Jeremías 6:20 - Biblia Enxet

²⁰ ¿Yaqsa ektáha sélsántegkesa nak ko'o kéxegke aqsok ánek ekmátsa nak ekpaqneyam éten agkok éleñama nak Sabá, tén han yámet ekmátsa nak ekpaqneyam éleñama nak ma'a apkelókxa makhawók agko'? Megkalchek ko'o ewáxok ma'a aqsok kélwatno nak, tén han ma'a mók aqsok kélnaqtósso kélnapma nak.”

Jeremías 6:20 ပူးပေါင်းရင်းမြစ်များ

2 Samuel 15:12

Apkeltamhók axta han kólyentawakxak Absalón xama m'a David appaqhetcháseykha axta chá'a, apwesey axta Ahitófel, aphama axta Guiló, tegma apwányam apagkok nak, yaqwayam enxoho etnehek apxegexma neyseksa apkelane aqsok ektekyawa. Cháxa ektáhakxa axta eyántágko ekxénakxa apwáxok etnehek, keñe han apxámagko apkelyetleykekxa m'a Absalón.

1 Reyes 10:10

Tén axta élmésa wesse' apwányam tres mil novecientos sesenta kilos ma'a sawo élyátekto élmomnáwa, tén han ekxámokma agko' ma'a sokmátsa, tén han meteymog élyenma éltaqmalma. Axta kaweykmok ekxámokma Israel ma'a ekwánxa axta ekxámokma sokmátsa, élmésa wesse' ekwányam eñama nak Sabá m'a wesse' apwányam Salomón.

Salmos 40:6

Mopmenyeyk xép ma'a kélnaqtósso ektekyawa nak, tén han ma'a aqsok kélcheneykekxa ekyexna kélmésso naqsa nak chá'a; meltémók han kólsakxések ma'a aqsok kélwatno nak, tén han ma'a aqsok kélmésso naqsa ekmasséssamo nak magya'assáxma. Enegkenchessegkek xép eheyk'ák yaqwayam aña'.

Salmos 66:3

Kólteme kólának Dios se'e: “Keltásók agko' xép aqsok apkelane. Apmopwána ekyawe keñamak xép apkelpexyennama apmonye' m'a apkelenmexma nak;

Éxodo 30:23

“Elyésha sa' apagko' xép ma'a yámet éltaqmalma élmátsa nak élpaqneyam: seis kilos sa' ma'a mirra agye' ektaqmalma, tén sa' ántánxo kilos ma'a canela, tén sa' ántánxo kilos ma'a yámpa'at;

Proverbios 15:8

Etaqnawhok Wesse' egegkok aqsok apchaqhássesso m'a énxet élmasagcha'a nak apkeltémakxa', yetlo ektaqmeleykha apwáxok eyke chá'a emok takha' nempeywa nélmaxnagko apagkok ma'a énxet apkelpéwomo nak.

Proverbios 21:27

Eltaqnawásseshok Wesse' egegkok aqsok apkelmésso naqsa m'a énxet'ák élmasagcha'a nak apkeltémakxa', hakte yetlo ekmaso élchetámeykha apkelwáxok chá'a elmések.

Isaías 1:11

Aptáhak Wesse' egegkok se'e: “¿Yaqsa ektáha sélsántegkesa nak ekxámokma kélnaqtósso kélnapma? Élekleykmek ko'o m'a nepkések apkelennay'a nak kélwatno tén han ma'a weyke étkók pexmok agkok nak; ektaqnawágweykmek ko'o m'a weyke kelennay'a nak éma agkok tén han ma'a nepkések apkelennay'a nak tén han ma'a yát'ay apketkók nak éma apagkok.

Isaías 60:6

Kólwetak sa' ewakhegwak apxámokma apagko' yányátnáxeg apkeleñama m'a Madián tén han ma'a Efá; elwak sa' apyókxoho m'a énxet'ák apkeleñama nak Sabá, elpatmohok sa' ma'a sawo ekyátekto élmomnáwa tén han ma'a aqsok ánek ekmátsa nak ekpaqneyam éten agkok, elxének sa' nahan aqsok éleymáxkoho apkelane nak ma'a Wesse' egegkok.

