Jeremías 13:27 - Biblia Enxet

²⁷ Ekweteyak ko'o m'a aqsok kélyespagko nak, kélnaqtawáseykegkoho kélnaqteyegka'a kéllane chá'a mók, tén han kéltémakxa segmegqassamo kélhémo m'a kelán'a ekyaqmagkáséyak pók énxet ekpathetéyak ekma chá'a ekyánmaga; tén han kéltémakxa ekmaso agko' ma'a néten egkexe nak tén han ma'a yókxexma nak. ¡Xél'aye Jerusalén! ¿Háxko sa' ekwánxa katnégwók néxa ekteme ekmanyása émpehek?”

Jeremías 13:27 ပူးပေါင်းရင်းမြစ်များ

Salmos 94:4

Megkalyexnegwayam apkelpeywa apyókxoho xa apkeláneykegkoho nak aqsok ekmaso; éleymáxkoho apkelwáxok, éleymáxkoho han ma'a apkelpeywa.

Salmos 94:8

¡Énxet'ák élyeyháxma, kólya'asagkoho sa'! ¿Háxko ekwánxa kólya'ásegwók?

Proverbios 1:22

“Wokma'ák megkólya'áseyak nak aqsok, megkólésso nak kóllektegmaha, tén han élyeyháxma nak. ¡Kólwátésák hana kéltémakxa kélteme meyke kélya'áseyak aqsok! ¡Kólwátésák ekmátsa nak kélya'ásseyam, nágkóltaqnow ma'a negya'áseyak nak!

Isaías 57:7

Kélnegkeneykegkek néten egkexe netnók ma'a kélyetnamakxa néten nak, cha'a kélmeyeykekxexa nahan chá'a kóllánegwakxak aqsok ektekyawa kélmésso m'a.

Isaías 65:7

ekhawo nak chá'a apkeláneyak aqsok ekmaso agko' ma'a ekweykekxoho m'a apyapmeyk nak. Apkelwatneykegkek chá'a néten meteymog élekhahéyak ma'a aqsok ekmátsa nak ekpaqneyam éten agkok, elókáseykegkek chá'a m'a néten egkexe nak. Alyetsetchásekxak sa' sekxók apkeltémakxa ekmaso, keñe sa' atnéssesek ma'a ekpayhawo nak atnéssesek.” Wesse' egegkok apxeyenma xa.

Jeremías 11:15

“Énxet'ák Israel, sekteme nak sélásekhayo ¿Yaqsa kélchetamsa'akto s'e tegma appagkanamap ahagkok nak, natámen kéllánéyak aqsok ekmaso? ¿Kélaneykeya kéxegke kamasséssesek eyáhapwe ekmaso kélheykha m'a kélnaqtósso kélnapma nak pexmok agkok, tén han ma'a ápetek nak? ¿Kólegketaxcheya sa'?”

Jeremías 3:6

Axta aptemék ko'o seyenagkama Wesse' egegkok, aptémakxa axta wesse' apwányam Josías: “¿Apweteyaya ektémakxa m'a Israel, cham'a sénmexeykekxo nak ko'o? Xegamche keñe élánegweykmo ektémakxa megkamasexta m'a néten egkexe nak, tén han ma'a ekyókxoho kóneg yenta'a élyentaxno nak pessesse agkok.

Ezequiel 16:23

“Ektáhak ko'o sekpeywa s'e, sektáha nak Wesse': ¡Xeye' laye! Keláneyak xeye' ekyókxoho aqsok élmasagcha'a.

Ezequiel 2:10

Meykessa'ak axta nahan emonye' weykcha'áhak ma'a kélmek nak. Yetnegkek axta nahan chá'a kéltáxésso xama nekha: nenlekxagweykha, nenlegeykegkoho ekmáske, ekxénamaxche yaqwánxa hẽlteméssesek ekmaso.

Ezequiel 20:28

Xama axta séltémo ko'o kólántexek ma'a xapop séltennassamakxa axta ekmámnaqsoho agko' agkések, yohók axta kéltáha kélseykekxexa chá'a aqsok kélnapma kélwet'a m'a egkexe netno nak tén han ma'a yámet ekxámokma nak áwa', kéllánegweykekxeyk axta nahan chá'a aqsok kélmésso naqsa kélagkok sektaqnagkamo ahagko' nak ko'o m'a; kélnegkenweykekxeyk axta chá'a m'a aqsok ekmátsa nak ekpaqneyam, kélyegkenweykekxeyk axta nahan chá'a m'a anmen yámet égmenek kélmésso naqsa kélagkok nak.

