Jeremías 52:18 - Biblia Enxet

¹⁸ Apkelsákxeyk axta han ma'a táhap kélxata, pála, tén han nensapanchessamól'a cháléwasso, egheykok élyawe, yekweykto élyawe keñe han ma'a ekyókxoho aqsok kélmeykegkaxa élánamáxche axta sawo ekyexwase, kélmeykha axta chá'a m'a tegma appagkanamap.

Jeremías 52:18 ပူးပေါင်းရင်းမြစ်များ

1 Reyes 7:40

Apkelánegkek axta han weygke m'a Hiram, pála tén han egheykok élyawe, cháxa appenchesa axta ekyókxoho aptamheykha apkelánesso aqsok Salomón, cham'a Wesse' egegkok tegma appagkanamap apagkok,

1 Reyes 7:45

tén han táhap kélxata, pála tén han sokpayhe élyawe. Sawo ekyexwase kélyenmáseykekxa axta han ekyókxoho m'a aqsok kélmeykegkaxa', apkelánesso axta Hiram ma'a wesse' apwányam Salomón, yaqwayam kólmaha m'a Wesse' egegkok tegma appagkanamap apagkok.

1 Reyes 7:50

tén han ma'a egheykok, tén han ma'a kélmeykha nak chá'a kólsapanchesek cháléwasso, tén han egheykok élyawe, tén han yekweykto élyawe, tén han ma'a aqsok ánek ekmátsa nak ekpaqneyam axagkok, sawo ekyátekto ekmomnáwa ektaqmalma agko' axta han ekyókxoho xa. Sawo ekyátekto ekmomnáwa axta han ma'a sawo élmayheykekxexa nak chá'a atña'ák ma'a Ekpagkanamaxchexa agko' nak, cham'a kañe' nak tegma appagkanamap, tén han ma'a atña'ák nak ma'a tegma appagkanamap.

1 Crónicas 28:17

Apkelméssek axta han sawo ekyátekto élmomnáwa yaqwayam kalanaxchek ma'a kelyetxaqxo apto, sokpayhe élyawe, keñe han ma'a kélyekwe yegmen élyawe nak, apkelméssek axta han sawo ekyátekto ekmomnáwa, tén han ma'a sawo ekmope ekmomnáwa yaqwayam kaxhok kalanaxchek ma'a egheykok, ekwánxa enxoho chá'a ekyentaxno m'a xama.

2 Crónicas 4:11

Apkelánegkek axta han weygke m'a Hiram, pála tén han egheykok élyawe, cháxa appenchesa axta ekyókxoho aptamheykha apkelánesso aqsok Salomón, cham'a Wesse' egegkok tegma appagkanamap apagkok.

2 Crónicas 4:16

tén han táhap kélxata, pála tén han kelyetxaqxo apto. Sawo ekyexwase kélyenmáseykekxa axta han ekyókxoho m'a aqsok kélmeykegkaxa', apkelánesso axta Hiram ma'a wesse' apwányam Salomón, yaqwayam kólmaha m'a Wesse' egegkok tegma appagkanamap apagkok, cham'a Hiram apmopwána axta aqsok.

2 Crónicas 4:22

tén han ma'a kélmeykha nak chá'a kólsapanchesek cháléwasso, egheykok élyawe, yekwékto élyawe tén han ma'a aqsok ánek ekmátsa nak ekpaqneyam axagkok, sawo ekyátekto ekmomnáwa éltaqmalma agko' axta han ekyókxoho xa. Sawo ekyátekto ekmomnáwa axta han ma'a nentaxnamakxa nak tegma appagkanamap, cham'a atña'ák kañe' nak, keñe han ma'a atña'ák Kañe' Ekpagkanamaxchexa agko', tén han ma'a atña'ák apagkok nak ma'a tegma appagkanamap.

