Jeremías 44:7 - Biblia Enxet

⁷ “Ektáhak ko'o kaxwók sekpeywa s'e, sektáha nak Wesse' ekha sekyennaqte, Dios apagkok nak Israel: ¿Yaqsa ektéma kéltekkessama nak kéxegke kélagkók kélagko' kélnepyeseksa xa aqsok ekmaso agko' nak? ¿Yaqsa ektéma kélhayo nak apkeletsapma apyókxoho m'a énxet'ák Judá, cham'a apkelennay'a nak, kelán'ák, sakcha'a, ekweykekxoho m'a kaxwe ekpalleyam nak, yaqwayam enxoho megkeymaxcheyk xama enxoho'?

Jeremías 44:7 ပူးပေါင်းရင်းမြစ်များ

Proverbios 1:18

apnegkenéyak apagko' eyke chá'a etnahágkok kelhanma xa énxet'ák nak, apkelsexnánémakpekxoho apagko' chá'a etnahagkok.

Proverbios 15:32

Énxet megyaháxenmo nak kélpaqhetchesso, apsexnánémakpekxoho apagko' etnehek; keñe m'a apkelyeheykekxoho nak chá'a kélnokáseykha, étak apya'áseykegkoho aqsok.

Proverbios 5:22

Kamekxohok agko' chá'a aqsok ekmaso apkelane m'a énxet ekmaso nak aptémakxa'; máxa táma katnehek kalpextétek ma'a mey'assáxma apkelane apagkok apagko' nak.

Proverbios 8:36

keñe m'a énxet ektáha nak sétnakhasso ko'o, cháxa aptawásekpoho apagko' xa; ¡apyókxoho ektáha nak chá'a setaqnagko ko'o, cháxa aptáha apchásekhayo m'a nétsapma!”

Jeremías 25:6

Nágkólyetlakxa m'a mók aqsok kéláyókxa; nágkólteme éláneykha, nágkólpeykesho nahan. Nágkóllókas Wesse' egegkok kólpeykeshok ma'a aqsok kéláyókxa kéllánéyak kélagko' nak kéxegke, keñe sa' megyahék kéxegke xama enxoho m'a aqsok ekmaso.’

Jeremías 25:7

Aptáhak kaxwók Wesse' egegkok se'e: ‘Megkólmáheyók kéxegke hélyahakxoho; éllókassegkek kélpeykessamo m'a aqsok kéláyókxa kélláneyak kélagko' nak kéxegke, cháxa peya sa' kagkések kéxegke aqsok ekmaso xa.

Jeremías 26:19

“¿Apchaqhegkeya axta wesse' apwányam Ezequías tén han apyókxoho énxet'ák Judá m'a Miqueas? Ma', apcháyak axta wesse' apwányam ma'a Wesse' egegkok, apkeltémok axta nahan kalepyóshok elano'. Tén axta Wesse' egegkok megyahaya m'a nenlegeykegkoho ekmaso apkeltennassama axta yaha'. ¿Agánaya sa' negko'o hegápekxak xa aqsok ekmaso agko' nak?”

Jeremías 3:24

Kéleykmássesso segmegqassamo nélpeykessamo ensawhessók ma'a aqsok apkelwete axta ẽlyapmeyk nano' ma'a nentémakxa axta egketkók: cham'a nepkések, weyke, tén han egketchek apkelennay'a tén han kelwán'ák.

Jeremías 38:17

Keñe axta Jeremías aptáha apcháneya Sedequías se'e: —Aptáhak Wesse' ekha apyennaqte, Dios apagkok nak Israel se'e: ‘Apmeyásékpek sa' agkok xép ma'a sẽlpextétamo apkelwesse'e apagkok nak wesse' apwányam Babilonia, ewagkasakpok sa' xép teyp, yetlo apnámakkok, megkólwatnekxeyk sa' nahan se'e tegma apwányam nak.

Jeremías 42:20

Awanhók agko' kéxegke megkólaqhémo kéltáhakxa peya nak kalsexnena', hakte kéxegke kélagkók axta kéltémo ay'ókxések ma'a Dios Wesse' kélagkok, axta kéltáhak séláneya s'e: ‘Hẽlmaxnésses negko'o Dios Wesse' egagkok, hegya'ássesagkoho sa' nahan ekyókxoho m'a aptáhakxa enxoho apcháneya, yaqwayam enxoho negko'o anlána'.’

Jeremías 44:14

Melegketakpek sa' xama enxoho m'a énxet'ák Judá, apkeleymomap axta, apkelmahéyak apkelhayam ma'a Egipto, méko sa' xama enxoho yeymakpok. Emáwhok sa' eyke elmeyenták makham Judá, yaqwayam elhaták makham ma'a, melwateyk sa' eyke, melxeganakmo enxoho apqántawo.’”

