Jeremías 16:4 - Biblia Enxet

⁴ Eletsapok sa' eñama negmasse ekmaso agko', méko sa' nahan kalekxagwaha eñama apkeletsapma, méko sa' nahan kalátawanyek: kaxnagkokxak sa' aqsa náxop aphopák, ektémól'a aqsok ekteyáseykha. Kasáwak sa' kempakhakma tén han meyk élnapma, máma sa' etawagkok aphopák, tén han aqsok nawha'ák éllo.”

Jeremías 16:4 ပူးပေါင်းရင်းမြစ်များ

2 Reyes 9:10

Keñe sa' ma'a Jezabel, semheg sa' katwok ápak ma'a yókxexma nak Jezreel, hakte méko sa' kátawanyek.’ Apmeykessek axta átog Dios appeywa aplegasso natámen apteme appeywa xa, keñe apkenyaha.

Salmos 78:64

Apkeletsepmeyk axta han apkelmaxnéssesso Dios énxet'ák apagkok, sawo axta chá'a kélyetxeykegkok, yawanchek axta han ekmáheyo kallekxagwaha m'a apnaqteyegka'a neptámen.

Salmos 83:10

kélmassésseykmo axta m'a Endor, ¡kélchexakhama axta aqsa aphopák éltahapma néten xóp!

Isaías 18:6

Ekyókxoho aqsok sa' kaltaqmopagkok ma'a néten meteymog élekhahéyak nak, yaqwayam sa' katawagkok ma'a náta élyawe ektómo nak chá'a mók, tén han ma'a aqsok nawha'ák éllo nak. Kalyagqak sa' náta, ekhem ekmexanmakxal'a exma m'a, keñe sa' ekyókxoho aqsok nawha'ák éllo kallawha chá'a m'a ekhem apmopsamágexal'a.”

Isaías 5:25

Cháxa keñamak apkeltaqnaweygko nak Wesse' egegkok ma'a énxet'ák apagkok, apkellegassásegkók nahan. Kelyawheyha m'a egkexe nak, máxa aqsok apák kélchexakhál'a táhak ekhéyak kélhapák ma'a ámay awáxok. Makke kamassak makham aplo m'a Wesse' egegkok; xénchek makham apwáxok ellegássesagkoho'.

Jeremías 19:7

Magwohok sa' ko'o katyapok aqsok élxeyenma nak apkelwáxok elanagkok énxet'ák Judá s'e yókxexma nak, tén han ma'a énxet'ák Jerusalén. Wának sa' emenxenek ma'a apkelenmexma apkeltaqnagkamo apagko' nak chá'a, tén han elnápok, máma sa' etawagkok aphopák, tén han aqsok nawha'ák éllo.

Jeremías 21:6

Alnápok sa' apyókxoho apheykha nak se'e tegma apwányam nak; kalnápok sa' negmasse énxet'ák tén han aqsok kélnaqtósso.

Jeremías 25:33

Kaxnagkok sa' aphopák ekyókxoho yókxexma nak keso náxop apkelnapma nak Wesse' egegkok xa ekhem nak. Méko sa' kalekxagwaha kalano', méko sa' nahan kalmekxak aphopák yaqwayam kalátawañek; exnagkokxak sa' aqsa náxop ektémól'a aqsok ekteyásekha.

Jeremías 34:17

Cháxa keñamak sektáha nak ko'o sekpeywa s'e, sektáha nak Wesse': Mehelyeheykekxohok ko'o kéxegke, megkólchexeykekxak ma'a kélásenneykha naqsa kélpeywomo xamo' nak; ayenyekxak sa' ko'o kaxwók kempakhakma, negmasse, tén han meyk segaqhe, yaqwayam sa' katnéssesek kéxegke xama aqsok eyeymáxchel'a kataxche' neyseksa m'a ekyókxoho apkelókxa nak keso náxop. Ko'o sekxeyenma xa, sektáha nak Wesse'.

Jeremías 34:20

Wának sa' ko'o elmok ma'a apkelenmexma apkeltaqnagkamo apagko' nak, máma sa' etawagkok ma'a aphopák, tén han aqsok nawha'ák éllo.

