Jeremías 5:6 - Biblia Enxet

⁶ Cháxa keñamak peya sa' kalántépok yámakméwa m'a naxma, keñe sa' kalnápok, nápakha'a apketkók sa' katnéssesek ma'a aqsok nawha'ák éllo élleykha nak yókxexma meykexa énxet, elyexanmaha sa' eleyxek yánneptána m'a nepyáwa nak tegma apkelyawe apagkok, nápakha'a apketkók sa' chá'a etnéssesagkok ma'a apkelántepa enxoho; hakte xámok agko' apkeláneyak melya'assáxma, hágkaxwe yenmexekxak ma'a Dios.

Jeremías 5:6 ပူးပေါင်းရင်းမြစ်များ

2 Crónicas 36:14

Apyáncháseykegkók axta aqsa apyamasma Wesse' egegkok ma'a apyókxoho apkelámha apmonye'e nak Judá, tén han apkelmaxnéssesso Dios énxet'ák apagkok, ekweykekxoho m'a énxet'ák, aptamheykegkek axta m'a apkeltémakxa ekmaso agko' axta m'a énxet'ák melya'áseyak nak Dios, aptawáseykha axta m'a Wesse' egegkok tegma appagkanamap apagkok, apkelyéseykegkaxa axta tegma appagkanamap apagkok ma'a Jerusalén.

Esdras 10:10

Keñe axta apkempákxo néten ma'a Esdras, apteme axta apkelmaxnéssesso Dios énxet'ák apagkok, aptáhak axta apkeláneya s'e: —Kélláneykegkek kéxegke megkólya'assáxma kélmeykegko m'a kelán'a megkatnaha nak kélpeywomo xamo', kélyánchessáseykegkók apkelsexnánémap ma'a énxet'ák Israel.

Esdras 9:6

sektáha s'e: “Dios ahagkok, ekmegqakkek ahagko' ko'o, may'ásegkok sektáhakxa, mowanchek sekmako alanok xép. Yeykhágwokmok agko' ma'a ektémakxa nak negko'o mólya'assáxma, weykmók néten ma'a nentémakxa nélsexnánémaxche'.

Job 10:16

Eyeyxkók agkok ko'o, heyaqmaksek xép ektémól'a méwa, weykmók apkelane m'a aqsok sempelakkasso nak agweta' apmáheyo hemasséssók.

Salmos 104:20

Eyáqtéssesek chá'a exchep, keñe chá'a katnehek axta'a, keytlawhok han chá'a élánteyapma m'a aqsok nawha'ák élleykha nak naxma.

Salmos 80:13

Apkelekkexmeyk ma'a pomáp; ¡teykegkek ma'a aqsok nawha'ák!

Isaías 1:23

Élyennaqte apkelwáxok ma'a kelwesse'e apkelwányam kélagkok nak, énxet'ák élmasagcha'a apkeltémakxa nahan ma'a apkelxegexma'a. Meltaqheksók nahan elxawagkok selyaqye m'a apyókxoho nak, etegyagkok nahan yaqwayam nak kólmésagkok aqsa chá'a m'a aqsok kelméyáséyak naqsa nak. Meltaqmelchessásekxeyk ekheykha m'a élyeheykha nak, megkalyetnakhaksók nahan apkelwáxok ektémakxa nak ekheykha m'a kelán'a xentampe'e nak.

Isaías 59:12

Xámók agko' negko'o nenmexeykha exchep, mólya'assáxma egagkok egagko' nahan ẽlsexnáneyákxa'; yetnegkek negyeseksa m'a aqsok magaqhémo, negya'ásegkók nahan ma'a aqsok ekmaso nenlánéyak.

Jeremías 14:7

Wesse', ẽlsexnenagkamchek eykhe negko'o m'a mólya'assáxma nak, eyke elána sa' aqsa aqsok, eñama apkelmeyeykha m'a apwesey! Xámokmeyk negko'o negyenseyam negyetleykha exchep, nenláneykegkek mólya'assáxma nenmexeykekxo.

Jeremías 2:15

¿Yaqsa eyke ektéma kélchetámeykmo nak ektémól'a yámakméwa, yetlo kélpáxegkáseykha ekyennaqte? Ekmaso kéltemessásekxak ma'a apchókxa; kélwatneyáseykekxók nahan ma'a tegma apkelyawe apagkok, méko nahan xama énxet enxoho apheykekxa m'a.

