Jeremías 23:5 - Biblia Enxet

⁵ Aptáhak Wesse' egegkok se'e: “Kammok sa' ekhem yaqwánxa exek xama aptáwen neptámen apagko' ma'a David, xama wesse' apwányam ekpéwomo aptémakxa, etnehek sa' wesse' apwányam yetlo apya'áseykegkoho, elánekxések sa' chá'a apheykha énxet'ák, yetlo ekpéwomo aptémakxa tén han ekpayhawo nak chá'a etnehek se'e apchókxa nak.

Jeremías 23:5 ပူးပေါင်းရင်းမြစ်များ

2 Samuel 23:3

Appaqmetchek ma'a Dios apagkok nak Israel; aptáhak seyáneya Apmasma nak chá'a Israel se'e: ‘Énxet apkeláneykha nak chá'a énxet'ák yetlo ekpéwomo aptémakxa', apkeláneykha nak chá'a énxet'ák yetlo apcháyo Dios,

Salmos 45:4

Exeg, yaqwayam emallánek yetlo apcheymákpoho, eñama apmasma m'a aqsok ekmámnaqsoho, tén han etaqmelchessásekxak apheykha m'a élyelqamáxkoho nak apkelwáxok. ¡Apyennaqte exchep keñamak apmallanma apagko'!

Salmos 80:15

anmen yámet xeyep apagko' axta apkeneykekxa', éltekteyapma ektáha axta exchep apkenegkessso apagko'.

Salmos 99:4

Xép apteme Wesse' Apwányam ekha apyennaqte, apmopmenyého nak nentémakxa ekpéwomo; xép apagko' appekkenma meyke ekyeykhamaxche mók nentémakxa. Appékessessamók axta chá'a exchep apkelánéseykekxa apheykha m'a Jacob énxet'ák apagkok, yetlo ektaqmalma aptémakxa.

Isaías 33:5

Méko kayeykhágwomhok ma'a Wesse' egegkok, hakte aphegkek ma'a néten; cha'a apsawheyáseykekxoho ekpéwomo nentémakxa Sión ma'a tén han ektaqmalma nentémakxa,

Isaías 4:2

Tásek sa' katnehek aqsok apkeltémo nak kaltektépekxak Wesse' egegkok xa ekhem nak, kalyenmok sa' nahan; sa' etnehek apagkok ma'a énxet'ák Israel apkeleymomap nak meletsapma; sa' katnéssesek eyaqheykha chá'a kélwáxok ma'a aqsok ekyexna eknakxamáxche ektekkesso nak xapop tén han katnéssesek ekha kéláyo.

Isaías 42:6

“Ekwóneykha axta ko'o exchep, ko'o sektáha nak Wesse', ekmeyk axta apmek, yaqwayam enxoho etnehek apkelwagkasso teyp énxet'ák; éláneyak axta ko'o exchep, hakte émenyeyk axta etnehek magkenatchesso ekhémo mók sélpaqhetchásamáxkoho ko'o m'a énxet'ák, tén han élseyéxma apagkok ma'a pók aptémakxa nak chá'a énxet'ák,

Isaías 45:24

Sa' etnehek elpaqmétek se'e: ‘Wesse' egegkok aqsa yetnók ma'a negmallane nak tén han negyennaqte.’ Elmegqágwakxohok sa' apyókxoho m'a setaqnagko nak chá'a ko'o.

Isaías 52:13

Tásek sa' katnehek ekteyapma aqsok apkelane m'a séláneykha, kéláyo sa' kóltéhek, kólhéssók sa' ma'a netnók agko' nak.

Isaías 53:10

Mékoho axta apkeltémok etnéssesek Wesse' egegkok apméssama aplegeykegkoho neyseksa apha m'a. Ahóxek sa' nahan katnehek apha eñama apmeyásamákpoho apagko' yaqwayam emátog ekyaqmageykekxa mólya'assáxma, kammohok sa' apkelwet'a m'a aptawán'ák neptámen nak; sa' kañék ekteyapma aqsok yaqwayam nak elának Wesse' egegkok xa.

Isaías 53:2

Apkeltémok axta exhok Wesse' egegkok ewanák apkeláneykha m'a ektémól'a pánaqte exnók kaxwe ekteyapmal'a, élatchesseyam la'a kepmenák ma'a ekyamakakxa xapop. Apsagkók axta m'a háwe axta apcheymákpoho méko axta m'a ektémakxal'a kélmámenyéhol'a kóllano';

Isaías 9:5

Kólwatnekxak sa' ma'a kélatchesso kélmagkok nenlegayo axta chá'a elpáwaksek yenyahagkok ma'a sẽlpextétamo tén han ma'a apáwa apkeltexnémap nak éma. Táxa sa' kasawhoho'.

