Jeremías 12:16 - Biblia Enxet

¹⁶ Naqsók eyke apkelxekmóssama énxet'ák ahagkok apteméssesso chá'a naqsók apkelmésso apkelpeywa m'a Baal, apwanchek eyke kaxwók exmakha nepyeseksa énxet'ák ahagkok, ektáha enxoho naqsók apmáheyo etnahagkok ma'a aptamheykegkaxa nak chá'a hélpeykeshok ma'a énxet'ák ahagkok, tén han etnehek chá'a apkelpeywa exének sekwesey ekmámnaqsoho s'e: ‘Memassegwomek sa' chá'a Wesse' egegkok.’

Jeremías 12:16 ပူးပေါင်းရင်းမြစ်များ

Cantares 1:8

Kelán'a ektaqmalma nak neyseksa m'a kelán'ák éltaqmalma, sa' agkok kay'ásegkok xeye', kalyetlow sa' aptamnek ma'a nepkések, kalágwom sa' pa'at yát'ay apketkók eknaqtósso m'a ekpayho nak apkelpakxeneykegkaxa m'a apkeláneykha nepkések.

Isaías 2:3

énxet apxámokma apagko' sa' elwa', sa' etnehek apkelpeywa s'e: “Kólchempoho, ólchántek Wesse' egegkok egkexe apagkok, tegma appagkanamap apagkok nak ma'a Jacob Dios apagkok, yaqwayam sa' hẽlxekmósek ma'a ámay apagkok, keñe sa' agkegwának ólyetlók ma'a apkeltamhókxa enxoho chá'a ólyetlók.” Hakte Sión sa' katyapok ma'a nélxekmowásamáxche apagkok nak Wesse' egegkok, Jerusalén sa' kañék ma'a appeywa nak.

Isaías 42:6

“Ekwóneykha axta ko'o exchep, ko'o sektáha nak Wesse', ekmeyk axta apmek, yaqwayam enxoho etnehek apkelwagkasso teyp énxet'ák; éláneyak axta ko'o exchep, hakte émenyeyk axta etnehek magkenatchesso ekhémo mók sélpaqhetchásamáxkoho ko'o m'a énxet'ák, tén han élseyéxma apagkok ma'a pók aptémakxa nak chá'a énxet'ák,

Isaías 45:23

Ekxénaxchekxók ko'o ahagko', ekxénchek ma'a amya'a ekmámnaqsoho nak, katnehek sa' nahan xa sektáhakxa nak sekxeyenma: apyókxoho énxet sa' eltekxeyagkok aptapnák emonye' ko'o, apyókxoho énxet sa' hexének ko'o hélpeykesho'.

Isaías 49:6

“Mopwanchek xép etnehek séláneykha wánxa apkelánekxésso apheykha m'a Jacob énxet'ák apagkok tén han yaqwayam enaqlanták makham ma'a énxet'ák Israel apkeleymomap nak meletsapma; atnéssesek sa' nahan ko'o exchep élseyéxma apagkok ma'a apyókxoho pók aptémakxa énxet'ák, yaqwayam sa' eswok nélwagkásamáxche teyp ahagkok ma'a makhawók agko' nak keso náxop.”

Isaías 65:16

Apyókxoho énxet apkelmaxneyakxa enxoho chá'a ektaqmalma negha m'a apkelókxa, elmaxnak sa' chá'a m'a Dios apmámnaqsoho nak; apyókxoho apteméssesso nak chá'a naqsók appeywa m'a apkelókxa, egkések sa' chá'a ekmámnaqsoho appeywa m'a Dios apmámnaqsoho nak. Kelwagqámexcheyk kaxwók ma'a nanók ekyentaxnamo egwáxok axta, massegwokmek sekwete.

Jeremías 16:19

Wesse', segkésso nak sekyennaqte, tén han setaqmelchesso, semasma nak chá'a ekwa'a enxoho ekmaso sekha; xeyep sa' elyo'ótak pók aptémakxa énxet'ák apkeleñama m'a makhawók agko' nak xapop. Sa' etnehek chá'a yának se'e: “Wánxa axta aqsa apkelxaweykekxo ẽlyapmeyk nano' negko'o m'a aqsok kéláyókxa ekteme nak mékoho, tén han meyke nak ekmowána.

Jeremías 18:8

Apkelwátesagkek agkok chá'a apkeláneyak aqsok ekmaso xa énxet'ák nak, keñe magwáphássesek chá'a m'a séllegassáseykegkoho séleyxchessama nak ko'o.

