Jeremías 8:19 - Biblia Enxet

¹⁹ Legáxkók apkelápentegeykha apkellegeykegkoho ekmáske énxet'ák ahagkok ma'a ekyókxoho apheykegkaxa nak énxet: “¿Masséya apha Wesse' egegkok ma'a Sión? ¿Masséya apha wesse' apwányam apagkok ma'a?” Aptáhak axta apchátegmowágko Wesse' egegkok se'e: “¿Yaqsa ektéma séllókassama nak kélpeykessamo m'a kéleykmássesso, cham'a aqsok kéláyókxa ekteme nak mékcha'awo tén han éleñama mók nekha?”

Jeremías 8:19 ပူးပေါင်းရင်းမြစ်များ

Salmos 135:21

¡Kataqmalmakha sa' chá'a apxénamap Wesse' egegkok ma'a Sión, cham'a aphama nak Jerusalén! ¡Aleluya!

Salmos 137:1

Negheykha axta chá'a neyáwa wátsam Babilonia néllekxagweykencha'a ekxeyenma egwáxok ma'a Sión.

Salmos 146:10

Oh Sión, etnehek sa' chá'a wesse' apwányam meyke néxa m'a Wesse' egegkok, etnehek sa' chá'a wesse' apwányam megkatnégwayam néxa m'a Dios agkok. ¡Aleluya!

Salmos 149:2

Israelitas, kalpayhekxa kélwáxok, kélteme nak énxet'ák Sión, hakte Dios apteme apkelane kéxegke, tén han Wesse' apwányam kélagkok.

Salmos 31:6

Ataqnawhok ko'o m'a apkelpeykessamo nak kéleykmássesso mékoho. May'ásseykmok ko'o m'a Wesse' egegkok.

Isaías 1:4

¡Énxet'ák melya'assáxma laye, ekyentaxno nak apkeltémakxa ekmaso, énxet'ák élmasagcha'a nak apkeltémakxa aptawán'ák neptámen, énxet'ák apkeláneykegkoho nak aqsok ekmaso! Kélyamasmeyk ma'a Wesse' egegkok, kélyetnakhassegkek ma'a Dios Aptaqmalma apagkok nak ma'a Israel, kélpekkeneykekxeyk kélnentámen.

Isaías 12:6

Kólwehesha yetlo ekpayheykekxa kélwáxok, kélheykha nak Sión, hakte apheyk kélnepyeseksa kéxegke m'a Dios Aptaqmalma apagkok nak ma'a Israel, yetlo ekyawe apcheymákpoho.”

Isaías 13:5

Apkeleñamak ma'a xama apkelókxa makhawók agko' nak, cham'a teyp agko' nak ma'a néxa xapop. Wesse' egegkok neykhe m'a, yetlo m'a apkelmeykha nak chá'a apkenchesso aplo, apxegakmo nak yaqwayam emasséssók ekyókxoho keso náxop.

Isaías 33:22

Kelyelqamáxcheyk táma' kélnaqtete xa yántakpayhe ekyawe nak massegkek élyennaqtésso m'a yámet ekwenaqte agkok nak; megkólwanchek kólpeykásekxak ma'a apáwa agkok nak. Ólyementamok sa' ekxámokma agko' aqsok apagkok ma'a sẽlenmexma nak, kawomhok sa' apkelxawéyak aqsok apagkok ma'a meyke nak apaqta'ák, elmagkok sa' aqsok ma'a élmasagcha'a nak chá'a apyókxa apkelyelqamap nak chá'a. Hakte Wesse' egegkok apteme énxet segyekpelchémo egagkok, apteme senlánésso chá'a segánamakxa tén han wesse' apwányam egagkok, sa' hẽlwagkasek nahan teyp ma'a.

Isaías 39:3

Tén axta m'a Dios appeywa aplegasso Isaías apya'aweykxo m'a wesse' apwányam Ezequías. Aptáhak axta apkelmaxneyáncha'a s'e: —¿Háxko apkeleñamakxa m'a énxet'ák nak? ¿Háxko aptáhakxa apcháneya? Aptáhak axta Ezequías apchátegmowágkokxo s'e: —Apkeleñamak ma'a apkelókxa makhawo' nak; cham'a Babilonia.

Isaías 52:1

Sión, exatakha', énnákxoho; Jerusalén, tegma apwányam aptaqmalma, elántaxnekxa apkelnaqta apkeltaqmalma apagko' nak, hakte melántexek sa' chá'a kaxwók kañe' apwáxok ma'a énxet'ák melya'áseyak nak Dios, tén han ma'a élmanyása nak apyempe'ék.

Jeremías 10:15

aqsok mékoho, tén han kélya'ásseykmoho, emasséssók sa' Wesse' egegkok ma'a ekwokmo sa' ekhem sẽlyekpelchássessamókxa'.

Jeremías 14:19

Wesse', ¿apkexakkek apagkóya exchep ma'a énxet'ák Judá? ¿Leklágwokmeya exchep apkeltémakxa m'a énxet'ák apheykha nak tegma apwányam Sión? ¿Yaqsa ektáha sẽlyensásegko nak negko'o meyke néltaqmelwayam? Nélhaxanmeyk axta kataqmelek negheykha, makke anxaweyk xama enxoho aqsok ektaqmela. Nélhaxanmeyk axta kawak élyenneykha egyempehek, nélmeneykha axta aqsa negweteyk.

