Josué 9:1 - Biblia Enxet

¹ Apkelleg'ak axta amya'a ektáhakxa m'a apkelwesse'e apagkok nak hititas, amorreos, cananeos, ferezeos, heveos, tén han ma'a jebuseos. (Cháxa apkelwesse'e nak, axta apheykha m'a neyáwa wátsam Jordán ekpayho nak ektaxnegwánxa ekhem, ekxámakxa nak meteymog élekhahéyak, tén han ma'a ekpayhegweykenxa nak xapop, apyetleykekxeyk axta han apheykha m'a neyáwa wátsam ekyawe Mediterráneo ekweykekxoho m'a yókxexma Líbano.)

Josué 9:1 ပူးပေါင်းရင်းမြစ်များ

2 Samuel 24:7

Keñe apkelmeyákxo m'a apyetnamakxa nak tegma apyennaqte Tiro, tén han ma'a apyókxoho tegma apkelyawe apagkok nak heveos, keñe han cananeos, ekwokmoho apkelyephagweykxo m'a ekpayho nak nepyeyam ma'a Judá, cham'a Beerseba.

Éxodo 23:23

Seyásenneykha sa' eyke exog apmonye' exchep, tén sa' eyentamok ma'a amorreos apchókxa, hititas, ferezeos, cananeos, heveos tén han ma'a jebuseos, cham'a yaqwánxa nak amasséssók apyókxoho.

Éxodo 23:31

Keso sélqahássesso yaqwánxa chá'a katnehek néxa xapop kélagkok se'e, eyeynamo sekxók ma'a Wátsam Ekyexwase nak ekweykmoho m'a wátsam ekwányam apagkok nak ma'a filisteos, tén han eyeynamo m'a yókxexma meykexa nak énxet ekweykmoho m'a wátsam Éufrates. Ekméssek ko'o yaqwayam kólmok énxet'ák apheykha nak xa apkelókxa nak, emenxenek sa' xeyep ma'a apwánxa enxoho.

Éxodo 3:17

Éltennássek axta nahan ko'o apxéna kéxegke apmako elmallahanchesek ma'a ektémakxa nak kéllegeykegkoho m'a Egipto, apxéna elya'aksek ma'a yókxexma apagkok nak ma'a cananeos, hititas, amorreos, ferezeos, heveos, tén han ma'a jebuseos; cham'a xama xapop ényahamakxa nak weyke nagkeygmenek, tén han ma'a yányawhéna' apyegmenek ektémól'a kanyehek ma'a yegmen.’

Éxodo 34:11

“Kóllána sa' sakhem ma'a séltamho exchek ko'o kóllána', keñe sa' ko'o alántekkesek kélnepyeseksa kéxegke m'a amorreos, cananeos, hititas, ferezeos, heveos tén han ma'a jebuseos.

Números 13:29

Keñe m'a yókxexma Négueb apheykencha'a m'a amalecitas. Keñe m'a yókxexma ekxámokmakxa nak meteymog élekhahéyak apheykencha'a m'a hititas, jebuseos tén han ma'a amorreos, keñe m'a nekha nak wátsam ekwányam, ekpayho nak ma'a wátsam Jordán apheykencha'a m'a cananeos.

Números 34:6

“Keñe sa' ma'a néxa xapop ekpayho nak ektaxnegwánxa ekhem, katnehek sa' néxa m'a nekha nak wátsam ekwányam Mediterráneo.

Deuteronomio 1:7

Kólmekxa sa' aqsok kélagkok, kólmohók sa' ma'a egkexe élekhahéyak apagkok nak amorreos, tén han ma'a ekyókxoho yókxexma nekhaw'ék nak: cham'a Arabá, tén han ma'a yókxexma ekxámokmakxa nak meteymog élekhahéyak, tén han ma'a eyáxñeyo meyke nak élekhahéyak xapop, tén han ma'a Négueb, tén han ma'a neyáwa wátsam ekwányam nak, tén han ma'a cananeos apchókxa tén han ma'a Líbano, ekweykmoho m'a wátsam ekyawe nak Éufrates.

