Josué 10:6 - Biblia Enxet

⁶ Tén ma'a énxet'ák apheykha nak yókxexma Gabaón, apcháphássesa han appeywa m'a Josué, aphakxa m'a apkelpakxeneykegkaxa nak yókxexma Guilgal: “Elyahakxoho sa' xeyep. Hempásegwata sa', hakte negko'o nentáha apkeláneykha. Hẽlmeyágwata sa', apchaqnákxeyk apyókxoho apkelámha apmonye'e amorreos, apkeleñama nak ma'a egkexe élwenaqte nak yaqwayam hegketámegma'.”

Josué 10:6 ပူးပေါင်းရင်းမြစ်များ

2 Reyes 4:24

Keñe axta éltamho kóltahanchessesek yámelyeheykok, axta táhak eyáneya m'a éláneykha: —Nók, exeg sa' apmonye'. Ná eyáqkassem aqsa maltamho enxoho eyáqkassók.

Salmos 125:2

Aptemék Wesse' egegkok apwakhaya énxet'ák apagkok ma'a ektémakxa nak egkexe ekwakhaya m'a Jerusalén, keso kaxwo' nak tén han megkatnégwayam néxa;

Isaías 33:22

Kelyelqamáxcheyk táma' kélnaqtete xa yántakpayhe ekyawe nak massegkek élyennaqtésso m'a yámet ekwenaqte agkok nak; megkólwanchek kólpeykásekxak ma'a apáwa agkok nak. Ólyementamok sa' ekxámokma agko' aqsok apagkok ma'a sẽlenmexma nak, kawomhok sa' apkelxawéyak aqsok apagkok ma'a meyke nak apaqta'ák, elmagkok sa' aqsok ma'a élmasagcha'a nak chá'a apyókxa apkelyelqamap nak chá'a. Hakte Wesse' egegkok apteme énxet segyekpelchémo egagkok, apteme senlánésso chá'a segánamakxa tén han wesse' apwányam egagkok, sa' hẽlwagkasek nahan teyp ma'a.

Números 13:29

Keñe m'a yókxexma Négueb apheykencha'a m'a amalecitas. Keñe m'a yókxexma ekxámokmakxa nak meteymog élekhahéyak apheykencha'a m'a hititas, jebuseos tén han ma'a amorreos, keñe m'a nekha nak wátsam ekwányam, ekpayho nak ma'a wátsam Jordán apheykencha'a m'a cananeos.

Deuteronomio 1:15

“Élmomchek axta chá'a ko'o énxet apkeleñama nak kélnepyeseksa kéxegke m'a énxet apmopwancha'a apagko' nak aqsok, tén han apkelya'áseykegkoho nak chá'a ektémakxa aqsok apkelwete, ekteméssessegkek axta ko'o apkelámha apmonye'e kélagkok kéxegke; ekméssegkek axta chá'a ko'o xama yaqwayam etnehek apkemha apmonye' nepyeseksa m'a mil énxet, tén axta pók sekméssama cien, tén axta nahan pók sekméssama cincuenta, tén axta pók sekméssama diez, tén axta nápakha sélméssama nahan yaqwayam eltaqmelchesek ma'a pók nápakha neghawóxama nak.

Josué 10:5

Keñe axta xa cinco apkelwesse'e apkelwányam nak amorreos, cham'a apkeleñama nak Jerusalén, Hebrón, Jarmut, Laquis, tén han Eglón, apchaqnákxeyk axta keñe apkelxega yetlo sẽlpextétamo apagkok yaqwayam yekhegwók ma'a keto' nak yókxexma Gabaón, keñe han ektamagkok.

Josué 10:7

Keñe axta aptepa Josué m'a yókxexma nak Guilgal, yetlo m'a apyókxoho sẽlpextétamo apagkok megyeye nak elmahagkok eyesagkexa'.

Josué 21:11

Apkelxawágkek axta m'a Hebrón, yókxexma ekxámakxa nak meteymog élekhahéyak ma'a Judá, cham'a tegma apyawe apagkok axta m'a Anac aptawán'ák neptámen, xama énxet apwenaqte axta, yetlo m'a yókxexma ektaqmelakxa nak pa'at.

Josué 5:10

Apkelpakxenwokmek axta énxet'ák Israel ma'a yókxexma Guilgal, taxnakmók axta apkelánegko m'a ekhem melwagqayam kéltéma nak Pascua, cham'a ekhem catorce, pelten nak. Axta payhók ma'a ekpayhegweykenxa nak xapop ma'a Jericó.

Josué 9:15

Keñe axta Josué apkelana xama ekhémo mók apkelpaqhetchásamákpoho yaqwayam keytek apkelásekhamakpoho, apkeltamhók axta megkólnáphe'; keñe axta han ma'a apkelámha apmonye'e nak énxet'ák Israel, apteméssesa naqsók peya etnahágkok xa ektáha nak.

Josué 9:6

Xama axta apkelwokmo m'a apkelpakxeneykegkaxa nak ma'a yókxexma Guilgal, aptáhak axta apcháneya Josué tén han ma'a énxet'ák nak Israel: —Tayépók agko' negko'o néleñamakxa. Hẽllanés hana kéxegke xama ekhémo mók nélpaqhetchásamáxkoho negko'o.

Josué 9:8

Axta eyke aptáhak apcháneya Josué m'a énxet'ák nak: —Apkeláneykha sa' antemhek negko'o exchep. Tén axta apkelmaxneyáncha'a m'a Josué: —¿Yaqsa énxet'ák kéxegke? ¿Háxko kéleñamakxa'?