Jeremías 44:8

¿Yaqsa ektéma séllókassama nak, eñama m'a ektémakxa nak aqsok kélláneyak, tén han kélméssama chá'a aqsok ánek ekmátsa nak ekpaqneyam éten agkok mók aqsok kéláyókxa s'e kañe' Egipto nak, kélmeyeykenxa nak kélhaya? Sa' kagkések kélmassésamaxkoho kélagkok kélagko' kéxegke xa, katnéssásekxak sa' kéltémo nak chá'a hentemegwomhok exma ekmaso, tén han mékoho nepyeseksa pók aptémakxa énxet'ák nak keso náxop.

Jeremías 51:22

Xép chá'a wásenneykxak alyaqtennagkok ma'a énxet'ák, tén han kelán'ák, apkelwányam, tén han wokma'ák, wokma'ák apketkók tén han kelán'ák étkók.

Jeremías 7:19

Háwe eyke ko'o setnéssesseykmohoxma ekmaso xa énxet'ák nak, apnaqtawásamakpekxoho apagko', yaqwayam enxoho elmegqasakpekxohok apagko'. Ko'o sekxeyenma xa, sektáha nak Wesse'.

Jeremías 9:21

“Taxneyk enxanák nétsapma, wokmek ma'a tegma apkelyawe egagkok apkeltaqmalma nak; kelnapchek sakcha'a apkelennay'a m'a ámay nak, tén han wokma'ák ma'a apheykegkaxa nak chá'a énxet'ák elweynchamha.

Lamentaciones 2:11

Kelyélaqtéssek ahaqta'ák sekwóno, eklegágkok ekyentaxno agko' ewáxok; yelqáxcheyk ewáxok sekwet'a kélmasséssekmo tegma apwányam apagkok nak énxet'ák ahagkok, tén han sekwet'a apkeletsapa meyk ámay ma'a sakcha'a ekweykekxoho m'a melyamasma nak neme.

Lamentaciones 2:22

Máxa keleñamak apnaqlókmo m'a aqsok segyegwakkassamo nak, ektémól'a kólya'ammok ma'a kélessawássessamo; méko axta xama enxoho eyewagko kagketaxchek ma'a aplawa axta exchep Wesse'. Apkelnapmeyk sélenmexma m'a séktegkesso axta, tén han ma'a sélxekmowáseyak axta.

Ezequiel 33:11

Naqsók eyke ko'o sekxéna sektáha nak Wesse' mamassegwayam, mómenyeyk yetsapok ma'a énxet ekmaso nak aptémakxa, émeñeyk aqsa eyaqmagkasek aptémakxa, keñe megyetsepe'. Israel, eyenyekxa xa aptémakxa ekmaso apmeykencha'a nak. ¿Yaqsa ektéma apkeltémo nak yetsapok?’

Habacuc 2:10

Kéllánessegkek kélxanák ma'a aqsok segmegqassamo nak, kélnaqtawásamáxche kélagko' kéltemék kélmassésseykmo apxámokma apagko' ma'a pók aptémakxa énxet'ák.

Números 16:38

Élpagkanamaxche táhak apxata nak chá'a aqsok ánek ekmátsa ekpaqneyam éten agkok xa énxet'ák nak, apkeletsapa nak eñama melya'assáxma, hakte kélmeykha axta chá'a yaqwayam kólnegkenwók nahaqtók ko'o m'a aqsok ánek ekmátsa nak ekpaqneyam éten agkok. Kólpeykásekxa sa' xa sawo nak yaqwayam sa' kólyepetchesek émpehek ma'a ekwatnamáxchexa nak aqsok, yaqwayam sa' katnehek ekxénweykekxoho chá'a apkelwáxok kéleysso m'a israelitas.”

Deuteronomio 32:25

Etekyók sa' apketchek ma'a neyseksa ámay, keytek sa' nélmeneykha m'a kañe' apxanák; eletsapok sa' ma'a wokma'ák tén han kelán'a étkók, tén han apkelwányam tén han ma'a sakcha'a mekxakha nak makham neme.

Josué 6:21

Keñe axta apkelnapa m'a énxet'ák, kelán'ák, sakcha'áletkók, tén han ma'a apkelwányam nak, sókwenaqte axta chá'a apkelyetxeyk, wokmók axta han apkelnapma m'a weyke apnaqtósso, nepkések, tén han yámelyeheykok. Ekyókxoho agko' axta apmasséssekmok.

1 Samuel 15:3

Exeg, ektamák; emasséssem sa' yetlo ekyókxoho aqsok apagkok, nágkalepyósho aqsa elano'. Elnáhap sa' apkelennay'a tén han kelán'ák, sakcha'áletkók, keñe han kaxwe ekpalleyam nak, tén han ma'a weyke kelennay'awo', nepkések, yányátnáxeg, tén han yámelyeheykok.’

1 Samuel 22:19

Tén axta apkeltamho han emhagkok ma'a Nob, tegma apwányam apagkok axta m'a apkelmaxnéssesso Dios énxet'ák apagkok, apkelnapchek axta han chá'a énxet'ák apkelyetxeygko sókwenaqte, ekweykekxoho kelán'ák, sakcha'áletkók, tén han ma'a kaxwe ekpalleyam nak. Apkelnapchek axta han weyke, yámelyeheykok, tén han nepkések.