Jeremías 7:28 - Biblia Enxet

²⁸ Etne sa' elának se'e: Keso énxet'ák melyaheykekxa nak Dios Wesse' apagkok se'e, megkalmopmenyého nak kóllánekxések apkeltémakxa. Massegweykmók agko' apkelxeyenma m'a amya'a ekmámnaqsoho.’”

Jeremías 7:28 ပူးပေါင်းရင်းမြစ်များ

Salmos 12:2

Elyexanchesha aqsa chá'a pók; atsek chá'a katnehek apkelpeywa háwe eyke naqso', eyaqmagkasek chá'a mók ektáhakxa apkelpeywa.

Salmos 50:17

megkalcha enxoho kélwáxok alxekmósagkok, tén han megkólámenyého enxoho m'a sekpeywa.

Proverbios 1:7

Néltamhók agkok antéhek negya'áseykegkoho aqsok, kéméxcheyk sekxók antéhek negáyo Wesse' egegkok; elwanyaha eyke chá'a énxet élyeyháxma xa ektémakxa nak negya'áseykegkoho aqsok, tén han ma'a ektémakxa nak chá'a sẽlpékessáseyak.

Isaías 30:9

Énxet'ák apkenmexeykekxa chá'a Dios xa énxet'ák nak, apyenseyam chá'a apkelyetleykha, megkalmopmenyého nak yeyxhok ma'a Wesse' egegkok nélxekmowásamáxche apagkok.

Jeremías 11:10

Apkeláneykegkokxeyk melya'assáxma ekhawo apkeláneykegko axta m'a apyapmeyk nano', cham'a mehelyeheykekxohok axta ko'o, apkelyetleykekxo axta m'a mók aqsok kéláyókxa tén han apkelpeykessamo. Meláneykegkok ekhémo mók nélpaqhetchásamáxkoho m'a énxet'ák Israel, tén han ma'a Judá sélánésso axta ko'o m'a apyapmeyk nano'.

Jeremías 17:23

Axta eyke ko'o heháxenmók ma'a, axta han hélyeheykekxoho', apkelyennaqtéssegkek axta aqsa apkelwáxok, axta hélyeheykekxoho', mopmenyeyk axta kólxekmósagkok.

Jeremías 2:30

Chaqhémok ko'o séllegassáseykegkoho m'a kélketchek nak kéxegke, mopmenyék elya'ásegwók ma'a séltémókxa nak etnahagkok. Kélhawók kéxegke m'a, yámakméwa éllo, kélnápeykekxeyk ma'a énxet'ák kélagkok apkellegasso nak sekpeywa.

Jeremías 32:33

Eyheykekxeyk apkap'ák, massegkek sélányo. Axta ayenseykmok eykhe sélxekmósso, makke hélyeheykekxoho', melmák takha' m'a séltémókxa etnahagkok.

Jeremías 5:1

Aptáhak Wesse' egegkok se'e: “Kólweynchamha sa' ma'a ámay nak Jerusalén, kóltaqmelchesho sa' kéllányo, kólchetam sa' ma'a apheykegkaxa nak chá'a énxet elweynchamha, kólwetak sa' kexaha énxet apkelane nak chá'a aqsok ekpéwomo, apmopmenyého nak chá'a etnehek ekmámnaqsoho apxeyenma aqsok. Kélwet'ak sa' agkok ma'a, mayaqmagkásekxeyk sa' ko'o ektémakxa m'a Jerusalén.

Jeremías 5:3

Wesse', wánxa exchep aptegyeykencha'a chá'a m'a énxet apteméssesso nak chá'a ekmámnaqsoho appeywa. Apkellegassáseykegkók axta exchep; axta eyke ellegeykegkok; apmassésseykmek axta eykhe, axta eyke kalyaqwámeykegkok elya'ásegwók. Kalyéha'ak agko' apkelwáxok, yeykhágweykmók ma'a ekweykenxal'a ekyennaqte meteymog, axta emáheyók elyaqmagkasek apkelwáxok.

Jeremías 6:17

Apnegkenchek axta Wesse' egegkok énxet'ák apkelhaxneykha, tén axta aptáha apkeláneya énxet'ák se'e: “Kólleyxmakha sa' kélaqkahasso magkenatchesso kéltennasso yaqwánxa katnehek.” Keñe axta énxet'ák aptáha s'e: “Magmakók negko'o ageyxho'.”

Jeremías 6:28

Wesse', apyókxoho apteme élyennaqte apkelwáxok ma'a; énxet'ák aptekkessáseykha naqsa apkelwesey apnámakkok, tén han élmaso apkeltémakxa; máxa sawo élyexwase m'a, tén han sawo ekyentaxno.

Jeremías 6:8

Kastégho sa', Jerusalén, sa' agkok kastégak, ayenyók sa' eñama megkaleklo ewáxok, yókxexma meyke xama aqsok sa' atnessásekxa', meyke énxet apheykha kañe' sa' atnessásekxa'.”

Oseas 4:1

Israelitas, kóleyxho aptáhakxa nak appeywa Wesse' egegkok. Appekkenchek yaqwayam elxénchásekxohok apkeltémakxa énxet'ák apheykha nak se'e apchókxa nak, hakte méko kaxwók mekxeymákpoho nepyeseksa énxet'ák se'e, tén han melyepetcheykha apnámakkok; massegkek apkelya'áseyak ma'a Dios.

Sofonías 3:2

Megyaháxenmók ma'a Wesse' egegkok appeywa mopmenyeyk nahan kólpékessesagkok; megyáyok nahan ma'a; mey'eykekxak han ma'a Dios.

Sofonías 3:7

Axta entáhak élchetamso ewáxok se'e: ‘Sa' heyeyk chá'a énxet'ák Jerusalén sekteméssesa enxoho xa tén han elyahakxohok chá'a apékessesagkok; tén sa' megkólmasséssemek chá'a m'a apxanák nak eñama ko'o séllegassáseykegkoho.’ Apkelánegkokxeyk axta eyke aqsa makham ekyókxoho m'a mók ektémakxa nak chá'a aqsok ekmaso.