Jeremías 3:12 - Biblia Enxet

¹² Exeg sa', emhók sa' ma'a ekpayho nak nexcheyha, eñes sa' se'e amya'a nak: “Aptáhak Wesse' egegkok se'e: ¡Hey'óta' ko'o, Israel sénmexeykekxo nak! Ataqmelcheshok sa' ko'o amok takha exche', mawenaqtésók sa' nahan seklo, hakte ko'o sekteme ektaqmeleykha ewáxok. Ekméssek ko'o sekpeywa, sektáha nak Wesse' kélagkok.

Jeremías 3:12 ပူးပေါင်းရင်းမြစ်များ

Génesis 4:7

Tásek xeyk agkok xép aptáhakxa, kátsaha exchek nápat, mólya'assáxma kelhaxnak apmonye' exchep yaqwayam kamok, eñama apteme xa ektáha nak. Apwanchek eyke exchep elenmaxakpohok ma'a.”

2 Reyes 15:29

Apwokmek axta Tiglat-piléser, wesse' apwányam nak Asiria, aptémakxa axta wesse' apwányam Israel ma'a Pécah, apkelmeyk axta m'a tegma apkelyawe nak Iión, Abel-bet-maacá, Janóah, Quedes, Hasor, Galaad, Galilea keñe han ma'a ekyókxoho yókxexma nak Neftalí. Keñe axta m'a apheykha nak kañe' apkelmoma apnaqleykekxo m'a Asiria.

2 Reyes 17:23

Keñe axta Wesse' egegkok apkelyetnakhassama aphakxa m'a énxet'ák Israel, ekhawo ektémakxa axta apxeyenma, apkelásenneykekxo axta m'a apkellegasso nak appeywa, cham'a apkeláneykha nak, tén axta énxet'ák Israel apkelmákpo kélnaqleykekxo Asiria, apheykegkaxa nak makham, ekwokmoho s'e negwánxa nak.

2 Reyes 17:6

Keñe ekweykmo axta nueve apyeyam apteme wesse' apwányam Oseas, apmomchek axta wesse' apwányam Asiria m'a Samaria, keñe axta apkelmoma israelitas apnaqleykekxo Asiria, apkelhésseykmek axta m'a Halah, yókxexma nak Habor, wátsam nak Gozán, keñe han ma'a tegma apkelyawe apagkok nak medos.

2 Reyes 18:1

Apcheynamók axta apteme wesse' apwányam Ezequías, Ahaz axta apketche, wesse' apwányam axta Judá, ekweykmo axta apqántánxo apyeyam apteme wesse' apwányam Oseas, Elá axta apketche, wesse' apwányam axta Israel.

2 Crónicas 29:10

Xénchek ko'o kaxwók ewáxok axnéshok mók sélpaqhetchásamáxkoho Wesse' egegkok, Dios apagkok nak Israel, yaqwayam kamaskok sẽltaqnawéyak negko'o.

2 Crónicas 30:9

Kélya'aweykteyk sa' agkok makham kéxegke m'a Wesse' egegkok, elepyóshok sa' elanok katnaha nak kélnámakkok ma'a kélnámakkok nak kéxegke, tén han kélketchek, apkelmoma axta, keñe sa' yohok elmeyenták makham se'e apchókxa nak, hakte apyósek henlanok ma'a Dios Wesse' kélagkok nak, hegemlekxohok nahan, meltaqheksók sa' han kéxegke kélya'aweykto enxoho.”

Salmos 103:17

Megkamassegwomek eyke chá'a apkelásekhayo Wesse' egegkok ma'a ektáha nak chá'a apcháyo; megkatnégwomek chá'a néxa aptaqmelchessáseykekxa apheykha apyókxoho m'a aptawán'ák neptámen nak,

Salmos 103:8

Wesse' egegkok apteme ektaqmeleykha apwáxok henlano', tén han apmopyósa henlano'; tén han mepekhésamap, awanhek han segásekhayo.

Salmos 103:9

Mehenxénchásekxók chá'a nentémakxa yókxoho ekhem, megkawegqók chá'a aplo;

Salmos 145:8

Wesse' egegkok apteme ektaqmeleykha apwáxok henlano', tén han apmopyósa henlano', tén han mepekhésamap, awanhek han segásekhayo.

Salmos 79:5

Wesse' egegkok, ¿yaqsa sa' ekhem elwataksek sẽltaqnawéyak? ¿Megkamassegwomeya sa' aplo ektémól'a táxa?

Salmos 86:15

Wesse', xép akke apteme Dios ektaqmeleykha apwáxok, tén han apmopyósa henlano', mepekhésamap, tén han ekyawe segásekhayo, apteme apmámnaqsoho.

Salmos 86:5

Wesse', tásek xép awáxok, meyaqmagkásekxeyk nahan nentémakxa; elásekhohok chá'a exchep ma'a apwóneykha nak chá'a.

