Isaías 9:6 - Biblia Enxet

⁶ Hakte apteyekmek xama sakcha'a negyeseksa, Dios segmésso xama apketche, cham'a peya sa' exkak apmopwána yaqwayam etnehek aptaqmelchesso apchókxa. Sa' nahan kólteméssesek apwesey s'e: Eyaqheykha kélwáxok aqsok apkelane, Dios apyennaqte, Egyáp Memassegwayam, Wesse' meyke ektáhakxa negha.

Isaías 9:6 ပူးပေါင်းရင်းမြစ်များ

2 Samuel 7:13

Sa' etnehek sélánésso ko'o xama tegma appagkanamap ma'a, keñe sa' ko'o atnéssesek megkatnégwayam néxa apteme wesse' apwányam.

2 Samuel 7:16

Méko sa' chá'a katnehek apheykha aptawán'ák neptámen, tén han aptémakxa nak wesse' apwányam, hakte altaqmelchesek sa' chá'a ko'o, megkamassegwomek sa' aptamhéyak apkelwesse'e m'a aptawán'ák neptámen nak.’”

1 Reyes 10:9

¡Apcheymákpoho sa' kólteméssesek ma'a Dios Wesse' apagkok, ektaqmeleykencha'a nak chá'a apwáxok apkelányo, apméssama nak apteme wesse' apwányam ma'a Israel! ¡Apkelásekhayo meyke néxa han keñamak Wesse' apagkok énxet'ák Israel, apteméssessama exchep wesse' apwányam, yaqwayam enxoho etnehek chá'a apkeláneykha ekpéwomo aptémakxa, keñe han apkelánekxésso chá'a apheykha!”

1 Reyes 2:33

Kápekxak sa' Joab apsexnánémap eñama apketsapma, ekweykekxoho m'a aptawán'ák neptámen meyke néxa. Tén sa' David keytek chá'a meyke ektáhakxa apha, eñama nak Wesse' egegkok, ekweykekxoho aptawán'ák neptámen, tén han yaqwayam nak etnahagkok chá'a kelwesse'e.

1 Reyes 2:45

Kataqmalmakha sa' eyke chá'a ko'o apwáxok hélanok ma'a Wesse' egegkok, ko'o Salomón, sektáha nak wesse', etnahágkok sa' chá'a apkelwesse'e nápaqtók Wesse' egegkok ma'a David aptawán'ák neptámen.

Nehemías 9:32

“Dios egagkok, Dios meyke ekhémo, tén han apyennaqte, tén han ekha kélaye, tén han meyaqmagkasseyam nak ekhémo mók nélpaqhetchásamáxkoho apagkok, tén han ekyawe segásekhayo, kaxén apwáxok ekyókxoho aqsok ekmaso ektémakxa axta m'a kelwesse'e apkelwányam egagkok, tén han apkelámha apmonye'e egagkok, tén han ma'a apkelmaxnéssesso Dios énxet'ák apagkok, tén han ma'a apkellegasso nak appeywa, tén han ma'a ẽlyapmeyk nano' axta, tén han ma'a apyókxoho énxet'ák egagkok, eyeynmo m'a apheykegkaxa axta apkelwesse'e apkelwányam axta Asiria, ekwokmoho s'e kaxwo' nak.

Salmos 45:3

¡Etétekxa nepxet sókwenaqte apagkok, xép apteme nak apyennaqte! ¡Katxohok chá'a exchep emha xa, xép apteme nak apcheymákpoho!

Salmos 45:6

Oh Dios, megkamassegwomek xép ma'a aptémakxa wesse' apwányam, kapéwhok chá'a apkelánéseykekxa apheykha énxet'ák.

Salmos 45:7

Yásekhohok chá'a m'a aqsok ektaqmela, etaqnók chá'a m'a aqsok ekmaso nak. Cháxa keñamak apkelyéseyncha'a nak Dios, cham'a Dios apagkok nak, apyánchessamók han apmésso m'a ekpayheykekxa apwáxok, kaxnók ma'a apkelxegexma'a nak.

Salmos 50:1

Appaqmetchek Wesse' egegkok, cham'a Dios apteme nak néten ekyókxoho m'a aqsok kéláyókxa; apkelwóneyha apheykha nak keso náxop, cham'a teyapmakxa ekhem nak, tén han ma'a taxnegwánxa ekhem.

