Jueces 14:3 - Biblia Enxet

³ Keñe axta chána ektáha eyáneya s'e: —¿Yaqsa ektáha apmako nak etegyágwók aptáwa' nepyeseksa m'a filisteos melya'áseyak nak Dios? ¿Mékoya kelán'a negyeseksa negko'o néleñémeyo xamo', essenhan nepyeseksa apyókxoho nak ma'a israelitas? Aptáhak axta Sansón apchátegmowágko: —Wánxa eyke ko'o ekleklamo ewáxok ma'a kelán'a étkok nak, cháxa séltamho nak ko'o hélmések yaqwayam atnehek etáwa'.

Jueces 14:3 ပူးပေါင်းရင်းမြစ်များ

Génesis 13:8

Aptáhak axta Abram apcháneya Lot se'e: “Émók ahagko' ko'o exchep, megkapayhawok ólenmexaxche', megkapayhawok han elenmexakpok ma'a apkeláneseykha nak xép apnaqtósso, tén han séláneseykha nak ko'óxa seknaqtósso.

Génesis 21:27

Tén axta Abraham apnaqlánto nepkések tén han weyke apkelmésa m'a Abimélec; cháxa apkelánegkaxa axta han ekhémo mók apkelpaqhetchásamákpoho xa apqánet nak.

Génesis 34:14

Aptáhak axta apcháneya s'e: —Mogwanchek negko'o agmések egyáxeg xama énxet megkólyenyekhássesso nak nekha apyempehek, hakte hegmegqaksohok negko'o meyke nak kélteméssesso xa ektáha nak.

2 Samuel 1:20

Ná kóltennasha aqsa m'a énxet'ák apheykha nak Gat, nágkóltennaha m'a ámay nak Ascalón, yaqwayam enxoho megkalessawaksók ma'a kelán'ák nak filisteas, tén han megkalnextegmakha néten kalátsaha xa kelán'ák megkalya'áseyak nak Dios.

Josué 23:12

Hakte éltamhók ko'o kólya'asagkohok se'e: kélyetnakhássek sa' agkok Dios, kélpáxaqwokmek sa' agkok énxet'ák apheykha nak makham kélnepyeseksa kéxegke, kélmágko enxoho kóltamhagkok kélnaqteyegka'a m'a kelwán'ák nak, melántekkesek sa' kélmonye'e kéxegke Dios Wesse' kélagkok xa énxet'ák nak, máxa yám'én sa' aqsa etnéssesagkok tén han kelhanma, yaqwayam sa' kalmok chá'a kéxegke, máxa kelyekpexchetma sa' etnéssesagkok elyensássesek kélkap'ák, máxa am'ák sa' etnéssesagkok elyetxeygkok kélaqta'ák, ekwokmoho kélsawhéxkoho kélagko' kéxegke s'e xapop ektaqmalma, apmésso axta m'a Dios Wesse' kélagkok.

Jueces 14:2

xama axta apwákxo makham ma'a apxagkok, apkeltennáseyha axta chána, aptáhak axta apkeláneya s'e: —Ekwetágwokmek ko'o xama kelán'a filistea m'a Timná, éltamhók eykhe héllanaksek amya'a yaqwayam atnehek etáwa'.

Jueces 15:18

Apwóneyha axta Wesse' egegkok ma'a Sansón, hakte hem agko' axta entáhak. Axta aptáhak apcháneya s'e: “¡Egkéssek xép ekyawe agko' sekmallanma! ¿Péya yohok aqsa watsapok hem seyaqhe, tén han hemok se'e énxet'ák melya'áseyak nak Dios?”

1 Samuel 14:6

Tén axta Jonatán aptáha apcháneya m'a apchásenneykha: —Nók, ólyeykhekxak ma'a neyp nak, apheykegkaxa nak ma'a énxet'ák meyke nak kélyenyekhássáseyak nekha apyempe'ék. Lapmaxcheyk sa' elának aqsok Wesse' egegkok hempasmok negko'o, hakte yeskohok hegmallahanchesek ma'a, megkeyxek nenxámokma essenhan egqántawo'.

1 Samuel 17:26

Keñe axta David aptáha apkelmaxneyáncha'a m'a apchaqneykha axta nápakha: —¿Yaqsa aqsok kólmések énxet apchaqhe enxoho xa filisteo, keñe han apmasséssesso enxoho apkelmegqakto m'a Israel? ¡Mékoho apagko' xa filisteo mey'áseyak nak Dios, kaqhok etnehek elxénmakha ekmaso Dios memassegwayam nak sẽlpextétamo apagkok xa ektáha nak!

1 Samuel 17:36

Cháxa sektémakxa ko'o waqhek méwa essenhan aqsok nawhak eklo, ko'o sektáha nak xép apkeláneykha wesse'. Kaxhok sa' han ektáhakxa xa filisteo mey'áseyak nak Dios, hakte apkellókaseykegkek chá'a m'a Dios memassegwayam nak sẽlpextétamo apagkok.

1 Samuel 31:4

Tén axta aptáha apcháneya m'a apkelsókáseykha axta chá'a apkelmeykha apkenchesso kempakhakma: —Elek sókwenaqte apagkok keñe sa' hélyetxa', hey'áwa katnehek ma'a énxet'ák melya'áseyak nak Dios, keñe heyaqhek, hetwasagkoho'. Axta eyke elyahákxak ma'a apchásenneykha nak, hakte apkekak axta. Keñe axta Saúl apmawo apagko' ma'a sókwenaqte apkelyetxeykpekxoho.