Jeremías 36:30

Ektáhak ko'o seyáneya exchep se'e Joaquim wesse' apwányam nak Judá, ko'o sektáha nak Wesse', méko sa' xama enxoho aptáwen neptámen etnehek wesse' apwányam apyaqmagkasso m'a David. Kólpekkenek sa' aqsa aphápak xép neyseksa mayáhat ekhem, tén han neyseksa yeyam appok ma'a axta'a,

Jeremías 44:12

Wának sa' ko'o kólmasséssók apyókxoho m'a apkelheykekxa nak Judá, tén han apkelpekheykha axta elmeyekxak elhakxak ma'a Egipto. Apyókxoho sa' eletsapok kempakhakma, meyk, cham'a ketcheyetse nak ekweykekxoho m'a apkelwányam nak, etnahagkokxak sa' éñamakxa néltémo hentemegwomhok exma ekmaso, tén han mékoho, tén han aqsok eyeymáxkohol'a kataxche'.

Jeremías 44:27

Hakte alanha sa' ko'o, yaqwayam wahak ma'a aqsok ekmaso, háwe m'a aqsok ektaqmela nak. Apyókxoho énxet'ák Judá apheykha nak Egipto, kólmasséssók sa' apyókxoho eñama kempakhakma tén han meyk.

Jeremías 7:33

Máma sa' etnehek aptéyak aphopák xa énxet'ák nak, tén han ma'a aqsok nawha'ák éllo, méko sa' kamenxenchesek.

Jeremías 9:22

Hágkek aphopák náxop ma'a énxet'ák, máxa m'a weyke ekteyáseykha ekhéyak la'a yókxexma, máxa m'a hótáhap apyexna appalleykhal'a neptámen ma'a énxet apkelyaqtónma nak, méko nahan élmákxo.” Wesse' egegkok apxeyenma xa.

Lamentaciones 4:9

Tásek axta ektémakxa apkeletsapma axta neyseksa kempakhakma, megkaxnawok ma'a apkeletsapma nak meyk élnapma, hakte taqmelcháseykegkók axta aqsa apkeletsapma eñama meyke aptéyak eñama nak keso náxop.

Ezequiel 24:21

‘Etne sa' elának énxet'ák Israel se'e: Keso aptáhakxa exchek appeywa Wesse' egegkok se'e: Atwasha sa' ko'o tegma appagkanamap ahagkok, cham'a kélmámenyého kélagko' nak chá'a kéxegke kóllano' tén han kélásekhayo kélagko' nak chá'a, tén han éleymáxkoho nak chá'a kélpaqméteykha kólxénmakha, tén han apmésso nak chá'a kélyennaqte; katekyók sa' ma'a kélketchek kélnegkeneykekxa axta m'a Jerusalén, cham'a apkelennay'a nak tén ma'a kelwán'ák nak.

Ezequiel 5:12

Eletsapok sa' chá'a xama énxet'ák agkok aptáhakxa nak chá'a apqántánxo, eñama negmasse tén han meyk élnapma, keñe sa' ma'a nápakha nak elnápok ma'a apkelenmexma apheykha nak nepyáwa', keñe sa' ma'a apkeleymomap nak waxpánchesek ekyókxoho keso náxop. Axog sa' eyke ko'o neptámen yetlo sekmeykha sókwenaqte.

Sofonías 1:17

Aptáhak Wesse' egegkok se'e: “Malya'ássesagkek sa' aptamhágkaxa énxet'ák. Máxa meyke apaqta'ák sa' chá'a etnahagkok elxog, hakte apkeláneykegkek melya'assáxma nahaqtók ko'o. Máxa xapop ánek sa' katnehek kayegkenaxchek éma apagkok, keñe sa' aphápetek kéláncheseykekxa kaxhok ma'a ektémól'a aqsok ekteyáseykha.”

Deuteronomio 28:22

Yáphássesek sa' nahan ma'a negmasse ekmanyehe nak chá'a kapayhekxa', ekmexanma egyempehek ekmaso, élyephe egyempehek, tén han ekmexanma agko' exma, ekyamáyóxma meyke yegmen, tén han askok yaqwayam katwássesha m'a hótáhap kélcheneykekxa, negmasse ekmaso yaqwayam sa' katnahagkok chá'a kéxegke ekwokmoho ekmasséssekmo.

Deuteronomio 28:26

Máma sa' etawagkok ma'a kélhapák nak kéxegke tén han ma'a aqsok nawha'ák éllo, méko sa' kamenxenchesha.