Jeremías 22:21 - Biblia Enxet

²¹ Élpaqhetchessegkek axta eykhe kéxegke m'a ektaqmalmakxa axta kélheykha, axta eyke hélháxenmo'. Cháxa kéltémakxa axta kéxegke xa, eyeynamo m'a kéltémakxa axta kélketkók: ¡megkólmenyeyk axta kóleyxhok sekpeywa!

Jeremías 22:21 ပူးပေါင်းရင်းမြစ်များ

2 Crónicas 33:10

Appaqhetchessek axta Wesse' egegkok ma'a Manasés yetlo énxet'ák apagkok, axta eyke elyahákxa'.

Salmos 129:1

Kólteme sa' kólpaqmétek se'e Israel: Xámok axta ko'o sélyentaxnéssesso sekha eyeynmo m'a sektémakxa axta étkok,

Proverbios 30:9

hakte eyeykhágwokmók agkok ko'o xa aqsok nak, ayenyók kexa katnehek xép, axének may'ásegko; méko agkok han aqsok ahagkok, amenyexek kexa nahan katnehek, keñe atwássesha m'a apwesey nak xép Dios ahagkok.

Isaías 48:8

Meñeyk xép kaxénaxchek xa, meteyk nahan, hakte yókxoho ekhem ekteme meyke apeyk'ák. Ekya'ásegkók ko'o exchep apteme melane chá'a m'a aptáhakxa enxoho appeywa, apkeltamhomakpek axta exchep ekyennaqte apwáxok ma'a apyetnamakxa axta egken awáxok.

Jeremías 13:10

Cháxa énxet'ák élmasagcha'a nak apkeltémakxa, megkalyaqwámeykegkok elyahakxohok ma'a séltémókxa nak ko'o etnahagkok, apkelyennaqtéssegkek aqsa apkelwáxok apkelyetleykekxo m'a ektémakxa nak chá'a élchetámeykha apkelwáxok. Apkelyetleykekxeyk ma'a mók aqsok kéláyókxa nak, yaqwayam etnahagkok éláneykha, tén han elpeykeshok chá'a. Aphawók xa kéltétamáxche ektepelchamáxche nak, megkólmowána nak kólmaha.

Jeremías 19:15

“Aptáhak appeywa Wesse' ekha nak apyennaqte, Dios apagkok nak Israel: Wahak sa' ko'o séllegassáseykegkoho s'e tegma apwányam nak, tén han ma'a apyókxoho tegma apheykegko nak nepyáwa, sekxeyenma axta waha', hakte kalyeyha'ak kéxegke kélwáxok, megkólyeheykekxak chá'a m'a sekpeywa.’”

Jeremías 2:25

“¡Énxet'ák Israel, nágkólnaqtawasha kélmagkok kólnaqtémha meyke kélatchesso kélmagkok, nágkólho kalyameyk kélyespa'ák! Keñe axta kéltéma makham se'e: ‘Ma', mogwanche'; nélásekhayók negko'o m'a apkeleñama nak mók nekha, ólyetlakxak sa' negko'o m'a.’

Jeremías 2:31

(Kéxegke nahan, kaxwe nak kélektegeykekxa makham, kóltaqmelchesho kélháxenmo Wesse' egegkok appeywa.) Israel, ¿yókxexma meykexa énxet kélagkok ya axta ko'o kéxegke?, ¿xapop ekyaqtéssamakxa exma ya axta ko'o? Énxet'ák ahagkok, ¿yaqsa ektéma kéltéma nak chá'a kélpeywa s'e? ‘Nenteme egagko' negko'o kaxwók nentamheykegkok; wánxa kaxwók negye'eykekxa exchep’.

Jeremías 25:3

“Veintitrés apyeyam ko'o wokmok sepaqhetchesso m'a Wesse' egegkok, eyeynamo m'a ekweykmo axta trece apyeyam apteme wesse' apwányam Josías ma'a Judá, Amón axta apketche, ekwokmoho makham se'e kaxwo nak, alpaqhetchásekxohok axta eykhe chá'a ko'o kéxegke; axta eyke hélyaheykekxa'.

