekhéyak nak ma'a kañe'.”

Miqueas 3:12

Kéxegke keñamak peya kólpeynchámekxohok xóp ma'a egkexe Sión, kéxegke keñamak peya etnekxak nápakha'a apketkók ma'a Jerusalén, tegma apwányam nak egkexe Sión, kápekxak sa' ekmompánaqma m'a egkexe nak tegma appagkanamap.

Habacuc 3:13

Apyaweykteyk xép yaqwayam epasmok énxet'ák apagkok, tén han ma'a wesse' apwányam apagkok apkelyéseykha axta exchep. Apketsagkassessek xép néten apxanák ma'a énxet'ák élmasagcha'a nak apkeltémakxa, yáxña'akxoho apnegkencháseykxak ma'a meteymog apowhók nak tegma.