2 Crónicas 4:8

Apkelanak axta han diez mésa, apnegkenwákxeyk axta han ma'a tegma appagkanamap nak, cinco axta m'a nélya'assamakxa', cinco han ma'a nepsagqalwa. Apkelanak axta han cien egheykok élyawe sawo ekyátekto ekmomnáwa.

Esdras 1:10

treinta egheykok élánamáxche nak sawo ekyátekto ekmomnáwa, tén han cuatrocientos diez egheykok élánamáxche nak sawo ekmope ekmomnáwa yáma éltaqmalma, keñe axta mil han ma'a mók aqsok nak.

Éxodo 25:29

Elanés sa' nahan sawo ekyátekto agko' ma'a sokpayhe agkok, yekweykto élyawe, egheykok élyawe tén han ma'a egheykok étkók yaqwayam sa' kóltéhek chá'a kélmeykha kélanchesso sélmésso m'a aqsok égmenek.

Éxodo 25:38

sawo ekyátekto ekmomnáwa nahan chá'a payhawók katnehek ma'a kélmeykha nak chá'a kólsapanchesek tén han ma'a sokpayhe étkók agkok nak.

Éxodo 27:3

Sawo ekyexwase sa' nahan chá'a katnehek ekyókxoho aqsok kélmeykegkaxa nak chá'a m'a ekwatnamáxchexa aqsok: cham'a kélxata nak chá'a táhap agkok, tén han ma'a kélyekwe nak chá'a kólchexa', sokpayhe élyawe agkok, kelyetxaqxo apto tén han ma'a kélxata nak chá'a kólchexák átex.

Éxodo 37:16

Sawo ekyátekto agko' axta nahan apkeláneyásak ma'a aqsok kélmeykegkaxa nak chá'a, yaqwayam nak chá'a kaxnagkok ma'a néten mésa, cham'a sokpayhe agkok nak, yekwékto élyawe, egheykok élyawe agkok tén han ma'a egheykok étkók éltaqmalma yaqwayam nak chá'a kólyetmok ma'a aqsok égmenek kélmésso nak chá'a Dios.

Éxodo 37:23

Apkelánéssek axta nahan sawo ekyátekto agko' ma'a siete cháléwasso étkók agkok, tén han ma'a kélmeykegko nak chá'a kólsapanchesek tén han ma'a sokpayhe étkók agkok ekpalleykentamxa nak chá'a táhap agkok.

Éxodo 38:3

Apkelánéssek axta nahan sawo ekyexwase ekyókxoho aqsok yaqwayam chá'a kalmaha m'a ekwatnamáxchexa nak chá'a aqsok kéltósso, cham'a kélxata nak chá'a táhap agkok, tén han ma'a kélmeykha nak chá'a kólaxñásekxa', egheykok élyawe agkok, kelyetxaqxo apto, tén han ma'a kélxata nak chá'a átex agkok.

Números 4:14

Kólnegkenek sa' néten ekyókxoho m'a kélmeykegkaxa nak chá'a m'a ekwatnamáxchexa nak aqsok: cham'a kélnegkenmakxa nak átex, kelyetxaqxo apto, pála, sokpayhe élyawe; ekyókxoho aqsok kélmeykha nak chá'a m'a ekwatnamáxchexa nak aqsok. Kólaqlaksek sa' aqsok émpe'ék élexyawáyo xa ekyókxoho nak, kólatchesek sa' nahan yámet nekhaw'ék yaqwayam enxoho kólsók.

Números 4:7

Kólpeykesek sa' han xama apáwa hómáyok ma'a néten nak mésa kélnegkenmakxa nak chá'a kelpasmaga kélmésso Wesse' egegkok, keñe sa' kólnegkenagkok sokpayhe xa néten nak, yekwekto élyawe, egheykok, tén han egheykok élyawe yaqwayam kólyetmagkok ma'a vino kélmésso naqsa, tén han ma'a kelpasmaga megkayetyapwágwayam nak chá'a kélmésso aphéyak ma'a néten nak.