Jeremías 51:33 - Biblia Enxet

³³ Hakte aptáhak Wesse' ekha apyennaqte Dios apagkok nak Israel se'e: “¡Aphawók Babilonia m'a kélchexakkassamakxa nak chá'a apyempe'ék hótáhap apaktek, kaxwók sa' kammok ekhem eknakxamáxchexa apaktek!”

Jeremías 51:33 ပူးပေါင်းရင်းမြစ်များ

Isaías 18:5

Penchessek sa' agkok élyapwe m'a anmen yámet kélcheneykekxa, ekyaqmagkasa enxoho m'a ekyexna nak, kólyaqténchesagkok sa' aktegák sawo amonye' yaqwayam kammok ekhem eknakxamáxchexa, kólyaqténchesek sa' keñe sa' kólchexakkasek.

Isaías 21:10

Énxet'ák ahagkok, kélteyammeykha nak ektémól'a m'a hótáhap apaktek kélteyammeykha, éltennássek ko'o m'a seklege nak eñama Wesse' ekha apyennaqte, cham'a Israel Dios apagkok nak.

Isaías 47:1

“Kelán'a étkok Babilonia meyke nak makham atáwa', katyep, kaxa néten yagkamex; katyep néten ektaháno ekyawe, kelán'a étkok Caldea, kaxa náxop, hakte kamaskok sa' kaltamhaxchek kaxwók xeye' ektaqmalma tén han ektaqmalma émpehek.

Jeremías 51:32

Apkelmeyk axta apkelenmexma m'a wátsam apkelyekheykekxexa axta chá'a énxet'ák, apkelwatneyk axta han ma'a tegma apkelyennaqte nak, apkelyegwakkók apagko' axta m'a sẽlpextétamo.

Oseas 6:11

Keñe exchep Judá, ekpekkenchessek ekhem yaqwánxa añássesagkoho'. “Ekyókxoho sekmáheyo chá'a ayaqmagkassesek ektémakxa apheykha m'a Israel,

Joel 3:13

Kólyaqtennák sa' ma'a, hakte asagko' agko' apkeltémakxa, sa' kólteméssesek ma'a aptémól'a hótáhap apyexna apmakhetma kólyaqtennek, hakte wokmek ekhem kélyaqténmakxa; kólteyammaha sa' ektémól'a anmen yámet ekyexna kólteyammaha, hakte penchásexcheyk yaqwayam kalanaxchek vino.

Amós 1:3

Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Damasco, megkatnehek sa' mallegassáseykegkoho; hakte nápakha'a apketkók aptemessáseykegkok ma'a apheykha nak Galaad máxa aptemessessók ma'a hótáhap apaktek kélchexakkassól'a apyempe'ék, kélmeykhal'a m'a aqsok éxakkassól'a apyempe'ék élánamáxchel'a sawo.

Miqueas 4:12

Makke elya'ásegkok élchetamso apwáxok Dios xa pók aptémakxa énxet'ák nak, tén han ma'a aqsok apmáheyo nak elána'; melya'ásegkok apmáheyo yánchásekxak, ektémól'a hótáhap apyexna kéltéteykekxa kélchexakkassól'a apyempe'ék apák.

Miqueas 4:13

¡Tegma apwányam Sión, yempekxa néten, ellegássesagkoho apkelenmexma! Hakte aptáhak Wesse' egegkok se'e: “Agkések sa' ko'o exchep apyennaqte ektémól'a m'a weyke kennawo' sawól'a kepet'ák, tén han sawo ekyexwasel'a aphék, yaqwayam sa' enaqtawasagkohok apxámokma apagko' énxet'ák. Elyementók sa' xép ma'a aqsok apagkok ekxámokma apkelmenyexcháseyak axta pók énxet'ák, keñe sa' hélmések ko'o, sektáha nak Wesse' ekyókxoho keso náxop.”

Habacuc 3:12

Yetlo aplo apweynchámeyha ekyókxoho keso náxop, yetlo aplómo apagko' apkelteyammeyha pók aptémakxa énxet'ák.