Jeremías 14:9

¿Yaqsa ektéma aptéma m'a aptémól'a énxet mey'áseyak la'a aqsok, aptémól'a m'a kempakhakma yáp megkamopwána nak hempasmok? Wesse', apheyk eyke exchep negyeseksa, apyókxoho énxet apya'ásegkók nentáha negko'o xép énxet'ák apagkok; ¡ná hegkexa aqsa negko'o!

Jeremías 2:5

Aptáhak apkeláneya kéxegke Wesse' egegkok se'e: “¿Yaqsa axta aqsok ekmaso apkelweteya séláneya ko'o kélyapmeyk nano' seyamasma? Apkelyetleykekxeyk axta m'a aqsok kéláyókxa ekteme nak mékoho, mékoho apagko' axta han apkelteméssásamákpekxak ma'a.

Jeremías 27:10

Wanchek amya'a m'a aptémakxa nak chá'a apkelanagkama, wánxa aqsa apkeltémo kéxegke yának kólántekkesek ma'a kélókxa kólnaqlakxak mók nekha, tén han waxpánchesek ko'o, keñe kóletsapok.

Jeremías 31:6

Hakte kammok sa' ekhem yaqwayam etnehek elyennaqtéshok apkelpeywa apkelhaxneykha nak chá'a m'a néten egkexe nak Efraín: ‘Kólchexyem, ólmeyekxak Sión, aphakxa nak Dios Wesse' egegkok.’”

Jeremías 32:30

Sekxók eyeynókxa axta apkeláneyak aqsok megkaleklamakxa nak chá'a ko'o ewáxok ma'a énxet'ák Israel, tén han ma'a Judá; melwátésseykmok selókaséyak ma'a énxet'ák Israel eñama m'a aqsok kéleykmássesso apkeláneyak apancha'awo nak. Ko'o sekxeyenma xa, sektáha nak Wesse'.

Jeremías 7:19

Háwe eyke ko'o setnéssesseykmohoxma ekmaso xa énxet'ák nak, apnaqtawásamakpekxoho apagko', yaqwayam enxoho elmegqasakpekxohok apagko'. Ko'o sekxeyenma xa, sektáha nak Wesse'.

Jeremías 8:20

Yeykhayak ekmexanmakxal'a exma, sawhomáxcheyk eknakxamáxche ekyexna aqsok kélcheneykekxa, keñe negko'o mólwagkásamáxchek teyp.

Jeremías 9:16

Waxpánchesek sa' alya'aksek nepyeseksa m'a pók aptémakxa énxet'ák, melya'ásegko nak ma'a, tén han melweteya axta m'a apyapmeyk nano'; sókwenaqte sa' wának kólmenxenchesek, ekwokmoho megyeymékpo xama enxoho.”

Ezequiel 48:35

Nueve mil metros sa' kammok ekyókxoho ekwenaqte m'a meteymog kélhaxta nak nepyáwa tegma, keñe sa' katnehek kaxwók apwesey xa tegma apwányam nak: ‘Apheyk Wesse' egegkok se'e.”

Joel 2:32

Apyókxoho énxet ektáha nak sewóneykha, ko'o sektáha nak Wesse', ewagkasakpok sa' teyp ma'a nétsapmakxa nak, hakte keytek sa' nélwagkásamáxche teyp ma'a egkexe Sión, Jerusalén nak, apkeltennassamakxa axta katnehek ma'a Wesse' egegkok. Meletsepek sa' ma'a ektáha nak apkelyéseykha.

Abdías 1:17

Ekpagkanamaxche sa' eyke katnehek ma'a egkexe ahagkok nak Sión, cham'a yaqwánxa sa' elyexánegwók nápakha énxet'ák. Emekxak sa' makham xapop apagkok ma'a Jacob aptawán'ák neptámen;

Miqueas 4:9

¿Yaqsak ektáha ekpayhencha'a nak apátog? Máxa aptáhak ma'a kelán'a ekmáskel'a awáxok kamáwhok katnehek naqláwa. ¿Meyke wesse' apwányam apagkok enxeykel'a keñamak? ¿Enxeykel'a keñamak apkeletsapma m'a appaqhetcháseykha nak chá'a?

Sofonías 3:15

Apkelwátessekmek Wesse' egegkok yaqwánxa axta etnéssesek kéxegke, apkelántekkessek nahan ma'a kélenmexma nak. Apheyk kélnepyeseksa kéxegke m'a Wesse', Wesse' apwányam nak ma'a Israel: megkólakyek sa' kaxwók xama enxoho m'a aqsok ekmaso.

Deuteronomio 31:17

Altaqnaweygkok sa' eyke ko'o xa énxet'ák nak, akxák sa'; megkeytnakhaksók sa' ewáxok xama enxoho, káhapwak sa' ekxámokma agko' ma'a aqsok ekmaso tén han ma'a nenlegeykegkoho nak, keñe sa' etnehek chá'a elpaqmésmakha s'e: ‘Hákho óllegagkohok se'e aqsok ekmaso nak, ñókxa ekmassa apha negyeseksa m'a Dios Wesse' egegkok.’