Jeremías 51:53 - Biblia Enxet

⁵³ Yántek sa' eykhe Babilonia m'a néten, yaqwayam epekkenwók netnók agko' ma'a apxagkok apyennaqte nak, aláphaksek sa' eyke han ko'o apkelenmexma m'a, yaqwayam emasséssók. Ko'o sekxeyenma xa, sektáha nak Wesse'.”

Jeremías 51:53 ပူးပေါင်းရင်းမြစ်များ

Génesis 11:4

Keñe axta aptáha apkelpaqmeta s'e: “Kólchempoho, anlának xama tegma apwányam, tén han xama tegma néten apwenaqte apweykmoho néten. Keñe sa' ólxénaxchek chá'a negko'o negmowána aqsok, móxpaqnehek sa' chá'a ekyókxoho keso náxop.”

Job 20:6

Megkeyxek apteme apwenaqte apagko', ekhawo nak ma'a néten, kawomhok eykhe apqátek ma'a yaphope,

Isaías 13:17

Alyáteyagkohok sa' ko'o ektamagkok medos ma'a, cham'a énxet'ák megkalyetnakhassamo nak apkelwáxok ma'a sawo ekmope élmomnáwa, melányo nak ma'a sawo ekyátekto élmomnáwa.

Isaías 41:25

“Éltamhók axta ko'o éphagwak xama énxet ma'a ekpayho nak teyapmakxa ekhem; ekwóneyha axta apwesey, tén axta apyephagwa'a m'a ekpayho nak nexcheyha. Máxa axta yelpa' aptemessásak apkelteyammeyncha'a m'a kelwesse'e apkeláneykha nak chá'a apkelókxa; máxa axta aptáhak ma'a aptémól'a apkelane yátegwáxwa eyélaqtések yelpa' m'a apmagkok.

Isaías 47:5

“Caldea kelán'a étkok, kawanma aqsa kaxek, katex ekyáqtésakxaxma, hakte kamaskok sa' kaltamhaxchek xeye' ‘wesse' ekwányam ekyókxoho apheykegkaxa énxet'ák’.

Isaías 47:7

Axta temék chá'a ekpeywa s'e: ‘Atnehek sa' chá'a wesse' meyke néxa'; keñe megkalchetagkáseykencha'a exche' awáxok ektémakxa xa aqsok nak, megkaxeyenmak nahan awáxok yaqweykenxa katnéssesek.

Jeremías 49:16

Eyaqhémo temégweykmok kéxegke m'a kéleymáxkoho nak, hakte kóleyxchek axta chá'a. Kélheykha kéxegke m'a neyseksa meteymog élyagqaxe, kélpathetmeyk ma'a naw'ék egkexe netno nak. Kéllánegweykmek eykhe kéxegke kélxanák ma'a netnók agko' nak, ektémól'a náta ekyawe, sa' eyke kólenyék alántekkesek ko'o kéxegke m'a. Ko'o sekxeyenma xa, sektáha nak Wesse'.

Jeremías 50:21

“¡Kólchetamák yókxexma Merataim, tén han ma'a apheykha nak Pecod! ¡Kólemhák, kólsawhoho kólmasséssók! ¡Kóllána ekyókxoho m'a séltémókxa nak kóllána'! Ko'o sekxeyenma xa, sektáha nak Wesse'.”

Jeremías 50:25

Apmeykásekxeyk átog Wesse' egegkok ma'a apxátamakxa nak chá'a apkelmeykha apkenchesso kempakhakma, apkelhaxyawássekxeyk apkelmeykha, hakte aplóke', yetneyk han aqsok yaqwayam elának Wesse' ekha nak apyennaqte neyseksa m'a caldeos apchókxa.

Jeremías 50:45

Kóleyxho séláneykekxa nak ko'o sektáhakxa sekmakókxa atnéssesek ma'a Babilonia, ko'o sektáha nak Wesse', sekmakókxa nak han ko'o atnéssesek ma'a apchókxa nak caldeos: Kawomhok sa' kélyementaméyak ma'a apketchek ketcheyetse nak, kóltawasha sa' nahan ma'a yókxexma apagkok ektaqmalma nak.

Jeremías 51:11

Peyk emasséssók Wesse' egegkok ma'a Babilonia, apnaqxétekhássásegkek han apkelwáxok ma'a kelwesse'e apkelwányam nak Media. Cháxa yaqwayam eyaqmagkásekxak Wesse' egegkok apteméssessamakxa axta m'a tegma appagkanamap apagkok. ¡Kóllánekxa yágke aktek kélagkok! ¡Kólmák sa' kéláhakkásamáxche!

Jeremías 51:25

Énmexchek ko'o exche' meteymog ekwenaqte ekmassesseykmoho nak aqsok, ekmasseseykmo nak aqsok ekyókxoho keso náxop. Ko'o sekxeyenma xa, sektáha nak Wesse'. Añássesagkohok sa' ko'o exche', eyttelegwásenták sa' eñama m'a néten meteymog élwenaqte nak, egkexe ekmeyesma sa' atnéssásekxa'.

Jeremías 51:48

Kapayhekxak sa' awáxok apteyekmo sa' Babilonia m'a néten, tén han xapop, tén han ma'a ekyókxoho aqsok élánteyapma nak, apkelxegakmo sa' apkeleñama nexcheyha m'a apmassésseyam nak. Ko'o sekxeyenma xa, sektáha nak Wesse'.

Jeremías 51:56

Apkelxegakmek yaqwayam emasséssók Babilonia; apkelmeyk kaxwók ma'a kempakhakma yapmeyk apagkok, apkelekkexchessek yágke apagkok. Hakte Wesse' egegkok, apteme xama Dios, apyaqmagkáseykekxohol'a chá'a aptémakxa xama énxet ekpayhawo nak chá'a etnéssesek.

Jeremías 51:58

Ektáhak ko'o sekpeywa s'e, sektáha nak Wesse' ekha sekyennaqte: Kólyaqnegkesek sa' ekyókxoho m'a kélhaxtegkesso ekyawe nak ekpayhakxa m'a Babilonia, kólwatnekxak sa' ma'a átog apagkok élyawe nak. Kaqhok sa' chá'a eltemeykha énxet'ák, hakte táxa sa' kalwatnések chá'a m'a apkelwasqápeykekxoho nak apkelánéyak.”

Daniel 4:30

aptáhak axta s'e: “¡Awanhók agko' nak la'a s'e Babilonia! Ko'o axta sélane yetlo sekmowána, sekhamakxa chá'a sektémakxa wesse' apwányam, yaqwayam enxoho kataxchek seyeymáxkoho.”

Amós 9:2

elyexánegwók sa' eykhe m'a kañe' xapop ekmattawóneg nak, alántekkessók sa' eyke chá'a ko'o m'a, elchenátwók sa' eykhe m'a netnók agko' nak yaphope, wának sa' eyke han ko'o elántépok ma'a.

Amós 9:4

kélnaqlákxeyk sa' agkok nahan ma'a megkatnahakxa apkelókxa apnaqleykekxa enxoho m'a apkelenmexma nak, wának sa' ko'o etekyawágwók ma'a. ¡Alanha sa' chá'a ko'o m'a, háwe eyke yaqwayam ataqmelchessesek apheykha aqsok ekmaso sa' waha'!”

Habacuc 2:9

¡Kéxegke la'aye, kéllánesso nak kélxanák ma'a aqsok kélmenyexéyak, yaqwayam enxoho katnehek meyke ektáhakxa kélheykha!