Proverbios 28:13

Asagkek katnehek apha m'a énxet appósso nak chá'a mey'assáxma; yásekhekxohok eyke chá'a Dios ma'a énxet apkeltennasso nak chá'a aptémakxa, tén han apyenyeykekxa nak chá'a.

Isaías 31:6

Énxet'ák Israel, kólyo'óta sa' makham ma'a kéltaqnaweykencha'a kélagko' nak.

Isaías 44:22

Máxa yaphope ekmassegwayam la'a aqsa ekteméssessók ko'o sekmassesseykmo m'a aqsok megyaqhémo nak tén han ma'a mey'assáxma. Hey'óta ko'o makham, hakte ko'o axta sekwagkasso teyp xép.”

Jeremías 11:6

Tén axta aptáha seyáneya Wesse' egegkok se'e: “Eñes sa' nepyeseksa tegma apkelyawe Judá s'e amya'a nak tén han ma'a ámay nak Jerusalén. Etne sa' elának énxet'ák se'e: Kóleyxho sa' ektémakxa nak ekpeywa s'e ekhémo mók nélpaqhetchásamáxkoho nak, kólyahakxoho sa'.

Jeremías 12:15

Keñe sa' natámen sélántekkesso, alásekhekxohok makham, wának sa' elmeyenták makham ma'a xapop apagkok nak, tén han ma'a apkelókxa apancha'awo nak.

Jeremías 23:8

sa' aqsa chá'a kóltéhek naqsók kélpeywa s'e: ‘Memassegwomek sa' chá'a Wesse' egegkok, apkelántekkesso axta israelitas ma'a apchókxa ekpayho nak nexcheyha, tén han ma'a ekyókxoho apkelókxa apkelya'assamakxa axta chá'a apkexpánchessama.’ Kólhakha sa' chá'a m'a xapop kélagkok kélagko' nak.”

Jeremías 3:1

Aptáhak Wesse' egegkok se'e: “Yenyókek agkok aptáwa' xama énxet, keñe ektepa enxoho aphakxa xa kelán'a nak, kamekxak pók énxet, yawanchek kay'ókxak makham ma'a apmonye' atáwa' axta. ¡Ekmanyása agko' sa' katnéssesek apchókxa ektáha enxoho xa ektáha nak! Keñe exche' Israel, kelánéseykegkek nentémakxa ekmaso mansexta apxámokma apagko' ma'a élásekhayókxa nak. ¡Keñe kaxwo' ekmako makham ko'o hey'óta'! Ko'o sekxeyenma xa, sektáha nak Wesse'.

Jeremías 3:14

Aptáhak Wesse' egegkok se'e: “Kólchexyem makham, énxet'ák sénmexeykekxa nak ko'o, ko'o sekteme Wesse' kélagkok. Amok sa' chá'a ko'o kélxama xama tegma apwányam, keñe sa' apqánet chá'a m'a ektáha nak chá'a apnámakkok apagko', anaqlakxak sa' ma'a Sión.

Jeremías 3:18

“Wokmek sa' agkok xa ekhem nak, keypetchekxak sa' Judá m'a Israel, kataqhohok sa' makham xamo' ma'a apchókxa ekpayho nak nexcheyha, cham'a xapop sekpekkencháseykekxa axta ko'o m'a kélyapmeyk nano' axta kéxegke.

Jeremías 3:22

Hélyo'óta makham ko'o, énxet'ák sénmexeykekxa nak chá'a, amasséssesek sa' ko'o m'a ektémakxa nak chá'a sélenmexeykha.” “Keso negheyncha'a negko'o s'e, negya'aweykteyk xép, hakte xép apteme Dios Wesse' egagkok.

Jeremías 3:5

¿melwátessemeya sa' aplo? ¿Megkatnégwomeya sa' néxa aplo?’ Temegkek eykhe ekpeywa xa ektáha nak, keláneykxeyk eyke aqsa ekyókxoho aqsok ekmaso ekmakókxa enxoho kalána'.”

Jeremías 3:7

Énagkamchek axta ko'o hey'ótak makham natámen élane xa ekyókxoho aqsok nak, neyke hey'ékekta'. Wetayak axta han yáxeg Judá xa, cham'a seyenseykmo nak ko'o sétleykha;

Jeremías 30:11

Ekxénchek ko'o, sektáha sélxegexma'a kéxegke yaqwayam alwagkasek teyp, ko'o sektáha nak Wesse'. Amasséssók sa' ko'o ekyókxoho apkelókxa, cham'a sélya'assamakxa axta chá'a ko'o kéxegke séxpánchessama. Keñe sa' kéxegke mamassésseme'; allegássesagkohok sa' aqsa ekpayhawo nak atnéssesek séllegassáseykegkoho: megkatnehek sa' mallegassáseykegkoho kéxegke.”

Jeremías 31:20

“Hatte seyásekhayo ko'o m'a Efraín énxet'ák apagkok; hatte sekmámenyého ahagko'. Apaqhetchesek eykhe chá'a ekyennaqte, mehelwánaqmeyk eyke chá'a; megkeynnayhek han chá'a ewáxok alano', apyósek apagko' nahan chá'a alano'. Ko'o sekxeyenma xa, sektáha nak Wesse'.

