Jeremías 50:14 - Biblia Enxet

¹⁴ “¡Kóllánekxa kélchaqneykha kélmeykha nak yágke, kólwakhegwom Babilonia! ¡Kólyáta' ekyókxoho yágke aktek kélagkok, hakte apkeláneykegkek melya'assáxma nahaqtók ko'o m'a, sektáha nak Wesse'!

Jeremías 50:14 ပူးပေါင်းရင်းမြစ်များ

2 Samuel 10:9

Xama axta apwet'a Joab ekmako kólchetámegmak apmonye' tén han neptámen, apkelyesáha axta sẽlpextétamo apkelyennaqte israelitas, keñe axta apkelánesagkokxo aptamhágkaxa yaqwayam ektamagkok ma'a sirios.

Salmos 51:4

Xép aqsa énmexmak séláneya may'assáxma, xép aqsa énmexmak séláneya aqsok ekmaso aptaqnagkamo nak chá'a exchep. Cháxa keñamak ekpayhawo nak ma'a yaqwánxa nak hetnéssesek; naqso' agko' ma'a ektémakxa nak xép segyekpelchémo.

Isaías 13:4

Legáxcheyk élpayheykha kélatña'ák ma'a néten meteymog élekhahéyak nak, máxa m'a ektémól'a énxet apxámokma. Legáxcheyk apyennegkessóxma ekyennaqte m'a pók aptémakxa nak chá'a énxet'ák, cham'a énxet'ák apchaqneykekxa nak. Apteyánegwákxók sẽlpextétamo apagkok appencheséyák nak aptamhágkaxa yaqwayam yempakhak ma'a Wesse' ekha nak apyennaqte.

Isaías 5:28

Ahamtakcha'ak agko' nahan ma'a yágke aktek apagkok, tásek nahan apkeleykesso apnaqtete táma ekyókxoho m'a yágke apagkok. Máxa nahan meteymog élyennaqte agko' la'a awáxok apmagkok ma'a yátnáxeg apkelchánte, máxa nahan samaxche élyennaqte élyéha amagkok ma'a yátnáxeg apkelyenyawasso apagkok nak;

Jeremías 46:9

“¡Kólxeg kélchánte nak yátnáxeg! ¡Kólxeg kélchánte nak yátnáxeg apkelyenyawasso! ¡Kólxeg kempakhakma yapmeyk: sẽlpextétamo nak Etiopía, tén han Libia, kólmekxa kéláhakkásamáxche'; tén han sẽlpextétamo nak Lidia, apmopwancha'a nak elmaha yágke!

Jeremías 49:14

Wa'ak ko'o amya'a sekhakxa eñama Wesse' egegkok; aptáhak xama apseykha amya'a aplegasa nepyeseksa énxet'ák se'e: “¡Kólaqnekxa', kólchetamák Edom! ¡Kóllánekxa kéltáhakxa yaqwayam kólempakha'!

Jeremías 49:35

“Ektáhak ko'o sekpeywa s'e, sektáha nak Wesse' ekha sekyennaqte: Alekkexchesek sa' ko'o yágke apagkok ma'a énxet'ák Elam, cham'a yágke ekméssamo nak chá'a apkelyennaqte.

Jeremías 50:11

“Kéxegke caldeos, kélyementaméyak axta aqsok apagkok énxet'ák ahagkok, ¡kalpayhekxa kélwáxok, kólnéwha! ¡Kólnextegmakha néten, ektémól'a weyke étkok ma'a neyseksa pa'at! ¡Kólwehesha aptémól'a elpáwha yátnáxeg!

Jeremías 50:29

“¡Kólwónmakha apyókxoho apkelmeykha nak chá'a yágke, yaqwayam sa' ektamagkok ma'a Babilonia! ¡Kólpakxenák sa' ma'a nepyáwa nak tegma apwányam, yaqwayam sa' megyenyehek exyenmok xama énxet enxoho! ¡Kólhésho mók ma'a apteméssessamakxa axta! ¡Kóltemésses ma'a apteméssessamakxa axta! Hakte cheymáxkók axta chá'a appeywa sexéneykencha'a ekmaso ko'o, ko'o sektáha nak Wesse' Dios Appagkanamap ma'a Israel.

