Jeremías 9:21 - Biblia Enxet

²¹ “Taxneyk enxanák nétsapma, wokmek ma'a tegma apkelyawe egagkok apkeltaqmalma nak; kelnapchek sakcha'a apkelennay'a m'a ámay nak, tén han wokma'ák ma'a apheykegkaxa nak chá'a énxet'ák elweynchamha.

Jeremías 9:21 ပူးပေါင်းရင်းမြစ်များ

2 Crónicas 36:17

Tén axta Wesse' egegkok apkeltamho ektamagkok ma'a wesse' apwányam apagkok nak caldeos apkelnapchek axta apketkók ma'a kañe' tegma appagkanamap nak, axta elepyósak apkelano m'a wokma'ák tén han kelán'a étkók, keñe han ma'a apkelwányam, tén han ma'a meyke aptapnák nak. Apméssek axta Wesse' egegkok yaqwayam elmok ma'a apyókxoho nak.

Isaías 40:30

Awanchek nahan elyampak chá'a m'a apketkók nak tén han elyelqakpok chá'a, kawomhok nahan apkelpelápeyam chá'a m'a élyennaqte nak apyempe'ék,

Jeremías 15:7

Éxpánchessessek énxet'ák apagkok ektémól'a pa'at apák, élántekkessek tegma apkelyawe nak se'e apchókxa; meyke apketchek ektemessásak énxet'ák ahagkok, ekmasséssekme', hakte mopmenyeyk elwátésagkok ma'a apkeltémakxa ekmaso.

Jeremías 18:21

¡Yána kaxwók eletsapok apketchek meyk élnapma, essenhan sókwenaqte kélyetxaqxo; tampe sa' katnahagkok ma'a apnaqteyegka'a nak, tén han meyke étchek! ¡Yána kalnápok negmasse m'a apkelennay'a nak énxet'ák apagkok, keñe sa' wokma'ák eletsapok kempakhakma!

Jeremías 44:7

“Ektáhak ko'o kaxwók sekpeywa s'e, sektáha nak Wesse' ekha sekyennaqte, Dios apagkok nak Israel: ¿Yaqsa ektéma kéltekkessama nak kéxegke kélagkók kélagko' kélnepyeseksa xa aqsok ekmaso agko' nak? ¿Yaqsa ektéma kélhayo nak apkeletsapma apyókxoho m'a énxet'ák Judá, cham'a apkelennay'a nak, kelán'ák, sakcha'a, ekweykekxoho m'a kaxwe ekpalleyam nak, yaqwayam enxoho megkeymaxcheyk xama enxoho'?

Jeremías 50:30

Cháxa keñamak peya sa' etekyók wokma'ák apagkok ma'a ámay nak, etekyók sa' apyókxoho kempakhakma yapmeyk apagkok xa ekhem nak. Ko'o sekxeyenma xa, sektáha nak Wesse'.”

Jeremías 6:11

Wesse', lanawók ko'óxa ewáxok xeyep aplo; mowanchek kaxwók sekmako amágwakxa'.” Aptáhak axta ko'o seyáneya Wesse' egegkok se'e: “Eyenyenta nepyeseksa m'a wokma'ák apkelweynchámeykha nak ámay, nepyeseksa nak ma'a wokma'ák apyaqyeyáseykha nak apkelweynchámeykha. Elmakpok sa' ma'a énxet'ák yetlo apnaqteyegka'a, tén han ma'a apkelwányamók apagko' nak.

Jeremías 6:21

Cháxa keñamak aptáha nak Wesse' egegkok se'e: “Wának sa' ko'o elpelapmok se'e énxet'ák nak tén han elyaqnenagkok. Esawhakpohok sa' eletsapok apyókxoho, cham'a apyapmeyk, apketchek tén han ma'a apnámakkok nak.”

Jeremías 7:33

Máma sa' etnehek aptéyak aphopák xa énxet'ák nak, tén han ma'a aqsok nawha'ák éllo, méko sa' kamenxenchesek.

Jeremías 8:2

kólnegkenek sa' aqsa neyseksa mayáhat, tén han aptaqmelakxa pelten, tén han neyseksa apkelápogwátéyak ma'a apyókxoho yaw'a, apkelmopmenyého apagko' axta chá'a m'a, apkelánéssama axta chá'a aqsok, tén han apkelyetleykencha'a axta chá'a, apkelpaqhetchásamákpoho axta chá'a, tén han apkelpeykessamo axta chá'a. Méko sa' kalmekxak yaqwayam kalátawanyek. Kaxnagkokxak sa' aqsa náxop, ektémól'a weyke ekteyáseykha.

Joel 2:9

Ektamagkok chá'a tegma apwányam, elápxog chá'a m'a néten nak meteymog kélhaxtegkesso tegma, elchántek chá'a tegma, máxa apkelmenyexma chá'a etnehek elántexek ma'a malagwa'a átog étkók nak.

Amós 5:2

Apteyekmek Israel aphémo nak kelán'a étkok ektaqmalma; apteyekmek meyke apheykekxa néten. Apyetneyk náxop, cham'a xapop apagkok nak, méko han xama enxoho yaqwayam kaxneyásekxak néten.

Amós 6:9

Apkeleymékpek sa' agkok diez énxet xama tegma, esawhakpohok sa' eletsapok xa diez nak.

Sofonías 1:17

Aptáhak Wesse' egegkok se'e: “Malya'ássesagkek sa' aptamhágkaxa énxet'ák. Máxa meyke apaqta'ák sa' chá'a etnahagkok elxog, hakte apkeláneykegkek melya'assáxma nahaqtók ko'o. Máxa xapop ánek sa' katnehek kayegkenaxchek éma apagkok, keñe sa' aphápetek kéláncheseykekxa kaxhok ma'a ektémól'a aqsok ekteyáseykha.”