Jeremías 32:34 - Biblia Enxet

³⁴ Weykmok aptawáseykha tegma appagkanamap sélpagkanchesso nak ko'o, apnegkenweykmo m'a kéleykmássesso apagkok élmaso agko' nak.

Jeremías 32:34 ပူးပေါင်းရင်းမြစ်များ

2 Reyes 21:1

Doce apyeyam apagkok axta apkeynamo apteme wesse' apwányam Manasés, cincuenta y cinco apyeyam axta apteme wesse' apwányam ma'a Jerusalén. Hepsiba axta ekwesey egken.

2 Reyes 23:6

Aptekkessek axta yókxexma teyp Jerusalén ma'a kéleykmássesso Aserá, ekyetnama axta m'a Wesse' egegkok tegma appagkanamap apagkok, apwatnegwokmek axta m'a alwáta' Cedrón ekwokmoho ektamhákxo táhap, keñe axta apkexpáncháseyncha'a táhap ma'a kélátawanyamakxa axta chá'a énxet'ák.

2 Crónicas 33:15

Apkelántekkessek axta han Wesse' egegkok tegma appagkanamap apagkok ma'a aqsok kéláyókxa éleñama nak mók apkelókxa, tén han kéleykmássesso, tén han ma'a ekyókxoho nak élwatnamáxchexa aqsok, kélpeykessamókxa axta chá'a m'a aqsok kéláyókxa, apkelane axta tegma appagkanamap ma'a egkexe nak, tén han Jerusalén, apkexakhagwokmek axta teyp tegma apwányam.

2 Crónicas 36:14

Apyáncháseykegkók axta aqsa apyamasma Wesse' egegkok ma'a apyókxoho apkelámha apmonye'e nak Judá, tén han apkelmaxnéssesso Dios énxet'ák apagkok, ekweykekxoho m'a énxet'ák, aptamheykegkek axta m'a apkeltémakxa ekmaso agko' axta m'a énxet'ák melya'áseyak nak Dios, aptawáseykha axta m'a Wesse' egegkok tegma appagkanamap apagkok, apkelyéseykegkaxa axta tegma appagkanamap apagkok ma'a Jerusalén.

Jeremías 19:4

Hakte eyamasmeyk ko'o israelitas, yókxexma negkenatchesso aptemessáseykekxak se'e xapop nak; apkelméssegkek chá'a aqsok ánek ekmátsa nak ekpaqneyam éten agkok mók aqsok kéláyókxa s'e kañe' nak, cham'a melya'áseykegko nak tén han melya'áseykegko axta m'a apyapmeyk nano', tén han ma'a kelwesse'e apkelwányam nak Judá, apkelnapmeyk énxet meyke nak apkeltémakxa s'e yókxexma nak.

Jeremías 23:11

Aptáhak Wesse' egegkok se'e: “Weykmok meheyáyo m'a apkellegasso nak sekpeywa tén han ma'a apkelmaxnéssesso nak chá'a énxet'ák ahagkok, ekweteyak han chá'a apkeláneykegko aqsok ekmaso m'a tegma appagkanamap ahagkok ahagko' nak.

Jeremías 30:14

Massegkek nahan élxeyenma apkelwáxok kéxegke m'a apyókxoho kélásekhayókxa nak; massegkek élyetnakhassamo apkelwáxok kéxegke. Élyensassegkek axta ko'o kéxegke, máxa axta ektemék ma'a apteméssessamól'a elyensaksek ma'a kélenmexma, éllegassáseykegkok axta ekyentaxno agko' eñama ekxámokma kéltémakxa ekmaso, tén han ekxámokma agko' ma'a megkólya'assáxma.

Jeremías 34:15

Keñe kéxegke kélyaqmagkasa kaxwók kéltémakxa, tén han kélláneygko m'a ekleklamo nak ko'o ewáxok, kélchexeykxo m'a kélásenneykha naqsa kélpeywomo xamo' nak. Kélxénchek nahan kóllanagkok ma'a ekhémo mók kélpaqhetchásamáxkoho kéllana nak nahaqtók ko'o, cham'a tegma appagkanamap sélpeykessamókxa nak chá'a.

Jeremías 44:4

Éláphassáseykekxeyk axta eykhe chá'a ko'o kéxegke apkellegasso nak sekpeywa, yaqwayam enxoho eltennaksek megyánhek kóllának ma'a aqsok ekmaso agko', sektaqnagkamo nak chá'a ko'o.

Jeremías 7:10

keñe chá'a kólmeyenták se'e tegma appagkanamap sélpeykessamókxa nak chá'a ko'o, kólchaqnágwaták nahaqto'. Kólának chá'a méko katnehek kélheykha s'e; kólának chá'a kélwanchek kóllenxanmagkohok kéllánéyak xa aqsok sektaqnagkamo nak ko'o.

Jeremías 7:30

Aptáhak Wesse' egegkok se'e: “Apkeláneykegkek aqsok megkaleklamakxa nak ko'o ewáxok ma'a énxet'ák Judá: apnegkenweykmek aqsok kéleykmássesso apagkok élmasagcha'a nak ma'a kañe' tegma appagkanamap sélpeykessamókxa nak chá'a ko'o, keñe aptawáseykencha'a.

Jeremías 7:31

Apkelánegweykmek ekwatnamáxchexa aqsok Tófet ma'a ekyapwátegweykenxa nak xapop Ben-hinom, yaqwayam elwatnek ma'a apketchek apkelennay'a tén han kelwán'ák; aqsok maltémo axta chá'a ko'o elanagkok, tén han megkaxeyenma axta ko'o ewáxok katnehek.