Jeremías 31:21

“Énxet'ák Israel, kólqahasák sa' ámay yaqwayam sa' kólwetekxak chá'a ekmanyehe agko'; kóltaqmelchesho sa' kéllányo m'a ámay kélyetlamakxa axta. ¡Énxet'ák Israel, kólchexyem kólmeyenta makham ma'a tegma apkelyawe kélagkok axta!

Jeremías 31:8

Wának sa' ko'o elchexyók makham apkeleñama m'a apkelókxa ekpayho nak nexcheyha, wánchásekxak sa' makham ekweykmoho m'a néxa xapop nak. Elyetlanták sa' nahan elchexyók ma'a meyke nak apaqta'ák, tén han ma'a ekmaso nak apkelxega, tén han kelán'a lós'awo', tén han ma'a naqláw'ák nak; ¡elchexyók sa' apxámokma apagko'!

Jeremías 33:26

malyetnakhaksek sa' chá'a ko'o m'a Jacob aptawán'ák neptámen, tén han ma'a David séláneykha nak, megkatnehek sa' chá'a matnéssesso xama nepyeseksa yaqwayam etnehek wesse' apwányam nepyeseksa m'a Abraham aptawán'ák neptámen, Isaac tén han ma'a Jacob. Hakte apyósekak sa' chá'a ko'o alanok ma'a, ayaqmagkassesek sa' mók ma'a ektémakxa nak apheykha.”

Jeremías 4:1

Aptáhak Wesse' egegkok se'e: “Israel, peyk sa' agkok kólchexyók, ko'o sa' hélyo'óta'. Kélchexakkek sa' agkok ma'a aqsok kéleykmássesso kélagkok élmasagcha'a agko' nak, tén han mehelyenyawa enxoho ko'o,

Lamentaciones 3:22

Méko néxa segásekhayo m'a Wesse' egegkok, megkamassegwomek nahan ektémakxa ektaqmeleykha apwáxok henlano'.

Ezequiel 11:17

Etne sa' nahan elának se'e: ‘Keso aptáhakxa exchek Wesse' egegkok se'e: Anaqlósawakxak sa' ko'o makham kéxegke m'a apkelókxa nak sélya'assamakxa axta séxpánchessama, nepyeseksa nak ma'a pók aptémakxa énxet, wánchásekxak sa', tén sa' agkeyásekxak makham ma'a apkelókxa Israel.

Ezequiel 33:11

Naqsók eyke ko'o sekxéna sektáha nak Wesse' mamassegwayam, mómenyeyk yetsapok ma'a énxet ekmaso nak aptémakxa, émeñeyk aqsa eyaqmagkasek aptémakxa, keñe megyetsepe'. Israel, eyenyekxa xa aptémakxa ekmaso apmeykencha'a nak. ¿Yaqsa ektéma apkeltémo nak yetsapok?’

Ezequiel 39:25

“Ekeso éñamakxa sektáha nak ko'o sekpeywa s'e sektáha nak Wesse': Kalepyóshok sa' ko'o kaxwók alanok apyókxoho m'a énxet'ák Israel, Jacob aptawán'ák neptámen nak. Wának sa' kayaqmagkasek mók ma'a ektémakxa nak chá'a, yaqwayam sa' wának ko'o etaqmelchesek ma'a sekwesey ektaqmalma nak.

Oseas 6:1

Kólchexyem kélyókxoho, agyo'ókxak makham Wesse' egegkok. Ẽlekkexmeyk axta negko'o m'a, sa' eyke hẽltaqmelchessók makham ma'a; ẽlyensáseykegkek axta, sa' eyke hẽlpextehetchesek makham nélyense m'a.

Levítico 26:40

“Kólya'ásegwakxohok sa' eykhe kéxegke kéltémakxa ekmaso, tén han apkeltémakxa ekmaso axta m'a kélyapmeyk nano', tén han ma'a kélyenseyam nak sélyetleykha, tén han sélenmexeykekxa chá'a ko'o,

Zacarías 1:4

Nágkólteme aptamheykegkaxa axta m'a kélyapmeyk nano', apkeltennassama axta eykhe ko'o sektémakxa sekpeywa m'a nano' apkellegasso axta sekpeywa, aptéma axta apkelanagkama s'e: kólyenyow kéltémakxa élmasagcha'a tén han kélláneyak aqsok ekmaso, axta eyke heháxenmók ko'o m'a, axta nahan hélyeheykekxa'. Ko'o sekxeyenma xa, sektáha nak Wesse'.

Deuteronomio 30:2

kélya'aweykto enxoho Wesse' egegkok tén han kélyahákxoho enxoho ekweykmoho kañók agko' kélwáxok tén han ekweykmoho m'a élchetámeykegkegkaxa nak kélwáxok, kéxegke tén han ma'a kélketchek nak, séltamho nak ko'o kóltéhek se'e kaxwo' nak,