Jeremías 2:17

Temegkek kéxegke xa ektáha nak eñama sélyamasma ko'o, sektáha nak Dios Wesse' kélagkok, sekpékessáseyak nak chá'a ámay kélagkok.

Jeremías 2:19

Kéltémakxa ekmaso kélagko' sa' kéxegke kallegassásegkokxa', kélyamasma kélyetleykha Dios sa' kalsexnena'. Kalchetam sa' kélwáxok keñe sa' kólya'ásegwók asagkek ko'o hélyenyók, tén han askehe', tén han mehélakawo enxoho, ko'o sektáha nak Dios Wesse' kélagkok. Ko'o sekxeyenma xa, sektáha nak Wesse' ekha sekyennaqte.

Jeremías 2:31

(Kéxegke nahan, kaxwe nak kélektegeykekxa makham, kóltaqmelchesho kélháxenmo Wesse' egegkok appeywa.) Israel, ¿yókxexma meykexa énxet kélagkok ya axta ko'o kéxegke?, ¿xapop ekyaqtéssamakxa exma ya axta ko'o? Énxet'ák ahagkok, ¿yaqsa ektéma kéltéma nak chá'a kélpeywa s'e? ‘Nenteme egagko' negko'o kaxwók nentamheykegkok; wánxa kaxwók negye'eykekxa exchep’.

Jeremías 25:38

Máxa aptáhak aptepa m'a yámakméwa ekteyapmal'a axagkok, meyke xama aqsok tamhákxak ma'a apkelókxa nak, hakte aplókók apagko' ma'a Wesse' egegkok, apcha'ak kempakhakma ekmaso agko'.

Jeremías 30:14

Massegkek nahan élxeyenma apkelwáxok kéxegke m'a apyókxoho kélásekhayókxa nak; massegkek élyetnakhassamo apkelwáxok kéxegke. Élyensassegkek axta ko'o kéxegke, máxa axta ektemék ma'a apteméssessamól'a elyensaksek ma'a kélenmexma, éllegassáseykegkok axta ekyentaxno agko' eñama ekxámokma kéltémakxa ekmaso, tén han ekxámokma agko' ma'a megkólya'assáxma.

Jeremías 30:15

¿Yaqsa ektáha kélpaqméteyncha'a nak élleklámegko ektémakxa kélyense? Megkaltaqmelwomek kéllegeykegkoho. Ekxámokma kéltémakxa ekmaso, tén han ekxámokma agko' megkólya'assáxma keñamak, sekteméssessama xa ektáha nak.

Jeremías 30:24

Megkamassehek sa' Wesse' egegkok aplo ekwokmoho apkelana m'a ekxeyenma nak apwáxok elána'. Kawak sa' ekhem yaqwánxa kólya'ásegwók kéxegke xa aqsok nak.

Jeremías 4:7

Tekkek yámakméwa m'a ekyáqtamakxa nak, xegakmek ma'a ekmassésseykmoho nak pók aptémakxa énxet'ák; tekkek ma'a eyókxa nak, peyk kamasséssak kélókxa, yaqwayam kamasséssessók ma'a apchókxa tén han katnéssásekxak yókxexma meykexa énxet, tén han nápakha'a apketkók ma'a tegma apkelyawe kélagkok nak.

Jeremías 49:19

Katlakkasek sa' ko'o axegma', ektémól'a yámakméwa katyapok ma'a naxma ekyentaxno neyáwa Jordán, ekmahéyak la'a chá'a m'a yókxexma ekhakxa nak pa'at axnagcha'ák, sa' ko'o amenxenek énxet'ák Edom ma'a, wának sa' ko'o etnehek apkeláneykha apchókxa m'a énxet sélyéseykha nak ko'o. Hakte ¿yaqsa awanchek ko'o hexnésaxkoho'? ¿Yaqsa awanchek ko'o hélyekkónaxche'? ¿Yaqsa keláneykha nepkések apwanchek hénmexekxak ko'o?

Jeremías 8:5

Israel, ¿yaqsa eyke ektéma sénmexeykekxo nak? Jerusalén, ¿yaqsa eyke ektéma seyamasma agko' nak ko'o? ¿Yaqsa ektéma aptéma nak ekyennaqte apwáxok tén han memáheyo nak hey'óta'?

