Jeremías 2:36 - Biblia Enxet

³⁶ ¿Yaqsa ektáha kélpekhésa nak kólyaqmagkasek pók kélxegexma'a? Elyexanchesha sa' eyke nahan kéxegke m'a énxet'ák Egipto, ektéma axta m'a énxet'ák Asiria.

Jeremías 2:36 ပူးပေါင်းရင်းမြစ်များ

2 Crónicas 28:16

Cháxa apyeyam apkeláphassamakxa axta apkeláneykha wesse' apwányam Ahaz ma'a aphakxa nak wesse' apwányam Asiria, apkeltamho epasmok,

Isaías 20:5

Metwasha sa' yeyk ma'a énxet'ák, elmegqeyk sa' elanok ma'a énxet'ák Etiopía, apteme axta chá'a apkelásenneykekxa', tén han ma'a Egipto eyaqheykencha'a axta chá'a apkelwáxok.

Jeremías 2:18

¿Yaqsa kagkések kéxegke kólmeyekxak Egipto kólyahagwakxak yegmen ma'a wátsam Nilo? ¿Yaqsa kagkések kéxegke kólmeyekxak Asiria kólyahagwakxak yegmen ma'a wátsam Éufrates?

Jeremías 2:23

Megkólwanchek kéxegke kóltéhek kélpeywa s'e: ‘Mólpeysegkesamaxchek negko'o, mólpeykessamók han ma'a aqsok kéláyókxa élmowancha'a amya'a nak.’ Kóllano kéltémakxa axta m'a yókxexma ekyapwátegweykenxa nak xapop, kóllano ekyókxoho aqsok kélláneyak axta, kéxegke kélhémo nak yányátnáxeg apkelwána apyennaqtél'a apxega, apweynchámeykhal'a ekyókxoho yókxexma;

Jeremías 2:33

“¡Kélya'ásegkok kélagko' nak la'a kéxegke ámay yaqwayam kóltegyaha kélásekhayókxa! ¡Kélxekmósso aqsok ekmaso kélnámakkok kéxegke!

Jeremías 22:20

“¡Énxet'ák Judá, kólchenát sa' néten egkexe Líbano, tén sa' kólyennaqtések kélpeywa! ¡Kólpáxamha sa' ma'a ekpayho nak élámhakxa meteymog Basán! Kólwónches sa' ma'a ekpayho nak naw'ék egkexe Abarim, hakte apmenxenákpek ma'a appasmeykekxa axta kéxegke!

Jeremías 22:22

Éxchahayam sa' kalsók ma'a apyókxoho apkelámha apmonye'e kélagkok, kólnaqlakxak sa' megkatnahakxa apkelókxa m'a appasmeykekxa axta chá'a kéxegke. Kólmegqágwakxohok kélagko' sa', eñama m'a ekyókxoho kéltémakxa ekmaso nak.

Jeremías 31:22

¿Háxko sa' ekwánxa katnégwók néxa kélweynchámeykha aqsa ektémól'a kélketche kelwána ekxegányam la'a? Élanak ko'o axnagkok aqsok keso náxop, ko'o sektáha nak Wesse': xama kelán'a ektaqmeleykha ekpeywa kalának xama énxet.”

Jeremías 37:7

kélápháseykha axta: “Kóltennés sa' wesse' apwányam Judá, apkeláphasso exchek hélyo'ótak ko'o, apkeltaqháwo makham Egipto m'a faraón sẽlpextétamo apagkok, apkelxegakmo excheykhe yaqwayam epasmok kéxegke.

Jeremías 46:12

Apkelya'ásegkók kaxwók ekyókxoho apkelókxa kéltamhákxo mékoho, legáxcheyk han élpayheykha kélatña'ák ekyókxoho yókxexma nak keso náxop; apkeltegwákpek chá'a pók kempakhakma yapmeyk, apkelyettelegwágkók nahan chá'a xamók pók náxop.”

Lamentaciones 4:17

Kelyampayak egaqta'ák nélhaxanma, nélhaxanmeyk eyke aqsa, chaqhémok nélhaxanma hempasmok. Nélhaxanmeyk eykhe elwak énxet'ák megkalmopwána nak hempasmok.

Lamentaciones 5:6

Nélmaxneyeykha axta chá'a nentéyak ma'a egipcios tén han asirios.

Ezequiel 16:28

Yespeyeykegkók axta aqsa élane xa ektémakxa nak, meyásekxeyk axta makham ekyókxa m'a Asirios; hawók axta aqsa makham ma'a ektémakxa nak, yespeyagkók axta aqsa makham élane.

Ezequiel 29:7

xama axta apkelmágweykmo chá'a m'a, apkentegkek axta chá'a exchep, apkelyensáseykegkek axta chá'a apkelpexyekhaya m'a nápakhaw'ék nak; xama axta nahan emáwhok chá'a elteyammagkok xép ma'a, yentek axta chá'a, tén axta elyaqnegkesagkok chá'a.

Oseas 10:6

Kólsakxak sa' han weyke étkok kéleykmássesso m'a Asiria, yaqwayam sa' kólmések ma'a wesse' apwányam ekyawe nak kéláyo. Keñe sa' emegqeyk ma'a Efraín, kamegqaksek sa' Israel ma'a kéleykmássesso apagkok nak.

Oseas 12:1

Apteykegkek éxchahayam ma'a énxet'ák Efraín: yókxoho ekhem chá'a apkelyetleykha m'a éxchahayam eñama nak ekteyapmakxa ekhem. Apxámáseykekxeyk apkelmopwancha'a amya'a, tén han apkelyennaqteyáseykha chá'a apyempe'ék apnaqtawáseykegkoho apnámakkok, aphéssamók chá'a mók apkelpaqhetchásamákpoho m'a Asiria, apkeláphassegkek chá'a apkelmésso naqsa pexmok égmenek ma'a Egipto.”

Oseas 14:3

Mopwanchek negko'o hẽlwagkasek teyp ma'a Asiria, mogwanchek nahan ólxeganmok ólchántek yátnáxeg. Kamaskok sa' kaxwók óltéhek negko'o ‘Dios egagkok’ ma'a aqsok nenlánéyak egagko' nak, hakte xép apwánxa apagkok kóteyágwók ekmayósa kóllanok ma'a élyeheykha nak, xép Wesse'.”

Oseas 5:13

“Apwet'ak sa' agkok Efraín apháxekpo, apwet'ak sa' agkok apkelyense m'a Judá, emhagkok sa' Efraín ma'a Asiria etegyaha yaqwayam epasmok ma'a wesse' apwányam ekyawe nak kéláyo, mopwanchek sa' eyke eltaqmelchessók, mopwanchek sa' han eltaqmelchessessók ma'a apkelyense nak.

Oseas 7:11

Aphawók Efraín ma'a aptémól'a wáx'ay ekyeyháxmal'a, meyke apya'áseyak aqsok: aptegyágweykmek ekpasmo m'a Egipto, keñe apmeyeykekxo nahan ma'a Asiria.