Jeremías 3:17

Wesse' egegkok aptaháno ektaqmalma sa' kólteméssesek ekwesey m'a Jerusalén; apyókxoho pók aptémakxa énxet'ák sa' yaqnekxak ma'a, yaqwayam hélpeykesho'; kamaskok sa' elyetlakxohok ma'a ektémakxa nak élmámenyého apkelwáxok elanagkok aqsok ekmaso eñama élyennaqte, yaqwayam sa' etnehek ko'o seyáyo, kamaskok sa' etnahagkok élyennaqte apkelwáxok elanagkok ma'a aqsok ekmaso nak.

Jeremías 4:2

kélwanchek sa' hélmések kélpeywa yetlo kélxeyenma sekwesey, ekmámnaqsoho agko', tén han ektaqmalma tén han ekpéwomo. Sekwesey sa' chá'a elmaha elmaxnéssesek aqsok éltaqmalma apnámakkok ma'a pók aptémakxa énxet'ák, tén han ektaqmalma apkelxénamap.”

Jeremías 5:2

Yetneyk énxet apxeyenma nak chá'a apmésso appeywa ekmámnaqsoho m'a Wesse' egegkok, apmopwána amya'a eyke.”

Jeremías 5:7

Aptáhak Wesse' egegkok se'e: “Mowanchek ko'o mayaqmagkásekxeyk mók xa ekyókxoho kéltémakxa nak. Eyamasmeyk axta ko'o m'a kélketchek nak, apméssegkek axta ekmámnaqsoho apkelpeywa m'a aqsok kéláyókxa megkatnaha nak ekmámnaqsoho. Élméssegkek axta ko'o ekxámokma aptéyak, keñe apnaqtawáseykegkoho apnaqteyegka'a apkelánegweykmo chá'a megkatnahakxa aptáwa', apyókxoho axta apkeláneykegkok ma'a nentémakxa ekmaso mansexta.

Jeremías 6:16

Aptáhak Wesse' egegkok apkeláneya énxet'ák apagkok se'e: “Kólchaqnágwom hana ámay, kóllano sa', kóltegyaha sa' amya'a m'a nanók ámay axta, háxko ekyetnamakxa m'a ámay ektaqmalma nak; kólyetlakxa sa' ma'a, keñe sa' kólwetekxak kéllókasso kélyampe.” “Axta eyke aptáhak apkelpaqmeta s'e: Ma', magmakók negko'o ólyetlakxak ma'a.”

Sofonías 1:5

Amasséssók sa' ma'a apkelchánte nak chá'a néten tegma yaqwayam elpeykeshok ma'a aqsok élápogwátéyak nak néten, tén han apkeltekxeyéyak nak chá'a aptapnák xapop etnéssesek naqsók apkelpeywa elxének ma'a sekwesey, tén han ekwesey m'a aqsok kéláyókxa Milcom.

Zacarías 1:6

Cham'a sekpeywa tén han seyánamakxa axta chá'a etnahagkok, séltémo axta ko'o eltennasagkok ma'a séláneykha apkellegasso axta sekpeywa, apwagkassegkek axta apheykegkaxa m'a kélyapmeyk nano' axta kéxegke. Tén axta sey'eykekto ko'o m'a, apkelya'ásegweykmo m'a sekteméssessamakxa axta chá'a ko'o sektáha nak Wesse' ekha sekyennaqte eñama m'a apkeltémakxa tén han aqsok ekmaso apkeláneyak.’”

Zacarías 2:11

Temék sa' agkok xa, apxámok sa' pók aptémakxa énxet'ák elyo'ótak ma'a Wesse' egegkok. Sa' etnehek appeywa s'e: “Atnehek sa' nahan énxet'ák ahagkok xa énxet'ák nak. Keñe sa' axek chá'a ko'o kélnepyeseksa kéxegke.” Keñe sa' kólya'ásegwók kéxegke aptáha seyáphasso ko'o m'a Wesse' egegkok ekha nak apyennaqte.

Josué 23:7

Nágkólpáxaqwom pók énxet'ák apheykha nak makham se'e kélnepyeseksa nak kéxegke. Nágkólpeykesho m'a aqsok apkeláyókxa nak, nágkólyahakxoho han; nágkólxénmakha han chá'a xa aqsok kéláyókxa nak, nágkólmaha han chá'a élwesey kélteméssesa enxoho chá'a naqsók kélpeywa.

Rut 3:13

Katyen sa' aqsa sekxók se'e, keso axta'a nak. Keñe sa' saka, apmakók sa' agkok elának ekpayhawo nak etnéssesek xeye' m'a énxet nak, tásek elána'; sa' agkok emakók elána', ko'o sa' alának nápaqtók ma'a Wesse' egegkok. Katyen sa' kaxwo' ekwokmoho élsaka.