Jeremías 31:9 - Biblia Enxet

⁹ Elmaxneyagkok sa' elchexyók yetlo apkellekxagweykenta'. Anaqlakxak sa' ko'o m'a ényahamakxa nak yegmen, cham'a ámay meykexa nak élyapwáteyak, yaqwayam sa' melpelapmehe'. Hakte ko'o apyáp ma'a Israel, keñe hatte átnaha apketkok ma'a Efraín.

Jeremías 31:9 ပူးပေါင်းရင်းမြစ်များ

1 Crónicas 29:10

Keñe axta David apteméssesa apcheymákpoho Wesse' egegkok nápaqta'awók ma'a apyókxoho énxet'ák. Aptáhak axta s'e: “¡Apcheymákpoho sa' chá'a kólteméssesek xép Wesse' egegkok, Dios apagkok nak ma'a ẽlyapmeyk nanók Israel!

Salmos 107:7

Tén axta apkelya'ásekxo ektaqmelakxa ámay ekmahéyak ma'a xama tegma apwányam yaqwánxa exmakha.

Salmos 23:2

Héllókassesek chá'a sekyampe m'a ekyetnamakxa nak pa'at ektaqmela, héntemekxak chá'a m'a ektaqmalmakxa nak ekyetno yegmen,

Salmos 89:27

Atnéssesek sa' nahan ko'o apteme hatte átnaha apketkok, apteme néten agko' nepyeseksa m'a kelwesse'e apkelwányam nak keso náxop.

Éxodo 4:22

Tén sa' etnehek yának faraón se'e: ‘Exchek aptáhak appeywa Wesse' egegkok se'e: Israel apteme hatte átnaha apketkok.

Isaías 42:16

Sa' alya'ásekxak anaqlakxak énxet'ák meyke nak apaqta'ák ma'a ámay melya'ásegkaxa nak. Élseyéxma sa' atnessásekxak apmonye'e m'a ekyaqtéssóxma nak, keñe sa' xapop éláxñeyo m'a élyapwáteyak nak chá'a. Alának sa' ko'o ekyókxoho xa aqsok nak.

Isaías 43:20

Heyáwhok sa' ma'a aqsok nawha'ák élleykha nak naxma, cham'a semheg nawha'ák nak tén han ma'a xápen, hakte atekkesek sa' yegmen ma'a yókxexma meykexa nak énxet, tén han wátsam ma'a xapop megkatyapmakxa nak xama aqsok, yaqwayam sa' agkések apyenéyak ma'a énxet'ák ahagkok sélyéseykha axta,

Isaías 45:11

Aptáhak Wesse' egegkok se'e, cham'a Dios Aptaqmalma nak Israel, ektáha axta apkelane: “¿Hélmaxneyha enxoho sa' eykel'a ko'o kéxegke sekteméssessamakxa m'a étchek nak ko'o? ¿Hélxekmósagkoya sa' kéltamhókxa enxoho chá'a atnehek sélane aqsok?

Isaías 57:14

Keñe sa' kañexchek katnehek kalpaqmetaxchek se'e: “Kóllána sa' xama ámay éláxñeyo agko', kólyetnakhés sa' ma'a aqsok élhaxtaméyak nak chá'a ámay yaqwayam sa' elyeykhak ma'a énxet'ák ahagkok.”

Isaías 63:13

apkelyeykháseykekxo axta kañók agko' wátsam ekwányam meyke apkeltáxñeykha m'a énxet'ák apagkok, aptémól'a yátnáxeg elxog ma'a yókxexma ekyamáyekxa nak xapop,

Isaías 63:16

¡Xép apteme negko'o egyáp! Mehẽlya'ásegkok eykhe m'a Abraham, megkaxénwakxók nahan negko'o apwáxok ma'a Israel, Wesse', xép apteme negko'o egyáp; nanók xép apteme sẽlwagkasso teyp.

Isaías 64:8

Wesse', xép akke apteme negko'o egyáp; yelpa' negko'o, keñe exchep ma'a senlane nak chá'a; ¡negyókxoho negko'o nenteme senlane apagko' xép!

