Jeremías 42:18 - Biblia Enxet

¹⁸ “Aptáhak Wesse' ekha apyennaqte, Dios apagkok nak Israel se'e: ‘Sa' atnehek nahan ko'óxa altaqnaweygkok kéxegke m'a sektémakxa axta séltaqnaweykegkoho ahagko' ma'a apheykha nak Jerusalén, kélmeyákxo sa' ma'a Egipto, altaqnaweygkohok ahagko' sa' ko'o kéxegke. Néltémo hentemégwomhok exma ekmaso sa' kóltemekxa', aqsok eyeymáxkohol'a kataxche', megkólwetekxók sa' chá'a s'e yókxexma nak.’

Jeremías 42:18 ပူးပေါင်းရင်းမြစ်များ

2 Crónicas 34:25

Hakte élyamasmeyk ko'o kéxegke, kélwatnéssegkek han aqsok ekmátsa nak ekpaqneyam éten agkok ma'a mók aqsok kéláyókxa nak, elókassegkek ma'a ekyókxoho aqsok kéllánéyak nak; cháxa keñamak seklawa nak ko'o sektaqnawaya s'e yókxexma nak, megkamassehek nahan sektaqnagko.

Isaías 30:3

Elyexanchesha sa' eyke aqsa chá'a elmeyók ma'a faraón, elmegqágwakxohok sa' ma'a apkelheykekxa nak chá'a kañe' Egipto.

Isaías 65:15

Elmaha sa' kélwesey kéxegke m'a sélyéseykha nak ko'o yaqwayam sa' elyemnaha tén han eltamhok yetsapok ma'a pók, alyaqmagkassesek sa' eyke ko'o mók apkelwesey m'a séláneykha.

Jeremías 18:16

Cháxa apkeltémakxa aptemessáseykekxo yókxexma meykexa énxet ma'a apchókxa nak, tén han élyamasso apkelwáxok ma'a énxet'ák. Elyeykesha sa' chá'a apqatkok elyegweyk elwetak ma'a ektáhakxa enxoho chá'a apkelyeykhágwayam ma'a.

Jeremías 22:27

Megkalwatamók sa' chá'a s'e xapop élpekheykegkaxa agko' nak chá'a kalmeyenta'.

Jeremías 23:40

Meyke néxa sa' ko'o atnéssesek kéxegke sekteméssesso mékoho tén han kélmegqakto, megkalwagqamagkehek sa' xa aqsok nak.’”

Jeremías 24:9

Wának sa' ko'o káhapwak aqsok ekmaso agko' ma'a, yaqwayam sa' kalyegwakkasek chá'a elwetak ma'a apyókxoho énxet'ák apheykha nak keso náxop, elasmésakpok sa' chá'a ekyókxoho apkelókxa sélya'asakxa enxoho chá'a ko'o waxpánchesek, eltaqnaweykpok sa' nahan, kóltamhok sa' nahan chá'a kaltemégwomhok exma ekmaso.

Jeremías 25:9

aláneyha sa' ko'o apyókxoho énxet'ák apheykha nak nexcheyha yetlo séláneykha Nabucodonosor, wesse' apwányam nak ma'a Babilonia, yaqwayam sa' elxegma', ektámegmak se'e apchókxa nak, yetlo apyókxoho énxet'ák apheykha nak kañe', tén han ma'a apyókxoho énxet'ák apheykha nak neyáwa'. Amasséssók sa' ko'o ekyókxoho. Meteymog ektaháneykekxa mók meyke néxa sa' atnessásekxa', negaye agweta', tén han segyegwakkassamo.

Jeremías 26:6

sa' atnéssesek ko'o sekteméssessamakxa axta Siló s'e tegma appagkanamap nak. Apkelxéneykha ekmaso sa' ko'o atnéssesek apyókxoho énxet'ák apheykha nak keso náxop, cháxa tegma apwányam nak.’”

Jeremías 29:18

Alyetlókasha sa' kempakhakma, meyk tén han negmasse. Wának sa' ko'o elpexyennók apkelaye apkelwet'a enxoho m'a apyókxoho énxet'ák, atnessásekxak sa' ko'o éñamakxa néltémo hentemegwomhok exma ekmaso, tén han negmegqakto, xama aqsok ekpexchessamo nak egyempehek agweta' tén han segyegwakkassamo nepyeseksa m'a apyókxoho énxet'ák, sélya'assamakxa nak chá'a ko'o séxpánchessama.

