Jeremías 22:3 - Biblia Enxet

³ Kóllána chá'a ektaqmalma kéllánekxésso apheykha énxet'ák se'e yókxexma nak, tén han ekpayhawo nak chá'a kóltéhek, kólwagkas sa' chá'a teyp neyseksa apmáheyo enaqtawasagkohok ma'a apkelyennaqtésamakpoho nak chá'a, nágkólyennaqtésha chá'a kélyempe'ék kóllának ma'a apkeleñama mók nekha, tén han ma'a élyéheykha nak, tén han ma'a xentampe'e nak. Nágkólaqha chá'a énxet apkeñama mók nekha s'e yókxexma nak.

Jeremías 22:3 ပူးပေါင်းရင်းမြစ်များ

2 Samuel 23:3

Appaqmetchek ma'a Dios apagkok nak Israel; aptáhak seyáneya Apmasma nak chá'a Israel se'e: ‘Énxet apkeláneykha nak chá'a énxet'ák yetlo ekpéwomo aptémakxa', apkeláneykha nak chá'a énxet'ák yetlo apcháyo Dios,

2 Reyes 24:4

eñama han ma'a apkelnapma axta énxet'ák meyke apkeltémakxa, apsawheyáseykekxoho axta éma apagkok ma'a Jerusalén. Axta keñamak memáheyo elásekhekxohok makham ma'a Wesse' egegkok.

Job 22:9

Eláphaksek axta aqsa chá'a meyke apkelmésso aqsok ma'a xentampe'e nak, apnaqtawáseykegkók axta m'a élyeheykha.

Job 24:9

Kólyementamagkok chá'a étchek kaxwe appalleyam ma'a xentampe'e nak, keñe m'a meyke nak aqsok apagkok, kólyementamok chá'a apketchek ekyánmaga aqsok kélmassáseykha.

Salmos 68:5

Dios, aphama nak cha'a m'a tegma appagkanamap apagkok, cha'a apteme chá'a apyapmeyk ma'a apkelyéheykha nak, tén han apkeltaqmelchesso m'a xentampe'e nak.

Salmos 82:4

¡Kólpásem ma'a apkelyelqamákpoho nak, tén han meyke nak aqsok apagkok, kólmeyow neyseksa apmáheyo elmok ma'a élmasagcha'a nak apkeltémakxa!

Salmos 94:21

apkeláneykekxa nak chá'a aptamhágkaxa yaqwayam yenmexek ma'a meyke nak aptémakxa, tén han ma'a melánéyak nak aqsok ekmaso, apkeltémo nak chá'a kólnápekxa'.

Salmos 94:6

Apkelnapmeyk chá'a m'a xentampe'e nak, tén han ma'a apkeleñama nak chá'a mók nekha, apkelnapmeyk han chá'a m'a élyéheykha nak.

Éxodo 22:21

“Nágkóltawasagkoho chá'a énxet apkeñama nak mók apkelókxa, nágkólyentaxnésses nahan apha, hakte kéxegke axta nahan kélteme kéleñama mók apkelókxa m'a kélheykencha'a axta Egipto.

Éxodo 22:22

“Nágkólnaqtawasagkoho m'a kelán'ák xentampe'e nak tén han ma'a élyéheykha nak,

Proverbios 23:10

Nágkólxegkásekxoho chá'a xapop kélagkok ekpekkenamaxchexa axta nanók néxa', ná émentagwom han xapop apagkok ma'a apkelyéheykha nak,

Proverbios 6:17

énxet apkeleymákpoho, énxet apkelmopwancha'a amya'a, énxet apkelnapma nak chá'a m'a énxet'ák meyke nak apkeltémakxa',

Isaías 1:23

Élyennaqte apkelwáxok ma'a kelwesse'e apkelwányam kélagkok nak, énxet'ák élmasagcha'a apkeltémakxa nahan ma'a apkelxegexma'a. Meltaqheksók nahan elxawagkok selyaqye m'a apyókxoho nak, etegyagkok nahan yaqwayam nak kólmésagkok aqsa chá'a m'a aqsok kelméyáséyak naqsa nak. Meltaqmelchessásekxeyk ekheykha m'a élyeheykha nak, megkalyetnakhaksók nahan apkelwáxok ektémakxa nak ekheykha m'a kelán'a xentampe'e nak.

