Jeremías 20:11 - Biblia Enxet

¹¹ Wesse', sekxegexma eyke ko'o exchep, máxa m'a kempakhakma yáp apyennaqte meykel'a ekhémo; elpelapmok sa' ma'a énxet'ák sénmexeykha nak chá'a ko'o, mehexók sa', megkatyepek sa' apmakókxa etnahagkok, elmegqágwakxak sa', megkatnégwomek sa' néxa apkelxénamap ekmaso apkeltémakxa.

Jeremías 20:11 ပူးပေါင်းရင်းမြစ်များ

Salmos 129:2

xámok axta ko'o sélyentaxnéssesso sekha eyeynmo m'a sektémakxa axta étkok, axta eyke hélhémo'.

Salmos 35:26

Yána elmegqágwomhok apagko' ma'a élpayheykxo axta apkelwáxok seyáhapwa'a ko'o aqsok ekmaso; yána elmegqáwhok apagko' ma'a apkene axta hetnessásekxak ko'o kóneg.

Salmos 40:14

¡Elmegqeyk sa' kéltemessásekxo enxoho mékoho m'a apmáheyo nak chá'a heyaqhek! ¡Elmegqeyk sa' yenyahagkok ma'a apmáheyo nak chá'a hetnéssessamhok exma ekmaso!

Salmos 47:2

Hakte apcheymap ma'a Wesse' egegkok apteme nak Meyke Ekhémo; cha'a apteme Wesse' apwányam ekyókxoho keso náxop.

Salmos 6:10

Elyegwáwhok apagko' sa' ma'a sélenmexma nak, elasmésakpok sa'; ¡ekmanyehe agko' sa' elxeganmok eñama apkelmegqakto!

Salmos 65:5

Dios, Sẽlwagkasso nak teyp negko'o, egátegmowágkek negko'o exchep, yetlo ekyawe apkelane aqsok sentaqmelchessáseykekxo nak negheykha; megkólya'ásseykmok xép ekyókxoho keso náxop, ekweykmoho m'a énxet'ák apheykha nak makhawók agko', teyp wátsam ekwányam;

Salmos 66:5

Kólchexyem, kólteyánegwatámho Dios apkelane aqsok, aqsok sempelakkasso apkelánesso axta m'a énxet'ák:

Isaías 41:10

Nágyé aqsa, ekheyk ko'o xamók xép; nágkatneykha aqsa apwáxok, ko'o sekteme Dios apagkok. Agkések sa' ko'o exchep apyennaqte, apasmok sa' nahan, amagkok sa' ko'o exchep apmek ma'a émek ekmallahanmo nak chá'a kempakhakma.

Isaías 41:14

Aptáhak Wesse' egegkok se'e: “Énxet'ák Israel, kélketcheyetsék eykhe kéxegke, nágkóle'; Jacob énxet'ák apagkok, kélyelqáxkók eykhe kéxegke, apasmok sa'. Ko'o sekteme sélmallanchesso chá'a ekyentaxno kélheykha, ko'o sektáha nak Dios sektaqmalma m'a Israel.

Isaías 45:16

Elmegqágwakxohok sa' apyókxoho m'a apkelánéyak nak chá'a aqsok kéleykmássesso, melya'asagkehek sa' aptamhágkaxa, elesmésakpok sa'.

Jeremías 1:18

Sakhem ko'o sekteméssesa exchep apho tegma apwányam apyennaqte, apho sawo émhal'a, apho tegma kélhaxtegkesso nepyáwa sawo ekyexwase, yaqwayam sa' elenmexek ma'a apyókxoho énxet'ák apheykha nak yókxexma Judá: cham'a kelwesse'e apkelwányam apagkok nak, apkelámha apmonye'e tén han ma'a apkelmaxnéssesso nak énxet'ák ahagkok, tén han ma'a énxet'ák apheykha nak apkelókxa.

Jeremías 1:19

Yenmexekxak sa' xép xa énxet'ák nak, mexók sa' eyke, hakte sekxegexma sa' ko'o atnehek xép, yaqwayam amyók chá'a. Ekméssek ko'o sekpeywa, sektáha nak Wesse' apagkok.”

Jeremías 1:8

Nágye' aqsa xama énxet enxoho, hakte sekxegexma sa' ko'o atnehek xép yaqwayam amyók chá'a. Ekméssek ko'o sekpeywa, sektáha nak Wesse' apagkok.”

Jeremías 15:15

Wesse', xép apya'áseykegkoho nak ekyókxoho aqsok, ¡kaxénwakxoho apwáxok ko'o, hepásegwata'! ¡Heyaqmagkassásekxa ko'o mók setnéssessamakxa m'a énxet'ák setwáseykegkoho nak chá'a! Nágyoho aqsa ko'o heyaqhek xa énxet'ák nak, eñama m'a ektémakxa nak xép mepekhésamap; xeyep keñamak sélyamatcháseykencha'a chá'a.

Jeremías 15:20

Máxa sawo ekyexwase kélhaxtegkessól'a tegma apwányam sa' ko'o atnéssesek xép nepyeseksa xa énxet'ák nak, megkólaqtassól'a. Yempakhakpok sa' eykhe, mexók sa' eyke, hakte ko'o sekxegexma exchep, yaqwayam awagkasek teyp, tén han amallahanchesek. Ekméssek ko'o sekpeywa, sektáha nak Wesse' apagkok.

Jeremías 17:18

Yána' elmegqeyk ma'a sénmexeykha nak chá'a ko'o, ko'o eyke ná hetnésses; yána elyegweyk ma'a, ko'o eyke ná hégwakkas. Yána káhapwak ekmaso apheykha m'a, emasséssem ekmanyehe agko'.

Jeremías 22:22

Éxchahayam sa' kalsók ma'a apyókxoho apkelámha apmonye'e kélagkok, kólnaqlakxak sa' megkatnahakxa apkelókxa m'a appasmeykekxa axta chá'a kéxegke. Kólmegqágwakxohok kélagko' sa', eñama m'a ekyókxoho kéltémakxa ekmaso nak.

Jeremías 23:40

Meyke néxa sa' ko'o atnéssesek kéxegke sekteméssesso mékoho tén han kélmegqakto, megkalwagqamagkehek sa' xa aqsok nak.’”

Jeremías 32:18

Apxekmóssegkek xép apkelásekhayo apxámokma apagko' énxet, ellegássesagkohok eyke han cha'a énxet'ák, eñama apkeláneyak melya'assáxma m'a apyapmeyk nak. Oh Dios apyennaqte tén han apteme apwányam apagko', Wesse' ekha apyennaqte exchep apwesey.

Daniel 12:2

Apxámok sa' enaqxétekhágwók ma'a apkeletsapma kélátawanye axta takhaxpop: yetneyk sa' chá'a yaqwayam eweynchamha meyke néxa, yetneyk sa' han chá'a yaqwayam emegqágwakxak meyke néxa megyásekhamap.