Jeremías 22:22 - Biblia Enxet

²² Éxchahayam sa' kalsók ma'a apyókxoho apkelámha apmonye'e kélagkok, kólnaqlakxak sa' megkatnahakxa apkelókxa m'a appasmeykekxa axta chá'a kéxegke. Kólmegqágwakxohok kélagko' sa', eñama m'a ekyókxoho kéltémakxa ekmaso nak.

Jeremías 22:22 ပူးပေါင်းရင်းမြစ်များ

Isaías 64:6

Neghémók negko'o negyókxoho m'a énxet ekmanyásal'a apyempe'ék, máxa apáwa aphápak apmanyásal'a m'a ekyókxoho aqsok éltaqmalma nak chá'a nenlánéyak; nempalleykmek negko'o negyókxoho, ektémól'a m'a yámet áwa' élyamayél'a, máxa éxchahayam entemék sẽlchampassama m'a nentémakxa élmasagcha'a agko' nak.

Isaías 65:13

Cháxa keñamak aptáha nak appeywa Wesse' egegkok se'e: “Yetneyk sa' chá'a katnehek aptéyak ma'a séláneykha; keñe sa' kéxegke kóllegagkohok meyk élnapma; yetneyk sa' katnehek ma'a apyenéyak, keñe sa' kéxegke kóllegagkohok hem élnapma; kalpayhekxak sa' apkelwáxok ma'a, keñe sa' kéxegke kólmegqe';

Jeremías 10:21

—Élyeyháxma apkelámha apmonye'e apagkok nak xa énxet'ák nak; melchetamsók ma'a Wesse' egegkok. Cháxa keñamak megkatyapma nak chá'a aqsok apmáheyo elanagkok, apkexpánmeyk apyókxoho m'a nepkések apnaqtósso.

Jeremías 12:10

Apxámok apkelwesse'e apkelwányam sélenmexma nak ko'o aptawáseykencha'a m'a anmen yámet séneykekxa nak, apkelteyammeykha m'a yókxexma ahagkok nak. Meyke xama aqsok aptemessáseykekxak ma'a xapop ekleklamókxa agko' nak ko'o ewáxok.

Jeremías 2:36

¿Yaqsa ektáha kélpekhésa nak kólyaqmagkasek pók kélxegexma'a? Elyexanchesha sa' eyke nahan kéxegke m'a énxet'ák Egipto, ektéma axta m'a énxet'ák Asiria.

Jeremías 2:37

Kóltaqhohok sa' makham kéxegke kéleñama Egipto, yetlo ekyawe agko' kélmegqakto, hakte élyetnakhássek ko'o m'a kélásenneykekxo nak chá'a kéxegke, méko sa' kataksek kéxegke kélteme kélxegexma'a m'a.”

Jeremías 2:8

Mehektamsók ko'o m'a apkelmaxnéssesso énxet'ák ahagkok, mehey'ásegkok ko'o m'a énxet'ák apkelxekmósso nak segánamakxa énxet'ák ahagkok, élmexeykekxeyk ko'o m'a apkelámha apmonye'e nak, keñe m'a apkellegasso nak sekpeywa, apkelxeyenma chá'a m'a Baal ekwesey, apkelyetleykekxeyk ma'a aqsok kéleykmássesso ekteme nak mékoho.

Jeremías 20:11

Wesse', sekxegexma eyke ko'o exchep, máxa m'a kempakhakma yáp apyennaqte meykel'a ekhémo; elpelapmok sa' ma'a énxet'ák sénmexeykha nak chá'a ko'o, mehexók sa', megkatyepek sa' apmakókxa etnahagkok, elmegqágwakxak sa', megkatnégwomek sa' néxa apkelxénamap ekmaso apkeltémakxa.

