Jeremías 18:15 - Biblia Enxet

¹⁵ Kelwagqámeykegkek eyke ko'o m'a énxet'ák ahagkok, apkelméssegkek chá'a aqsok ánek ekmátsa nak ekpaqneyam éten agkok ma'a aqsok kéláyókxa élmowancha'a amya'a nak. Apkelyetnakhágweykmek ma'a ámay apagkok nak, cham'a nanók ámay nak, apkelyetleykekxeyk ma'a ámay melya'áseykegkaxa nak.

Jeremías 18:15 ပူးပေါင်းရင်းမြစ်များ

Nehemías 9:17

Axta emáheyók yeyxho, axta emáheyók kalxének apkelwáxok ma'a aqsok ekyawe apkelánesso axta m'a. Apkelásennamap apagko' axta, apkelyéseykha axta xama apkemha apmonye' apagkok, apkeltémo enaqlakxak makham yaqwayam etnekxak makham kélásenneykha naqsa m'a Egipto. Dios meyaqmagkáseykekxa nentémakxa eyke exchep, tén han Dios ektaqmeleykha apwáxok, tén han apmopyósa henlano', tén han mepekhésamap, tén han ekyawe segásekhayo, axta ekxakhák.

Isaías 3:12

Sakcha'a m'a apnaqtawáseykegkoho nak énxet'ák ahagkok; kelán'ák kaxwo' tamheykegkok ma'a wesse' apagkok. Énxet'ák ahagkok, apkelyexancháseykha kéxegke m'a apkelámha apmonye'e kélagkok, apkelxegánegkessegkek apkelya'áseykekxo m'a mók ámay.

Isaías 41:29

¡Mékcha'awo agko' ekyókxoho m'a! Méko xama aqsok kalanagkok; kéleykmássesso aqsa, meyke nak ekyennaqte.

Isaías 57:14

Keñe sa' kañexchek katnehek kalpaqmetaxchek se'e: “Kóllána sa' xama ámay éláxñeyo agko', kólyetnakhés sa' ma'a aqsok élhaxtaméyak nak chá'a ámay yaqwayam sa' elyeykhak ma'a énxet'ák ahagkok.”

Isaías 62:10

Kólántép yókxexma, kólántép teyp nak atña'ák, kóllanés ámay ma'a énxet'ák ahagkok. Kóltaqmelchesho sa' kéllane ámay, kólyetnakhés sa' ma'a meteymog; kólchenegkes sa' aqsok magkenatchesso yaqwayam sa' melchenatchesek elwetak ma'a pók aptémakxa nak chá'a énxet'ák.

Isaías 65:7

ekhawo nak chá'a apkeláneyak aqsok ekmaso agko' ma'a ekweykekxoho m'a apyapmeyk nak. Apkelwatneykegkek chá'a néten meteymog élekhahéyak ma'a aqsok ekmátsa nak ekpaqneyam éten agkok, elókáseykegkek chá'a m'a néten egkexe nak. Alyetsetchásekxak sa' sekxók apkeltémakxa ekmaso, keñe sa' atnéssesek ma'a ekpayhawo nak atnéssesek.” Wesse' egegkok apxeyenma xa.

Isaías 9:16

Apkelyetnakhásseykmek énxet'ák se'e apkelámha apmonye'e nak, keñe m'a aptegyéyak nak chá'a ekpékessáseyak apkelxegáneykmo chá'a.

Jeremías 1:16

Keso apkellegeykegkoho peya nak ko'o allegássesagkohok ma'a énxet'ák melya'assáxma, seyamasma nak ko'o; apkelwatnéssama nak chá'a aqsok ekmátsa nak ekpaqneyam éten agkok ma'a aqsok kéláyókxa éleñama nak mók nekha', apkeláneyak apagko' nak chá'a tén han apkelpeykessamo.

Jeremías 10:15

aqsok mékoho, tén han kélya'ásseykmoho, emasséssók sa' Wesse' egegkok ma'a ekwokmo sa' ekhem sẽlyekpelchássessamókxa'.

Jeremías 11:12

Keñe sa' énxet'ák Judá, tén han apheykha nak Jerusalén elyo'ókxak eltamhok kapasmok ma'a aqsok apkeláyókxa apkelméssama nak chá'a m'a aqsok ánek ekmátsa nak ekpaqneyam éten agkok, yawanchek eyke kalwagkasek teyp, ekwa'a sa' aqsok ekmaso m'a.

Jeremías 11:13

Xámok agko' aqsok apkeláyókxa m'a énxet'ák Judá, hawók ma'a tegma apkelyawe apagkok nak, keñe m'a énxet'ák apheykha nak Jerusalén, apxámassamók apagko' apkelánéyak ma'a apkelwatnamakxa aqsok yaqwayam elmések chá'a aqsok ánek ekmátsa nak ekpaqneyam éten agkok ma'a Baal, hawók ma'a ektémakxa nak ekxámokma ámay ma'a tegma apwányam.

