Josué 7:12 - Biblia Enxet

¹² Cháxa keñamak ma'a énxet'ák nak Israel, mexók sa' elenmexek ma'a katnaha nak apnámakkok. Yenyahagkok sa' aqsa chá'a apmonye'e, hakte payhawók kaxwo' kólmasséssók ma'a énxet'ák Israel. Sa' agkok kólmasséssekmok kaxwók xa séltémo axta kéxegke kólmasséssók, maxek sa' chá'a makham kélnepyeseksa kéxegke.

Josué 7:12 ပူးပေါင်းရင်းမြစ်များ

Salmos 44:10

Apkeltamhók xép ónyahagkok apmonye'e m'a nélenmexma; ẽlmenyexchásegkek aqsok egagkok ma'a sẽltaqnagko nak, apkelsákxeyk ma'a apmakókxa enxoho chá'a elsakxa'.

Salmos 60:10

Hakte egkexakhamchek negko'o exchep Dios; ¡massék apkelyetlawa m'a sẽlpextétamo egagkok!

Proverbios 28:1

Méko eykhe chá'a kayaqmaksek ma'a ekyeyháxma nak, exyenmok aqsa chá'a, méko eyke katnehek chá'a apkelakakxa m'a apkelpéwomo nak, máxa etnahagkok ma'a ektémól'a yámakméwa.

Isaías 59:2

Aqsok ekmaso kélláneyák akke keñamak kéxegke ekhaxtegkessama kélmonye'e m'a Dios; megkólya'assáxma keñamak melányo chá'a kéxegke m'a tén han megyaháxenmo chá'a kélpeywa.

Jeremías 23:33

“Jeremías, aptemék sa' agkok xama énxet, essenhan aplegasso nak sekpeywa, essenhan apkelmaxnéssesso nak énxet'ák ahagkok elmaxneyha s'e: ‘¿Háxko apkeltémókxa antéhek Wesse' egegkok?’ Etne sa' elának se'e: ‘Apxénchek kéxegke Wesse' egegkok kéltáha apseykha ekyentaxno, peyk han yohok kólpallamok.’

Jeremías 6:8

Kastégho sa', Jerusalén, sa' agkok kastégak, ayenyók sa' eñama megkaleklo ewáxok, yókxexma meyke xama aqsok sa' atnessásekxa', meyke énxet apheykha kañe' sa' atnessásekxa'.”

Oseas 9:12

Kélwánegkessek sa' agkok kélketchek, ko'o sa' alyementemekxak meyke seyégkesso xama. ¡Asagkek sa' katnehek ektáhakxa xa énxet'ák nak, séxaya sa' ko'o!

Habacuc 1:13

Mopwanchek xép yohok aqsa katyapok aqsok ekmaso, hakte cháxña'awók aptémakxa, mopwanchek elanok yetlo ekleklamo apwáxok ma'a aqsok élmasagcha'a, ¿yaqsa ektéma exchep apwanmeyeykencha'a nak aqsa apkeláneykencha'a m'a énxet'ák apkelánéyak nak chá'a aqsok ekmaso agko'? ¿yaqsa ektéma apwanmeyeykencha'a nak apkeláneykencha'a m'a énxet'ák élmasagcha'a nak apkeltémakxa apmassésseykmo m'a énxet'ák megkaxnawo nak apkeltémakxa?

Números 14:39

Xama axta apkeltennáseyncha'a Moisés israelitas aptáhakxa apcháneya m'a Wesse' egegkok, apyókxoho axta kellapwámeygkok.

Números 14:42

Nágkólxeg aqsa, hakte metnahak apkelxegexma'a kéxegke m'a Wesse' egegkok. Emenxenek sa' kéxegke m'a kélenmexma nak.

Números 14:43

Apkelhaxneyk amalecitas ma'a kélmonye'e nak, tén han ma'a cananeos, yaqwayam elnapakpok kéxegke, tén han elnápok. Massék aptáha apkelxegexma'a kéxegke m'a Wesse' egegkok, eñama kélyamasma kéxegke.

Números 14:45

Tén axta amalecitas, tén han cananeos apheykencha'a axta m'a yókxexma nak apkelanyexakmo, apmenxenchek axta israelitas ekweykekxoho m'a Hormá, apsawhawók axta anhan apkelnapa.

Deuteronomio 7:26

Nágkólsakxa chá'a kélxanák xama enxoho m'a aqsok megkaleklamakxa nak chá'a egwáxok anlano', yaqwayam enxoho megkólmasséssemek kéxegkáxa. Xénamaxcheyk kólmasséssók ekyókxoho xa, kéméxcheyk chá'a kéxegke kólteméssesek aqsok megkaleklamakxa nak chá'a egwáxok anlanok xa.

Josué 6:18

Kóltaqmelchesaxkoho sa' kéxegke, nágkólma aqsa tén han nágkólpaknegwomho m'a aqsok ekhéyak nak ma'a tegma apwányam, hakte appenchessek apkelpagkanma Wesse' egegkok yaqwayam kólmasséssók xa aqsok nak. Sa' agkok kólyahákxak kéxegke xa, kélsexnenagko kélagko' sa' kóltéhek ma'a apkelpakxeneykegkaxa nak énxet'ák Israel, kólhágwakxak sa' ma'a ekmaso agko' nak.

Jueces 16:20

kelpáxamáha axta ekwónencha'a: —¡Sansón, filisteos apketamakmok! Apxatakha'ak axta Sansón, apkeneykek axta katnekxak makham ma'a ektémakxa axta chá'a, axta ey'ásegkok apyenyawa m'a Wesse' egegkok,

Jueces 2:14

Axta keñamak apkeltaqnaweykegko Wesse' egegkok ma'a israelitas, apkeltémok axta elyementamok aqsok apagkok ekyetnakxa axta m'a apkelmenyexeykegko axta chá'a, tén han apkeltémo elmok ma'a apkelenmexma, apheykha axta nepyáwa', meyke apmopwána elenmexekxa'.

Jueces 2:4

Xama axta appenchesa apteme appeywa Wesse' egegkok apchásenneykha xa ektáha nak, axta eleyságkohok apkellekxagweyncha'a m'a apyókxoho israelitas.

1 Samuel 14:38

Keñe axta Saúl aptáha s'e: —Kólmeyenta hana s'e kélyókxoho kélámha kélmonye'e nak sẽlpextétamo, kóltegyaha sa' amya'a yaqsa élana sakhem megkay'assáxma.