Jeremías 11:20 - Biblia Enxet

²⁰ Wesse' ekha nak apyennaqte, xép akke apteme segyekpelchémo appéwomo; apya'ásegkók xép ekweykmoho kañók agko' elchetámeykha apwáxok énxet. Yána ko'o alanha yaqwánxa etnéssesek apkellegassáseykegkoho xa énxet'ák nak, hakte ekméssek ko'o exchep ma'a setnamakxa nak.

Jeremías 11:20 ပူးပေါင်းရင်းမြစ်များ

Génesis 18:25

Mopwanchek xép elának xa, elnápok ma'a meyke nak apkeltémakxa yetlo m'a élmasagcha'a nak apkeltémakxa, hakte máxa katnehek ekhawo enxoho mók apkeláneyak melya'assáxma xa. ¡Ná elána aqsa xa! Xép apteme segyekpelchémo apsawheykekxoho ekyókxoho yókxexma keso náxop. ¿Metnésseseya m'a ekpayhawo nak etnéssesek?

2 Reyes 19:14

Apmeyk axta weykcha'áhak Ezequías apsókasso axta m'a énxet'ák kélapháseykha, apkelyetsetchessek axta. Tén axta apmeyákxo m'a tegma appagkanamap, appeykessek axta weykcha'áhak apmonye' m'a Wesse' egegkok,

1 Crónicas 28:9

Keñe sa' xép, hatte Salomón, ey'asagkoho sa' Dios apagkok nak apyáp, elána' sa' chá'a ekweykmoho kañók agko' apwáxok ma'a apkeltémókxa nak etnehek, tén han yetlo ekmáheyo apwáxok, hakte elanok chá'a Wesse' egegkok ma'a ektémakxa nak egwáxok, ékpelkohok han ma'a ektáhakxa enxoho chá'a ekmámenyého egwáxok, tén han élchetamso egwáxok. Apketamchek sa' agkok chá'a exchep ma'a, megkatnehek sa' chá'a méteyeykekxa'; apyenyókek sa' agkok xép ma'a, eyenyók sa' megkatnégwayam néxa m'a.

1 Crónicas 29:17

Dios ahagkok, ekya'ásegkók ko'o apteme apkelányo chá'a egwáxok, tén han apchásekhayo m'a ekpéwomo nentémakxa. Cháxa keñamak sélmésa nak xép ekyókxoho s'e aqsok nak yetlo eyáxñeyo ewáxok. Payhékxeyk kaxwók ewáxok sekwet'a énxet'ák apagkok apchaqnákxo nak se'e, apkelmésa chá'a aqsok apkelmésso naqsa yetlo melmeyágweykekxa.

Job 5:8

Etnék agkok ko'o xa, ay'ókxak ma'a Dios, altennaksek ma'a setnamakxa nak;

Salmos 139:23

Oh Dios, elano sektémakxa ékpelkoho ewáxok; hépkeyn, ey'asagkoho élchetamso ewáxok;

Salmos 35:2

Emekxa apcháhakkásamap, tén han apkelmeykha hepásegwata';

Salmos 43:1

Oh Dios, hexén ko'o meyke sektémakxa; ¡hepásegwata' heyátegmakkasagkok se'e énxet'ák melya'áseyak nak xép! ¡Hewagkas teyp nepyeseksa énxet'ák apkelmopwancha'a amya'a, tén han élmasagcha'a nak apkeltémakxa,

Salmos 57:1

Dios ahagkok, yepyósho ko'o hélano', yepyósho hélano', hakte ekya'aweykteyk xép séltamho hemyók. Axnaták sa' ko'o kóneg apxempenák yaqwayam hemyók, ekwokmoho ekyeyk'a m'a aqsok ekmaso.

Salmos 58:10

Kalpayhekxak sa' apkelwáxok kélyaqmagkassásekxo enxoho kélteméssessamakxa m'a apkelpéwomo nak; ¡elyássesek sa' apmagkok éma apagkok ma'a élmasagcha'a nak apkeltémakxa!

Salmos 7:10

Cha'a semasma ko'o m'a Dios apha nak néten, apwagkassamo nak chá'a teyp ma'a énxet apkelyeheykekxoho nak chá'a.

Salmos 7:8

Wesse', elyekpelkohok chá'a exchep ma'a pók aptémakxa nak énxet'ák: hékpelkoho ko'óxa ektémakxa nak meyke sektémakxa; hékpelkoho ko'óxa ektémakxa nak ektaqmalma sektémakxa.

Salmos 7:9

Dios appéwomo, apkelányo nak chá'a ektémakxa élchetámeykha egwáxok, tén han ekxéneykha egwáxok kañók agko', ¡emasséssem apkeltémakxa ekmaso m'a élmasagcha'a nak apkeltémakxa, eyke ewasqakkas neyseksa apha m'a énxet meyke nak aptémakxa!