Jeremías 3:19

“Énxet'ák Israel, ekxeyenmeyk axta ko'o kéxegke atnehek étchek ahancha'awo', tén han agkések ma'a xapop, étsapmo nak kélnények kóllano', apchókxa ektaqmalma agko' nak, megkaxnawo nak ma'a mók apkelókxa nak keso náxop. Énagkamchek axta ko'o kéxegke héltéhek kélyáp, tén han mehélyenyewek chá'a xama enxoho.

Jeremías 3:4

Kaxwók ektáha axta makham seyáneya s'e: ‘Táta ahagkok, séntameykha axta chá'a sektémakxa étkok,

Jeremías 31:20

“Hatte seyásekhayo ko'o m'a Efraín énxet'ák apagkok; hatte sekmámenyého ahagko'. Apaqhetchesek eykhe chá'a ekyennaqte, mehelwánaqmeyk eyke chá'a; megkeynnayhek han chá'a ewáxok alano', apyósek apagko' nahan chá'a alano'. Ko'o sekxeyenma xa, sektáha nak Wesse'.

Jeremías 50:4

Aptáhak Wesse' egegkok se'e: “Ellekxagwenták sa' elchexyamok énxet'ák Israel tén han Judá xa ekhem nak, hektamok ko'o, sektáha nak Dios Wesse' apagkok.

Oseas 12:4

Apkelnápomákpek axta han xama Dios apchásenneykha, apwatneyk axta han ma'a Jacob, apwóneyk axta, keñe apkeltamho kapyóshok elano'. Apwetágwokmek axta nahan Dios ma'a Betel, appaqhetchessek axta nahan ma'a.

Oseas 3:5

Keñe sa' natámen xa, elchexyók ma'a israelitas, elchetmok sa' Dios Wesse' apagkok, tén han ma'a David apteme nak wesse' apwányam apagkok, elyo'ótak sa' yetlo apkeláyo Wesse' egegkok amonye' ektemegwánxa néxa', tén han etegyagkok aqsok éltaqmela yaqwayam nak elmések.

Zacarías 12:10

Ayánchesseshok sa' ko'o sekmésso apmopyóseka elanok apnámakkok tén han apkelmaxneyéyak ma'a David aptawán'ák neptámen nak tén han ma'a énxet'ák apheykha nak Jerusalén. Keñe sa' elanok chá'a m'a ektáha nak chá'a apkelyetxaqxo, tén sa' kallapwomagkok, ellekxagwaha sa' elano'. Máxa sa' etnéssesek ma'a aptémól'a yetsapok kélketche aptemél'a wánxa xama apagko' essenhan ma'a kélketche átnaha apketkok la'a.

Malaquías 2:10

¿Háweya xama egyáp negyókxoho? ¿Háweya senlane negyókxoho xa Dios nak? ¿Yaqsa eyke ektéma nélyexancháseykencha'a nak chá'a egmók, nentawáseykencha'a chá'a m'a ekhémo mók nélpaqhetchásamáxkoho apkelánesso axta Dios ma'a ẽlyapmeyk nano'?

Números 2:18

“Taxnegwánxa ekhem sa' elpakxenagkok ma'a Efraín nak sẽlpextétamo apagkok, apkemhakxa nak bandera apagkok. Elisamá akke apkemha apmonye' apagkok ma'a Efraín énxet'ák nak sẽlpextétamo apagkok, cham'a apketche nak Amihud,

Deuteronomio 14:1

“Kéxegke kélteme apketchek ma'a Dios Wesse' kélagkok. Nágkólpexyekhasha aqsa kélyókxa, nágkólmopaksoho aqsa kélyese ekpayhakxa kélnát apketsapa enxoho kélxama.

Deuteronomio 32:6

¿keyaxa kélyaqmagkásekxo mók apteméssessamakxa Wesse' egegkok kéltéma xa ektáha nak? Énxet'ák élyeyhaxma meyke nak kélya'áseyak aqsok, ¿háweya kélyáp kéxegke m'a? ¿Háweya apkelane? ¡Axta apkelane kéxegke m'a tén han apmésso kélyennaqte!