Jeremías 30:14

Massegkek nahan élxeyenma apkelwáxok kéxegke m'a apyókxoho kélásekhayókxa nak; massegkek élyetnakhassamo apkelwáxok kéxegke. Élyensassegkek axta ko'o kéxegke, máxa axta ektemék ma'a apteméssessamól'a elyensaksek ma'a kélenmexma, éllegassáseykegkok axta ekyentaxno agko' eñama ekxámokma kéltémakxa ekmaso, tén han ekxámokma agko' ma'a megkólya'assáxma.

Jeremías 4:30

Tegma apwányam, aptamhákxo nak nápakha'a apketkók, ¿yaqsa ektáha aptaxnékxo nak apáwa hómáyok? ¿yaqsa ektáha apwakhésakpo nak aqsok étkók éltaqmalma sawo ekyátekto élmomnáwa? ¿yaqsa ektáha apkelpeysegkesa nak apaqta'ák? Kaqhok etaqmelchesakpok elnáxamha, aptaqnawágwokmek kaxwók xép ma'a apkelásekhayókxa nak, peyk yaqhek kaxwo'.

Jeremías 5:13

Máxa éxchahayam ma'a apkellegasso nak Dios appeywa, hakte megkeytnók apkelwáxok ma'a Dios appeywa. Keso aptáhakxa exchek ko'o seyáneya Wesse' egegkok Dios ekha nak apyennaqte s'e: “Keso yaqwánxa sa' katnehek, eñama aptamhéyak chá'a apkelpaqmeyesma apkelxeyenma aqsok ma'a: Máxa táxa sa' ko'o atnéssesek sekpeywa apekkenchesek ma'a apátog nak xép, keñe sa' énxet'ák etnahagkok máxa yántapák, kalwatnek sa' xa táxa nak.”

Jeremías 7:19

Háwe eyke ko'o setnéssesseykmohoxma ekmaso xa énxet'ák nak, apnaqtawásamakpekxoho apagko', yaqwayam enxoho elmegqasakpekxohok apagko'. Ko'o sekxeyenma xa, sektáha nak Wesse'.

Oseas 12:1

Apteykegkek éxchahayam ma'a énxet'ák Efraín: yókxoho ekhem chá'a apkelyetleykha m'a éxchahayam eñama nak ekteyapmakxa ekhem. Apxámáseykekxeyk apkelmopwancha'a amya'a, tén han apkelyennaqteyáseykha chá'a apyempe'ék apnaqtawáseykegkoho apnámakkok, aphéssamók chá'a mók apkelpaqhetchásamákpoho m'a Asiria, apkeláphassegkek chá'a apkelmésso naqsa pexmok égmenek ma'a Egipto.”

Oseas 13:15

Máxa sa' eykhe etnehek Israel ma'a ektémól'a kalyapwak pa'at, kawátekhápok sa' eyke m'a éxchahayam eñama nak ekteyapmakxa ekhem, cham'a éxchahayam ekyennaqte eñama nak ekwátekhapma m'a yókxexma meykexa nak énxet, keymaksek sa' ma'a ekteyapmakxa nak chá'a yegmen, kalyamasagkok sa' ma'a yámelchet. Elyementamok sa' apkelenmexma m'a aqsok élmomnáwa, tén han ma'a aqsok éltaqmalma nak.

Oseas 4:19

¡Kalchampaksek sa' éxchahayam, elmegqék sa' eñama apkelpeykessamo aqsok kéleykmássesso!

Zacarías 11:17

¡Keláneykha nepkések mékoho laye, apkexakha nak aqsa chá'a m'a nepkések apnaqtósso! ¡Sókwenaqte sa' kayaqtennek apaktog, kawomhok sa' ma'a apaqtek ekpayho nak apkelya'assamakxa! ¡Ekyame apaktog sa' etnehek, meteyxma sa' nahan katnehek ma'a xama apaqtek!”

Zacarías 11:8

Élántekkessek axta nahan apqántánxo keláneykha nepkések xama pelten, séleklágwayam axta ko'o apkeltémakxa tén han setaqnagko axta ko'o.