Salmos 98:9

nápaqtók Wesse' egegkok, apxegakmo nak yaqwayam etnehek wesse' apwányam keso náxop. Elanha sa' apyókxoho énxet'ák keso nélwanmeygkaxa', yetlo ekpéwomo aptémakxa, meyke ekyeykhamaxche mók.

Jeremías 12:1

Wesse', élátegmoweyxchek agkok ko'o exchep, xeyep aqsa chá'a kapayhohok aptáhakxa appeywa; peyk eykhe almaxneyha ko'o exchep ektémakxa aqsok sekwete. ¿Yaqsa enxoho ektéma ektaqmalma chá'a ekteyapma aqsok apkelánéyak ma'a élmasagcha'a nak apkeltémakxa? ¿Yaqsa enxoho ektéma megkatnegweykmoho chá'a exma apheykha m'a appelakkassesso nak chá'a elsexnenak apnámakkok?

Jeremías 12:3

Kaxnók ko'o, ey'ásegkók xép Wesse', éteyak nahan, apya'ásegkók nahan ektémakxa ewáxok ekmámenyého exchep. ¡Enaqlow sa' xa énxet'ák nak, ektémól'a m'a nepkések kélnaqleykekxal'a m'a aptekyómakxa; elyetnakhés sa' ma'a, yaqwayam nak etekyók ekhem ekwokmo sa' aptekyómakxa!

Jeremías 15:15

Wesse', xép apya'áseykegkoho nak ekyókxoho aqsok, ¡kaxénwakxoho apwáxok ko'o, hepásegwata'! ¡Heyaqmagkassásekxa ko'o mók setnéssessamakxa m'a énxet'ák setwáseykegkoho nak chá'a! Nágyoho aqsa ko'o heyaqhek xa énxet'ák nak, eñama m'a ektémakxa nak xép mepekhésamap; xeyep keñamak sélyamatcháseykencha'a chá'a.

Jeremías 17:10

Ko'o sélányo chá'a apwáxok énxet, sektáha nak Wesse', tén han sekya'áseykegkoho chá'a m'a kañók agko' nak élchetámeykegkaxa apwáxok; tén han sekméssamól'a chá'a xama m'a ekpayhawo nak chá'a atnéssesek sellegassáseykegkoho, cham'a ektémakxa nak chá'a aqsok apkeláneyak.”

Jeremías 17:18

Yána' elmegqeyk ma'a sénmexeykha nak chá'a ko'o, ko'o eyke ná hetnésses; yána elyegweyk ma'a, ko'o eyke ná hégwakkas. Yána káhapwak ekmaso apheykha m'a, emasséssem ekmanyehe agko'.

Jeremías 20:12

Wesse' ekha nak Apyennaqte, apkelányo nak chá'a yetlo ekpéwomo agko', apwetayo nak chá'a kañók agko' apwáxok énxet, yoho ko'o alanha ektáhakxa apkellegassáseykegkoho xa énxet'ák nak, hakte ekméssegkek ko'o exchep ma'a setnamakxa nak.

Lamentaciones 3:58

Wesse', epasmomchek axta exchep, megyahayók watsapok.

Lamentaciones 3:59

Wesse', apweteyak xép megkapéwomo nak sélteméssessamakxa, ¡hélánekxés amya'a!

Lamentaciones 3:64

Wesse', etnésses ekpayhawo nak etnéssesek, egkés ma'a éltémókxa nak egkések ma'a aqsok apkelánéyak.

Ezequiel 11:5

Apweywenteyk axta ko'o tekhéxet Wesse' egegkok espíritu apagkok, tén axta apkeltamho atnehek sekpeywa s'e: “Keso aptáhakxa exchek Wesse' egegkok se'e: ‘Cháxa ekxeyenma nak chá'a kélwáxok kéxegke kóltéhek xa, israelitas. Ekya'ásegkók ko'o ektémakxa élchetamso kélwáxok.

1 Samuel 16:7

Keñe axta aptáha apcháneya Wesse' egegkok se'e: “Ná elano ektémakxa apyempehek, essenhan ektémakxa apwenaqte, hakte mómenyék ko'o xa. Megkatneyk ko'o sélányo ektémakxa nak apkelányo énxet; hakte apyókxa aqsa chá'a elanok pók énxet, keñe ko'o apwáxok aqsa chá'a alano'.”

1 Samuel 24:15

Wesse' egegkok sa' etnehek segyekpelchémo negko'o s'e egqánet nak, tén han exének yaqwánxa henteméssesek; ¡sa' elanok han aqsok sélane m'a, tén han hemyók neyseksa apmáheyo hetnéssessamhok exma ekmaso exchep, wesse'!”