Salmos 72:17

¡Megkamassegwomek sa' chá'a apwesey m'a wesse' apwányam; megkamassegwomek sa' ekxénamaxche apwesey ekhakxa nak makham ekhem! ¡Elxawagkok sa' chá'a ektaqmalma apheykha apyókxoho énxet'ák apheykha nak keso nélwanmeygkaxa, eñama xa wesse' apwányam nak! ¡Apyókxoho pók aptémakxa énxet'ák sa' chá'a eltéhek: “Apkeleñémo”.

Salmos 72:3

Kagkések sa' meyke ektáhakxa apheykha énxet'ák ma'a egkexe élwenaqte nak, keñe ekpéwomo apkeltémakxa m'a xóp élekhahéyak nak.

Salmos 72:7

¡Kayákxak sa' meyke ektáhakxa negha, tén han ektaqmalma nentémakxa neyseksa apteme wesse' apwányam, ekwokmoho apmassa m'a pelten!

Salmos 85:10

Keypetchekxak sa' segásekhayo m'a ektémakxa nak mehegyenyaweykha, kapathétekxak sa' mók ma'a meyke ektáhakxa nak negha, tén han ekpéwomo nentémakxa,

Salmos 89:5

Oh Wesse', elpeykeshok chá'a exchep ektémakxa mehegyenyaweykha m'a apyókxoho apkelásenneykha apheykha nak néten, tén han ma'a aqsok sempelakkasso nak chá'a agwetak apkelane.

Proverbios 8:23

Nanók axta ko'o sélane, amonye' axta yaqwayam elának se'e nélwanmeygkaxa nak.

Isaías 10:21

Etnekxak sa' makham melya'ásseyam Dios ekha nak apmopwána apkeleymomap nak apqántawók ma'a Jacob énxet'ák apagkok.

Isaías 11:5

Exog sa' chá'a yetlo apcháhakkásamap ma'a aptémakxa ekpéwomo tén han ma'a amya'a ekmámnaqsoho nak, ektémól'a m'a nentétamáxchel'a.

Isaías 16:5

xama David aptáwen neptámen sa' etnehek wesse' apwányam, ekyennaqte apteme wesse' apwányam, ektaqmalma apwáxok. Etnehek sa' xama énxet segyekpelchémo meyke aptémakxa, ekha apcháyo, yaqwayam sa' elának ma'a aqsok ekpéwomo, ekmanyehe sa' nahan chá'a elánekxések ektémakxa apheykha m'a énxet'ák.

Isaías 26:12

Wesse', egméssegkek xép ektaqmalma negheykha; naqsók xép apkelane chá'a ekyókxoho m'a aqsok nenlanakxa enxoho chá'a.

Isaías 26:3

Wesse', eltaqmelcheshok chá'a exchep yetlo meyke ektáhakxa apwáxok ma'a melyenseyam nak chá'a apteme melya'ásseyam, hakte apcháyók chá'a exchep ma'a.

Isaías 28:29

Cháxa aptémakxa nahan elánekxak yaqwánxa etnehek ma'a Wesse' ekha nak apyennaqte. Yetneyk aqsok sempelakkasso nak agwetak ekxeyenma apwáxok elának ma'a, yetlo apya'áseykegkoho ekyawe nahan chá'a epenaksek apkelane.

Isaías 32:1

Etyapok sa' xama wesse' apwányam yaqwayam etneykha yetlo ekpéwomo aptémakxa tén han ma'a kelwesse'e apkeláneykha nak chá'a apkelókxa yaqwayam sa' eltemeykha chá'a apkelókxa yetlo ekpéwomo apkeltémakxa.

Isaías 37:32

hakte yetneyk sa' apkelheykekxa apqántawók ma'a Jerusalén; yetneyk sa' meletsapma m'a egkexe Sión. Elának sa' eñama ekyawe apkelásekhayo Wesse' ekha nak apyennaqte xa.

Isaías 53:10

Mékoho axta apkeltémok etnéssesek Wesse' egegkok apméssama aplegeykegkoho neyseksa apha m'a. Ahóxek sa' nahan katnehek apha eñama apmeyásamákpoho apagko' yaqwayam emátog ekyaqmageykekxa mólya'assáxma, kammohok sa' apkelwet'a m'a aptawán'ák neptámen nak; sa' kañék ekteyapma aqsok yaqwayam nak elának Wesse' egegkok xa.

