Levítico 4:31 - Biblia Enxet

³¹ Kéméxcheyk nahan elhaxyawássesek ma'a ekyókxoho pexmok nak, ekhawo kélteméssessamakxal'a m'a kéltósso ekmatñá yaqwayam nak kólmések segwetasso nak sẽlásekheykekxoho, tén sa' elwatnek ma'a ekwatnamáxchexa nak aqsok, yaqwayam katnehek ekmátsa nak ekpaqneyam etekhánek Wesse' egegkok, cháxa peya sa' katnehek apwetasso apkelmaxnéssesso Dios énxet'ák apagkok megkólyaqmagkáseykekxa ektémakxa mey'assáxma xa énxet nak, megkólyaqmagkásekxeyk sa' mey'assáxma.

Levítico 4:31 ပူးပေါင်းရင်းမြစ်များ

Génesis 8:21

Xama axta aptekhana Wesse' egegkok xa ekmátsa nak ekpaqneyam, aptáhak axta s'e: “Wánxa kaxwók sektaqnagko keso náxop, eñama apkeltémakxa énxet'ák, hakte apketkok apkeynmókxa énxet wánxa kaxénmakha apwáxok elának aqsok ekmaso. Mamasséssemek han chá'a kaxwók ma'a ekyókxoho aqsok nawha'ák, sektáhakxa nak se'e kaxwo' nak.”

Esdras 6:10

yaqwayam enxoho kólmések Dios apha nak néten ma'a aqsok ektekyawa ekleklamo nak apwáxok, tén sa' hélmaxnéssesek ko'óxa, tén han ma'a étchek nak.

Job 42:8

Kólnáhap sa' kaxwók siete weyke kelennay'awo, tén han siete nepkések apkelennay'awo, keñe sa' kólyo'ókxak ma'a séláneykha Job, kóltemésses sa' aqsok élwatnamáxche eñama kéxegke. Séláneykha Job sa' elmaxnéssesek kéxegke, keñe sa' ko'o amok takha' apkelmaxnagko, matnéssessamók sa' exma ekmaso xama enxoho, payhawok eykhe atnéssesek eñama megkólteméssesso chá'a naqsók sélxeyenma, aptéma nak ma'a séláneykha Job apteméssessama chá'a naqsók sexeyenma.”

Éxodo 29:18

Epekken sa' néten ekwatnamáxchexa aqsok ma'a nepkések apkennawo nak, etnéssesek sa' aqsok ekwatnamáxche yaqwayam hegkések ko'o, sektáha nak Wesse' kélagkok, tén han aqsok ekwatnamáxche' ekmátsa nak ekpaqneyam atekhánek ko'o.

Isaías 42:21

Apmenyeyk eykhe elának ekyawe tén han ektaqmalma nélxekmowásamáxche apagkok ma'a Wesse' egegkok eñama apteme Dios segwagkasso teyp;

Isaías 53:10

Mékoho axta apkeltémok etnéssesek Wesse' egegkok apméssama aplegeykegkoho neyseksa apha m'a. Ahóxek sa' nahan katnehek apha eñama apmeyásamákpoho apagko' yaqwayam emátog ekyaqmageykekxa mólya'assáxma, kammohok sa' apkelwet'a m'a aptawán'ák neptámen nak; sa' kañék ekteyapma aqsok yaqwayam nak elának Wesse' egegkok xa.

Levítico 1:13

Énxet apyentameykenta nak aptósso nepkések yaqwayam ewatnakpok, kéméxcheyk elyenyeksek ma'a ekhéyak nak apwáxok, tén han ma'a apmagkok nak, tén sa' apkelmaxnéssesso Dios énxet'ák apagkok elwatnek ekyókxoho m'a néten nak ekwatnamáxchexa aqsok, yaqwayam katnehek apmésso naqsa ekmátsa nak ekpaqneyam etekhánek Wesse' egegkok.

Levítico 1:17

Keñe sa' elmássesagkok apxampagkok epaxqátek nepyeseksa, meyke apyenyókasso mók ma'a appáxqatma nak nepyeseksa, ewatnek sa' ma'a néten yántápak nak, cham'a néten ekwatnamáxchexa nak aqsok, yaqwayam katnehek apmésso naqsa ekmátsa nak ekpaqneyam etekhánek Wesse' egegkok.

Levítico 1:9

Énxet apyentameykenta nak aptósso yaqwayam kawatnaxche', kéméxcheyk elyenyeksek ma'a ekhéyak nak awáxok, tén han ma'a amagkok. Keñe sa' apkelmaxnéssesso Dios énxet'ák apagkok elwatnek ekyókxoho m'a néten ekwatnamáxchexa nak aqsok, yaqwayam katnehek apmésso naqsa ekmátsa nak ekpaqneyam etekhánek Wesse' egegkok.

Levítico 14:18

keñe sa' ma'a eyeymomáxche nak pexmok égmenek, eyegkenchesek apqátek ma'a ektáha nak kéláxñassáseykekxa apyempehek. Keñe sa' etaksek apkelmaxnéssesso Dios énxet'ák apagkok meyaqmagkáseykekxa Wesse' egegkok mey'assáxma xa énxet nak.