Isaías 58:6

Háwe'. Manto nento ekleklamo nak ko'o ewáxok katnehek se'e ektéma nak: kólyétekkesek ma'a cadenas ekméssama nak chá'a ekyentaxno apheykha énxet'ák, kólhaxyawaksek ma'a kélnaqtete ekyennaqte nak kélyespok ma'a aqsok ekyentaxno; kólántekkesek ma'a énxet'ák kélnaqtawáseykegkoho nak, kólmasséssók ekyókxoho m'a ektawassáseykencha'a nak chá'a apheykha énxet'ák;

Isaías 58:7

kólmések nekha kélto m'a meyk áto', kólmok nahan chá'a takha' kólhések kélxagkok ma'a énxet apmopyósa meyke nak apxagkok; kólmések nahan apkelántaxno m'a énxet'ák meyke nak apkelántaxno, kólpásem chá'a m'a kélnámakkok.

Jeremías 19:4

Hakte eyamasmeyk ko'o israelitas, yókxexma negkenatchesso aptemessáseykekxak se'e xapop nak; apkelméssegkek chá'a aqsok ánek ekmátsa nak ekpaqneyam éten agkok mók aqsok kéláyókxa s'e kañe' nak, cham'a melya'áseykegko nak tén han melya'áseykegko axta m'a apyapmeyk nano', tén han ma'a kelwesse'e apkelwányam nak Judá, apkelnapmeyk énxet meyke nak apkeltémakxa s'e yókxexma nak.

Jeremías 22:17

“Wánxa eyke aqsa chá'a exchep ekxéneykencha'a apwáxok ma'a apxámáseyak nak aqsok apagkok eñama apmenyexeykha; apkelnapmeyk chá'a m'a meyke nak apkeltémakxa, apnaqtawáseykegkok chá'a énxet'ák apagkok.”

Jeremías 26:16

Keñe axta m'a apkelámha apmonye'e, tén han énxet'ák aptáha apkeláneya apkelmaxnéssesso Dios énxet'ák apagkok, tén han apkellegasso nak Dios appeywa s'e: “Mogwanchek agának emátog se'e énxet nak; Dios Wesse' egegkok appeywa ẽltennásak.”

Jeremías 5:28

tén han apnaqmelaya tén han ektaqmalma aptéyak. Méko néxa m'a apkeltémakxa ekmaso: melánekxések chá'a amya'a yaqwayam etaqmelchessásekxak ekheykha m'a élyéheykha nak, melanók han chá'a ektémakxa nak apheykha m'a meyke nak aqsok apagkok.

Jeremías 7:23

Wánxa axta aqsa chá'a ko'o séltémo hélyahakxoho'; keñe hetnehek ko'o Dios apagkok, keñe ko'o atnehek énxet'ák ahagkok ma'a. Éltémók axta nahan chá'a etnahagkok ma'a séltamhókxa enxoho chá'a etnahagkok, yaqwayam enxoho kataqmelek apheykha.

Jeremías 9:24

Apmakók agkok keyxkohok appeywa exénakpekxohok xama énxet, kéméxcheyk keyxkohok appeywa hexének ko'o sey'áseyak, sey'ásegkoho sektáha ko'o, Wesse', séláneyól'a chá'a aqsok keso náxop yetlo seyásekhayo, tén han ektaqmalma, tén han ekpéwomo, hakte cháxa ekleklamo nak chá'a ko'o ewáxok xa. Ko'o sekxeyenma xa, sektáha nak Wesse'.”