Deuteronomio 3:25

Éltamhók ko'o heyhok ayeykhekxak ma'a neyp wátsam Jordán, hakte émenyeyk ko'o ótak ma'a xapop ektaqmalma nak, cham'a yókxexma ektaqmalma ekxámokmakxa nak ma'a meteymog élekhahéyak tén han ma'a egkexe Líbano.’

Deuteronomio 4:49

tén han ma'a ekyókxoho nak yókxexma Arabá, teyapmakxa ekhem nak ma'a wátsam Jordán, ekweykekxoho m'a Wátsam Ekwányam Étsapma, awhak nak ma'a egkexe Pisgá.

Deuteronomio 7:1

“Elántaxnések sa' Wesse' egegkok, Dios kélagkok nak kéxegke m'a apchókxa kélmaheyókxa nak kólmok kóltéhek kélagkok, elántekkesek sa' kélmonye'e m'a siete pók aptémakxa énxet'ák apxámokma nak tén han apkelyennaqte megkólhawo nak kéxegke: cham'a hititas, gergeseos, amorreos, cananeos, ferezeos, heveos tén han ma'a jebuseos.

Josué 1:15

ekwokmoho apmésa sa' Wesse' egegkok ma'a xama yókxexma yaqwánxa enxoho ellókassók apkelyampe, ekhawo m'a ektáhakxa axta apmésa kéxegke, kenhan ekwokmoho sa' aptáha apagkok apagko' xa xapop peya nak egkések Wesse' egegkok. Keñe sa' kéxegke kélwanchek kólmeyenták makham se'e xapop kélagkok ekpayhókxa nak ekteyapmakxa ekhem ma'a wátsam, yaqwayam kóltéhek kélagkok kélagko' xa xapop nak, apmésso axta m'a Moisés, apteme axta Dios apchásenneykha.

Josué 1:4

Agkések sa' kéxegke xapop kélagkok eyeynókxa nak ma'a yókxexma meykexa énxet, ektemegwánxa nak néxa yókxexma élekhahéyak ma'a Líbano, ekweykmoho wátsam ekwányam Éufrates, tén han ma'a ekyókxoho xapop apheykegkaxa nak énxet'ák Hititas, néxa m'a wátsam ekwányam nak Mediterráneo.

Josué 10:23

Apkelyahákxók axta m'a énxet'ák nak Israel, apkelántekkessákxeyk axta kañe' meteymog áxwa m'a apkelwesse'e apkelwányam apkeleñama nak Jerusalén, Hebrón, Jarmut, Laquis tén han ma'a Eglón.

Josué 11:17

Apkelmomchek axta Josué apyókxoho apkelwesse'e m'a apheykegkaxa nak tén han apkelnapma, eyeynókxa m'a egkexe Halac, ekmeheykegko m'a yókxexma nak Seír, néxa m'a Baal-gat, ekpayho nak ekpayhegweykenxa xapop ma'a Líbano, kóneg nak ma'a egkexe Hermón.

Josué 13:5

Kéméxcheyk han ma'a xapop apagkok nak guiblitas, keñe han ma'a ekyókxoho yókxexma nak Líbano ekpayho nak ekteyapmakxa ekhem, eyeynókxa m'a Baal-gat, émhakxa nak ma'a egkexe Hermón, ekweykekxoho m'a nentaxnamakxa nak ma'a Hamat.

Josué 15:12

Wátsam ekwányam Mediterráneo axta ektáhakxa néxa xapop ekpayho nak ektaxnegwánxa ekhem. Cháxa néxa xapop apagkok ekpehewayam axta apkelxawéyak ma'a Judá énxet'ák apagkok, kélexpánchesso axta nepyeseksa m'a ektáhakxa nak chá'a apnámakkok ma'a énxet'ák.