Jeremías 11:17

Apkeltamhók kéxegke káhapwak aqsok ekmaso m'a Wesse' ekha nak apyennaqte ektáha axta apkelheyáseykha s'e xapop nak, eñama aqsok ekmaso apkeláneyak ma'a énxet'ák Israel, tén han ma'a Judá, hakte aplókassegkek apkelméssama chá'a aqsok ánek ekmátsa nak ekpaqneyam éten agkok ma'a Baal.

Jeremías 13:25

Cháxa yaqwánxa katnehek kéxegke xa, Israel, cháxa ekpayhawo nak ko'o atnéssesek kéxegke xa. Ko'o sekxeyenma xa, sektáha nak Wesse'. Hakte megkaxénweykmok kélwáxok ko'o, kélásenneykekxeyk aqsa m'a aqsok kéleykmássesso élmowancha'a amya'a nak.

Jeremías 16:19

Wesse', segkésso nak sekyennaqte, tén han setaqmelchesso, semasma nak chá'a ekwa'a enxoho ekmaso sekha; xeyep sa' elyo'ótak pók aptémakxa énxet'ák apkeleñama m'a makhawók agko' nak xapop. Sa' etnehek chá'a yának se'e: “Wánxa axta aqsa apkelxaweykekxo ẽlyapmeyk nano' negko'o m'a aqsok kéláyókxa ekteme nak mékoho, tén han meyke nak ekmowána.

Jeremías 17:13

Wesse', xép apteme apkelhaxanma m'a Israel. Elmegqágwakxohok sa' apyókxoho m'a apyamasma nak xép. Elmassegwók sa' apyókxoho m'a apyetnakhasso nak xép, ektémól'a kélwesey kéltáxéssól'a yagkamex, eñama apyamasma exchep, apteme nak ekteyapmakxa yegmen ektaqmalma.

Jeremías 18:14

¿Emassegwomhoya chá'a yeyam appok ma'a naw'ék nak egkexe meteymog Líbano? ¿Keymawhoya chá'a yegmen ektaqmalma ekteyapma nak ma'a néten nak egkexe?

Jeremías 19:5

Apkeláneykegkek han apkelwatnamakxa aqsok, yaqwayam elwatnések chá'a apketchek ma'a Baal, maltémo axta chá'a ko'o etnahagkok, tén han maltennassama axta chá'a, megkaxeyenma agko' axta chá'a ko'o ewáxok etnahagkok.

Jeremías 2:13

“Apkeláneykegkek ánet melya'assáxma m'a énxet'ák ahagkok: eyamasmeyk ko'o, sektáha nak ekteyapmakxa yegmen ekyennaqtéssamo nak egnények, apkelánéyak apagko' aptamheykegkok ma'a apkelyátamakxa nak yegmen, yámelchet élyagqaxe megkeytno nak yegmen ma'a kañe'.

Jeremías 2:19

Kéltémakxa ekmaso kélagko' sa' kéxegke kallegassásegkokxa', kélyamasma kélyetleykha Dios sa' kalsexnena'. Kalchetam sa' kélwáxok keñe sa' kólya'ásegwók asagkek ko'o hélyenyók, tén han askehe', tén han mehélakawo enxoho, ko'o sektáha nak Dios Wesse' kélagkok. Ko'o sekxeyenma xa, sektáha nak Wesse' ekha sekyennaqte.

Jeremías 2:32

¿Kalwánaqmohoya chá'a xama kelán'a aqsok étkók agkok élmomnáwa, tén han élmeykha axta chá'a élnáxameykha m'a élyamhopma? Keñe énxet'ák ahagkok, nanók ekmasse élxéneykha apkelwáxok ko'o.

Jeremías 3:21

“Legáxcheyk élpayheykha kélatña'ák ma'a néten egkexe ekyamáyekxa nak exma: ¡israelitas ma'a apkellekxagweyncha'a nak, apkeltamho nak kalepyóshok kóllano'! Apkelyetnakhágweykmek apkelyetlo ámay ekpéwomo, megkalxeyenmak apkelwáxok ko'o, sektáha nak Dios Wesse' apagkok.