Isaías 9:6

Hakte apteyekmek xama sakcha'a negyeseksa, Dios segmésso xama apketche, cham'a peya sa' exkak apmopwána yaqwayam etnehek aptaqmelchesso apchókxa. Sa' nahan kólteméssesek apwesey s'e: Eyaqheykha kélwáxok aqsok apkelane, Dios apyennaqte, Egyáp Memassegwayam, Wesse' meyke ektáhakxa negha.

Isaías 9:7

Exek sa' ma'a néten nak David aptaháno ekyawe ektaqmalma; kasawhekxohok sa' apteme Wesse' apwányam ekyókxoho yókxexma, megkamassegwomek sa' ma'a meyke ektáhakxa nak negha; tásek sa' katnehek ekyetno m'a aptémakxa nak Wesse' apwányam, sa' katnehek ekyennaqtésso m'a aptaqmelchessáseykekxa nak chá'a apheykha énxet'ák tén han ma'a ekpayhawo nak chá'a elána', keso kaxwo' nak tén han megkatnégwayam néxa. Elának sa' Dios ekha nak apyennaqte xa, eñama ekyawe agko' segásekhayo.

Jeremías 22:15

¿Apkenagkamcheya anxek aqsa segwakhe yámet cedro nenteme nak wesse' apwányam? Payheykekxeyk axta apwáxok neyseksa apha m'a apyáp nano', apkeláneyak axta eyke chá'a aqsok yetlo ekpéwomo aptémakxa, tén han ekpayhawo nak chá'a etnehek, axta keñamak ektaqmalma chá'a aqsok apkelane.

Jeremías 22:3

Kóllána chá'a ektaqmalma kéllánekxésso apheykha énxet'ák se'e yókxexma nak, tén han ekpayhawo nak chá'a kóltéhek, kólwagkas sa' chá'a teyp neyseksa apmáheyo enaqtawasagkohok ma'a apkelyennaqtésamakpoho nak chá'a, nágkólyennaqtésha chá'a kélyempe'ék kóllának ma'a apkeleñama mók nekha, tén han ma'a élyéheykha nak, tén han ma'a xentampe'e nak. Nágkólaqha chá'a énxet apkeñama mók nekha s'e yókxexma nak.

Jeremías 22:30

Aptáhak Wesse' egegkok se'e: “Kólteme sa' énxet meyke apketchek xa énxet nak, kólxén sa' apteme énxet megkatyapma aqsok apkelane neyseksa apha. Metepagkek sa' aptawán'ák neptámen yaqwayam etnahagkok kelwesse'e apkelwányam apyaqmagkasso m'a David, yaqwayam enxoho etnahagkokxak kelwesse'e apkelwányam ma'a Judá.”

Jeremías 23:6

Méko sa' katnehek apheykha énxet'ák Judá neyseksa apteme wesse' apwányam, méko sa' nahan katnehek ektáhakxa apheykha m'a énxet'ák Israel. Keso yaqwánxa sa' kólteméssesek apwesey s'e: ‘Wesse' egegkok segmallahanchesso.’”

Jeremías 29:11

Ekya'ásegkók ko'o sekmáheyókxa atnéssesek kéxegke, yaqwayam kataqmelekxak kélheykha, háwe m'a ekmaso nak kélheykha, yaqwayam sa' kayágwomhok agko' kélhaxneykha m'a egmonye' sa'. Ko'o sekxeyenma xa, sektáha nak Wesse'.

Jeremías 30:3

hakte xegakmek ekhem yaqwánxa sa' ko'o ayaqmagkassesek mók ektémakxa nak apheykha m'a énxet'ák ahagkok Israel tén han ma'a Judá. Ko'o sekxeyenma xa, sektáha nak Wesse'. Wának sa' ko'o elmeyenták makham ma'a xapop sekméssamakxa axta yaqwayam etnehek apagkok ma'a apyapmeyk nano' axta.”

Jeremías 30:9

Ko'o sa' aqsa etnahagkok séláneykha, sektáha nak Dios Wesse' apagkok, tén han ma'a David, peya nak ko'o atnéssesek wesse' apwányam apagkok.

Jeremías 31:27

Aptáhak Wesse' egegkok se'e: “Kammok sa' ekhem yaqwánxa axámásekxak ko'o énxet tén han aqsok kélnaqtósso m'a Israel tén han ma'a Judá.

Ezequiel 21:27

Élmasagcha'a agko' sa' atnessásekxak ma'a ekyókxoho aqsok. Sa' eyke katnehek apwa'a enxoho m'a ektáha nak ko'o séltémo elyekpelchásseshok énxet'ák, cham'a ekpayhawo nak elána'.