Jeremías 50:42

Yágke apkelmeykha tén han sawhéwa; Apkellamchek apagkók nahan ma'a, megkayóshek elanok aqsok, máxa wátsam ekwányam éxtegyawà m'a apkelwónchesso nak, yátnáxeg apkap'ák apkelxegakmok. Appenchásegkek aptamhágkaxa yaqwayam yempakhak ma'a Babilonia.

Jeremías 50:7

Apkeltahanya'awók axta agkok chá'a m'a apkelenmexma nak, elnápok axta chá'a etawagkok, axta etnehek chá'a elpaqmétek se'e: ‘Manlánegkok negko'o aqsok ekmaso, hakte apkeláneykegkek melya'assáxma nápaqtók Wesse' egegkok ma'a, apkelmésso nak chá'a ekyókxoho aqsok, melya'ásseykmo axta chá'a m'a apyapmeyk nano'.’

Jeremías 50:9

Hakte wának sa' ko'o kaxhok mók apketámeyam Babilonia m'a énxet'ák apkelyennaqte apxámokma apkeleñama nak nexcheyha. Eléwekxak sa' yaqwayam yempakha', emok sa' nahan. Kempakhakma yapmeyk apmopwancha'a elnapakpok ma'a, apmoplensa'a yágke m'a apkelyát'a enxoho.

Jeremías 51:2

Máxa hótáhap apaktek kélchempasso sa' ko'o wának etnéssesek apkelenmexma m'a Babilonia; meyke énxet apheykha sa' wának etnéssásekxak ma'a kañe' xapop apagkok nak. Wokmek sa' agkok ekhem ekmaso, máxa sa' kañék kélchetámeyam.

Jeremías 51:27

“¡Kólchexen néten aqsok ma'a apchókxa nak magkenatchesso yaqwayam kólchetamagkok! ¡Kólpáwés kélaqkahasso, kólána' elanagkokxak aptamhágkaxa apyókxoho énxet'ák, yaqwayam ektamagkok ma'a Babilonia! ¡Kólenmexches sa' ma'a apkelókxa nak Ararat, Miní, tén han ma'a Asquenaz! ¡Kólyésha xama sẽlpextétamo apkemha apmonye' kempakhakma! ¡Kólána elxog yátnáxeg apkelchánte, aptémól'a sawa' apkello!

Jeremías 51:3

¡Kóllánekxa yágke kélagkok kélmeykha nak chá'a yágke! ¡Kóláhakkásekxa kélnénya'ák ma'a kéláhakkasso nak chá'a! ¡Nágkalapyósho kóllanok ma'a wokma'ák nak Babilonia; kólmasséssem sa' apyókxoho m'a sẽlpextétamo apagkok!

Habacuc 2:17

Kaphewakxak sa' kéxegke kélteméssessamakxa axta kélyennaqteyáseykencha'a kélyempe'ék kélláneya m'a egkexe Líbano, kalyegwakkasek sa' eñama kélnapma m'a aqsok nawha'ák élleykha nak ma'a. Cháxa yaqwayam sa' káhapwak kéxegke xa, eñama aqsok ekmaso kéllánéyak tén han ekyókxoho kéltémakxa ekmaso axta, kélyennaqteyáseykencha'a axta kélyempe'ék ma'a apchókxa, kélenmexma m'a tegma apkelyawe nak, yetlo énxet'ák apheykha m'a kañe'.

Habacuc 2:8

Épetchekxak sa' pók, pók aptémakxa énxet'ák yenmexek xép, elyementók sa' aqsok apagkok, ekhawo aptémakxa axta chá'a exchep, apkelyementamoma aqsok apagkok ma'a. Exnéshok sa' mók ma'a ekyókxoho aptémakxa ekmaso axta, apyennaqteyáseykencha'a axta apyempehek ma'a apchókxa, apkenmexma axta m'a tegma apkelyawe nak, yetlo énxet'ák apheykha m'a kañe'.

1 Samuel 17:20

Keñe axta mók ekhem, axto'ók agko' axta apxatakha'a David, pók énxet axta han apkeltamhók elánésha m'a nepkések apnaqtósso, apxegkek axta apkelsákxo m'a nento apkelmésso axta m'a Jesé. Xama axta apwákxo m'a apkelpakxeneykegkaxa nak, appenchásegkek axta aptamhágkaxa yaqwayam elxog kempakhakma m'a sẽlpextétamo, apkelwónchessek axta apmako yempakha'.