Levítico 26:16 - Biblia Enxet

¹⁶ sa' atnéssesek ko'óxa kélxegkáxa s'e: wáphássesek sa' aqsok segyegwakkassamo nak, tén han negmasse segaqhamo nak, ekmexanma egyempehek, tén han negmasse élmaso nak egaqta'ák, tén han ma'a ekyelqamáxche egyempehek; kaqhok sa' kólchenekxak aqsok, hakte kélenmexma sa' etókasek ma'a aqsok kélcheneykekxa kélnakxo.

Levítico 26:16 ပူးပေါင်းရင်းမြစ်များ

1 Reyes 8:37

“Meyk segaqhe sa' agkok tépak se'e apchókxa nak, essenhan negmasse ekmaso, essenhan élyamégko enxoho aqsok kélcheneykekxa eñama ekmexanma, essenhan ekwa'a enxoho askok ekto kélcheneykekxa', sawa' essenhan kéyek; apwakhegwa'a enxoho han sẽlenmexma s'e tegma apkelyawe egagkok nak, tén han segketamokmo enxoho, essenhan segáhapwa'a enxoho mók ektémakxa ekmaso negheykha, essenhan ma'a negmasse,

Job 18:11

Elmeneyha sa' chá'a apmahágkaxa enxoho; eyaqmasakpok sa' chá'a apmahágkaxa enxoho.

Job 20:25

Kamallánek sa' kayaqxák ma'a yágke, keyphagwakxak sa' naw'a aphekhek nak. Awanhek sa' katnehek apkeye;

Job 31:8

pók énxet sa' etwok ma'a aqsok séneykekxa nak, elpátekkesek sa' han.

Salmos 109:6

Etnésses xama énxet ekmaso aptémakxa apkelyekpelchémo chá'a, elsexnáneyekxohok sa' chá'a apagko' ma'a apkelánekxésso nak chá'a amya'a;

Salmos 73:19

¡Ekmanyehe sa' kólmasséssók! ¡Apkelaye sa' kasáwa'!

Salmos 78:33

Axta keñamak apmassésseykmo Dios ekmanyehe agko', ektémól'a xama negwátekhapma, asagkek axta ektémakxa apkeletsapma.

Éxodo 15:26

Aptáhak axta apkeláneya s'e: “Kélhaxnawók agkok chá'a kéxegke meyke kéltawásseyo kóleyxhok ma'a sektáhakxa enxoho chá'a séláneya, ko'o sektáha nak Wesse' Dios kélagkok, tén han kéllana enxoho chá'a m'a ekpeykeseykekxoho nak chá'a ko'o ewáxok, kélyahákxoho enxoho nahan chá'a m'a séltémókxa nak chá'a kóltéhek, tén han kéllana enxoho chá'a m'a segánamakxa ahagkok nak, magwáphaksek sa' ko'o xama enxoho m'a aqsok ekmaso nenlegeykegkoho, seyáphasa axta ko'o nepyeseksa m'a egipcios, hakte ko'o sekteme Wesse', ektáha nak chá'a apkelmeyáseykekxa kélyennaqte kéxegke.”

Proverbios 3:33

Aqsok ekmaso chá'a yahak Wesse' egegkok apxagkok ma'a énxet ekmaso nak aptémakxa', aqsok ektaqmela eyke chá'a etekkessesek aphakxa m'a énxet ekpéwomo nak aptémakxa'.

Isaías 10:4

Sa' agkok kéxegke kólháxahagkok nepyeseksa m'a apkelmomap nak tén han ma'a aptekyawa axta neyseksa kempakhakma, kóletsaphok sa' xamo'. Makke kamassak makham aplo m'a Wesse' egegkok; xénchek makham apwáxok ellegássesagkoho'.

Isaías 62:8

Naqsók kaxwók aptáha appeywa Wesse' egegkok apya'asa néten apaktog apkelya'assamakxa ekha nak ekyennaqte s'e: “Magwohók sa' chá'a kaxwók etawagkok hótáhap apaktek kélagkok ma'a kélenmexma nak. Magwohok sa' nahan kaxwók énagkok vino kélláneyák nak ma'a énxet'ák apkeleñama nak mók nekha;

Isaías 7:2

Kéllegássekxeyk axta wesse' apwányam Ahaz xa amya'a nak tén han ma'a ekheykha nak apxagkok: “Appasmeykxeyk énxet'ák Siria m'a Efraín énxet'ák apagkok.” Yetlókok axta nahan apkelpexyennama m'a wesse' apwányam tén han ma'a énxet'ák, máxa axta aptamhágkok ma'a ektémól'a yámet kalpexyennegkesek éxchahayam ma'a yókxexma.

Jeremías 12:13

Apkeneykegkek hótáhap, keñe apnakxeykegko menóke; eyaqhémo temégweykmok ma'a ekyókxoho apkeltamheykha nak. Ántawók ekyexna aqsok kélcheneykekxa, eñama seklómo ahagko' ko'o.”

Jeremías 15:3

“Ektáhak ko'o sekpeywa s'e, sektáha nak Wesse': Wahak sa' ko'o cuatro ektémakxa apkellegeykegkoho: etekyók sa' kempakhakma, semheg sa' kalyenyawasha, máma sa' etawagkok aphápetek, tén han aqsok nawha'ák éllo.

Jeremías 15:8

Ekxámásekxeyk nahan nepyeseksa m'a kelán'a tampe, yeykhásseykmók ma'a ekweykenxa nak ekxámokma yagkamex ekhéyak neyáwa wátsam ekwányam. Yetseksók ekhem agko' axta ko'o élnápak ma'a chána yetlo étchek wokma'ák nak makham; ekpelakkassessek axta seyhe éltamheykha awáxok, tén han élaye.

