Jeremías 7:15 - Biblia Enxet

¹⁵ Alántekkesek sa' ko'o kéxegke s'e sekhakxa nak, sekteméssessama axta ko'o sélántekkessama m'a kélyáxeg'a axta, cham'a Efraín axta aptawán'ák neptámen.’

Jeremías 7:15 ပူးပေါင်းရင်းမြစ်များ

2 Reyes 17:23

Keñe axta Wesse' egegkok apkelyetnakhassama aphakxa m'a énxet'ák Israel, ekhawo ektémakxa axta apxeyenma, apkelásenneykekxo axta m'a apkellegasso nak appeywa, cham'a apkeláneykha nak, tén axta énxet'ák Israel apkelmákpo kélnaqleykekxo Asiria, apheykegkaxa nak makham, ekwokmoho s'e negwánxa nak.

2 Reyes 24:20

Axta keñamak apkeltaqnagkama Wesse' egegkok ma'a énxet'ák nak Jerusalén tén han ma'a Judá, keñe axta apkelántekkessama m'a aphakxa nak yaqwayam melwetekxók chá'a.

2 Crónicas 15:9

Tén axta apchánchesákxo apyókxoho m'a énxet'ák Judá, tén han Benjamín, ekweykekxoho m'a mók nekha apkeleñama apheykha axta nepyeseksa, apkeleñama axta m'a Efraín, Manasés tén han Simeón énxet'ák apagkok, apxámok axta israelitas apyepetcheykekxa m'a Asá, ñókxa apwet'a axta aptáha apxegexma m'a Dios Wesse' apagkok.

Salmos 51:11

Ná hetekkes aphakxa nak xép, ná hémentemekxa han ma'a espíritu appagkanamap apagkok nak.

Isaías 7:16

Keñe sa' amonye' apya'ásegwayam apmeykha élchetámeykha apwáxok ma'a sakcha'a nak, kataqmopagkok sa' ma'a apchókxa nak apqánet kelwesse'e, apcháya apagko' nak chá'a exchep.

Jeremías 15:1

Aptáhak axta ko'o seyáneya Wesse' egegkok se'e: “Elwaták sa' eykhe Moisés tén han Samuel se'e sekhakxa nak ko'o, megkalepyóshek sa' eyke ko'o alanok xa énxet'ák nak. Yána sa' elántépok se'e sekhakxa nak, tén han elxog.

Jeremías 23:33

“Jeremías, aptemék sa' agkok xama énxet, essenhan aplegasso nak sekpeywa, essenhan apkelmaxnéssesso nak énxet'ák ahagkok elmaxneyha s'e: ‘¿Háxko apkeltémókxa antéhek Wesse' egegkok?’ Etne sa' elának se'e: ‘Apxénchek kéxegke Wesse' egegkok kéltáha apseykha ekyentaxno, peyk han yohok kólpallamok.’

Jeremías 23:39

alpatmekxak sa' ko'o kéxegke ektémól'a nempata ekyentaxno, yetlo tegma apwányam sekmésso axta ko'o kéxegke, tén han ma'a kélyapmeyk nano' axta, keñe sa' akxakhagwók makhawók agko'.

Jeremías 3:8

wetayak axta han ko'o ektémakxa sektaqnagkama m'a Israel, cham'a sénmexeykekxo nak ko'o, tén han sekyamasma eñama setwáseykegkoho élánegwayam chá'a pók énxet megkatnaha atáwa'. Keñe m'a Judá, yáxeg nak ma'a Israel, seyenseykmo nak ko'o sétleykha, axta kayeyk, xegamchek axta nahan ma'a, tén axta éláneya nahan ma'a ektémakxa megkamasexta.

Jeremías 52:3

Axta keñamak apkeltaqnagkama Wesse' egegkok ma'a énxet'ák nak Jerusalén tén han ma'a Judá, keñe axta apkelántekkessama m'a aphakxa nak yaqwayam melwetekxók chá'a. Apkenmexeykekxeyk axta Sedequías ma'a wesse' apwányam nak Babilonia.