Jeremías 8:7

Weykmók seyána' ekya'áseykegkoho ekhem yaqwánxa keyxyók makham. Apya'ásegkók nahan ekhem yaqwánxa emyekxak chá'a mók nekha m'a sapop, tén han yeptameygmen, tén han ma'a yáho. Keñe kéxegke énxet'ák ahagkok, megkólya'ásegkok ma'a segánamakxa ahagkok.

Lamentaciones 1:5

Kóneg aptemessásekxak ma'a apkelenmexma, tásek ekteyapma aqsok apkelánéyak ma'a apkelenmexeykha nak chá'a. Wesse' egegkok apyentaxnéssesso apheykha m'a, eñama ekxámokma m'a melya'assáxma. Kélnaqlákxeyk megkatnahakxa apkelókxa m'a apketchek, apnaqlákxeyk ma'a apkelenmexma nak.

Ezequiel 16:25

Kelánegweykmek chá'a ekyókxoho ekmassegweykemxa nak chá'a ámay xa ektéma nak aqsok, temessáseykekxeyk aqsok ekmaso agko' ma'a ektémakxa nak ektaqmalma ekméssama chá'a ekyókxa m'a apyókxoho ektáha nak chá'a apyeykhágwayam, méko néxa élane m'a ektémakxa ekmaso megkamasexta.

Ezequiel 22:27

Máxa aqsok nawha'ák éllo élyeptamól'a ekyógkexma apkelwesse'e s'e apchókxa nak, apkelpenchesso nak chá'a yaqwayam elnápok énxet yaqwayam enxoho kaxámekxak ma'a aqsok apagkok.

Ezequiel 23:19

Yánchesseykmók axta eyke aqsa ektemegweykmohóxma élane m'a ektémakxa ekmaso megkamasexta, ekxénweykekxo chá'a awáxok ma'a ektémakxa axta étkok, ektemegweykmoho axta chá'a exma m'a Egipto éláneya m'a ektémakxa ekmaso megkamasexta,

Daniel 7:4

Máxa axta yámakméwa m'a émha amonye' nak, axempenák axta eyke eghak, máxa axta m'a náta ekyawel'a. Kélhexyawássessek axta han axempenák neyseksa sélányo ko'o, kélchampásekxeyk axta néten, kélteyágkassek axta xapop ma'a ataqla amagkok, kélchenegkáseyha axta ektémól'a énxet, kélméssek axta ekya'áséyak ektémól'a énxet.

Daniel 7:6

“Keñe axta m'a ektáhakxa ántánxo, ekhawo m'a yám neptána, cuatro axta eyke axempenák ma'a akpok nak; ekwet'ak axta han ekyetna cuatro apqatkok, xakak axta han ekmowána éláneykha aqsok.

Oseas 5:14

Sa' atnehek ko'o aktamagkok Efraín, tén han Judá m'a ektémól'a méwa kaktamagkok aqsok, ko'o ahagko' sa' han atnéssesagkok nápakha'a apketkók, tén sa' axñekxak makham, alyenyawasagkokxak sa', méko sa' kalwagkasek teyp.

Habacuc 1:8

Apmelyeyha'awók apagko' han apkenyahéyak apkelchánte yátnáxeg, apyeykhásseykmok ma'a ekwánxa nak ekyennaqte apkenyahéyak yánneptána, apkellómók apancha'awók nahan, apyeykhásseykmok ma'a aqsok nawha'ák éllo élleykha nak yókxexma meykexa énxet. Apxámok apagko' han chá'a etnehek enaqtégkesagkok apkelchánte yátnáxeg, makhawo chá'a elleñék ektamagkok ma'a apkelenmexma, ektémól'a náta ekyawe kathánek aqsok ekmáheyo kamok.

Sofonías 3:3

Máxa yámakméwa m'a apkelámha apmonye'e apagkok élpáweykhal'a awáxok; máxa aqsok nawha'ák éllo élleykhal'a meykexa énxet ma'a segyekpelchémo apagkok nak, megkáyam la'a ketsék axchapok yaqwayam katwok ma'a saka.

Números 32:14

Keñe kaxwók kéxegke, apketchek nak ma'a kélyapmeyk nanók melya'assáxma, kélmakók kólyetlakxak ma'a apkeltémakxa axta kélyapmeyk nano', yaqwayam enxoho kóllókasek makham Wesse' egegkok eltaqnaweygkok ma'a énxet'ák Israel.