Jeremías 20:4

Hakte aptáhak Wesse' egegkok se'e: ‘Apkelmeneykha apxakkók sa' ko'o atnessásekxak xép, yeyk sa' nahan chá'a m'a apyókxoho apnámakkok nak; nápaqtók sa' xép elnáhakkasek apkelenmexma m'a apnámakkok nak. Almések sa' ko'o apyókxoho énxet'ák Judá m'a wesse' apwányam Babilonia, enaqlakxak sa' ma'a Babilonia essenhan elnápok.

Jeremías 5:17

Etókasek sa' ma'a aqsok ekyexna apkeneykekxa, tén han apto, elnáhakkasek sa' nahan ma'a apketchek apkelennay'a tén han kelwán'ák. Etókasek sa' nahan ma'a nepkések apnaqtósso, tén han weyke, anmen yámet apkeneykekxa, tén han higo yámet. Sókwenaqte sa' elmaha emasséssók ma'a tegma apkelyawe ekyennaqte nak kélhaxtegkáseyak nepyáwa', cham'a apchásenneykekxo nak chá'a exchep.”

Ezequiel 24:23

Megkólwanchek sa' kólweynchamha meyke kélatchesso kélpátek tén han meyke kélatchesso kélmagkok. Megkóltekkesek sa' éllapwáméyak tén han kéllekxagweykha. Kólyelqaxchek sa' eñama kéltémakxa élmasagcha'a, kóllekxagwaha sa' chá'a kóllanok kélmók.

Ezequiel 33:10

“Xép énxet, etne sa' elának énxet'ák Israel se'e: ‘Kéltemék chá'a kélpaqméteykencha'a kéxegke s'e: yentexók agkók negko'o nentémakxa élmasagcha'a tén han mólya'assáxma. Cháxa keñamak eksawha nak nélyennaqte. Mogwanchek kaxwók anlenxanmagkohok nélweynchámeykha.

Amós 5:11

Megkólhakha sa' ma'a kélxanák apkeltaqmalma kélláneyak axta meteymog eñama kélnaqtawáseykegkoho m'a meyke nak aqsok apagkok tén han kéltémo elyánmagkasek chá'a hótáhap apaktek elmések kéxegke, megkólyenagkek sa' nahan vino éleñama m'a kélcheneykekxa nak.

Miqueas 6:15

Eknekxak sa' eykhe chá'a aqsok aktek, menakxek sa' eyke chá'a ekyexna; elyaqhápok sa' eykhe olivo ekyexna, memha sa' eyke m'a pexmok agkok; elteyammok sa' eykhe m'a anmen yámet ekyexna, ménhek sa' eyke m'a égmenek nak.

Hageo 1:6

Xámok kéxegke kélcheneykekxa aqsok, ántawók eyke kélnakxo ekyexna; kélteykegkek eykhe kéltéyak, makke kólyaqkáneykmok; kélyeneykegkek eykhe vino, makke kamassék élnapma ekhem; kélántaxneykekxeyk eykhe kélántaxno apkelyentaxno, makke kalmexanmak kélyempe'ék; keñe m'a énxet kélyánmagkasso nak chá'a apkeltamheykha xama ekhem, megkawakxók chá'a ekyánmaga aptamheykha m'a aqsok élmomnáwa.

Zacarías 14:12

Ellegássesagkohok sa' eyke ekyentaxno agko' Wesse' egegkok ma'a pók aptémakxa énxet'ák ektáha axta chá'a apkelnápomap ma'a Jerusalén: kaltepelchexchek sa' aphápetek meletsapakxoho m'a énxet'ák apagkok nak tén han ma'a kañe' apaqta'ák nak ekweykekxoho m'a apaxkok nak.

Malaquías 2:3

“Alyelaqtések sa' ko'o kéxegke, ayenhásekxak sa' kélnát ma'a kéltósso ekteyáseykha kélyentameykenta nak chá'a yaqwayam kólaqhek. ¡Kólchexeyxchek sa' nahan xamók kéxegke m'a kéltósso ekteyáseykha nak!

Deuteronomio 28:51

Etókasek sa' ma'a étkók nak weyke kélnaqtósso tén han ma'a ekyexna nak eñama m'a xapop kélagkok, ekwokmoho apteméssesa meyke agko' aqsok; megyeygkesek sa' ma'a hótáhap apaktek, tén han ma'a vino, tén han ma'a pexmok égmenek, tén han ma'a étkok nak ma'a weyke kélnaqtósso tén han nepkések, kólmaskok sa' meyk élnapma.

Deuteronomio 32:25

Etekyók sa' apketchek ma'a neyseksa ámay, keytek sa' nélmeneykha m'a kañe' apxanák; eletsapok sa' ma'a wokma'ák tén han kelán'a étkók, tén han apkelwányam tén han ma'a sakcha'a mekxakha nak makham neme.

Jueces 6:11

Tén axta apxegakmo Wesse' egegkok apchásenneykha, apha'ak axta kóneg yámet encina, émha axta m'a Ofrá, ektáha axta apagkok ma'a Joás, Abiézer axta apnámakkok. Apyexanmawók axta apkexakkasa apyempe'ék hótáhap apaktek ma'a Gedeón, Joás axta apketche, cham'a kélteyammomakxa axta chá'a anmen yámet, yaqwayam kalanaxchek vino, yaqwayam enxoho han métyehek ma'a madianitas.

1 Samuel 2:33

Aleymok sa' eyke ko'o nápakha apnámakkok ma'a keto' nak ekwatnamáxchexa nak chá'a aqsok ahagkok, yaqwayam sa' enathak chá'a, tén han keyntexhok agko' chá'a apwáxok, keñe sa' ma'a pók aptawán'ák neptámen nak, esawhakpohok etekyók.