Jeremías 50:21 - Biblia Enxet

²¹ “¡Kólchetamák yókxexma Merataim, tén han ma'a apheykha nak Pecod! ¡Kólemhák, kólsawhoho kólmasséssók! ¡Kóllána ekyókxoho m'a séltémókxa nak kóllána'! Ko'o sekxeyenma xa, sektáha nak Wesse'.”

Jeremías 50:21 ပူးပေါင်းရင်းမြစ်များ

2 Samuel 16:11

Tén axta appaqhetchesa Abisai tén han apyókxoho apkeláneykha, aptáha apkeláneya s'e: —Weykmók ko'o apmáheyo heyaqhek ma'a hatte ahagko' nak, ¡nágkalpelakkas aqsa kélwet'a nak apmako ko'o heyaqhek xama m'a Benjamín nak énxet'ák apagkok! ¡Kólho aqsa heyemnaha, Wesse' egegkok apkeltémo hetnéssesek!

2 Reyes 18:25

¿Apkeneykeya nahan axñekmok ko'o meyke Wesse' egegkok yaqwayam aktámegma', tén han amasséssók se'e apchókxa nak? ¡Neykhe apkeltémo ko'o aktámegmak kéxegke m'a tén han amasséssók!’

2 Crónicas 36:23

“Axta aptáhak Ciro, wesse' apwányam nak Persia s'e: Egkéssek ko'o Wesse' egegkok, Dios apha nak néten, ekyókxoho yókxexma nak keso náxop, apkeltamhók han alanaksek tegma appagkanamap ma'a Jerusalén, ekpayho nak ma'a yókxexma Judá. Kélyókxoho kéltáha nak Wesse' egegkok énxet'ák apagkok, kólmohok sa' ma'a, epasmok sa' ma'a Dios Wesse' kélagkok.”

Isaías 10:6

Eyáphássek ko'o ektamagkok ma'a apheykegkaxa nak énxet'ák megyáyo nak Dios, xama apheykegkaxa selókassamo nak chá'a ko'o, yaqwayam sa' elmenyexchesagkok tén han elyementamagkok ma'a aqsok apagkok ekxámokma élmomnáwa nak, yaqwayam sa' elteyammaha etnéssesek ma'a ektémól'a ólteyammaha yelpa' m'a ámay.

Isaías 44:28

Ektáhak ko'o seyáneya Ciro s'e: ‘Xép apteme keláneykha nepkések ahagkok, xép sa' elának chá'a ekyókxoho m'a sekmámenyého nak chá'a ko'o’; ektáhak nahan seyáneya Jerusalén se'e: ‘Kóllánekxak sa' makham xép’; keñe tegma appagkanamap sektáha seyáneya s'e: ‘Kólnegkenchesek sa' kóneg xép yaqwayam keynnaqtések.’”

Isaías 48:14

Kólaqnekxa sa' kélyókxoho kéxegke, kóleyxho sa' nahan: ¿Yaqsa axta kélxama kéxegke aplegassama ekmáheyo katnehek xa: apmáheyo etnéssesek ekxeyenmakxa nak ko'o ewáxok atnéssesek Babilonia m'a énxet ektáha axta ko'o sélyéseykha tén han ma'a énxet'ák caldeos?

Isaías 48:15

Ko'o axta sekxeyenma xa, ko'o axta seyáneyeykha tén han séltémo exegma', tásek sa' chá'a katnehek apwayam ma'a apmahágkaxa enxoho chá'a.

Jeremías 34:22

Wának sa' eyke ko'o elchexyók makham yenmexek se'e tegma apwányam nak tén han ektámenta', emok sa', keñe sa' ewatnekxoho'. Wának sa' ko'o etnekxak meyke xama aqsok ma'a nápakha nak tegma apkelyawe Judá, meyke xama énxet enxoho apha. Ko'o sekxeyenma xa, sektáha nak Wesse'.”

Jeremías 48:10

(¡Aptaqnómap sa' etnehek énxet melane nak aptamheykha apmésso m'a Wesse' egegkok! ¡Aptaqnómap sa' etnehek énxet memáheyo nak yaqhek pók neyseksa kempakhakma!)

Jeremías 50:15

¡Kólwónches kempakhakma m'a ekyókxoho nepyáwa nak! ¡Apmeyásekpek kaxwók ma'a Babilonia! ¡Apkelyaqnenágkek ma'a tegma netna'awo nak, kélyaqnegkeságkek ma'a kélhaxtegkesso nak nepyáwa! ¡Cháxa sekyaqmagkáseykekxa ko'o sélteméssessamakxa xa: kólyaqmagkásekxa apteméssessamakxa! ¡Kóltemésses apteméssessamakxa axta kéxegke m'a!

Jeremías 50:3

Hakte nexcheyha apkeleñamak apkelxegakmo apketamakmo m'a yaqwayam sa' etnessásekxak yókxexma meykexa énxet ma'a apchókxa nak. Méko sa' xama énxet exnekxak ma'a tén han aqsok kélnaqtósso, hakte yenyahagkok sa' apyókxoho énxet.”

Jeremías 50:9

Hakte wának sa' ko'o kaxhok mók apketámeyam Babilonia m'a énxet'ák apkelyennaqte apxámokma apkeleñama nak nexcheyha. Eléwekxak sa' yaqwayam yempakha', emok sa' nahan. Kempakhakma yapmeyk apmopwancha'a elnapakpok ma'a, apmoplensa'a yágke m'a apkelyát'a enxoho.

Ezequiel 23:23

cham'a énxet'ák Babilonia tén han ma'a caldeos, tén han ma'a énxet'ák Pecod, Soa tén han ma'a Coa, tén han ma'a apyókxoho asirios; cham'a apyókxoho wokma'ák apkeltaqmalma apagko' nak, kelwesse'e tén han ma'a apkeltaqmelchesso nak chá'a apkelókxa, sẽlpextétamo apkelwesse'e tén han ma'a kempakhakma yapmeyk nak; apyókxoho m'a énxet apkelchánte nak chá'a yátnáxeg.

Deuteronomio 33:27

Cha'a aptaqmelchesso exchep ma'a Dios memassegwayam nak, cha'a ekpasmo m'a apmopwána megkamassegwayam nak; emenxenchesek chá'a apmonye' exchep ma'a apkelenmexma nak keñe exchep yának chá'a emasséssók.

1 Samuel 15:3

Exeg, ektamák; emasséssem sa' yetlo ekyókxoho aqsok apagkok, nágkalepyósho aqsa elano'. Elnáhap sa' apkelennay'a tén han kelán'ák, sakcha'áletkók, keñe han kaxwe ekpalleyam nak, tén han ma'a weyke kelennay'awo', nepkések, yányátnáxeg, tén han yámelyeheykok.’