Levítico 15:15

Egkések sa' apkelmaxnéssesso Dios énxet'ák apagkok xama, yaqwayam etnéssesek aqsok ekmatñá ekyánmaga magya'assáxma, keñe sa' ma'a pók nak yaqwayam ewatnakpok, cháxa peya sa' elának nápaqto' Wesse' egegkok ma'a apcháxñáseykekxa nak apyempehek énxet eksekkeneykha nak apyegmenek.

Levítico 19:22

Cháxa nepkések apkennawo' apmatñà nak ekyánmaga nensexnánémaxche', elmaxnéssesek sa' apkelmaxnéssesso Dios énxet'ák apagkok yaqwayam meyaqmagkásekxeyk Wesse' egegkok mey'assáxma xa énxet nak, keñe sa' megkólyaqmagkásekxeyk ma'a mey'assáxma apkelane.

Levítico 2:2

keñe sa' kólsakxések ma'a Aarón apketchek, apteme nak apkelmaxnéssesso Dios énxet'ák apagkok, tén sa' xama nak ma'a, emok xama apmek hótáhap yetlo pexmok égmenek, yetlo nahan ma'a ekyókxoho aqsok ánek ekmátsa nak ekpaqneyam éten agkok, keñe sa' elwatnek ma'a néten ekwatnamáxchexa nak aqsok, yaqwayam katnehek kélmésso naqsa kélwatno ekxénweykekxoho kélwáxok, ekmátsa nak ekpaqneyam etekhánek Wesse' egegkok.

Levítico 2:9

Keñe sa' apkelmaxnéssesso Dios énxet'ák apagkok elmok ketsék ma'a kélmésso naqsa nak aqsok, yaqwayam elwatnek ma'a néten ekwatnamáxchexa nak aqsok, yaqwayam katnehek kélmésso naqsa kélwatno ekxénweykekxoho kélwáxok, cham'a ekmátsa nak ekpaqneyam etekhánek Wesse' egegkok.

Levítico 4:19

Keñe sa' han elhaxyawássesek weyke étkok kennawo' ekyókxoho pexmok agkok, tén sa' elwatnek ma'a ekwatnamáxchexa nak aqsok.

Levítico 4:26

elwatnek sa' ekyókxoho pexmok ma'a néten nak ekwatnamáxchexa aqsok, ekhawo kélteméssessamakxal'a m'a kéltósso ekmatñá pexmok agkok kélmésso nak segwetassamo nak sẽlásekheykekxoho. Cháxa peya sa' apkelmaxnéssesso Dios énxet'ák apagkok katnehek apwetasso megkólyaqmagkáseykekxa mey'assáxma m'a apkemha apmonye' nak, megkólyaqmagkásekxeyk sa' ektémakxa mey'assáxma.

Levítico 4:35

Keñe sa' elhaxyawássesek ma'a ekyókxoho pexmok agkok nak, ekhawo kélteméssessamakxal'a m'a nepkések apmatñà kélmésso naqsa segwetassamo nak sẽlásekheykekxoho, elwatnek sa' pexmok ma'a ekwatnamáxchexa nak aqsok, yetlo m'a apwatno apmésso naqsa nak Wesse' egegkok. Cháxa peya sa' katnehek apwetasso apkelmaxnéssesso Dios énxet'ák apagkok megkólyaqmagkáseykekxa apkelane mey'assáxma xa énxet nak, megkólyaqmagkásekxeyk sa' mey'assáxma.

Levítico 5:10

Keñe sa' ma'a pók nak, ewatnek sa', ekhawo m'a kéltémókxal'a chá'a katnehek élánamáxche', cháxa peya sa' etaksek apkelmaxnéssesso Dios énxet'ák apagkok megkólyaqmagkáseykekxa mey'assáxma apkelane xa énxet nak, keñe sa' megkólyaqmagkásekxeyk aptémakxa mey'assáxma.

Levítico 5:6

keñe sa' éntemekxések Wesse' egegkok xama aptósso apkelwána, yaqwayam etnehek apchaqhe ekyánmaga m'a mey'assáxma apkelane nak, xama nepkések, essenhan xama yát'ay; keñe sa' xa aptósso apchaqhe nak, apkelmaxnéssesso Dios énxet'ák apagkok sa' etaksek megkólyaqmagkáseykekxa mey'assáxma xa énxet nak.

Levítico 8:21

tén axta apkelyenyesa yegmen ma'a ekhéyak apwáxok nak, tén han ma'a apmagkok nak nepkések apkennawo', apkelwatneyk axta ekyókxoho néten ekwatnamáxchexa nak aqsok apteméssesa aqsok ekwatnamaxche', tén han aqsok kélmésso naqsa ekmátsa nak ekpaqneyam etekhánek Wesse' egegkok, ekhawo m'a apkeltamhókxa axta etnehek Wesse' egegkok.

Números 15:25

Keñe sa' apkelmaxnéssesso Dios énxet'ák apagkok etnéssesek ma'a kélteméssessamakxal'a chá'a, yaqwayam etaksek megkólyaqmagkáseykekxa melya'assáxma m'a apyókxoho énxet'ák Israel, mayaqmagkásekxeyk sa' nahan ko'o melya'assáxma m'a, hakte háwe apmáheyo apagko' elanagkok melya'assáxma, élsántegkessek nahan ko'o m'a apkelmésso naqsa aqsok, tén han apnaqtósso apkelnapma, ekyaqmageykekxa melya'assáxma.