Joel 2:17 - Biblia Enxet

¹⁷ Kóllekxagwaha apkelmaxnéssesso énxet'ák ahagkok, apkeltamheykha nak chá'a sekhakxa ko'o sektáha nak Wesse', kólteme kólpaqmétek émha amonye' apwáxok nak tegma appagkanamap, tén han élwatnamáxchexa nak aqsok se'e: “Wesse', elásekhekxoho énxet'ák apagkok; nágyoho aqsa ey'ássók xama énxet enxoho m'a énxet'ák apagkok; nágyoho enaqtawasagkohok ma'a pók énxet'ák nak, nágyoho etnehek énxet melya'áseyak nak xép se'e: ¿Háxko aphakxa Dios apagkok?”

Joel 2:17 ပူးပေါင်းရင်းမြစ်များ

1 Reyes 6:3

Keñe axta m'a apwáxok nentaxnamakxa nak tegma ekwokmo nueve metros ekwenaqte, hawók axta m'a ekwánxa axta appayhakxa tegma, keñe axta cuatro metros y medio appayhakxa m'a apmonye' nak tegma.

1 Reyes 9:7

alántekkesek sa' ko'o Israel ma'a xapop sekméssamakxa axta, alyetnakhaksek sa' sekhakxa tegma appagkanamap sekteméssessama axta appagkanamap, apkelasmésamap sa' atnéssesek Israel nepyeseksa m'a apyókxoho pók aptémakxa énxet'ák nak.

2 Crónicas 7:20

alántekkesek sa' ko'o kéxegke s'e xapop sekméssamakxa nak, alyetnakhaksek sa' sekhakxa tegma appagkanamap, sekteméssessama axta appagkanamap, kélasmésamaxche sa' atnéssesek nepyeseksa m'a apyókxoho pók aptémakxa énxet'ák nak.

2 Crónicas 8:12

Ewatnéshok axta chá'a Salomón aqsok Wesse' egegkok ma'a ekwatnamáxchexa nak aqsok, cham'a apkelane axta appekkenma m'a ekpayho nak apmonye' tegma appagkanamap,

Nehemías 9:36

“Elano sentémakxa negko'o s'e kaxwo' nak, sẽlásenneykha naqsa nentamheykegkok se'e apchókxa nak, apméssamakxa axta m'a ẽlyapmeyk nano', yaqwayam enxoho katókasek ma'a aqsok ektekkesso nak, tén han ma'a aqsok éltaqmela.

Salmos 115:2

Yaqsa ektéma aptéma nak chá'a sẽlmaxneyeykencha'a pók énxet'ák se'e: ¿Háxko aphakxa Dios kélagkok?

Salmos 42:10

Weykmok élmásse exchakkok, eñama sexéneykha ekmaso m'a sélenmexma nak, yókxoho ekhem kélteme sélmaxneyeykha s'e: ¿Háxko aphakxa Dios apagkok?

Salmos 42:11

¿Yaqsa katnehek ko'o kayaqhapwomhok ewáxok? ¿Yaqsa katnehek ko'o katneykha ewáxok? Élhaxanmeyk eyke aqsa m'a Dios, cham'a peya nak ko'o alenxanmohok sélpeykessamo. ¡Cha'a apteme ko'o Dios ahagkok ma'a, tén han Sewagkasso teyp!

Salmos 42:3

Yókxoho ekhem ko'o sélekxagweykha tén han yókxoho axta'a, yókxoho ekhem kélteme sélmaxneyeykha s'e: “¿Háxko aphakxa Dios apagkok?”

Salmos 42:4

Xénwákxók agkok chá'a ko'o ewáxok xa aqsok nak, mamágwakxeyk chá'a kalekxagwaha ewáxok. Kaxénwakxohok chá'a ewáxok sélyetlama chá'a énxet'ák, seknaqleykekxo axta chá'a Dios tegma appagkanamap apagkok, yetlo nélwehéseykha élpayheykekxa egwáxok, tén han negmésso ekxeyenma egwáxok Dios. ¡Awanhek axta chá'a katnehek élpayheykekxa egwáxok!