Jeremías 29:22

Peyk sa' agkok chá'a yának katnégwomhok exma ekmaso xama énxet kélántekkesso axta Judá apheykencha'a nak kaxwók ma'a Babilonia, sa' etnehek chá'a s'e: Sa' etnéssesek xép Wesse' egegkok ma'a apteméssessamakxa axta m'a Sedequías, tén han Ahab, apkelwatnama axta wesse' apwányam Babilonia apkexakhama nátex.

Jeremías 44:12

Wának sa' ko'o kólmasséssók apyókxoho m'a apkelheykekxa nak Judá, tén han apkelpekheykha axta elmeyekxak elhakxak ma'a Egipto. Apyókxoho sa' eletsapok kempakhakma, meyk, cham'a ketcheyetse nak ekweykekxoho m'a apkelwányam nak, etnahagkokxak sa' éñamakxa néltémo hentemegwomhok exma ekmaso, tén han mékoho, tén han aqsok eyeymáxkohol'a kataxche'.

Jeremías 44:22

Massegkek axta eyke apkelenmáxamap Wesse' egegkok ma'a aqsok ekmaso kélláneyak, kélláneykegko axta kéxegke, cham'a aptaqnagkamo apagko' nak chá'a m'a. Cháxa keñamak ektamheykekxo nak kaxwók ekmaso kélókxa kéxegke tén han meyke xama énxet apha m'a; éñamakxa néltémo hentemegwomhok exma ekmaso tamheykekxa', aqsok eyeymáxkohol'a kataxche'.

Jeremías 44:6

Keñe seklómo ahagko' ko'o, máxa táxa eyáléwe axta temék élwatnama m'a tegma apkelyawe nak Judá, tén han ma'a ámay nak Jerusalén. Nápakha'a apketkók axta aptamheykekxa', tén han meyke xama aqsok, ekwokmoho makham se'e kaxwo' nak.

Jeremías 44:8

¿Yaqsa ektéma séllókassama nak, eñama m'a ektémakxa nak aqsok kélláneyak, tén han kélméssama chá'a aqsok ánek ekmátsa nak ekpaqneyam éten agkok mók aqsok kéláyókxa s'e kañe' Egipto nak, kélmeyeykenxa nak kélhaya? Sa' kagkések kélmassésamaxkoho kélagkok kélagko' kéxegke xa, katnéssásekxak sa' kéltémo nak chá'a hentemegwomhok exma ekmaso, tén han mékoho nepyeseksa pók aptémakxa énxet'ák nak keso náxop.

Jeremías 6:11

Wesse', lanawók ko'óxa ewáxok xeyep aplo; mowanchek kaxwók sekmako amágwakxa'.” Aptáhak axta ko'o seyáneya Wesse' egegkok se'e: “Eyenyenta nepyeseksa m'a wokma'ák apkelweynchámeykha nak ámay, nepyeseksa nak ma'a wokma'ák apyaqyeyáseykha nak apkelweynchámeykha. Elmakpok sa' ma'a énxet'ák yetlo apnaqteyegka'a, tén han ma'a apkelwányamók apagko' nak.

Jeremías 7:20

Cháxa keñamak peya nak ko'o ayenyenták seklo neyseksa s'e yókxexma nak, ko'o sektáha nak Wesse' tén han nepyeseksa xa énxet'ák nak, ekweykekxoho m'a aqsok kélnaqtósso, tén han yenta'a élámha nak yókxexma, tén han aqsok kélcheneykekxa. Sa' katnehek ma'a ektémól'a táxa eyáléwe, megkólmowánal'a kólsapanchesek.”

Lamentaciones 2:4

Máxa nénmexma aptáhak Wesse' egegkok apkeykesa axát'ák yágke, apyennaqtéssek apaktog apkeykesa; apmasséssekmek ma'a ekleklamo axta chá'a egwáxok anlano', máxa m'a nénmexmal'a; máxa táxa entáhak apyenyeynto aplo m'a neyseksa nak Sión ektaqmalma.