Lamentaciones 3:36

tén han negyetnakhásseyam nak élánamáxchekxa amya'a, cháxa aqsok apxeyenma nak chá'a Wesse' egegkok megkapayhawo nentáhakxa xa.

Ezequiel 18:12

aptawáseykegkoho nak chá'a m'a énxet apmopyósa nak tén han ma'a ekhakxa nak chá'a eyeyméxchexa aqsok apxagkok, tén han apmenyexchesso nak chá'a aqsok apagkok pók, tén han megkeyáseykekxa nak aqsa chá'a aqsok apmésso ekyaqmageykekxa apméyák ma'a pók, tén han apcháyo nak chá'a m'a aqsok kéláyókxa élmasagcha'a nak tén han apkelane nak chá'a m'a aqsok megkaleklamakxa nak chá'a ko'o ewáxok,

Ezequiel 18:7

tén han metwáseykegkoho nak pók, apmeyáseykekxa nak aqsa chá'a pók ma'a aqsok apmésso ekyaqmageykekxa m'a apméyak; memeñexchesso nak xama aqsok apagkok pók; appasmo nak apto m'a meyk eyaqhe nak tén han apmésso nak aptaxno m'a meyke nak apáwa;

Ezequiel 22:7

Méko apkelyeheykekxoho apyapmeyk tén han chána m'a énxet'ák apagkok nak xép, meltaqmelchesek nahan chá'a m'a énxet'ák apkeleñama nak mók nekha, enaqtawasagkohok nahan chá'a m'a élyéheykha nak tén han ma'a xentampe'e nak.

Ezequiel 45:9

“Ektáhak ko'o sekpeywa s'e sektáha nak Wesse': Kelwesse'e apkelwányam nak chá'a m'a apkelókxa Israel: ¡Wánxa kólteme! ¡Kólwátésák kélyennaqteyáseykha kélyempe'ék! ¡Nágkólnaqtawasagkoho kélnámakkok! ¡Kólteme ektaqmela kéltémakxa tén han ekpéwomo kéltaqmelchessáseykekxa apheykha énxet'ák kélagkok! ¡Kólwátésák kélmenyexcháseyak xapop apagkok énxet'ák ahagkok! Ko'o séltémo sektáha nak Wesse'.

Joel 3:19

Ekmaso sa' katnekxak ma'a Egipto, keñe sa' Edom katnekxak meykexa énxet, hakte apketámeykegkek axta m'a énxet'ák Judá, apkelnapmeyk axta énxet'ák meyke nak apkeltémakxa apheykha axta m'a.

Levítico 19:15

“Kélxénchek sa' agkok chá'a yaqwánxa kólteméssesek xama énxet, nágkólteme chá'a megkapéwomo kéltémakxa': nágkólteme chá'a apyeykhamap pók kóllano', cham'a meyke nak aqsok apagkok, tén han ma'a ekxákma nak aqsok apagkok. Nágkólyetnakhássem chá'a nentémakxa ekpéwomo kélxéna enxoho chá'a yaqwánxa kólteméssesek ma'a énxet.

Amós 5:15

¡Kóltaqnow aqsok ekmaso! ¡Kólásekhoho m'a aqsok ektaqmela! Kólána kalanaxchek ekpéwomo kéllánekxésso amya'a énxet'ák ma'a sẽlyekpelchémókxa nak; lapmaxcheyk sa' kexa kalepyóshok elanok Wesse' egegkok, Dios ekha nak apyennaqte énxet'ák Israel apkeleymomap nak ektáha enxoho xa ektáha nak.

Amós 5:24

Eyke émenyeyk katyapok ma'a nentémakxa ekpéwomo, ektémól'a katyapok yegmen, tén han ma'a meyke nentémakxa, ektémól'a m'a ekteyapmakxa yegmen megkeymayél'a.