Isaías 53:2

Apkeltémok axta exhok Wesse' egegkok ewanák apkeláneykha m'a ektémól'a pánaqte exnók kaxwe ekteyapmal'a, élatchesseyam la'a kepmenák ma'a ekyamakakxa xapop. Apsagkók axta m'a háwe axta apcheymákpoho méko axta m'a ektémakxal'a kélmámenyéhol'a kóllano';

Isaías 53:5

Nentémakxa ekmaso neykékhel'a keñamak kélyensáseykencha'a, nentémakxa élmasagcha'a neykékhel'a keñamak aplegeykegkoho ekmáske; egméssek meyke ektáhakxa egwáxok ma'a ektémakxa axta kéllegassáseykegkoho, apkelyense keñamak néltaqmelwokmo.

Isaías 63:16

¡Xép apteme negko'o egyáp! Mehẽlya'ásegkok eykhe m'a Abraham, megkaxénwakxók nahan negko'o apwáxok ma'a Israel, Wesse', xép apteme negko'o egyáp; nanók xép apteme sẽlwagkasso teyp.

Isaías 66:12

Hakte ektáhak ko'o sekpeywa s'e sektáha nak Wesse': Wának sa' ko'o káhapwak meyke ektáhakxa egwáxok ma'a ektémól'a kaxegmak ma'a yegmen ényé, tén han ma'a aqsok ekxámokma apagkok nak ma'a pók aptémakxa énxet'ák ektémól'a m'a yegmen ekyawél'a, ekteyapmal'a m'a neyáwa'. Sa' kalagkok kéltéyak kéxegke m'a, kalqeynmakha sa' nahan, kaláhapmakha sa' kaxnésha awáxok.

Isaías 7:14

Wesse' egegkok apagko' sa' egkések kéxegke xama aqsok yaqwayam megkólchenatchese': Lósók entáhak kelán'a étkok kótak sa' étche apkenna', kólteméssesek sa' apwesey Emanuel.

Isaías 8:18

Negko'o nenteme aqsok magkenatchesso sempelakkasso nak agwetak apagkok ma'a énxet'ák Israel, ko'o tén han ma'a étchek sélmésso axta m'a Wesse' egegkok, senteméssesso axta m'a Wesse' ekha nak apyennaqte apha nak ma'a egkexe Sión.

Jeremías 31:22

¿Háxko sa' ekwánxa katnégwók néxa kélweynchámeykha aqsa ektémól'a kélketche kelwána ekxegányam la'a? Élanak ko'o axnagkok aqsok keso náxop, ko'o sektáha nak Wesse': xama kelán'a ektaqmeleykha ekpeywa kalának xama énxet.”

Daniel 2:44

Epekkenek sa' xama apchókxa megkólmowána nak kólmasséssók ma'a Dios apha nak néten, neyseksa aptamhéyak apkelwesse'e apkelwányam xa apkelwesse'e nak, memek sa' xama enxoho m'a pók wesse', kamasséssók sa' ekyókxoho mók apkelókxa nak, megkamassegwomek sa'.

Daniel 7:14

Kélméssek axta apmopwána, apcheymákpoho tén han aptémakxa wesse' apwányam. Apyókxoho énxet'ák apheykha nak ekyókxoho apkelókxa tén han mók ektémakxa nak chá'a apkelpeywa axta aptamhágkok chá'a apkeltamhókxa axta etnahagkok. Megkamassegwomek sa' ma'a ektémakxa nak apmopwána, megkólmasséssemek han ma'a aptémakxa nak wesse' apwányam.

Hageo 2:9

Aptásók apagko' sa' etnehek se'e tegma appagkanamap nak, mexók sa' ma'a apmonye' apkelánamap axta. Keñe sa' ko'o wának keytek meyke ektáhakxa apheykha énxet'ák se'e yókxexma nak. Ko'o sekxeyenma xa, sektáha nak Wesse' ekha sekyennaqte.”

Deuteronomio 10:17

hakte cham'a Dios Wesse' kélagkok nak kéxegke apteme Dios Wesse' agkok ma'a ekyókxoho aqsok kéláyókxa nak tén han apteme Wesse' apagkok ma'a apyókxoho kelwesse'e apkelwányam nak keso náxop; apteme nahan Dios apwányam apagko', ekha apyennaqte tén han mageysso agè', metnéssesso nak han apyeykhamap pók elanok énxet tén han memà nak exkak ma'a aqsok kélmésso naqsa yaqwayam mexének ektemegweykmohoxma;

Jueces 13:18

Apchátegmowágkek axta Wesse' egegkok apchásenneykha: —¿Yaqsa ektáha apkeltamho nak ey'asagkohok sekwesey? Ekwányam agko' ko'o m'a sekwesey, megkólya'asagkehe'.