Jeremías 25:4

Apkeláphássáseykekxeyk axta eykhe chá'a kéxegke Wesse' egegkok ma'a apkeláneykha apkellegasso nak appeywa, axta eyke kéxegke kólháxenmo', axta kólmáheyok kóleyxhok chá'a apkelpeywa tén han kólyahakxohok chá'a.

Jeremías 25:7

Aptáhak kaxwók Wesse' egegkok se'e: ‘Megkólmáheyók kéxegke hélyahakxoho; éllókassegkek kélpeykessamo m'a aqsok kéláyókxa kélláneyak kélagko' nak kéxegke, cháxa peya sa' kagkések kéxegke aqsok ekmaso xa.

Jeremías 25:8

“Cháxa keñamak aptáha nak appeywa Wesse' ekha nak apyennaqte s'e: ‘Megkólyaheykekxak chá'a kéxegke sélpaqhetchesso,

Jeremías 3:24

Kéleykmássesso segmegqassamo nélpeykessamo ensawhessók ma'a aqsok apkelwete axta ẽlyapmeyk nano' ma'a nentémakxa axta egketkók: cham'a nepkések, weyke, tén han egketchek apkelennay'a tén han kelwán'ák.

Jeremías 3:25

Ólháxahagkok hana nélmegqakto, yetlo nélyeykhásamáxkoho egagko' nélmegqágweykekxa', hakte nentémakxa sakcha'a axta negko'o negeynamo nenlánéyak mólya'assáxma nenmexeykekxo m'a Dios Wesse' egagkok, tén han mólyeheykekxa, ekwokmoho s'e kaxwo nak, weykekxók axta nahan ma'a ẽlyapmeyk nanók axta.”

Jeremías 32:30

Sekxók eyeynókxa axta apkeláneyak aqsok megkaleklamakxa nak chá'a ko'o ewáxok ma'a énxet'ák Israel, tén han ma'a Judá; melwátésseykmok selókaséyak ma'a énxet'ák Israel eñama m'a aqsok kéleykmássesso apkeláneyak apancha'awo nak. Ko'o sekxeyenma xa, sektáha nak Wesse'.

Jeremías 35:15

Ketók pók axta eykhe ektemék séláphássesso chá'a apyókxoho m'a séláneykha apkellegasso nak chá'a sekpeywa, yaqwayam etnehek elának se'e: Kólwátésák kéltémakxa ekmaso, tén han ekmaso kéllánéyak aqsok. Nágkólyetlakxa m'a mók aqsok kéláyókxa nak, nágkólpeykesho han, keñe sa' kóllenxanmagkohok kélheykha s'e xapop sekmésso axta ko'o kéxegke, tén han ma'a kélyapmeyk nano' axta. Makke kéxegke hélháxenmo', mehelyeheykekxohok nahan.

Jeremías 48:11

Apkelweteyak chá'a meyke ektáhakxa apheykha m'a énxet'ák Moab, megkólnaqleykekxak makham megkatnahakxa apkelókxa xama enxoho. Aphémók ma'a vino kélpekkenmal'a aqsa meyke kéltaqheyáseykha, megkólyetmeykekxal'a m'a mók kélyeta nak, cháxa keñamak megkamassama nak chá'a ekmátsa, tén han ekpaqneyam.

Jeremías 6:16

Aptáhak Wesse' egegkok apkeláneya énxet'ák apagkok se'e: “Kólchaqnágwom hana ámay, kóllano sa', kóltegyaha sa' amya'a m'a nanók ámay axta, háxko ekyetnamakxa m'a ámay ektaqmalma nak; kólyetlakxa sa' ma'a, keñe sa' kólwetekxak kéllókasso kélyampe.” “Axta eyke aptáhak apkelpaqmeta s'e: Ma', magmakók negko'o ólyetlakxak ma'a.”

