Jeremías 17:26 - Biblia Enxet

²⁶ Elwak sa' chá'a énxet'ák apkeleñama nak tegma apkelyawe Judá, cham'a apheykencha'a nak nepyáwa Jerusalén, tén han ma'a apkeleñama nak Benjamín xapop apagkok, tén han ma'a ekpayhegweykenxa nak xapop, tén han ma'a yókxexma ekxámokmakxa nak meteymog élekhahéyak, tén han ma'a Négueb. Enaqlanták sa' chá'a tegma appagkanamap ma'a aqsok apnaqtósso yaqwayam etnehek apkelwatno, tén han yaqwayam etnehek apkelnapma, tén han apkelmésso naqsa nak aqsok ekyexna apkeneykekxa, tén han ma'a aqsok ánek ekmátsa nak ekpaqneyam éten agkok, tén han ma'a aqsok apkelmésso naqsa apmésso nak ekxeyenma apkelwáxok ma'a Wesse' egegkok.

Jeremías 17:26 ပူးပေါင်းရင်းမြစ်များ

Esdras 3:11

Nápakha axta chá'a apkelmeneykmásak apkelpeykásawo, keñe axta han nápakha aptáha chá'a apkelátegmowágko s'e: “Kólmés ekxeyenma kélwáxok Wesse' egegkok, hakte méko xama enxoho aptémakxa m'a, megkamassegwomek han apkelásekhayo m'a énxet'ák Israel.” Apyókxoho énxet axta apkelwehéseyha apkelátsencha'a apkelpeykásawo m'a Wesse' egegkok, hakte cheynawók axta makham kélxátekháseykekxa m'a Wesse' egegkok tegma appagkanamap apagkok.

Salmos 107:22

Kólmés kélnaqtósso kélnapma kélmésso nak ekxeyenma kélwáxok, kólxén yetlo ekpayheykekxa kélwáxok ma'a aqsok apkelane nak.

Salmos 116:17

Alnáhakkasek sa' ko'o exchep aqsok seknaqtósso eñama sekmésso ekxeyenma ewáxok, awónmakha sa' ko'o exchep apwesey Wesse' egegkok.

Salmos 66:13

Atxek sa' ko'o tegma appagkanamap apagkok, tén sa' almések aqsok sélwatno; keñe sa' alának ma'a aqsok séltennasso axta alána',

Isaías 58:13

“Kóltaqmelches chá'a ekhem sábado; nágkólyánmagkasaxche chá'a ekhem ahagkok ekpagkanamaxchexa nak. Kóltemésses ekhem ekpayheykekxexa kélwáxok xa ekhem nak, ekhem ekpagkanamaxche' apagkok ma'a Wesse' egegkok tén han ekpayhémókxa chá'a kaxének kélwáxok; nágkóltawasha, nágkóllána chá'a m'a aqsok kélmáheyo nak chá'a kóllána', nágkóltegyaha nahan chá'a m'a kélagkok kélagko' nak chá'a aqsok, nágkólyánmagkasaxche nahan chá'a.

Jeremías 30:19

Sa' kañék katyapok negmeneykmasso negmésso nak ekxeyenma egwáxok Wesse' egegkok ma'a, tén han néktegmeykha ekpayheykekxa egwáxok. Metnekxeyk sa' apqántawo', hakte ko'o sa' axámasagkok. Megkólwanyaha sa' nahan, hakte ko'o sa' atnéssesek ekha kéláyo.

Jeremías 32:44

Kólmekxak sa', kóltáxeyásekxak sa' makham ekxeyenma nak kélyamasma aqsok, yetlo kélyennaqtésso kélpextete, tén han apnaqtáxéseyak apkelwesey m'a apkelweteykegkoho nak. Sa' katnehek Benjamín nak xapop apagkok xa, nepyáwa nak ma'a Jerusalén, tén han ma'a tegma apkelyawe nak Judá, cham'a élámhakxa nak meteymog élwenaqte, tén han ma'a ekpayhegweykenxa nak xapop, tén han ma'a tegma apkelyawe nak Négueb, hakte wának sa' ko'o kayaqmagkasek mók ektémakxa apheykha. Ko'o sekxeyenma xa, sektáha nak Wesse'.”

Jeremías 33:11

kélmeneykmasso kélessawássessamo, tén han ekpayheykekxa egwáxok, tén han kélmeneykmássesso nak élyamhopma. Kañexchek sa' makham katnehek se'e: Kólmés ekxeyenma kélwáxok Wesse' ekha nak apyennaqte, hakte Wesse' egegkok apteme ektaqmalma apwáxok, megkamassegwomek chá'a segásekhayo. Elsanták sa' aqsok apkelmésso naqsa m'a tegma appagkanamap apkelmésso nak chá'a élxeyenma apkelwáxok. Naqso', ayaqmagkassesek sa' ko'o mók ektémakxa s'e apchókxa nak, yaqwayam sa' katnekxak makham ma'a ektémakxa axta nano'. Ko'o sekxeyenma xa, sektáha nak Wesse'.”

Jeremías 33:13

Elwetakpekxak sa' makham keláneykha nepkések yetlo apnaqtósso m'a tegma apkelyawe apheykegko nak yókxexma élámhakxa nak meteymog, tén han ma'a ekpayhegweykenxa nak xapop, tén han ma'a Négueb, tén han ma'a Benjamín nak xapop apagkok, tén han ma'a neyáwa nak Jerusalén, tén han ma'a pók tegma apkelyawe nak Judá. Ekxénchek ko'o xa, sektáha nak Wesse'.”

Zacarías 7:7

Cháxa appeywa aplegassama axta Wesse' egegkok, apchásenneykekxo axta eñeksek ma'a nanók apkellegasso axta Dios appeywa, ektaqmeleykekxo axta apheykha énxet'ák ma'a Jerusalén tén han aplánegweykekxo axta énxet ma'a kañe' nak tén han apheykegko axta tegma apkelyawe m'a nepyáwa nak, tén han ma'a yókxexma Négueb tén han ma'a xapop meyke nak élekhahéyak.