Salmos 74:10

Oh Dios, ¿háxko sa' ekwánxa katnégwók néxa sẽlenmexeykha m'a sẽlenmexma nak? ¿Háxko sa' ekwánxa katnégwók néxa apxéneykha ekmaso exchep?

Salmos 79:10

Nágyoho etnehek apkelpeywa m'a pók énxet'ák nak: “¿Háxko aphakxa Dios apagkok?” ¡Hégho negko'o anlanha aphéssessamo mók apkeletsapma m'a apkeláneykha! ¡Keñe sa' elya'asagkohok han ma'a melpeykessamo nak chá'a exchep!

Salmos 79:4

Ẽlya'ásseykmek chá'a negko'o m'a apheykha nak neyáwa negókxa; ẽlasméssegkek ma'a segwakhaya nak, ẽlxéneykha nahan chá'a ekmaso.

Salmos 89:41

Elyeykhágwak chá'a énxet'ák ma'a, elmenyexek chá'a m'a apmakókxa enxoho chá'a elmenyexek; elesmaksek chá'a m'a apheykha nak nepyáwa'.

Salmos 89:51

Oh Wesse', ¡cháxa aptémakxa negko'o sẽltaqnagkama m'a apkelenmexma nak xép! ¡cháxa aptémakxa aptaqnagko m'a apkelyéseykha nak xép!

Éxodo 34:9

Wesse' egegkok se'e: —¡Wesse'! ¡Wesse'! Naqsók agkok ekleklamo apwáxok ko'o exchep, hẽlyetlow sa'. Hakte naqsók apteme élyennaqte agko' apkelwáxok se'e énxet'ák nak, eyke ná eyaqmagkásekxa aqsa nentémakxa mólya'assáxma tén han nentémakxa élmasagcha'a, hẽlma sa' takha' yaqwayam antéhek negko'o énxet'ák apagkok.

Isaías 22:12

Apkeláneyáha axta kéxegke Wesse' ekha nak apyennaqte apkeltamho kóllekxagwaha xa ekhem nak tén han kallapwomagkok, tén han kólmópésagkohok kélyese kólántaxnekxak ma'a apáwa sẽlwáxaqxamól'a magkenatchesso éllapwáméyak.

Isaías 37:20

Dios Wesse' egegkok, hẽlmallahanches negko'o neyseksa apmáheyo hẽlnápok ma'a asirios, yaqwayam sa' elya'asagkohok apyókxoho pók aptémakxa nak chá'a énxet'ák apheykha keso náxop, apteme exchep Wesse', wánxa xama Dios.”

Ezequiel 20:9

Éláneyak axta ko'o xa, eñama sekmasma m'a sekwesey, yaqwayam enxoho maxénaxchék ekmaso nápaqta'awók ma'a énxet'ák, cham'a kañe' apheykegkaxa nak, hakte ekxekmowásamáxkók axta ko'o nápaqta'awók xa énxet'ák nak, éltennassegkek axta nahan alántekkesek ma'a Egipto.

Ezequiel 8:16

Tén axta séntamákxo m'a kañe' étkok apwáxok nak ma'a Wesse' egegkok tegma appagkanamap apagkok, ekwet'ak axta nahan veinticinco énxet apchaheykekxa apkap'ák tegma appagkanamap ma'a nentaxnamakxa nak tegma appagkanamap neyseksa nak ma'a émha amonye' apwáxok tegma, halep nak ekyetnamakxa m'a ekwatnamáxchexa aqsok; apkelpayhawók axta apkelháxahágko m'a ekpayho nak teyapmakxa ekhem yetlo apkeltekxeyéyak élpayhakxa nápaqta'a xapop apkelpeykásawo m'a ekhem.