Jeremías 9:19

Wokmók Sión eklegamaxche nélápentegeykha néllegeykegkoho ekmáske: ¡Negko'ol'aye nennaqtawásexche'! ¡néllegagkók nélmegqakto! Agyenyók sa' negókxa, hakte kélpalchessek ma'a enxanák.

Ezequiel 23:31

Yetlamchek xeye' m'a ektémakxa nak yáxa; cháxa keñamak sekmako nak wagkok xeyáxa' m'a aqsok ekmáske, seyágko axta m'a.

Ezequiel 33:25

Etne sa' elának se'e: ‘Keso aptáhakxa exchek appeywa Wesse' egegkok se'e: Kélteykegkek kéxegke ápetek yetlo éma, kélpeykessamok ma'a aqsok kéleykmássesso, kélnapmeyk nahan ma'a kélnámakkok, ¿kélagkok ya sa' kóltéhek ma'a apchókxa nak?’

Oseas 1:4

Keñe axta Wesse' egegkok aptáha apcháneya Oseas se'e: “Etnésses sa' apwesey sakcha'a Jezreel, hakte kaxwók sa' ko'o allegássesagkohok ma'a aptawán'ák nak wesse' apwányam Jehú, eñama apkelnapma apnámakkok ma'a ekpayho nak Jezreel. Amasséssók sa' ko'o m'a aptémakxa nak wesse' apwányam ma'a kañe' Israel.

Oseas 12:1

Apteykegkek éxchahayam ma'a énxet'ák Efraín: yókxoho ekhem chá'a apkelyetleykha m'a éxchahayam eñama nak ekteyapmakxa ekhem. Apxámáseykekxeyk apkelmopwancha'a amya'a, tén han apkelyennaqteyáseykha chá'a apyempe'ék apnaqtawáseykegkoho apnámakkok, aphéssamók chá'a mók apkelpaqhetchásamákpoho m'a Asiria, apkeláphassegkek chá'a apkelmésso naqsa pexmok égmenek ma'a Egipto.”

Oseas 13:16

Kóllegássesagkohok sa' nahan ma'a énxet'ák Samaria eñama apkenmexeykekxa Dios apagkok. Etekyók sa', sawo sa' chá'a kólyetxa', xapop sa' chá'a kólyenhaksek ma'a apketchek, tén sa' ma'a kelán'ák lós'awo nak, kólpáxqatchesagkok chá'a awokma'ák.

Oseas 7:13

“¡Asagkek sa' katnehek ektáhakxa eñama seyamasma! Káhapwak sa' kélmassésseyam, hakte élenmexeykekxeyk ko'o. Émenyeyk eykhe ko'o alwagkasek teyp ma'a, apkelmopwancha'a amya'a eyke chá'a aptamheykegkok sénmexma ko'o.

Oseas 9:13

Ekweteyak ko'o Efraín apteméssessama apketchek ektémól'a yaqwayam elnápok ma'a apkelnempaqwáméyak: apkelántekkessegkek chá'a yaqwayam etekyók.”

Oseas 9:3

Emyekxak sa' makham Efraín ma'a Egipto, Etáswakxak sa' nento élmanyása m'a Asiria. Mexnakha sa' kaxwók ma'a Wesse' egegkok apchókxa nak:

Oseas 9:9

Kélnaqtawásamáxkók kélagko', kéltémakxa axta nanók ma'a Guibeá. Kaxénwakxohok sa' eyke apwáxok Wesse' egegkok ma'a kéltémakxa ekmaso, ellegássesagkohok sa' eñama megkólya'assáxma.

Jonás 2:4

Éneykek axta ko'o hetekkásak ma'a aphakxa nak xép; xénchek axta ewáxok mótekxók chá'a m'a tegma appagkanamap apagkok aptaqmalma nak.

Números 1:32

Keñe axta José aptawán'ák neptámen, cuarenta mil quinientos axta apwokmok kélyetsete apyókxoho, cham'a Efraín nak énxet'ák apagkok. Keñe axta treinta y dos mil doscientos ma'a Manasés nak énxet'ák apagkok.