Josué 22:4

Apkelanak kaxwók ma'a apkeltennassama axta elána', aptaqmelchessáseykxeyk han apheykha m'a kélyáxeg'a, kólmeyekxa sa' kaxwók ma'a kéleñamakxa kélpakxeneykegkaxa axta, xapop apméssamakxa axta m'a Moisés, apteme axta Wesse' egegkok apchásenneykha, teyp nak ma'a wátsam Jordán, ekpayho nak ekteyapmakxa ekhem.

Josué 22:7

Apméssegkek axta Moisés xapop apagkok nápakha nak Manasés énxet'ák apagkok ma'a yókxexma Basán. Tén axta han ma'a pók nápakha nak Manasés énxet'ák apagkok apméssama Josué xapop apagkok ma'a nepyeseksa nak israelitas, halep nak Jordán, ekpayho nak ektaxnegwánxa ekhem, apkelmaxnéssessek axta apkeltamho epasmok Dios ma'a apmonye'e axta, keñe axta apkeltamho eltaqhohok makham.

Josué 23:4

Élmeyáseykegkek axta ko'o kéxegke xapop kélagkok sektawassama xama aqsok nepyeseksa énxet'ák kélagkok. Axta waxpánchessók ko'o wánxa m'a xapop élmomaxche axta, éxpánchessegkek axta han ma'a megkalmomaxche axta makham, eyeynókxa m'a wátsam Jordán ekpayho nak ekteyapmakxa ekhem, ekweykekxoho m'a wátsam ekwányam Mediterráneo, ekpayho nak ektaxnegwánxa ekhem.

Josué 24:11

Tén axta kélyeykheykekxo kéxegke m'a wátsam Jordán, kélweykmek axta m'a Jericó. Keñe m'a apheykha axta Jericó (cham'a amorreos, ferezeos, cananeos, hititas, gergeseos, heveos tén han ma'a jebuseos) apkelnápomákpo kéxegke, éltémók axta eyke ko'o kólmenxenek ma'a.

Josué 3:10

Kólya'asagkohok sa' kéxegke apha kélnepyeseksa m'a Dios memassegwayam nak, peyk sa' agkok kólwomok kéxegke m'a yókxexma nak, Dios sa' emenxenchesek ma'a cananeos, tén han hititas, keñe han ma'a heveos, tén han ma'a ferezeos, tén han gergeseos, keñe han amorreos, tén han ma'a jebuseos.

Josué 3:17

Apyókxoho énxet'ák axta apkeltámeyákxa', hakte yamakawók axta m'a wátsam nak Jordán, keñe m'a apkelmaxnéssesso nak Dios énxet'ák apagkok, appatmeykha axta m'a yántéseksek ekhémo mók nélpaqhetchásamáxkoho apagkok nak Wesse' egegkok, apchaqnáha axta aqsa m'a neyseksa nak wátsam Jordán. Axta eltaqhaháha hakte yamakawók axta exma m'a.

Josué 5:1

Apyókxoho apkelwesse'e amorreos ektáha axta apheykha m'a taxnegwánxa ekhem neyp nak Jordán, keñe han ma'a apkelwesse'e cananeos apheykencha'a nak ma'a keto' nak wátsam ekwányam Mediterráneo, apkelya'ásegwokmek axta ektáha Wesse' egegkok apyamasso yegmen ma'a wátsam Jordán nak, neyseksa apkeltámeyeykekxa axta m'a énxet'ák Israel, keñe axta éltamheyncha'a apkelwáxok. Axta elya'ásegkok yaqwánxa etnahágkok peya elenmexek ma'a énxet'ák nak Israel.

Josué 6:27

Appasmomchek axta Wesse' egegkok ma'a Josué, payheykekxeyk axta apwesey m'a ekyókxoho yókxexma apheykegkaxa nak.

Josué 9:7

Apkelátegmowágkek axta énxet'ák Israel ma'a énxet'ák nak heveos: —Kexa eykhe kéleñamak kéxegke s'e keto' nak negko'o negheykegkaxa; ¿háxko katnehek negko'o anlanaksek xama ekhémo mók nélpaqhetchásamáxkoho kéxegke?