Oseas 14:2

Kólyo'ókxa makham Wesse' egegkok, sa' kóltéhek kólmaxnak se'e ektáha nak: “Ná eyaqmagkásekxa aqsa ekyókxoho nentémakxa mólya'assáxma, ema sa' aqsa yetlo ektaqmeleykha apwáxok se'e nélpeykessamo negmésa nak.

Joel 1:13

Kéxegke kélmaxnéssesso nak chá'a Dios énxet'ák apagkok, kéltamheykha nak chá'a ekwatnamáxchexa aqsok, kólántaxnekxa apáwa sẽlwáxaqxo nak, kóllekxagwaha yetlo éllapwámeyak, hakte méko entáhak aqsok kélcheneykekxa ekyexna m'a Dios nak tegma appagkanamap apagkok, tén han vino yaqwayam kóltéhek kélmésso naqsa Dios.

Joel 1:9

aptamhágkok apkellekxagweyncha'a m'a apkelmaxnéssesso Dios énxet'ák apagkok, hakte méko entáhak aqsok ekyexna kélcheneykekxa m'a tegma appagkanamap nak, tén han anmen yámet égmenek, yaqwayam kólmések chá'a Wesse' egegkok.

Amós 7:2

Xama axta apsawhawo aptókagko sawa' m'a ekyókxoho aqsok kélcheneykekxa, ekweykekxoho m'a pa'at nak, axta ektáhak ko'o seyáneya s'e: —¡Wesse', hẽlásekhekxoho negko'o! ¿Háxko katnehek elenmaxakpohok ma'a énxet'ák apagkok Jacob? Apqántawók apagko'.

Amós 7:5

Keñe axta sektáha seyáneya s'e: —¡Wesse', emágwom hana xa! ¿Háxko katnehek elenmaxakpohok ma'a énxet'ák apagkok Jacob? ¿Apqántawók apagko'?

Miqueas 7:10

Elwetak sa' nahan ma'a sélenmexma nak, cháxa peya sa' kalmegqaksohok apagko' xa. Hakte axta etnehek chá'a heyának se'e: “¿Háxko aphakxa Dios Wesse' apagkok?”, alanha sa' ko'o kaxwo' kólteyammaha ektémól'a yelpa' m'a ámay nak.

Malaquías 1:9

Hẽlmaxnésses hana negko'o kéxegke Dios, yaqwayam kapyóshok henlano'. Kéllanak agkok kéxegke xa ektéma nak aqsok kélmésso naqsa, nágkaxén kélwáxok kéxegke elmok takha' m'a Dios yetlo ekleklamo apwáxok. Aptáhak Wesse' egegkok ekha apyennaqte s'e:

Números 25:6

Apyentamákxeyk axta nahan xama israelitas kelán'a madianita, nápaqtók Moisés, tén han ma'a apyókxoho israelitas apchaqnákxo axta m'a, neyseksa apkellekxagweykha axta m'a átog nentaxnamakxa nak kélpakxanma apchaqneykekxexa nak chá'a énxet'ák.

Deuteronomio 28:37

elyegweyk sa' chá'a elwetak apyókxoho énxet apkelya'asakxa enxoho chá'a m'a Wesse' egegkok, elya'ássók sa' chá'a yetlo apkelesmésso.

Deuteronomio 32:27

axta eyke nahan altamhók ko'o hésmaksek ma'a sélenmexma nak; axta altamhók kaleyxkohok apkelpeywa tén han etnehek elpaqmétek se'e: Háwe Wesse' egegkok apteméssesso xa; negko'o nenteméssesso eñama ekha negmowancha'a.’

Josué 7:9

Ellegak sa' amya'a ektáhakxa m'a cananeos, tén han ma'a apyókxoho apheykha nak ma'a yókxexma, keñe sa' epaxqeykxak ma'a nélenmexma nak, hegketámegmak sa'; hensawhohok sa' han hẽlnápok. ¿Háxko sa' etnehek xeyep megyohók kólwanyohok ma'a apwesey nak?