Isaías 66:5 - Biblia Enxet

⁵ Kóleyxho Wesse' egegkok appeywa, kéxegke kélyeheykekxoho nak chá'a appeywa: “Aptáhak apkelpaqmeta pók xam'a kélókxa xamo' apkeltaqnagkama nak chá'a kéxegke s'e, apkeltaqnaweykencha'a nak chá'a eñama kélxeyenma m'a sekwesey: ‘Wesse' egegkok sa' exekmósek apcheymákpoho; egmenyeyk negko'o agwetak kalpayhekxak apkelwáxok.’ Elmegqágwakxohok sa' eyke apteme nak apkelpeywa xa ektáha nak.

Isaías 66:5 ပူးပေါင်းရင်းမြစ်များ

1 Reyes 21:29

“¿Apwet'aya Ahab aptemessásekpoho mékoho nahaqtók ko'o? Magwahék sa' ko'o aqsok ekmaso apnámakkok ma'a apyennákxa nak makham, eñama aptemessásamap mékoho nahaqtók ko'o. Sa' eyke m'a apyennákxa enxoho makham ma'a apketche.”

2 Reyes 22:10

Apkeltennássek axta han Safán ma'a wesse' apwányam, apmésa xama weykcha'áhak ma'a apkelmaxnéssesso Dios énxet'ák apagkok Hilquías; apkelyetsetchessek axta han wesse' apwányam ma'a Safán.

2 Crónicas 34:27

apyelaqtéssek axta han apwáxok, apkelyahákxók axta apleg'a sekpeywa peya ko'o wanmexek se'e yókxexma nak, tén han ma'a apheykha nak ma'a, chaqhak axta han apwáxok aptémakxa nahaqtók ko'o, apkelyepteyk axta apkelnaqta, apkelekxagweyha axta han nahaqtók ko'o, cháxa keñamak sekhaxnawo nak aptáhakxa. Éltennássek ko'o exchep xa, ko'o sektáha nak Wesse'.

Esdras 9:4

Épetchegwa'akteyk axta ko'o apyókxoho m'a apkeye axta Dios nak Israel senlegassáseykegkoho, eñama melya'assáxma m'a apkelweykta axta makham kélnaqleykekxa axta megkatnahakxa apkelókxa; ekheyk axta eyke aqsa ko'o yetlo ekyaqhapmo ewáxok ekweykmoho taxnám ektekyómakxal'a aqsok kélnaqtósso.

Salmos 119:120

Kelpexyennegkek ko'o ekyókxoho émpehek seyeye nápaqto' xép, eyáyók ma'a apchánamakxa nak antéhek.

Salmos 38:20

Ekmaso chá'a apyaqmagkáseykekxak sekteméssessamakxa ektaqmela; élenmexeykekxeyk chá'a ko'o eñama séltémo alának aqsok ektaqmela.

Proverbios 13:13

Énxet melyaheykekxa nak chá'a kélpaqhetcháseykha, kaqhek sa' apwáxok natámen; exkak sa' eyke ekyánmaga m'a énxet apkelyaheykekxoho nak chá'a segánamakxa'.

Cantares 1:6

Nágkóllano aqsa ektémakxa ekpésyam émpehek, tén han ekwatno émpehek ma'a mayáhat. Etaqnagkamchek axta ko'o m'a élyapma, tén axta apkeltémo atnehek séláneykha m'a anmen yámet apkeneykekxa, ¡keñe maláneykencha'a m'a ektáha axta séneykekxa ahagko'!

Isaías 26:11

Wesse', appenchessek xép aptáhakxa yaqwayam ellegássesagkoho', makke elya'ásegkok ma'a; apkelwet'ak sa' agkok ektémakxa ekyawe apkelásekhayo exchep ma'a énxet'ák apagkok, elmegqeyk sa'. ¡Kamassessamho annal'a aplo xa énxet'ák nak!

Isaías 5:19

Kéxegke kélteme nak chá'a kólpaqmétek se'e: “Tásek sa' elának heykxe Dios ma'a aptamheykha apmáheyo nak elána', yaqwayam sa' agweta'; tásek sa' epekhaksohok elának Dios Appagkanamap nak Israel ma'a ekxeyenma nak apwáxok elána', yaqwayam sa' agya'asagkoho'.”

Isaías 60:15

Megkóltaqmopagkehek sa' chá'a kaxwo', megkóltaqnaweyxcheyk sa' nahan chá'a, megkólchexáyhek sa' nahan chá'a kaxwók kélxakcha'awo', megkamassegwayam kéleymáxkoho sa' ko'o atnéssesek kéxegke, kélpeykessáseykekxa chá'a apkelwáxok énxet meyke néxa.

Isaías 65:13

Cháxa keñamak aptáha nak appeywa Wesse' egegkok se'e: “Yetneyk sa' chá'a katnehek aptéyak ma'a séláneykha; keñe sa' kéxegke kóllegagkohok meyk élnapma; yetneyk sa' katnehek ma'a apyenéyak, keñe sa' kéxegke kóllegagkohok hem élnapma; kalpayhekxak sa' apkelwáxok ma'a, keñe sa' kéxegke kólmegqe';

Isaías 66:2

¡Ko'o ahagko' sélane ekyókxoho xa aqsok nak, axta keñamak élánteyapma! Ko'o sekxeyenma xa, sektáha nak Wesse'. “Énxet sekpasmomo nak chá'a ko'o, cham'a énxet apmopyósa nak ekyentaxnamo nak chá'a apwáxok apcháyo nak chá'a m'a sekpeywa.

Jeremías 36:16

Xama axta apkelleg'a, apkelanawók axta chá'a pók yetlo apkelyegwakto apagko', tén axta aptáha apkelpaqmeta s'e: —Tásek sa' óltennasha wesse' apwányam ekyókxoho xa.

Oseas 11:10

Enaqlakxak sa' Wesse' egegkok ma'a, keñe sa' éxwéwha m'a ektémól'a méwa. Éxwéwha sa', keñe sa' elyo'ótak yetlo apkelaye m'a ektáha nak énxet'ák apagkok, apkeleñama m'a ektaxnegwánxa ekhem.