Ezequiel 24:12

Teyepmeyk agko' apyéw'ák xa weygke nak, táxa eykhe megkamópesákxo.

Ezequiel 24:13

“Jerusalén, ekmáheyók axta eykhe ko'o amópessásekxak ektémakxa ekmanyása élane ektémakxa megkamasexta, axta eyke káxñeykekxak émpehek. Wánxa sa' eyke aqsa amasséssesek ma'a sekyenyento sa' seklo neyseksa exche'.

Ezequiel 24:6

“Hakte aptáhak Wesse' egegkok se'e: ¡Tegma apwányam ekyetnamakxa nentekyawal'aye! Máxa m'a xama weygke ekteyapmal'a ayéw'ák apwáxok, megkalchamáxchel'a m'a apyéw'ák. Elek sa' chá'a exchep xama xama m'a ápetek kélyaqtennéyak nak, ekwokmoho apteméssesa meyke aqsok apwáxok ma'a weygke.

Ezequiel 36:25

Ayaqpássesagkok sa' ma'a yegmen ektaqmalma agko' nak, almópessásekxak sa' ma'a ekyókxoho élmanyása kélyempe'ék, almópessásekxak sa' ma'a élyepetche nak ekmanyása m'a aqsok kéleykmássesso kélagkok;

Ezequiel 36:37

“Ektáhak ko'o sekpeywa s'e, sektáha nak Wesse': Alának sa' ko'o makham aqsok. Alanaksek sa' chá'a ko'o sélmaxneyakxa enxoho chá'a apkeltamhókxa alanaksek ma'a énxet'ák Israel; axámassásekxak sa' ma'a énxet'ák apagkok aptémól'a m'a nepkések.

Ezequiel 6:13

Elya'ásegwók sa' ko'o sektáha Wesse', apkelwet'a sa' kaxnagkok kélhapák neyseksa kéleykmássesso apagkok xa énxet'ák nak, tén han ma'a nekhaw'ék nak kélwatnamakxa chá'a aqsok, tén han ma'a ekyókxoho egkexe yámnetna'awo nak, tén han ma'a egkexe étseksa'ák nak, tén han ma'a ekyókxoho kóneg yenta'a éltaqmalma nak áwa', tén han ma'a ekyókxoho kóneg nak yámet élyawe élyentaxno nak pessesse agkok, tén han ma'a apkelseykekxéssamakxa nak chá'a kéleykmássesso apagkok ma'a sokmátsa élmátsa agko' nak élpaqneyam.

Oseas 1:2

Apcheynawók axta Wesse' egegkok apkeltennasa amya'a apmako axta eltennaksek eñama apchásenneykekxa m'a Oseas: “Máxa kelán'a ekyaqmagkáseyak pók énxet ekpathetéyak ektegye selyaqye aptamheykegkok seyamasma ko'o m'a énxet'ák Israel. Exeg, ema sa' yaqwayam etnehek aptáwa' xama kelán'a ekyaqmagkáseyak pók énxet ektegye selyaqye, etés sa' nahan étchek ma'a; etnahagkok sa' kelán'a ekyaqmagkáseyak pók énxet ektegye selyaqye étchek.”

Oseas 4:2

Wánxa aqsa ekyetnama nélyexancháseykha nak egmók yaqwayam anlána', nenteme nak chá'a negmowána amya'a, tén han nentekyawa, tén han negmenyexma, tén han nennaqtawáseykegkoho nak egnaqteyegka'a, nenlane chá'a mók, keñe han ma'a negyennaqteyáseykha nak egyempehek, megkatnegweykmok néxa apkelnapma apnámakkok énxet'ák.

Oseas 8:5

Ektaqnagkamók ahagko' ko'o m'a weyke étkok kennawók kéleykmássesso, élpeykessamo nak xeye' Samaria, Ektaqnagkamók ahagko' ko'o m'a. ¿Háxko sa' ekwánxa ekhem kalmópekxak kélyempe'ék kéxegke

Sofonías 3:1

¡Jerusalén la'aye, tegma apwányam apkenmexeykekxa nak Dios, eksawheykekxoho nak nentémakxa ekmaso, apnaqtawáseykegkoho nak chá'a m'a apheykha nak kañe'!