Ezequiel 34:16

Alchetmok sa' ma'a nepkések apkelxegányam nak, anaqlanták sa' ma'a apkelyetnakhágwayam nak chá'a apkelxega, alpextehetchesagkok sa' nahan ma'a ekhakxa nak chá'a énté xama apyók, apasmok sa' nahan ma'a apkelyelqamákpoho nak, keñe sa' amasséssók chá'a m'a apnaqmele nak tén han ma'a apkelyennaqte nak. Alanha sa' chá'a ko'o m'a, yetlo sekteméssesso m'a ekpayhawo nak chá'a anteméssesek nenláneykha.

Ezequiel 34:29

Agkések sa' ektaqmalma agko' ekteyapma m'a aqsok apkenéyak, kamaskok sa' ellegagkohok chá'a meyk élnapma m'a; kamaskok sa' nahan apkelasmésso chá'a m'a pók aptémakxa nak chá'a énxet'ák.

Ezequiel 45:8

Cháxa xapop nak, etnehek sa' apagkok ma'a wesse' aptaqmelchesso nak chá'a apchókxa m'a Israel; keñe sa' kamaskok elhak chá'a kaxwók énxet'ák ahagkok ma'a kelwesse'e apkeltaqmelchesso nak chá'a apkelókxa, epekkenchásekxak sa' aqsa chá'a xapop apagkok ma'a israelitas, cham'a apwánxa enxoho chá'a énxet'ák apagkok.

Daniel 9:24

“Setenta semána sa' kayeykhak kólmasséssók apkeltémakxa élmasagcha'a m'a énxet'ák apagkok tén han melya'assáxma, tén han tegma apwányam appagkanamap nak, yaqwayam sa' megkólyaqmagkásekxeyk ma'a apkeltémakxa élmasagcha'a, tén han keytek ekpéwomo nentémakxa meyke néxa, yaqwayam sa' katnehek ma'a ektémakxa axta aqsok apwete, tén han ekxénamaxche' kéltemessásekxo sa' appagkanamap apagko' ma'a Tegma Appagkanamap nak.

Oseas 1:11

Keñe sa' épetchekxak makham énxet'ák Judá m'a énxet'ák Israel, elyésha sa' xama apkemha apmonye' wánxa xama, elmeyenták sa' Jerusalén ma'a énxet'ák apkeleñama ekyókxoho yókxexma. ¡Awanhók agko' sa' katnehek ma'a ekhem apagkok nak Jezreel!

Oseas 3:5

Keñe sa' natámen xa, elchexyók ma'a israelitas, elchetmok sa' Dios Wesse' apagkok, tén han ma'a David apteme nak wesse' apwányam apagkok, elyo'ótak sa' yetlo apkeláyo Wesse' egegkok amonye' ektemegwánxa néxa', tén han etegyagkok aqsok éltaqmela yaqwayam nak elmések.

Amós 9:11

“Axátekhásekxak sa' ko'o makham David axta apxagkok aptéyam xa ekhem nak. Alápekxak sa' ma'a apkelyagqaxe nak, almekxak sa' makham ma'a nápakha'a apketkók nak, keñe sa' axátekhásekxak makham axnéshok ma'a aptémakxa axta m'a nano' axta,

Miqueas 5:3

Apkexakhamchek eyke kaxwók Wesse' egegkok ma'a ektáha nak énxet'ák apagkok, ekweykmoho sa' ektáha naqláwa m'a kelán'a élhaxanma nak kategkesek étche apkenna'. Keñe sa' kólpáxaqteyásekxak makham ma'a apchókxa xamo' nak israelitas, kélnaqleykekxa axta megkatnahakxa apkelókxa.

Zacarías 3:8

Xép Josué, apteme nak apkemha apmonye' apkelmaxnéssesso énxet'ák ahagkok, etaqmelchesho sa' apháxenmo. Tásek sa' eleyxhok nahan ma'a apkelxegexma'a aptémo xamo' nak apkelmaxnéssesso énxet'ák ahagkok, hakte kéxegke kélteme magkenatchesso sektéma axta chá'a ko'o sekxeyenma katnehek se'e: Eyntementák sa' ko'o séláneykha, Kaxwe Aptépeykekxa'.

Zacarías 9:9

¡Kapayhekxoho agko' apwáxok xép, tegma apwányam Sión! ¡Enneykmés kapayhekxak apwáxok, xép tegma apwányam Jerusalén! Apya'aweykteyk xép, Wesse' apwányam apagkok Wesse' appéwomo, tén han segwagkassamo teyp, háwe eyke eyeymáxkoho apwáxok, yámelyeheykok apchánte, yámelyeheykok étkok.