Jeremías 15:9 - Biblia Enxet

⁹ Élyennákxoho axta chá'a keletsapak ma'a kelán'ák apxámokma nak étchek, kelántaxneykxeyk axta chá'a élennama; ekyáqtéssóxma axta chá'a tamhákxak élányo m'a ekhem, kelmegqakkek axta, keleyósek axta awáxok. Kéleyméxcheyk sa' agkok chá'a kélnápakha megkóletsapma, wának sa' chá'a elnápok ma'a kélenmexma nak. Ekméssek ko'o sekpeywa, sektáha nak Wesse' apagkok.”

Jeremías 15:9 ပူးပေါင်းရင်းမြစ်များ

Isaías 47:9

Katlakkasek sa' eyke káhapwak xama ekhem agko' xeye' xa aqsok nak: Tampe' sa' katnehek, tén han meyke étchek, megkeyxek sa' ekxámokma m'a ekmowána, tén han ektémakxa nak ekxámokma agko' ma'a ekmowána katekkesek aqsok.

Jeremías 19:7

Magwohok sa' ko'o katyapok aqsok élxeyenma nak apkelwáxok elanagkok énxet'ák Judá s'e yókxexma nak, tén han ma'a énxet'ák Jerusalén. Wának sa' emenxenek ma'a apkelenmexma apkeltaqnagkamo apagko' nak chá'a, tén han elnápok, máma sa' etawagkok aphopák, tén han aqsok nawha'ák éllo.

Jeremías 21:7

Keñe sa' Sedequías wesse' apwányam nak Judá, wának emok ma'a Nabucodonosor tén han ma'a pók apkeltaqnagkamakxa apagko' nak chá'a, elmakpohok sa' nahan xamók ma'a sẽlpextétamo apkelwesse'e apagkok, tén han sẽlpextétamo apagkok tén han énxet'ák apkeleymomap nak meletsapma m'a tegma apwányam, megkalnapma nak negmasse, kempakhakma, tén han meyk. Wának sa' ko'o kólnápok kólyetxeygkok sawo, meyke apkelmopyóseka kóllano'. Ko'o sekxeyenma xa, sektáha nak Wesse'.

Jeremías 44:27

Hakte alanha sa' ko'o, yaqwayam wahak ma'a aqsok ekmaso, háwe m'a aqsok ektaqmela nak. Apyókxoho énxet'ák Judá apheykha nak Egipto, kólmasséssók sa' apyókxoho eñama kempakhakma tén han meyk.

Jeremías 50:12

Mékoho sa' eyke katnekxak ma'a kélókxa nak, emegqeyk sa' ma'a tegma apwányam kélpalleykemxa axta. Axayók agko' sa' etnekxak nepyeseksa m'a apheykegkaxa nak pók aptémakxa énxet'ák meyke xama aqsok, ekyamayéxma, tén han ekmaso.

Jeremías 6:4

Aptáhak apkelpaqmeta apkelenmexma s'e: “¡Kóllánekxa sa' kéltáhakxa, yaqwayam ólnapaxchek ma'a! ¡Kólchexyem, agketamagkok sa' yetseksók ekhem agko'! ¡Hay!, taxnakmek eyke nahan peyk kayaqtések.

Jeremías 7:19

Háwe eyke ko'o setnéssesseykmohoxma ekmaso xa énxet'ák nak, apnaqtawásamakpekxoho apagko', yaqwayam enxoho elmegqasakpekxohok apagko'. Ko'o sekxeyenma xa, sektáha nak Wesse'.

Lamentaciones 1:1

¡Apxakkók apagko' aptamhákxak ma'a tegma apyawe apláneyo axta chá'a énxet'ák! ¡Aphágwakxók kelán'a tampe' m'a tegma apyawe apagkok nak énxet'ák! ¡Kélméssegkek ekyentaxno ektamheykha m'a apchókxa ektaqmalma nak!

Lamentaciones 4:10

Ekháneykekxa ancha'awók han étchek ma'a kelán'ák éltaqmalma axta awáxok; ektéyak axta tamheykekxak ma'a étchek nak, kélmasséssekmo axta m'a tegma apwányam apagkok nak ma'a énxet'ák ahagkok.

Ezequiel 5:12

Eletsapok sa' chá'a xama énxet'ák agkok aptáhakxa nak chá'a apqántánxo, eñama negmasse tén han meyk élnapma, keñe sa' ma'a nápakha nak elnápok ma'a apkelenmexma apheykha nak nepyáwa', keñe sa' ma'a apkeleymomap nak waxpánchesek ekyókxoho keso náxop. Axog sa' eyke ko'o neptámen yetlo sekmeykha sókwenaqte.

Ezequiel 5:13

Keñe sa' kamaskok seklo; wánxa sa' atnehek séltaqnawéyak ma'a, awanmeyekxak sa'. Massék sa' agkok ko'o séltaqnawéyak ma'a, elya'ásegwók sa' ektáha ko'o sekxeyenma sélmeyeykha ekyawe agko', ko'o sektáha nak Wesse'.

1 Samuel 2:5

énxet'ák apkelyaqkáneykmoho axta chá'a, aptegyágkek kaxwók apkeltamheykha yaqwayam elwetak ketsék aptéyak; keñe m'a élnápeykha axta chá'a meyk, massék kaxwók élnapma meyk. Keñe m'a kelán'a megkate axta étchek, siete aptáhak ekwete étchek; keñe m'a apxámokma axta chá'a ekwete étchek, méko kaxwók xama enxoho étchek.