Isaías 66:3

Yetneyk eyke nahan ma'a apkelnapma nak chá'a weyke kelennay'a, tén han ma'a apkelnapma nak chá'a énxet; apyaqténchesso nak chá'a apyespok ma'a nepkések tén han apwápakhe nak chá'a m'a semheg; tén han apkelmésso nak chá'a aqsok aktek kélcheneykekxa tén han yátapomap éma apagkok; tén han apkelwatno nak chá'a aqsok ekmátsa nak ekpaqneyam éten agkok, apkelpeykessamo nak chá'a m'a kéleykmássesso. Apmenyeyk elanagkok ekyókxoho apkelyéseykha nak chá'a xa ektéma nak élánamáxche aqsok ekmaso agko'.

Jeremías 14:10

Aptáhak Wesse' egegkok apkelxéna énxet'ák Israel se'e: “Cháxa énxet'ák nak, apmenyeyk elweynchamha aqsa chá'a. Cháxa keñamak megkaleklama nak ko'o ewáxok sélányo. Kaxénwakxohok sa' ko'o kaxwók ewáxok ma'a melya'assáxma nak, ayaqmagkásekxak sa' ma'a apkeltémakxa.”

Jeremías 14:12

Metawagkehek sa' eykhe aptéyak, magweyxók sa' eyke ko'o m'a apkelmaxneyéyak; xámók sa' eykhe katnehek sélseykentegkesso m'a aqsok apkelwatno, tén han ma'a sélmésso naqsa nak chá'a aqsok ekyexna kélcheneykekxa, megkalchek sa' eyke ko'o ewáxok alano'. Amasséssók sa' wahak kempakhakma, meyk, tén han negmasse ekmaso.”

Ezequiel 20:39

“Énxet'ák Israel, keso aptáhakxa exchek appeywa Wesse' egegkok se'e: ¡Kólpeykessekxoho heykxa m'a aqsok kéleykmássesso kélagkok! Keñe sa' natámen hélyahakxohok ko'o kéxegke, kamaskok sa' nahan kóltawasha sekwesey ekpagkanamaxche kóllanagkok chá'a s'e ektéma nak aqsok kélmésso naqsa kélagkok tén han kélpeykessamo chá'a m'a aqsok kéleykmássesso kélagkok.

Ezequiel 27:22

Axta nahan aptegyágweyktamxa chá'a aqsok apkexeykekxa exchep ma'a énxet'ák ekha axta nahan aqsok apkexeykekxa m'a yókxexma Sabá tén han ma'a Raamá, eyánmagkasek axta chá'a aqsok apkelma m'a sokmátsa élmátsa agko' nak élpaqneyam, yetlo m'a meteymog éltaqmalma nak tén han ma'a sawo ekyátekto élmomnáwa nak.

Oseas 8:13

Aqsok ektekyawa aqsa apmenyeyk ma'a, keñe elnápok chá'a, etawagkok chá'a ápetek ma'a aqsok ektekyawa nak; megkalchehek eyke chá'a ko'o ewáxok xa aqsok nak, ko'o sektáha nak Wesse'; kaxének sa' ewáxok ma'a apkeltémakxa ekmaso apkeláneyak nak, allegássesagkohok sa' eñama melya'assáxma wának eltaqhohok makham ma'a Egipto.

Oseas 9:4

melyegkenchesek sa' kaxwók anmen yámet égmenek ma'a Wesse' egegkok, melmések sa' han kaxwók ma'a aqsok apkelnapma. Keñe sa' ma'a pán aptéyak nak, etnehek sa' pán nento senlapwayam, keñe sa' ma'a ektáha enxoho chá'a aptéyak, etnahagkok chá'a élmanyása apyempe'ék. Etawagkok sa' chá'a xa pán nak, mopwancha'ak sa' eyke elsakxak ma'a Wesse' egegkok nak tegma appagkanamap apagkok.

Malaquías 1:10

“¡Kólápekxoho annal'a kélxama kéxegke m'a apátog nak tegma appagkanamap, yaqwayam enxoho megkaqhók makham kóláléwássekxak táxa m'a ekwatnamáxchexa nak chá'a aqsok ahagkok! Massegkek ko'o ekleklamo ewáxok alanok kéxegke, mómenyeyk kaxwók amok takha' m'a kélmésso naqsa nak aqsok kéxegke.