Lamentaciones 2:6

Máxa apmenyexma aptáhak megyessákxo aptawásencha'a m'a tegma appagkanamap apagkok; apmasséssekmek ma'a kélpeykessamókxa nak chá'a. Apmasséssekmek Wesse' egegkok élánamáxche nak chá'a kélessawássessamo m'a Sión, tén han ma'a sábado. Aplo keñamak aptaqnawaya m'a wesse' apwányam tén han ma'a apkelmaxnéssesso nak chá'a énxet'ák apagkok.

Lamentaciones 4:11

Aplómok apagko' ma'a Wesse' egegkok, axta emágweykekxak aplo; apwatnegkek axta m'a Sión keñe apmassésseykmo ekweykmoho m'a apowhók nak.

Ezequiel 20:34

Wánchásekxak sa' ko'o kéxegke, anaqlósawakxak sa' nepyeseksa m'a énxet'ák tén han ma'a pók aptémakxa nak chá'a énxet'ák kélmeheykegkaxa axta chá'a kélexpánma, yetlo ekyawe sekmowána sa' eyke chá'a atnehek, tén han sellegassáseykegkoho yetlo seklo.

Ezequiel 22:22

Sa' kóltéhek kéxegkáxa kólpayhekxak nepyeseksa tegma apwányam ma'a ektémól'a sawo ekmope ekmomnáwa kólpeykásekxak ma'a kañe' táxa axagkok, keñe sa' kólya'ásegwók ektáha ko'o sekyenyeykenta seklo kélnepyeseksa kéxegke, ko'o sektáha nak Wesse'.”

Daniel 9:11

Apyókxoho énxet'ák Israel melyaheykekxak ma'a nélxekmowásamáxche apagkok, memáheyók elyahakxohok ma'a apkeltémókxa etnahagkok; cháxa keñamak segáhapwa'a nak negko'o m'a aqsok ekmaso, ekyetnama nak eknaqtáxésamaxche m'a Moisés segánamakxa apagkok, apkeláneykha axta exchep, hakte nenláneykegkek negko'o mólya'assáxma nénmexeykekxo exchep.

Daniel 9:27

Elának sa' ekhémo mók apkelpaqhetchásamákpoho apxámokma énxet ekweykmoho makham xama semána, emasséssók sa' eyke aqsok ektekyawa náxet semána, tén han ma'a kélmésso naqsa nak chá'a aqsok. Kalanaxchek sa' aqsok ekmaso agko' ma'a ekpayhókxa nak ekyetnamakxa m'a ekwatnamáxchexa aqsok ektekyawa, ekwokmoho eyápekxo kélmassésseyam ekxénamaxko nak katnehek ma'a ektáha nak apkelane xa aqsok ekmaso agko' nak.’”

Oseas 7:16

Apkelye'eykekxeyk axta eyke m'a aqsok kéleykmássesso, aphawók ma'a yágke ektaqhél'a, megkapayhémól'a negya'asakxa m'a aktek nak. Sókwenaqte sa' kólyetxák kólnápok ma'a apkelámha apmonye'e apagkok nak, eñama éleymáxkoho apkelpaqméteykha, elesmaksek sa' ma'a énxet'ák Egipto.

Nahúm 1:6

¿Yaqsa megkatsepek ma'a aplawa enxoho? ¿Yaqsa awanchek kalenmaxaxkohok ma'a aplo nak? Máxa táxa eyáléwe katnehek kapayhekxak ma'a aplo, kamayhekxak chá'a neyseksa apmonye' m'a meteymog.

Zacarías 8:13

Énxet'ák Judá tén han énxet'ák Israel. Sa' atnéssesek ko'o kaxwók alwagkasek teyp tén han wának kaltaqmalmakha apkelpeywa elxénmakha énxet'ák, ekhawo ektémakxa axta kélyemneykha ekmaso nepyeseksa m'a apyókxoho pók aptémakxa énxet'ák. ¡Nágkólé'! ¡Kólwasqápekxoho!”

Números 5:27

naqsók sa' agkok ektawáseykegkoho atáwa', kásseksek sa' awáxok xa yegmen eksáyam nak negyemnamaxche', keyphéssesek sa' nahan awáxok, katsagkassesek sa' nahan étche awáxok, keñe sa' kelán'a katnehek ekyemnamaxche nepyeseksa énxet'ák agkok.