Ezequiel 20:13

Élmexeykekxeyk axta eyke ko'o m'a yókxexma meykexa nak énxet, axta elyaheykekxohok ma'a segánamakxa ahagkok; aptaqnagkamchek axta m'a séltémókxa axta chá'a etnahagkok sekmésso axta, yaqwayam axta kalyennaqtéssesek chá'a apnénya'ák ma'a apkelánegko enxoho chá'a, aptawáseykha axta ekyókxoho m'a ekhem ahagkok sábado. Tén axta ekxéna ewáxok ategkesek seklo nepyeseksa m'a tén han amasséssók apyókxoho m'a yókxexma meykexa nak énxet.

Ezequiel 20:21

“Élmexeykekxeyk axta eyke nahan ko'o apketchek nak xa énxet'ák nak. Axta elyeheykekxohok ma'a segánamakxa ahagkok, axta nahan eláneykegkok ma'a séltémókxa nak chá'a etnahagkok, ekméssamo nak chá'a ekyennaqte apnények ma'a ektáha nak chá'a apkelyaheykekxoho, aptawáseykha axta nahan ma'a ekhem ahagkok sábado. Xénchek axta ko'o ewáxok ategkesek seklo nepyeseksa m'a tén han amasséssók apyókxoho m'a yókxexma meykexa nak énxet, yaqwayam enxoho kamaskok seklo,

Ezequiel 20:28

Xama axta séltémo ko'o kólántexek ma'a xapop séltennassamakxa axta ekmámnaqsoho agko' agkések, yohók axta kéltáha kélseykekxexa chá'a aqsok kélnapma kélwet'a m'a egkexe netno nak tén han ma'a yámet ekxámokma nak áwa', kéllánegweykekxeyk axta nahan chá'a aqsok kélmésso naqsa kélagkok sektaqnagkamo ahagko' nak ko'o m'a; kélnegkenweykekxeyk axta chá'a m'a aqsok ekmátsa nak ekpaqneyam, kélyegkenweykekxeyk axta nahan chá'a m'a anmen yámet égmenek kélmésso naqsa kélagkok nak.

Ezequiel 20:8

“Élmexeykekxeyk axta eyke ko'o m'a, axta emáheyók heyeyxho'; axta nahan emassésseykmok ma'a aqsok apcháyókxa élmasagcha'a nak, axta nahan ekxakhák ma'a aqsok kéleykmássesso éleñama axta m'a Egipto. Xénchek axta ko'o ewáxok ategkesek seklo nepyeseksa, tén han allegássesagkohok neyseksa apheykha m'a Egipto ekwokmoho ekmassa seklo.

Sofonías 3:2

Megyaháxenmók ma'a Wesse' egegkok appeywa mopmenyeyk nahan kólpékessesagkok; megyáyok nahan ma'a; mey'eykekxak han ma'a Dios.

Zacarías 7:7

Cháxa appeywa aplegassama axta Wesse' egegkok, apchásenneykekxo axta eñeksek ma'a nanók apkellegasso axta Dios appeywa, ektaqmeleykekxo axta apheykha énxet'ák ma'a Jerusalén tén han aplánegweykekxo axta énxet ma'a kañe' nak tén han apheykegko axta tegma apkelyawe m'a nepyáwa nak, tén han ma'a yókxexma Négueb tén han ma'a xapop meyke nak élekhahéyak.

Deuteronomio 31:27

Hakte ekya'ásegkók ko'o kéxegke kélteme énxet'ák élyennaqte kélwáxok tén han meyke kapeynchegkesek kéltáhakxa; kélenmexáha agkok makham Wesse' egegkok s'e sakhem nak, keso sekha nak makham ko'o kélnepyeseksa kéxegke, ¿háxko sa' katnehek ma'a sétsapa sa' ko'o?

Deuteronomio 9:24

¡Nanók axta kéltémakxa kéxegke kélenmexeykekxa chá'a Wesse' egegkok, eyeynamo m'a sekxók axta sélweteya ko'o!

Deuteronomio 9:7

“Kéméxcheyk megkalwagqamagkehek agko' chá'a kéxegke kéllókáseykegko axta chá'a Dios Wesse' kélagkok ma'a yókxexma meykexa nak énxet. Megkamassegweykmok kélenmexeykekxa chá'a m'a Dios, eyeynamo m'a sekxók axta kélánteyapma m'a Egipto, ekwokmoho kélwa'a s'e yókxexma nak.