Jeremías 44:25

Aptáhak Wesse' ekha apyennaqte, Dios apagkok nak Israel se'e: ‘Kéxegke kelán'ák, kélteme nak chá'a kélpeywa, kélláneyak nak chá'a m'a kélxeyenma kóllána'. Kélxeyenma nak chá'a kólmések aqsok ánek ekmátsa ekpaqneyam éten agkok, tén han aqsok kélmésso naqsa vino m'a ‘Wesse' Ekwányam Eñama Néten,’ kélxeyenma nak chá'a kóllának ma'a kélxeyenma nak chá'a kóllána'. ¡Táse', kóllána' sa' ma'a aqsok kélxeyenma nak kóllána'!

Jeremías 51:18

aqsok mékoho, tén han kélya'asseykmoho, emasséssók sa' Wesse' egegkok ma'a ekwokmo sa' ekhem sẽlyekpelchássessamókxa'.

Jeremías 6:16

Aptáhak Wesse' egegkok apkeláneya énxet'ák apagkok se'e: “Kólchaqnágwom hana ámay, kóllano sa', kóltegyaha sa' amya'a m'a nanók ámay axta, háxko ekyetnamakxa m'a ámay ektaqmalma nak; kólyetlakxa sa' ma'a, keñe sa' kólwetekxak kéllókasso kélyampe.” “Axta eyke aptáhak apkelpaqmeta s'e: Ma', magmakók negko'o ólyetlakxak ma'a.”

Jeremías 7:9

Kélmenyexeykegkek chá'a, kélnapmeyk chá'a kélnámakkok, kélnaqtawáseykegkók chá'a kélnaqteyegka'a kéllánegweykmo chá'a mók kelán'a, kélméssegkek chá'a kélpeywa Wesse' egegkok kélmowána amya'a, kélméssegkek chá'a aqsok ánek ekmátsa nak ekpaqneyam ma'a Baal, kélpeykessamók chá'a aqsok kéláyókxa megkólya'ásegko nak kéxegke,

Ezequiel 21:15

Kóleyk sa' chá'a kéxegke xa, apxámok sa' katnehek élnapma. Eknegkenchessek ko'o sókwenaqte ekyetnamo nak ekyógkexma m'a apyókxoho kélxanák nak. Cháxa sókwenaqte kélyenmáseykekxa yaqwayam chá'a kalyenmaksexma xa; kélmaxneyeykekxa yaqwayam kalának chá'a nentekyawa.

Ezequiel 36:15

Magwohok sa' chá'a kaxwók kóllegekxohok apkelxéneykha ekmaso m'a pók aptémakxa nak chá'a énxet'ák apkeleñama mók apkelókxa; kamaskok sa' kaxwók apkelenmexeyncha'a xa énxet'ák nak, hakte megkóltemessásekxók sa' chá'a kaxwók kéxegke meyke apketchek ma'a énxet'ák kélagkok. Ko'o sekxeyenma xa, sektáha nak Wesse'.’”

Oseas 11:2

Yágweykmók axta aqsa seyamasma sekwóneykencha'a, elmések axta chá'a aqsok ektekyawa aqsok kéláyókxa élmowancha'a amya'a énxet'ák ahagkok, elwatnések axta han chá'a aqsok ekmátsa nak ekpaqneyam éten agkok ma'a kéleykmássesso.

Oseas 2:13

Añássesagkohok sa' ko'o ektémakxa axta m'a nentámen axta élméssama axta chá'a kéleykmássesso m'a aqsok ekmátsa nak ekpaqneyam éten agkok, élnáxegkáseykencha'a axta chá'a élatchessessama aphék ma'a élatchesso aphék, tén han élnatanma, yaqwayam kalyetlók ma'a élpathetéyak nak chá'a, ekmassama axta ekxeyenma awáxok ko'o. Ekxénchek ko'o xa, sektáha nak Wesse'.

Oseas 2:6

“Cháxa keñamak peya nak ko'o wáhakkásekxak am'ák ma'a ámay agkok nak, wahaxtegkesek sa' ma'a neyáwa', yaqwayam sa' megkótyehek ámay agkok.

Malaquías 2:8

“Kélyetnakhágweykmek eyke kéxegke m'a ámay ektaqmela, kéxegke kélmaxnéssesso nak énxet'ák ahagkok; apxámok han énxet'ák ekpalchesso m'a ektémakxa nak chá'a kélxekmósso. Kéltawáseykha m'a ekhémo mók nélpaqhetchásamáxkoho ahagkok sekmésso axta ko'o m'a Leví.

Deuteronomio 32:21

Elókassegkek ma'a xama aqsok kéláyókxa megkatnaha nak Dios, elókassegkek ma'a aqsok apcháyókxa élmowancha'a amya'a nak; ¡Wának sa' eyke nahan ko'o kólnathak kéxegke m'a pók énxet'ák melya'áseyak nak Dios, wának sa' kóltaqnaweygkok ko'o kéxegke m'a énxet'ák megkalmopmenyého nak elya'asagkohok aqsok!