Jeremías 51:21 - Biblia Enxet

²¹ Xép chá'a wásenneykxak alyaqtennagkok ma'a yátnáxeg, tén han ma'a apheykha apkap'ák, tén han ma'a yátnáxeg apkelyenyawasso yetlo m'a apkelxegkesso nak chá'a.

Jeremías 51:21 ပူးပေါင်းရင်းမြစ်များ

Salmos 46:9

apmasséssekmek kempakhakma, ekweykmoho m'a néxa xapop nak keso nélwanmeygkaxa; apkelekkexchek ma'a yágke, nekha'a étkók aptemessásak ma'a sawhéwa, ¡apkelwatnékxeyk ma'a yátnáxeg apkelyenyawasso apkenchesso nak kempakhakma!

Salmos 76:6

Xama axta apkelpaqhetchesa exchep ma'a yátnáxeg, tén han ma'a apkelyenyawasso nak, xép aptáha nak Jacob Dios apagkok, máxa életsapma axta tamhágkok.

Éxodo 15:1

Tén axta Moisés apmeneykmasa yetlo israelitas se'e negmeneykmasso nak, apkelsawassásawo m'a Wesse' egegkok. Aptáhak axta apkelmeneykmasso s'e: “Anneykmássesek sa' ko'o Wesse' egegkok, cham'a apmallana axta nepyeseksa apkelenmexma apkelweykeságko kañe' wátsam ekwányam ma'a yátnáxeg tén han ma'a apheykha nak apkap'ák.

Éxodo 15:21

Axta entáhak nahan éláneya neyseksa élmeneykmasso námakkok se'e: “Kólmeneykmásses Wesse' egegkok, cham'a apmallana axta nepyeseksa apkelenmexma, apkelweykeságko wátsam ekwányam ma'a yátnáxeg tén han ma'a apheykha nak apkap'ák.”

Éxodo 15:4

Apkelweykásegkek axta Wesse' egegkok wátsam ekwányam ma'a yátnáxeg apkelyenyawasso tén han ma'a faraón sẽlpextétamo apagkok; ¡kelnapchek axta Wátsam Ekwányam Ekyexwase m'a sẽlpextétamo ektáha axta apkelyéseykha!

Isaías 43:17

apkeláphássek axta apxámokma apagko' sẽlpextétamo apkeltamho elántaxnegwók ma'a, yetlo yátnáxeg apkelyenyawasso apagkok tén han yátnáxeg, yaqwayam emasséssók. Apkelyaqnenágkek axta, mopwanchek axta apmako elchempekxak néten; máxa pápa' táxa eksapane axta aptamhágkok apsawheykpoho.

Jeremías 50:37

¡Kólnáhap ma'a sẽlpextétamo apagkok: elpexyennók sa' apkelaye! ¡Kólnáhap yátnáxeg apagkok, kólekkexches ma'a yátnáxeg apkelyenyawasso apagkok! ¡Kólnáhap ma'a sẽlpextétamo apagkok kélyánmagkasso nak chá'a ekyánmaga apkempakhe: máxa kelán'a sa' etnahagkokxa'! ¡Kólmasséssem ma'a aqsok éltaqmalma apagkok: kólmenyexchesák aqsok apagkok!

Ezequiel 39:20

Alanaksek sa' ko'o ektámaxche ekyawe, yaqwayam sa' katawagkok ekwokmoho elyaqkanakmo, cham'a yátnáxeg aphápetek tén han ma'a apkelchánte nak chá'a yátnáxeg, tén han ma'a sẽlpextétamo tén han ma'a pók aptémakxa nak chá'a kempakhakma yapmeyk. Ko'o sekxeyenma sektáha nak Wesse'.

Miqueas 5:10

Keso aptáhakxa nak appeywa Wesse' egegkok se'e: “Annáhakkasek sa' ko'o apkelchánte yátnáxeg xa ekhem nak, asawhaksohok sa' amasséssessók yátnáxeg apkelyenyawasso apagkok apkenchesso nak kempakhakma;

Nahúm 2:13

Aptáhak Wesse' egegkok ekha nak apyennaqte s'e: “Élenmexchek ko'o kéxegke: alwatnések sa' ma'a yátnáxeg apkelyenyawasso kélagkok kélanchesso nak kempakhakma, éten sa' atnessásekxa'; alnáhakkasek sa' méwa étkók kélagkok; alyementemekxak sa' aqsok kélmeñexéyak ekheykegko nak kañe' kélókxa', kamaskok sa' kañexchek apkelpeywa m'a apseykha nak chá'a amya'a kélagkok.”

Hageo 2:22

amasséssók sa' ko'o aptamhéyak chá'a apkelwesse'e apkelwányam keso náxop, néxa sa' atnéssesek aptamhéyak apkelwesse'e; alpeynchók sa' ma'a yátnáxeg apkelyenyawasso kélanchesso nak kempakhakma, yetlo m'a ektáha nak chá'a apkelchánte, eletsapok sa' yátnáxeg, tén han ma'a apheykha nak chá'a apkap'ák; yetsapok sa' chá'a xama apkelyetxeykekxa pók sawo.

Zacarías 10:5

Sa' etnahagkok ma'a aptamheykegkaxal'a sẽlpextétamo apkelxegál'a ámay neyseksa yelpa' yempakha'; elnapakpok sa', hakte apheyk nepyeseksa m'a Wesse' egegkok, elmegqaksek sa' ma'a apkelchánte nak yátnáxeg.

Zacarías 12:4

alyegwakkasek sa' eyke ko'o apyókxoho m'a yátnáxeg, keñe sa' alyeykesek exma m'a apheykha nak chá'a apkap'ák. Alanha sa' ko'o m'a Judá aptawán'ák neptámen nak, meyke apaqta'ák sa' atnéssesagkok apyókxoho yátnáxeg, apkelchánte nak chá'a m'a pók aptémakxa énxet'ák.