Miqueas 3:11

Elmok chá'a takha' elxawagkok selyaqye m'a énxet'ák segyekpelchémo nak tegma apwányam, selyaqye aqsa chá'a eltamhok elxawagkok ekyánmaga apkelxekmósso apnámakkok ma'a apkelmaxnéssesso nak Dios énxet'ák apagkok, keñe m'a apkellegasso nak chá'a Dios appeywa, elmok chá'a ekyánmaga apkeltenneykha elxénmakha appasmo m'a Wesse' egegkok, etnehek chá'a apkelpeywa s'e: “Apheyk negyeseksa negko'o Wesse' egegkok; méko xama aqsok ekmaso awanchek hegáhapwak negko'o.”

Miqueas 6:8

Énxet, apkeltennássek xép Wesse' egegkok ma'a aqsok ektaqmela nak, tén han yaqsa apkelhaxna elának xép: apkelhaxneyk elának ma'a aptémakxa ekpéwomo, tén han apmopyósa elanok pók, tén han elyahakxohok yetlo megkeymáxkoho apwáxok ma'a Dios.

Malaquías 3:5

Aptáhak Wesse' egegkok ekha apyennaqte s'e: “Awaták sa' ko'o yaqwayam alyekpelchágwatámhok kéxegke. Keytlawhok sa' ko'o sélxéncháseykekxoho apkeltémakxa m'a aptamhéyak nak chá'a apkelyohóxma, tén han ma'a apnaqtawáseykegkoho nak chá'a apnaqteyegka'a apkelane chá'a mók, tén han ma'a eyaqhémo nak chá'a etnéssesek ekmámnaqsoho apkelpeywa, tén han ma'a apnaqtawáseykegkoho nak chá'a énxet'ák ekha nak apkeltamheykha, tén han ma'a xentampe'e nak, tén han ma'a élyéheykha nak, tén han meltaqmelchesso nak ma'a apkeleñama nak mók apkelókxa, tén han ma'a meheyáyo nak chá'a.

Deuteronomio 10:18

apkelánekxéssamo nak han chá'a amya'a m'a élyeheykha nak tén han ma'a xentampe'e nak, apkelásekhayo nak han chá'a m'a énxet'ák apkeleñama nak mók apkelókxa apheykha nak kélnepyeseksa kéxegke, apkelmeyáseykegkoho nak chá'a m'a aptéyák tén han ma'a apkelántaxno.

Deuteronomio 24:17

“Nágkóltemésses chá'a xama enxoho megkapayhawo nak chá'a anteméssesek ma'a énxet'ák apkeleñama nak mók apkelókxa tén han ma'a élyéheykha nak, nágkólyementem nahan chá'a élnaqta ekyaqmageykekxa aqsok kélmassáseykha m'a xentampe'e nak.

Deuteronomio 24:7

“Kélwetágkok sa' agkok appósakxa xama appeywomo xamo' israelitas yaqwayam etnéssesek apchásenneykha naqsa essenhan yaqwayam eyenyekxak ekha ekyánmaga, yáneykpok sa' ematñekxa', yaqwayam sa' kólmasséssók aqsok ekmaso ekteyapma kélnepyeseksa kéxegke.

Deuteronomio 25:1

“Yetneyk sa' agkok chá'a apkelátegmómap pók énxet, kólyentemekxak sa' chá'a m'a sẽlyekpelchémókxa nak yaqwayam sa' ékpelchekpohok chá'a, keñe sa' énxet'ák segyekpelchémo exének chá'a meyke aptémakxa m'a énxet meyke nak chá'a aptáhakxa, tén sa' yának chá'a emakpok ma'a apsexnánémap nak chá'a.

Deuteronomio 27:19

‘Exkak sa' Dios aplo énxet apteméssesso nak chá'a megkapayhawo nak chá'a anteméssesek ma'a énxet apkeñama nak mók apkelókxa, tén han ma'a kelán'a tampe nak essenhan ma'a ekyéheykha nak.’ Apyókxoho énxet sa' etnehek apkelpeywa s'e: ‘Katnahagkok sa'.’