Jeremías 43:10 - Biblia Enxet

¹⁰ Etne sa' elának se'e: ‘Aptáhak Wesse' ekha apyennaqte, Dios apagkok nak Israel se'e: Wának sa' ko'o exegmak séláneykha Nabucodonosor, wesse' apwányam nak Babilonia, apekkenchessak sa' aptaháno, tén han appakxanma aptaqmalma s'e néten nak meteymog, sélátawanya exchek ko'o s'e.

Jeremías 43:10 ပူးပေါင်းရင်းမြစ်များ

1 Reyes 20:12

Xama axta apleg'a ektáhakxa amya'a kélátegmowéyak ma'a Ben-hadad, neyseksa apyá xamo' ma'a pók kelwesse'e apkelwányam, cham'a aphágkaxa axta kóneg apkelpakxanma nak. Keñe axta aptáha apkeláneya m'a sẽlpextétamo apkelámha apmonye'e apagkok: “¡Kólchetamák!” Keñe axta apkelánekxo aptamhágkaxa apyókxoho yaqwayam ektamagkok ma'a tegma apwányam.

1 Reyes 20:16

Yetseksókhem axta apkelántépak, keñe m'a Ben-hadad tén han ma'a treinta y dos kelwesse'e apkelwányam ektáha axta appasmeykekxa', kelnapchek axta aqsa makham ma'a kóneg nak apkelpakxeneykegkaxa,

Salmos 18:11

Apmeykha axta apyexanmoma m'a ekyáqtessóxma ekyentaxno ekwakhaya axta, apmeykha axta aptéma appakxanma m'a yaphope ekpésyam ekláneyo m'a yegmen.

Salmos 27:5

Wa'ak sa' agkok ekhem ekmaso, hekpósek sa' Wesse' egegkok ma'a kañe' nak tegma appagkanamap apagkok, hexnések sa' hetaqmelchesek ma'a kóneg nak. ¡Hewagkasek sa' teyp hexnéssók ma'a netnók agko' nak meteymog!

Salmos 31:20

Aphakxa chá'a exnések megyohok etnéssessamhok exma m'a énxet'ák élmasagcha'a nak apkeltémakxa; kóneg aphakxa chá'a exnések etaqmelchesek yeksek apkelya'ásseyam ma'a apkelenmexma nak.

Isaías 44:28

Ektáhak ko'o seyáneya Ciro s'e: ‘Xép apteme keláneykha nepkések ahagkok, xép sa' elának chá'a ekyókxoho m'a sekmámenyého nak chá'a ko'o’; ektáhak nahan seyáneya Jerusalén se'e: ‘Kóllánekxak sa' makham xép’; keñe tegma appagkanamap sektáha seyáneya s'e: ‘Kólnegkenchesek sa' kóneg xép yaqwayam keynnaqtések.’”

Isaías 45:1

Apteméssessek axta Wesse' egegkok wesse' apwányam ma'a Ciro, apmeyk axta apmek apkelya'assamakxa yaqwayam enxoho etnehek apkeláneykha apyókxoho énxet'ák keso náxop tén han yaqwayam elyementók chá'a apkelmeykha apkenchesso kempakhakma m'a kelwesse'e apkelwányam nak. Apkeltamhók axta nahan kólmeykessesek chá'a átog tegma apkelyawe apmonye' Ciro m'a Wesse' egegkok meyke enxoho xama énxet apmopwána yápekxa'. Tén axta aptáha apcháneya s'e:

Jeremías 1:15

Naqsók ko'o peya alwónmakha apyókxoho énxet'ák apheykha nak apchókxa nexcheyha, ko'o sektáha nak Wesse' kélagkok. Elxegmak sa' ma'a apkelwesse'e apkelwányam apagkok, enegkenwak sa' apkeltaháno éltaqmalma m'a nentaxnamakxa agko' nak ma'a Jerusalén, ekpayho nak ekyókxoho m'a kélhaxtegkesso nak nepyáwa ekwakhaya nak, tén han ekpayho nak apyókxoho m'a tegma apkelyawe nak Judá.

Jeremías 43:9

“Elma sa' meteymog élyawe, elátawañe sa' nentaxnamakxa nak tegma, nápaqta'awók énxet'ák Judá, cham'a átog nak nentaxnamakxa m'a wesse' apwányam apxagkok.

Jeremías 46:13

Appaqhetchessek axta Wesse' egegkok Dios appeywa aplegasso Jeremías, cham'a apxega axta Nabucodonosor wesse' apwányam nak Babilonia apketámegko m'a Egipto. Aptáhak axta apcháneya s'e:

Jeremías 49:38

Apekkenwók sa' ko'o sektaháno m'a Elam yaqwayam sa' atnehek séláneykha, alnáhakkasek sa' ma'a kelwesse'e apkelwányam apagkok, tén han ma'a apkelámha apmonye'e apagkok. Ko'o sekxeyenma xa, sektáha nak Wesse'.

Ezequiel 5:12

Eletsapok sa' chá'a xama énxet'ák agkok aptáhakxa nak chá'a apqántánxo, eñama negmasse tén han meyk élnapma, keñe sa' ma'a nápakha nak elnápok ma'a apkelenmexma apheykha nak nepyáwa', keñe sa' ma'a apkeleymomap nak waxpánchesek ekyókxoho keso náxop. Axog sa' eyke ko'o neptámen yetlo sekmeykha sókwenaqte.

Daniel 2:21

Cham'a apyaqmagkasso chá'a ektémakxa ekhem ma'a tén han ektémakxa nak chá'a aqsok ekteyapma; cham'a apnegkenma chá'a kelwesse'e apkelwányam, tén han apkelántekkesso chá'a, cham'a apkelmeyáseyak chá'a apkelmopwancha'a m'a ekha nak chá'a apkelmopwancha'a, tén han apkelya'áseyak chá'a aqsok ma'a apkelya'áseyak nak chá'a aqsok.