Jeremías 13:24 - Biblia Enxet

²⁴ Cháxa keñamak peya nak ko'o waxpánchesek kéxegke, ektémól'a pa'at apák élsól'a éxchahayam eñama nak yókxexma meykexa énxet.

Jeremías 13:24 ပူးပေါင်းရင်းမြစ်များ

Salmos 1:4

Megkaxnawok ma'a énxet'ák élmasagcha'a nak apkeltémakxa, hakte aphawók ma'a pa'at apák élsó nak éxchahayam.

Isaías 17:13

Xama axta apkelpaqhetchesa ekyennaqte agko' ma'a Dios, makhawók axta apkelmahágkok apkelyexanma, axta aptamhágkok ma'a ektémól'a pa'at kalsók éxchahayam ma'a yókxexma, ektémól'a am'ák kalpexyawasagkok náxop kalsók ma'a éxchahayam ekyennaqte agko'.

Isaías 41:16

Yempaksek sa' tén sa' kalsók éxchahayam; segyettekhane ekyennaqte sa' kaxpánchesha. Keñe sa' xép kapayhekxak apwáxok xamók ma'a Wesse' egegkok, kaqheykha sa' apwáxok ma'a Dios Aptaqmalma nak Israel.

Jeremías 18:17

Máxa sa' ko'o atnehek éxchahayam eñama nak ekteyapmakxa ekhem waxpánchesek ma'a énxet'ák Israel; wának sa' emenxenek ma'a apkelenmexma nak. Wahekxak sa' éyapok, malanók sa', cham'a ekwa'a sa' ekhem séllegassáseykegkoho.”

Jeremías 9:16

Waxpánchesek sa' alya'aksek nepyeseksa m'a pók aptémakxa énxet'ák, melya'ásegko nak ma'a, tén han melweteya axta m'a apyapmeyk nano'; sókwenaqte sa' wának kólmenxenchesek, ekwokmoho megyeymékpo xama enxoho.”

Lamentaciones 1:15

Makhawók élya'ássessók ko'o Wesse' egegkok ma'a énxet'ák apkelyennaqte semasma axta chá'a. Eyhayak sẽlpextétamo yaqwayam hesawhaksek ma'a énxet'ák ahagkok apkelyennaqte. ¡Apteméssessók Wesse' egegkok énxet'ák ahagkok Judá m'a kéltémakxal'a kólyaqhápok anmen yámet ekyexna, yaqwayam kalanaxchek vino!

Ezequiel 17:21

Etekyók sa' neyseksa kempakhakma m'a sẽlpextétamo apagkok apkelyennaqte nak, keñe sa' ma'a apkeleymomap nak yexpaqnek elmahagkok chá'a m'a ekyókxoho yókxexma. Keñe sa' kólya'ásegwók kéxegke, sektáha ko'o sekxeyenma, sektáha nak Wesse'.

Ezequiel 5:12

Eletsapok sa' chá'a xama énxet'ák agkok aptáhakxa nak chá'a apqántánxo, eñama negmasse tén han meyk élnapma, keñe sa' ma'a nápakha nak elnápok ma'a apkelenmexma apheykha nak nepyáwa', keñe sa' ma'a apkeleymomap nak waxpánchesek ekyókxoho keso náxop. Axog sa' eyke ko'o neptámen yetlo sekmeykha sókwenaqte.

Ezequiel 5:2

Wokmek sa' agkok néxa apwakhamap ma'a tegma apwányam, elwet sa' ektáhakxa nak ántánxo apkelyaqténma apwa' m'a nepyeseksa nak tegma apwányam; tén sa' natámen emok xama sawo, elyaqtennagkok nahan nepyáwa tegma apwányam ma'a mók nak apnegkenma apkelyaqténma m'a apwa', keñe sa' ma'a éleymomáxche nak, ekxák néten elchampaksek. Axog sa' ko'o neptámen ma'a énxet'ák apheykha nak tegma apwányam, yetlo sekmeykha sókwenaqte.

Ezequiel 6:8

Wának sa' eyke ko'o kólwomok teyp kélnápakha kéxegke tén han megkóltekyewe, kólexpaqnek sa' kólmahagkok ma'a nepyeseksa nak pók aptémakxa énxet.

Oseas 13:3

Cháxa keñamak peya nak elxohok ma'a téyáméten ekteyapmól'a axto'o, ektémól'a m'a yálye ektéyam la'a amonye' élseye, ekmanyehe nak chá'a kamassegwók, elxohok sa' ma'a ektémól'a pa'at apák élsól'a éxchahayam, tén han ektémól'a éten ekteyapmól'a m'a néten ekpánmakxa'.

Levítico 26:33

Waxpánchesek sa' ko'o kéxegke alya'aksek nepyeseksa m'a pók aptémakxa énxet'ák nak, sókwenaqte sa' amenxenchesek; yókxexma meykexa énxet sa' katnekxak ma'a kélókxa nak, keñe sa' ma'a tegma apkelyawe kélagkok nak, etnekxak segyegwakkassamo agweta'.

Sofonías 2:2

amonye' kélchempasso ektémól'a pa'at apák, ekmassamól'a aqsa xama ekhem agko'; amonye' eyáhapwe kéxegke m'a Wesse' egegkok aplo; amonye' eyáhapwe kéxegke m'a ekhem aplawa sa' Wesse' egegkok.

Deuteronomio 28:64

Yexpánchesha sa' Wesse' egegkok elya'aksek ma'a ekyókxoho apkelókxa apheykegkaxa nak chá'a pók aptémakxa énxet'ák, eyeynamo m'a xama nekha nak xapop ekweykekxoho m'a mók nekha xapop nak, sa' kólpeykeshok chá'a mók aqsok kéláyókxa nak chá'a m'a, cham'a aqsok kéláyókxa élánamáxche nak chá'a m'a yántéseksek tén han ma'a meteymog, megkólweteya nak kéxegke tén han melweteya axta m'a kélyapmeyk nanók axta.

Deuteronomio 32:26

“Xénchek axta eykhe ko'o ewáxok waxpánchesek tén han amasseksek apkelxénamap keso náxop,

Deuteronomio 4:27

Yexpánchesha sa' kéxegke Wesse' egegkok elya'aksek ma'a nepyeseksa nak pók aptémakxa énxet'ák, kélqántawók kélagko' sa' kóleymaxchek kéxegke, wánxa sa' aqsa m'a kélheykha nak chá'a apkelókxa apkelya'asakxa enxoho chá'a m'a Wesse' egegkok.